"بينى وبينك خطوه و نص...لا بتسلم ولا بتص ...اسئل عنا يا اللى هاجرنا...نعمل ايه لاجل انت تحس...تمشى ولاااااا......." اوبس انتوا دخلتوا عليا وانا بغنى على فكره او انا كالعاده سرحت مع الكيبورد....انا لسه راجعه من حفله حكيم اللى كانت بالظبط من "تنظر فى الساعه" اه كانت من 3 ساعات بالظبط من دلوقتى و ده عقبال ما روحت وركبت مواصلات و منهم فتره ليست بالقليله فى محاوله فتح ذلك الجهاز الملعون الذى يدعى جهازى التعبان جدا.....اتبسطت؟؟؟ الاجابه بصراحه ااااااااه اتبسطت جدا.....اتضايقت؟؟؟ الاجابه بصراحه ااااه اتضايقت جدا ....من غير ما تكشر و تسال نفسك انا اجاوبك عزيزى القارئ -لو كنت موجود اساسا-......اتبسطت؟؟...طبعا جدا كمان بصراحه اتحاد الجامعه عامل شغل عالى قوى يعنى لما يجيبوا حكيم فى الجامعه ببلاش بمسرح جميل باضواء و مكان مفتوح ...و حكيم النهارده كان ملعلع جدا " زى ما بيقولوا" بجد كتله حماس ونشاط 3 ساعات غنا من غير تعب او حشرجه وبنقاء وجوده صوت كانه صوت استديو بل واجمل و اكثر حماسه...حكيم الظريف اللى ولع الحفله بحماسه وصوته الواضح بلا اضافات الاستديو و برقصه و كانه عنده 20سنه ...حكيم البسيط اللى كل ما طلبنه منه اى اغنيه سواء بالاعاده او اغنيه معينه كان بيسمع كلمنا كانه صديق من سنين...حكيم اللى غنا كتير و كل اللى نفسنا فيه من قديم وجديد و اغانى الفيلم وكله بصراحه...حكيم اللى اصلا بحبه و كانت متعه انى استمتع بيه و غريبه ان الجمهور كان حافظ كل اغانيه من غير ولا اغنيه غريبه او مخفيه فى وسط الالبوم زى ما بيحصل مع مطربين تانين...حكيم اللى ممكن جدا يكون جاى ببلاش فى الجامعه مش زى اخينا التانى المخفى اللى مش بيظهر غير فى مارينا او عالاقل فى استاد القاهره....حكيم اللى امتعنى النهارده و كان قطعه سكر فى يومى المرير......
مش عارفه ليه الناس مستغربه انى بحب حكيم؟؟!!! ليه يعنى عشان بحب اقرا؟؟ عان بحب موسيقى فرنساوى؟؟ عشان بحب الافلام الاروبيه؟؟ عشان فى كليه الطب؟؟ عشان اغنيتى المفضله "حانه الاقدار" لام كلثوم؟؟.....كل ده ميمنعش انى بحب السعاده والفرفشه و المرح و الحاله الشعوريه اللى بتجيلى لما بسمع حكيم.......
ده بالنسبه لانبسطت اه.....اما بالنسبه ل اتضايقت ؟؟ اه فده موضوع يمكن بعيد شويه لكن ملح فى الوقت الحالى....
اتضايقت؟؟؟ طبعا اه...اتضايقت من الحاله المزريه اللى وصل ليها شبابنا ...الشباب اتهبلوا ولا ايه؟؟ تحرشات و معاكسات عالمكشوف كده؟؟؟ طلبه جامعيه من كليات المفروض انها محترمه و للاسف معظهم تجاره واداب وحقوق....و بتحرشوا بمين؟؟ بطالبات جامعيات برضه بصراحه حاجه تكسف بجد على الحاله الزفت اللى وصلنا ليها دى......يعنى انت سايب كليتك او بيتك و جاى مخصوص عشان تضايق بنات الناس ولا جاى تستمتع و تقضى وقت لطيف؟؟!!!!....اوعوا حد يقولى ان البنات هما السباب وانهم هما اللى بيدفعوا الشباب لكده لان مش ده اللى بيحصل لان البنات اللى فى دماغكوا دول الشباب بيخاف يقرب منهم بالعكس دول بيستغلوا البنات البسيطه ذات المظهر العادى اللى مش هتعرف تدافع عن نفسها او هتخاف من الفضيحه والاستغاثه بالاخريين....
ملحوظه كده على جنب: انا مش بتهم الكليات دى بعدم الاحترام او بتهم شبابها لان برضه من اللى شوفته النهارده شفت نماذح حلوه قوى من نفس الكليات...بما انى كنت لوحدى بما ان اانا واصحابى تهنا فى الحفله او تفرقنا لاسباب مختلفه و ابتدى اللى حواليا يضايقونى على الرغم من ان كعب جزمتى ال 10 سم كان بيقوم بالواجب من حيث هرس رجل من يقترب و رفض انى اخلى جد يبوظ متعتى عليا فتوليت الاهتمام بنفسى والدفاع عن موقعى المتقدم بالكوع والخبط لو عاز الموقف الا ان شله بنات و ولاد معرفهومش لما لاقونى واقفه لوحدى لاقيتهم بينادوا ويقولوا اقفى معنا عشان محدش يضايقك...الشله دى كانت 3 ولاد و بنتين الولاد عاملين شبه كردون عشان محدش يضايق اصحابهم والغريبه انهم وقفونى معاهم و سط البنات و اصبحت الحمايه مشتركه بعد التعرف طلعوا اولى و تانيه حقوق وتجاره ....بصراحه اتسعدت قوى ساعتها لانى حسيت ان البلد لسه فيها شباب جدع و رجاله وسط العيال و الفرافير....
امضاء
د/دودى
مدونه رفايع...مجرد رفايع
2 التعليقات:
لأ .. لأ .. مدونتك شابه وجميله ومتحرره - بالمعنى الحلو للتحرر - مدونه اكتشاففففف ، وديما للامام
عماد هلال
احب ارحب بيك فى رفايع اولا و ابدى اعجابى المتبادل بمحتوى مدونتك اللى بجد انا من متابعيها لجديه ما تقدمه....حظك انك تبدى معايا بالتدوينه دى بذات يمكن لانها فعلا متحرره شويه بس انا لما جيت امبارح من الحفله حسيت ان السكوت مش هو الحل .... مناقشه المشاكل اكيد افضل على المدى البعيد....
اهلا بيك
إرسال تعليق
حلو؟؟ وحش؟؟ طب ساكت ليه ما تقول....