الأربعاء، 27 أكتوبر 2010

ابن عبد الحميد الترزى...



"ابن عبد الحميد الترزى ..البوم سينمائى ساخر بقلم عمر طاهر" هو ده اسم كتابى النهارده عدد صفحاته 175 صفحه  و من اصدار دار اطلس وابتديت فيه من حوالى ساعتين و خلص منى من حوالى 10 دقايق....الكتاب ده حواليه شويه ظروف مميزه بالنسبه لى اولا: انه اول كتاب ليا فى كتابات عمر طاهر خاصه و من قلائل الكتب اللى قريتها فى الكتابه الساخره عامه لاعتبارت خاصه بالنسبه لى من ضعف مستواها و تكرارها عاده من ناحيه و من غلوها المفرط من ناحيه اخرى و من قله عدد صفحاتها و هو عامل اضافى بيضايقنى فى النوع ده من الكتب  ثانيا : انه من اوائل الكتب اللى بقراها سلف من احد الاصدقاء نظرا لانى عاده انا اللى بسلف لكن المره دى بالذات كان الوضع مختلف نظرا لان تمن كتاب زى ده بعدد صفحاته القليل و بكاتبه حديث العهد يبقى ب 15 جنيه "بعد خصم 20% نظرا لعرض خاص كده فى المعرض اللى كنا فيه" يبقى افضل وضع فى hopeless case زى دى هو انك تحرض صديق على شرا الكتاب ده بداعى انك بعد كده هتبقى تبدل مقتينات من المعرض كتب صاحبك وهو ما كان الا من خدعه بسيطه هو انى روحت من المعرض بشنطه كنب و محاسبه على 15 جنيه برضه بينما صحبتى خرجت بكتاب واحد و محاسبه برضه على 15 جنيه....

الكتاب ممتع بصراحه "خاصه انى سلفاه لانى لو دفعت فيه فلوس كنت هتوقع منه مستوى اعلى كتير" بيتكلم عن السينما المصريه بشكل كوميدى ساخر ظريف عامل زى الكلام التريقه اللى بنتكلمه عن افلامنا القديمه و الجديده ...هو مش كتاب عميق قوى ولا ذو ابعاد و اغوار لكن كتاب بسيط بفكره واضحه من غير حلول لمشاكل و عموما الكتب الساخره بقت موضه قوى و على الاقل الكتاب مش تريقه فى السياسه ولا شتيمه فى مصر زى ما بنشوف اليومين دول او من كتب يوسف معاطى صاحب نظريه ست البيت اللى بتقلب الملايه فستان و الفستان القديم شربات و الشرابات لحتت للمطبخ بمعنى ان الافكار هى هى و يمكن المقالات نفسها هى هى احيانا فى جرنال و بعدين فى كتب و يمكن فيلم مما اضاف على القارئ عبء معرفه هى المقاله دى انا قريتها قبل كده فين؟؟ فوق مشقه هى المقاله دى حلوه ولا لا ....

كفايه بس انى اكتب لكم اسماء الفصول و انت تقدر كوميديه الكتاب:

1/كيف تعرف انك تشاهد فيلما من انتاج ما قبل ثوره يوليو؟
2/كيف تعرف انك تشاهد فيلما من انتاج من انتاج ما قبل ثوره يوليو؟
3/ ما بين النكسه و العبور (قائمه الشرف)
4/ كيف تعرف انك تشاهد فيلما من انتاج ما بعد انتصار اكتوبر؟
5/ كيف تعرف انك تشاهد فيلم من انتاج ما بعد اغتيال السادات؟
6/ كيف تعرف انك تشاهد فيلما من انتاج ما بين حرب الخليج و ظهور الموبايل؟
7/ كيف تعرف انك تشاهد فيلم دينى؟
8/ كيف تعرف انك تشاهد فيلم عن حرب اكتوبر؟
9/كيف تعرف ان كاتب الفيلم سيناريست مصرى؟
10/ كيف تعرف ان الاغراء فى سياق الدراما؟
11/ كيف تعرف انك تشاهد فيلما فى دار عرض مصريه؟
12/اهم 20 صديق فى السينما المصريه؟
13/ افضل 100 جمله سينمائيه يمكن كتايتها على مؤخره الميكروباص و التك تك
14/البدايه"جيل شكلها باظت"

- الفصل رقم 3 .ما بين النكسه و العبور (قائمه الشرف) هو اكتر فصل جاد و يمكن تحليلى فى تاريخ السينما فعلا.
- الفصل رقم 10 .كيف تعرف ان الاغراء فى سياق الدراما؟ ...بصراحه معجبنيش
- الفصل ال 12 و 13 اكتر فصول اعجبت بيها و بالتالى قررت اجيبب لكم الفصل ال 12 اهم 20 صديق فى السينما المصريه؟ بالذات لانه عجبنى بجد ....





عجبنى قوى بالذات شله فرقه رضا و جورج سيدهم فى "الشقه من حق الزوجه" و طبعا المبدع صلاح جاهين فى "اللص و الكلاب"....



* انا عارفه ان الكتاب يعتبر قديم شويه ويمكن ناس كتير قروه منكم فعلا لكن انا لسه قرياه النهارده بس و بما انى stock كتبى اوشك على النفاذ و مفضلش الا 12 كتاب جديد بس لسه مقرتهومش فشكلى اما هعتمد على السلف او هاعوز حمله شراء فى المرحله المقبله نظرا لان الكتب مبقاش فيها بركه و بقت بتخلص بسرعه.....

امضاء
د/دودى
مدونه رفايع...مجرد رفايع

4 التعليقات:

عماد هلال يقول...

اوعى توقفى stock لان احنا مستمتعين معك بهذه القراءات المختلفه والهامة- بالرغم من انها قرأة مستعجله- الا انها وجبة من الوجبات الجاهزة سابقة التحضير واحنا بنلتهم بلهنا والشفا.

متغاظ قوى من علامة السرية التى تظهر على شكل حروف لاتينية لاعادة الكتابة عند النعليق .

د/دودى يقول...

لا اطمن القرايه دى داء و ادمان اللى يجربها ميقدرش يسلاها.. و عموما خير ربنا كتير و الكتب متلتله على النت و فى مكتبتى الورقيه الزاخره بالاضافه لاهل الخير من الاصدقاء محبى الكتب ...

اما بخصوص حكايه الحروف دى فوالله ما اعرف بتتشال ازاى ..لو تعرف ازاى قولى عشان اريحكوا هو يعنى التعب هيفضل ورانا ورانا حتى على النت

سمو الامير يقول...

انا قرأت أغلب كتب عمر طاهر بس لسا مقرأتش الكتاب ده

فعلا كتبه مش عميقه اوي بس بيعجبني اسلوبه الساخر :)

د/دودى يقول...

اهو انت كده جبت زتونه الموضوع اى اصله فعلا هو ظريف لكن اتمنى منه عمق شويه عشان ميقعش فى فخ التفاهه

إرسال تعليق

حلو؟؟ وحش؟؟ طب ساكت ليه ما تقول....