الاثنين، 4 أكتوبر 2010

البرد و الطب و الخنزير!!!


عزيزى و عزيرتى قراء "رفايع" العزاز على قلبى دائما وابدا (ايه الكلام الكبير ده؟؟؟) تتحدث لكم دينا (اظن تكتب لكم تكون اوقع شويه!!) انا كنت باقول ايه قبل الاقواس ما تقاطعنى ؟؟؟ اه افتكرت ...تتحدث لكم دينا اليوم من بين الاغطيه و تحت مظله الادويه والشاى السخن ببساطه لاصابتى بذاك الفيروس اللعين ..نعم حضرات الساده انه الانفلونزا او يمكن يكون برد عادى لسه تشخيصى من قبل الدكتوره العظيمه -اللى هو انا- اللى فى سنه رابعه طب لسه ما موصلش....بس غالبا ده برد عادى ....

ايه اللى مخلينى اسيب المرض و اكتب فى المدونه دلوقتى؟؟؟ بصراحه عده اسباب : 

1- انى بعد فتره غيابى اللى قربت من 16 يوم قررت انى ماغيبش عن المدونه مهما كان السبب و كانت العوائق و بالتالى اى مكان يتوفر فيه نت مقدرش انى اتنحى مهما كانت الدوافع او العوائق...و بالتالى قررت انى ادخل واكتب جالسه على الجهاز بمنديلى و بطاطينى و سلطاتى وبابا غنوجى....

2- انى عجبا بعد ما وصلت لسنه رابعه طب فى جامعه عريقه زى عين شمس و على الرغم من اقتناص تلك الكليه اربع سنين من عمرى حتى الان...الا انى لسه معرفش اعالج نفسى كليا بل معظم خبرتى فى عالم البرد و الانفلونزا تاتى من العالم الواقعى حيث مجموعه البرد بتاعه الصيدليه ام جنيه ونص ..تلك الاقراص الصغيره المقصوصه فى كيس صغير بحيث انك مهما حاولت مترعفش اسم الادويه دى ايه لانك دائما هتلاقى حروف موجوده و حروف ضايعه و بالمناسبه دى كانت هتبقى لعبه حلوه قوى لمحبى البازل... الاسوء انى حاسه ان ال 7 سنين هيخلصوا و انا لسه مش فاهمه!!!!!

3- السبب الباقى هو خاطر جالى بين الصداع المصاحب للبرد و يمكن بين نوبات الحمى الخفيفه ..الخاطر بيقول احنا النهارده فى شهر اكتوبر لعام 2010 فماذا كان سيحدث لو جاء عزيزى البرد فى نفس الوقت من العام السابق المدعو 2009؟؟؟؟؟....فاكرين سنه 2009 السنه المدعوه سنه انفلونزا الخنازير .....اااااااااااه و ههههههههه مع بعض ده كانت الكليه اتقفلت فعلا الى اشعار اخر و حصلت حاله من الذعر فى الجامعه و يمكن يقفلوا الجامعه كمان-مع انى المسافه بينا قرابه ال 3 شوارع- و مع الهيصه دى كلها اظهر فى برنامج عمرو اديب "القاهره اليوم" و اطلع منه على منى الشاذلى "العاشره مساءا" و مش هارضى اروح مع معتز فى "90 دقيقه" عشان دمه تقيل و طبعا كانوا هيحطوا على عينى شريطه سودا بما انى اس الفساد عشان محدش يعرفنى و سمعتى تبوظ  او ميحطوش شريطه سودا بما انى وباء لازم الكل يبعد عنه والا الموت و الهلاك فى الانتظار...اه صحيح ده انا عضو دائم ومشترك فى مترو الانفاق يا سلااااام كمان كانوا هيقفلوا و كانت شركه ديتول هاتعمل شغل عالى قوى على حسى وتطلع كل المخزون القديم بتاعها عشان ينضفوا ورايا الفساد اللى بنشره فى العالم..........و بعد كل ده يطلع برد عادى جدا و الكل يطلع يشتم الوزير اللى مكبر الموضوع و مخوف الناس اونطه!!! 

اسيبكوا عشان اروح اعييا شويه واجى تانى....مخافوش كده الكتاب على النت مش معديه..... 

2 التعليقات:

سمو الامير يقول...

ألف سلامة عليكي يا دكتورة

ابقي طمنينا عليكي لما البرد يروح ان شاء الله

:)

د/دودى يقول...

الله يخليك ...البرد لسه قدامه شويه كمان بما ان كورس البرد اسبوع بالادويه و 7 ايام من غير ادويه...

إرسال تعليق

حلو؟؟ وحش؟؟ طب ساكت ليه ما تقول....