محاكمه كافكا



روايه "المحاكمه" لكاتبها و مؤلفها الاكثر غرابه و يأس فى العالم او على الاقل مما قرأت ....احم احم اقدم لكم سيداتى سادتى قرائى رفايع كاتبنا الاغرب و الاكثر تأثيرا نعم يا سياده القراء انه هو كافكا.....

ما اظنش انى هاعرف الكاتب مش لانه معروف قوى يعنى -وهو كذلك فعلا-  لكن لانى مش بحب و سورى فى اللفظ "استغبى" القارئ بتاعى  و انقل له من ويكبديا بطريقه copy & paste  لانك بما انك هنا فى مدونه شبه ادبيه يعنى حتى لو مكنتش محب للادب فعلى الاقل بتعرف تستخدم جوجل و بالتالى لما هتحب تعرف مين كافكا هتدور و تعرف مش محتاجه فتاكه يعنى...و عموما هو كاتب تشيكى و بمناسبه هو يهودى و النقطه دى استفذت القارئ و الناقد العربى على السواء و للاسف ان بعض ناقدينا اتكلموا زى القارئ العادى و حبوا و كرهوا بدل ما يقوموا بشغلهم و يوضحوا من زاويه ادبيه مع ان كافكا مات سنه 1924 يعنى قبل الصراع العربى الاسرائيلى يبدأ اصلا ....

من قراءتى المحدوده لكافكا و اللى هاكملها فى تدوينات تانيه ان شاء الله و اكمل تفصيص باقى اعماله اللى قريتها و لسه بقرا فيها اتأكدت من مقوله ان كافكا هو رائد الكتابه السودوايه فعلا او احيانا بيقولوا عنها الكتابه الكابوسيه لانها بتعيشك فى كابوس لا منطقى حيث الاشياء مرعبه و خطيره حبث لا رحمه ولا مرسى لا عنوان و لا ميه للعطشان و تهت بين السما و الارض يا انسان على رأى الاغنيه...عندما تدخل روايه كافكا فانت لا تتمنى ان تكون احد ابطاله مش لانك هتكون تعيس زى روايات ديكنز او حيران زى روايات دستوفيسكى او بطل مغوار زى مسرحيات شيكسبير او فلسفى زى اعمال ديديه لا للاسف مع كافكا انت بطل بلا حصان او حتى ارض من تحتك لكن هتلاقى نفسك اشبه برواد الفضاء حيث ال لا جاذبيه و بالجاذبيه هنا اعنى المنطق لا للاسف انت هتكون كأنك فى كابوس من اسوء كوابيسك بالظبط حيث مش بس اللا منطق لا و كمان مصايب الدنيا تتوالى فوق دماغك بلا رحمه ولا هواده.....لعلك تسأل نفسك طب و ايه اللى هيزنقنى انى اقرا التعذيب ده كله اقولك معرفش لكن اللى يقرا كافكا ميقدرش يسلاه يمكن لان لا منطقه ممتع فى حد ذاته و بيفكرك بكوابيسك "ترفع كتفتها فى حيره" معرفش لكن يجوز.....

مهم قوى انك تقرا كافكا قبل ما تكرهه او تكون فكره مسبقه من كلام النقاد اللى احيانا بيكون ظالم...و بالتالى كانت تلك بدايه حكايتى مع كافكا اللى ما اظنش انه هيخرج بره قائمه افضل 10 كتّاب قريتلهم يمكن لتميزه و يمكن لاسباب غير معروفه....اه بالمناسبه حاجه كده على جنب و لو انها مش هتفيد القارئ فى حاجه : ابتدى اسم كافكا ينط فى دماغى لما كنت فى رحله الاقصر و اسوان السنه اللى فاتت تبع الجامعه و بينما كنت فى اتوبيس متوجهه من اسوان الى الاقصر "و هى المسافه اللى قدرتها ب ساعتين على الاكثر فاذا ب حرف عطف كلمتى الاقصر و اسوان تضم 5 ساعات من التعذيب الخالص فى الاتوبيس" المهم و انا فى السكه و كعادتى ابنديت اكون صداقات فاذا بى اقابل بنوته ظريفه لطيفه اظنها من طالبات الطب او الاداب بصراحه مش فاكره لنتحدث عن الكتب كالعاده و ابتدى الكلام عن "الملهاه الالهيه" لدانتى و كان كتاب مشترك احنا الاتنين قريناه و ابتدى الكلام و فى وسط الكلام كده قالت لى : قريتى ل كافكا ؟؟  فاذا بى اقع فى معصيه الكذب للاسف و اجيب ب انى سمعت عنه بس....و بعد منزلت مصر"على اساس انى كنت فى مدغشقر"قررت ابحث و انقب الى وجدت تلك التحفه الفنيه المدعوه كافكا فكان اكتشاف بحق....شكرا ليكى يا صديقتى التى لا اتذكر اسمك......

كل ده انا كنت بحكى فى كافكا نفسه و لسه مدخلتش فى روايتى النهارده "المحاكمه" و فى بعض الترجمات تسمى "القضيه" ذات ال 248 صفحه طباعه الاهرام اللى قبلتها بعيبها ك pdf على لاب توبى العزيز ....

س : تعمل ايه لو صحيت الصبح لاقيت نفسك مقبوض عليك و الادهى انك مش بس متعرفش ايه هى تهمتك ؟؟؟لا و كمان انت مش بتسأل حتى؟؟؟ تعمل ايه لو رحت عشان يتحقق معاك لاقيت المحكمه عباره عن اوضه فوق السطوح؟؟؟؟ طب لو سلمت انك بقى لك قضيه ايه هى الاجراءات اللى لازم تعملها؟؟؟ و الاهم من ده كله هل البراءه ممكنه؟؟؟ و ان لم تكن ممكنه فايه هى العقوبه المتوقعه؟؟؟

ج : اقرا الروايه و انت تعرف...يمكن تفضل مستغرب على طول و تتسأل هى الناس دى بتعمل ايه و محدش متعرض ليه؟؟؟ لكن هتظل اسير عالم كافكا الاسود القاتم كابوسى الطبع فاقد للمنطق احيانا و للمعنى احيانا...

حته كده على جنب : نهايه الروايه مفأجاه فى حد

* و كنوع من التشجيع على انك تقرا الروايه لو كنت مقرتهاش قبل كده ... دول اول 3 صفحات من الروايه:



كافكا