الانسه كافvsالانسه كاف

 VS

بعد لن اعيش فى جلباب ابى!! اللى كانت برضه فيه مقارنه تجى تدوينه اخرلاى بفكره مشابهه

الموضوع ببساطه مقارنه بين روايه الانسه كاف تاليف مصطفى امين ذاك الكتاب اللى بيضم بين غلافه الاول والاخير ما يقارب من 964 صفحه كامله و هى ثالث اكبر روايه انا قريتها و اللى اكيد هيجى اليوم اللى هاحكى عن حجم كتبى عموما ذاك الكتاب اللى المفروض ادر من اخبار اليوم بما انها اكيد اولى بابداعات مصطفى امين اللى عاش ومات فى ترابها و اللى اغرب من كده ان النسخه اللى قريتها كان -عجبا- من اصدار دار الشروق صاحبه الاسعار الخرافيه و الطبعات الراقيه و الاختيار الاجمل فى الكتب ...غريبه صح؟؟!! عموما انا معرفش ايه هى الظروف و الملابسات اللى جرى فيها طبع الكتاب لكن خلينا نركز على النتيجه النهائيه اللى بتقول ان الانسه كاف صادره عن دار الشروق فيما معناه ان السعر عالى وان كالعاده هاقرا الكتاب pdf على اساس ان تهمه اختراق حقوق النشر اخف وطئه بالنسبه لى عن تهمه الجهل بعظائم الكتب ..تخيلوا تعذيب قرايه 964 صفحه وانا متسمره قدام الجهاز اللى اظن انتوا عارفين صعوبه اقتناصه من فم الاسد فى منزل فيه 4 اشخاص بيحبوا النت و الكل على جهاز واحد !! الجميل ان المعاناه دى كلها نتج عنها متعه برشاقه كتابه مصطفى امين و تسلسل احداث مرن لا يصيب الملل و لا يهبط مستواه الا فيما ندر .....


مقدمه طويله شويه لكن كان لابد منها ...الاول عرض الروايه ببساطه روايتنا بتتكلم عن "عادل" زير النساء اللى بيحب الستات زى الورد من غير تعلق باحدهن مهما بلغت جمالها او مكانتها و امكانيه الزواج بالنسبه له زى امكانيه انك تشوف ودنك من غير مرايه....وده اول ظهور لعادل فى الروايه فى احد الحفلات فى المجتمع المخملى راقى المستوى اللى غرضها الحقيقى هو الصيد ...هاهو المهندس "عادل علاء الدين" يظهر فى اول مشاهده يرتدى بدله رسمى سوداء و على شفتيه ابتسامه الصياد الماهر ...دى صوره من الكتاب 

و دى لقطه تانيه بتلخص ازمته و اعترافه بيها...

 

تانى شخصيه اساسيه هى شخصيه قسمت شاهين اللى هتتحول بفعل الظروف و ملابسات القصه الى الانسه كاف ...قسمت شاهين هى "الخنفسه " اللى وسط الجميلات اللى بتقابلهم عيون عادل ...و ها هو اول تقديم للقصه  لقسمت فى نفس الحفل و ها هو عادل يقترب منها لمجرد اغاظه الاميره شويكار التى فشل فى التقرب منها

كيف تتحول قسمت شاهين المسترجله خنفسه الحفلات الى الانسه الكاف الامليئه بالانوثه و الرقه و نبع الحنان المتدفق؟؟ كيف يتحول عادل علاء الدين الى عاشق و لهان؟؟ ها هو فحوى القصه ببساطه فى قالب درامى مليئ بالتفاصيل و الاحداث......عارفه انى احيانا مش بروى عطش معرفه القصه لكنى مش بحب حرق القصص عشان لما تقراها تستمتع بيها ايما استمتاع ...

و الان تتحول قصتنا الحبيبه الى مسلسل مشهور انتج عام 1981 بنفس العنوان و هو "الانسه كاف" ...اغرب ما فى المسلسل هو تبادل اولوليه الشخصيات فتحولت الشخصيات الثانويه فى الروايه الى شخصيات اساسيه و ابطال الممثليين و يتحول الشخصيات الاساسيه امثال "عادل" و "قسمت" لمجرد شخصيات ثانويه يظهروا كل كام حلقه!!! بل الاهم من ده وده هو تحول الاتجاه الاساسى فى القصه من مجرد قصه حب بفروع دراميه ثانويه عن التاريخ و الحركه السياسيه و يتحول كل ده الى قصه عن النضال السياسى ابان الاحتلال الانجليزى بخط درامى ثانوى عن الحب بين عادل وقسمت و خطط الاميره فضيله .....
مفيش حاجه تعبر عن قلب الخطوط الدراميه اكتر من المسموح به اكتر من تقسيم الادوار حجيث حصل كل الادوار الثانويه فى القصه على مساحه المسلسل الكبيره و ابطال الشاشه التليفزيونيه...بل ان شخصيه اخت عادل اللى مثلتها "ميمى جمال" شخصيه شبه مصنوعه حيث لم ترد فى القصه الاصليه اكتر من مشهدين....و توزيعه الادوار هم :  
 محمد وفيق في دور "شاهين باشا "
"عبد المنعم مدبولي في دور "عم عبدو"
كرم مطاوع في دور "المنشاوي باشا"
فيفي عبده في دور "نشوى عبدو الراقصة "
نوال أبو الفتوح في دور "سمو الاميرة فضيلة "
خالد زكي في دور "عادل علاء الدين "
عزه بهاء فى دور " قسمت شاهين"




و يبقى السؤال : الى اى حد يسمح لواضع السيناريو و الحوار التغيير فى النص الدرامى؟؟؟؟؟!!!!

امضاء 

د/دودى

مدونه رفايع..مجرد رفايع