الجمعة، 1 أكتوبر، 2010

على و نينو...

غلاف كتاب"على و نينو" 


قاعده ذهبيه بالنسبه للكتب او الافلام او اى عمل ادبى القاعده بتقول "لو العمل الادبى خلص سواء كان كتاب او فيلم او اى حاجه وبعد ما خلص بفتره لا تقل عن 5 دقايق كنت فيها speechless اى غير قادره على التحدث ولكنى بكون بقلب العمل فى دماغى استرجعه و ادقق فى تلميحاته يبقى العمل ده رائع " قاعده بسيطه لكن حقيقيه لكم لو الكتاب خلص و لقيت نفسى قايمه ادور على غيره يبقى الكتاب غير مبدع او ببساطه كتاب عادى ....اقدر اقول ان ده حصل فى كتاب النهارده "على ونينو" لمؤلفه قربان سعيد او اى كان اسمه لان ببساطه الاسم عليه كلام و كلام و حاجات زى ما بتقول ام كلثوم....


المصدر : اشتريته ازاى ؟؟ ببساطه جيبته من مكتبه اخبار اليوم اللى فى محطه مترو حسنى مبارك اللى هى محطه رمسيس كما اتفق المصريين ان يسموها ....رحت اقلب فى كتب اخبار اليوم على امل انى الاقى حاجه يكون سعرها معقول وذات قيمه للقراءه و الاهم من ده كله انى ما اكونش قريتها قبل كده لان جالى احساس ان كل الكتب الرخيصه و الحلوه قريتها تقريبا كلها او على الاقل مرت عليا من قبل و اصبحت للاسف المفاجات عمله نادره....و انا بدور فى اصدرات اخبار اليوم -الممله الى حدا ما لعدم صدور جديد- لاقيت ان المكمتبه بتعرض كتب اصدرات هيئه قصور الثقافه المحببه الى قلبى واللى مش بلقيها الا صدفه للاسف لعدم معرفتى مكان ثابت متخصص للكتب دى ...و انا بتفرج وبقلب فيها و وسط كتبر الشعر -اللى مش بحب اشتريها ابدا- وجدت قصتى النهارده "على ونينو" فى غلاف بنى مائل للبرتقالى و عدد صفحات 327 صفحه يعنى حجم متوسط و طبعه ظريفه انيقه و الاجمل جمله " السعر : جنيهان" على غلافها الخارجى و حاجه تانيه اكثر اثاره  و هى التقديم على صفحه الغلاف الخارجى من  ورا بكلمات مثيره تدفعت دفع لشراء الكتاب و دخول عالم الروايه الغامض : 
  " لهذه الروايه تاريخ غريب.فقد اظهرت للمره الاولى فى فيينا عام 1937 عندما تم اكتشافها فى احد اكشاك بيع الكتب فى برلين. وهى لكاتب اسمه الحقيقى "اسعد بيه" فر من بلاده بعد استيلاء السلطه السوفيتيه عليها..و كتب هذه الروايه بالالمانيه فى فيينا باسمه المستعار "قربان سعيد" ..تدور احداث الروايه فى باكو "اذربيجان" عشيه قيام الثوره البلشفيه فى روسيا 1917 حيث تلتقى "اوروبا المتقدمه" مع "اسيا الرجعيه" انذاك" 
كلمات مثيره صح؟؟ علاقه حب و ده واضح من الاسم الرومانسى فى بلد غريب و هو اذربيجان و هى البلد التى لم نعلم عنها سوى القليل فى زمن غريب حيث الحرب العالميه الاولى بكل ما تحتويه من تناقضات و مشاعر انسانيه و فوق ده كله روايه ضاعت سنين و سنين ثم تجدها مترجمه بلغتك بعد عصور من الضياع و كل ده ب 2 جنيه!!!!!! انها التوليفه السحريه لروايه تصلح للقراءه تخليك تركن كل اللى فى ايديك من كتب تانيه وتتجهه قلبا و قالبا لسبر اغوار هذا العالم......


الشخصيات :
شخصيات الروايه متباينه و مختلفه و هو ده اللى بيدى الاحداث قوتها فى بلد شديد التباين فى نسيجه ...


على: مسلم شيعى من اسره عريقه ضاربه فى جذور النضال و الحرب ...على ليس متزمت و لكنه قابل للعيش فى اى وسط  و ان كان يفضل الشرق و يشعر بشعور السمكه خارج الماء فى الغرب الخالص ...


نينو : فها هو وصف نينو بلسان على  فى احد المواقف " رايت وجهه نينو فى ضوؤ الشمس الغاربه .نينو كيبيانى اسم جورجى جميل من ابوين محترمين يعيشان عيشه اروبيه ..ماذا يعنى هذا؟ نينو شقراء لها عينيان قوقازيتان واسعتان داكنتان و ضاحكتان تحت رموش طويله و رقيقه ..تميز الجورجيات هذه العيون الحلوه المرحه لا تجدها فى وجهه بنت اخرى سواء اسيويه او اروبيه بجفون تشبه الهلال و وجهه يشبهه العذراء ..حزنت..احزنتنى المفارقه امام الرجل الشرقى مقارنات كثيره لكن هؤلاء النسوه لا يشبهن الا السيده مريم و هى رمز لعالم غريب و غامض "  ...نينو مسيحيه جورجيه من اسره عريقه و حامله لقب اميره...


و شخصيات اخرى ليست بالثانويه دائما فهى تلعب دور كبير و اساسى فى القصه .....
القصه بتمر باحداث كتير و بتنقلك نقلات ضخمه من جو لجو و من بلد لبلد تعيش فى اجوائها و تشم عبيرها بحرها و ببرودها ....اجمل ما فى الروايه انها رمزيه مشبعه بالاحداث فلا الاحداث واقعيه طاغيه بلا روح ولا الرمزيه مطلقه او مقحمه على الاجواء ولكن الحدث نفسه يقع فى موقع الرمز فتجد نفسك تلهث وراء الاحداث فى الصفحات و فى نفس الوقت متأملا للرمز و قوته.... 

التقييم : روايه جميله:)

امضاء :
د/دودى
مدونه رفايع...مجرد رفايع 




0 التعليقات:

إرسال تعليق

حلو؟؟ وحش؟؟ طب ساكت ليه ما تقول....