الأحد، 7 نوفمبر 2010

تبيع صاحبك بمليار دولار؟؟!!

The Social Network 2010

 
http://www.imdb.com/title/tt1285016/


You don't get to 500 million friends without making a few enemies


سلوجن الفيلم ده حقيقى بشكل بشع .....فيلم الفيس بوك  اللى قلب الدنيا و انتظره الجميع خلصته بالظبط من 12 دقيقه و بالتالى احداثه لسه فريش فى دماغى...شفته فين ؟؟ فطبعا عالكمبيوتر فى صوره ولا احلى و لا الحوجه الى سينما سيتى ستارز ذات ال 50 جنيه غير التيبس من عينه "كل سنه و انتى يا طيبه يا انسه " صحيح ضميرى بيأنبنى على سرقه الملكيه الفكريه ببلاش و بمناسبه قريت فى مدونه سكندرى تدوينه جميله قوى عالموضوع ده هتلاقيه 
هــــــــــــــــــــــنـــــــــــــــــــــــــا  و بصراحه انا بتوجع شويه لما بدفع فلوس فى السينما بذات و يطلع الفيلم فاكس اما لما بيكون ببلاش بيبقى الوقت بس هو اللى راح بدل من الفلوس + الوقت ما يضيعوا اونطه.....قد تكون القصه تيبكال من حيث النجاح الساحق من الا شئ عشان يحسرك على حياتك البائسه اللى بتزرع فيها الارض جوافه و تطرح جميز و تفضل تذاكر طب 7 سنين و بعدين 3 ماجستير يليهم 5 دكتوراه ثم يحكم عليك مريض انك "دكتور حمار" كده بمنتهى البساطه بينما  بطلنا عمره كله 18 سنه و قفش من عمله للفيس كام مليار على قلبه بلا مجهود يذكر....لكن المميز فى الفيلم هو صراحته الوقحه ايوه الوقحه اللى طلعت الجميع طماع و الجميع عايز حته من التورته الكل عايز حته منك و الكل بيتبع اسلوب "اعطينا مما اعطاك الله" ....فى القصه الواقعيه دى مفيش للتسامح او الايثار مكان فالكل يتبع مبدأ "يلا نفسى" يمكن لان القصه واقعيه جدا و بالتالى مفيش شخصيات ملائكيه و اخرى شيطانيه فى ارض الواقع القصصى لان تابوهاتنا الدراميه -اللى لازم تتكسر بقى- بتصنف البشر كقسمين بلا وسط فالبطل اما طيب حبوب ظريف لطيف لو سرقت من جيبه يبستم لك او شرير شيطان رجيم لو امه هتموت على كوبايه ميه يستخسرها فيها اما فى فيلمنا فلا فالشخصيات انسانيه حقيقيه فتاره كده و مره كده و هو بين ده و ده الدنيا كده.....

السؤال اللى بيطرحه الفيلم: انت ممكن تقول و تقتنع من جواك و ليس نفاقا انك مش ممكن تبيع صاحبك ولا ب 100 مليون جنيه ....ممكن جدا يكون الكلام ده صح و فعلا مش تهويش لكن السؤال الاصعب اللى اتوضع فيه بطلنا فى الفيلم ده : هل تبيع صاحبك ب مليار دولار؟؟؟ الاجابه عن السؤال ده فى الفيلم بيتجاوب بطريقه انسانيه لا دراميه مش بطريقه زكى رستم فى رصيف نمره 5 ولا بطريقه حسين صدقى بمثالياته فى كل افلامه تقريبا.......
 
بيزنس از بيزنس و الفلوس بتغير النفوس هو شعار الفيلم الحقيقى......

ملحوظه كده على جنبك: الفيلم خلانى اقفش قوى عن الفيس و ابتديت اكرهه......

4 التعليقات:

سكندري يقول...

ايه ده ياجدعان
دا أنا متصيت علي النت و تدوينتي أشتهرت أهو
هيه هيه هيه
كويس أنا التدوينة بتاعتي عجبتك
تدونتك حلوة جداً ، و مع اني لسه ما شفتش الفيلم بس شكله فيلم حلو
يا ريت لو رابط للتحميل بقي يبقي كتر ألف خيرك
و الفيس بوك أدمان
ما بعرفش ابطله مش هتضحك عليكي
بس أنا مش ممكن ابيع صحابي اللي بحبهم و بشاركهم أحزاني و افراحي ولو بمليار جنيه
في نفوس أغلي من أل فلوس
دي الخلاصة
ور بنا يوفقك علي الدراسة و ووجع القلب ده

د/دودى يقول...

اه صحيح نسيت خالص اقولك انى هاستعير تدوينتك اصلها بصراحه عجبتنى قوى لانك ما اخدتش التيار المهاجم كالمعتاد لكن خدت وجهه نظرنا احنا اصحاب المنفعه و المتعاملين اليومين مع القضيه ضد اصحاب الرأى التقليدى اللى عايزين فلوس على الهوا اللى بنتفسه عشان حقوق الملكيه...

اما الفيس فده ادمان حقيقى ليك و للناس كلها ...

اما المليار دولار فمبلغ مغرى بصراحه بس جنه من غير ناس متنداس...

اما تحميل الفيلم فهتلاقيه هنا
http://forums.myegy.com/thread105596.html

سكندري يقول...

كويس ان التدوينة د ي عجبتكم
أصل في ناس كتير انتقدتني زي ما شفتي في تعلقات المدونة بتاعتي و في الموضوع المنقول عند نور
بس بصراحة قلت لو دخلت في جدال أكثر من اللازم مش هنسلم من الموضوع ده و كل واحد برضه في الاخر هيفضل واقف عند رأييه
فقلت ده رأيي اللي هعمل بيه اللي عاجبه اهلاً و سهلاً و اللي مش عجبه مافيش مشكلة
و اختلاف الرأي لا يفسد للود قضية
و بالنسبة للفيلم هنزله و اشوفه أن شاء الله

د/دودى يقول...

اصل موضوع حقوق النشر ده قلق و حقل الغام فكرى لازم عشان تدخلع تكون مستغنى عن عمرك

إرسال تعليق

حلو؟؟ وحش؟؟ طب ساكت ليه ما تقول....