الجمعة، 26 نوفمبر، 2010

المسلمانى و أنا....



لعلك تتساءل ايه الاهداء اللى فوق ده؟؟ و مين اللى جنب احمد المسلمانى مذيع "الطبعه الاولى" ؟؟؟؟


اجابه السؤال التانى ابسط و اسهل فى الاجابه حيث هتاخد كلمه واحده بينما اجابه السؤال التانى هتاخد باقى التدوينه....


فاما مين اللى جنب احمد المسلمانى فى الصوره فهى ببساطه و وضوح : أنــــــــا


اما قصه الاهداء فعلى الرغم من خصوصيتها الا انى مش عارفه ليه عايزه احكيها و اكتبها على رفايع يمكن لاكتسابها الحقيقيه و تدوينها فى مذكراتى الاون لاين....


فى اجازه نص السنه السنه اللى فاتت لما كنت فى سنه تالته -وهى تتميز بالمناسبه هى و خامسه اصعب سنين الطب و اسأل من ورايا لو عايز تتاكد- قريت اعلان من اتحاد الطلبه فى الكليه عن ان الكليه عايزه تنفصل عن راديو الجامعه "ستار" و تنشأ راديو خاص لكليه طب عين شمس اسوه بكثير من الكليات اللى حبت يبقى ليها صوتها الخاص اللى تعبر فيه عن نفسها بحريه و خصوصيه......


و بعد كثير من التردد و القلق نظرا لانى مانضمتش لاى نشاط طلابى لغايه سنه تالته باستثناء معسكرات و رحلات الكليه كالعاده و بعد مناوشات و مناقشات مع العائله قررت انى ادوس و خلاص  و اخش بقلب جامد و فعلا قدمت الابليكشن.......


و جاءت الخطوه التاليه لما عرفت ان فى انترفيو عشان اقدر انضم ليهم...مكدبش عليك انا قلقت نظرا لانى عندى مشكله ما فى موضوع الانترفيو و الشفوى و الحاجات اللى من النوع ده و بتسبب لى توتر و قلق  و اظن ان ده حال كثيرين و كثيرات مما يشعروا بالقلق و العصبيه من المقابلات المباشره ...سبب رئيسى فى كده احيانا بيكون خوف من الاحراج او عدم القدره على اظهار افضل ما فيك و بالتالى رفض طلبك مما يشعرك بالاحباط.....


و حدد للانترفيو الساعه 11 صباحا فى الكليه فى مكان محدد مسبقا و كعادتى فى حبى للحضور مبكر فكنت فى المكان المقرر الساعه 10.30 صباحا و جبت معايا جرنال "لوموند دبلوماتيك" للتسليه و عشان اكمل جرنالى المفضل لانى عارفه انى بروح بدرى و ان عاده صاحب و محدد المعاد بيروح متاخر كالعاده......تيك توك تك توك تيك توك تيك توك الساعه بقت من 10.30 الى 11 و مشفتش حد فى المكان فهل اخطأت المكان ام الزمان؟؟؟ عموما لسه بدرى......تيك توك تيك توك الساعه بقت 11.30 و برضه مفيش فايده...على 12 الا ربع ابتدى الناس اللى المفروض يتعمل معاهم الانترفيو يهلوا تباعا تباعا و على اقل من راحتهم....ابتديت اتصل بالمسئولين و ابتديت ازعق لرؤساء المستقبل عبر الهاتف.....على الساعه واحده و نص كده ابتدى الانترفيو فعليا و طبعا فى مكان غير المكان....


و ابتدى الانترفيو فعليا ...و كان كل اللى جايين على لسنهم كلمه واحده "انا عايز ابقى مذيع" او "انا مش عايزه اكون معده ولا مخرجه يا اذيع يا بلاش" ......اما انا وحدى انا بشوف الحزن مدارى ورا الضحكه اللى فى عينكى و بسمع فى رنين صوتك شجن اقصد انى انا وحدى تقدمت لشغل وظيفه الاعداد لانها فى رأيى الطف و اهم....


و اتقبلت فعلا كمعده.... و للمفاجأه لاقيت نفسى مذيعه!!!!! نعم هو ده اللى حصل لاسباب مختلفه منها حماسى الغير طبيعى و احيانا المبالغ فيه لفكره برنامجى اللى كنت ناويه اعده بس و مع الشغل حبيته و اتمنيت انى انا اللى اقدمه لانى حسيت ان مفيش حد يقدر يعبر عن كلامى و فكرتى غيرى ...و بالفعل بقى ليا برنامجى لمده ساعه و يدعى "ساعه اغانى مخــــتــــــلـــــفــــــه جداااااااا" و تقال بهذه الطريقه و بقيت مطالبه باعداد و تقديم حلقه اسبوعيا لمده ساعه فى راديو الكليه طبعا بعد فتره تدريب طوووووويله قاربت من الشهر كان فيها كلاااام كتير و توسيع مدارك و تكوين صداقات دامت كثيرا كثيرا....

و اتت الحلقه الاولى فحققت نجاح كبير و كانت فقرتى عن الرائعه فيروز و جبت ليها اغانيها المختلفه بس يعنى الاندلسيات و القصائد و اغانى زياد الرحبانى و قالوا ان اختياراتى كانت جيده صحيح اول مواجهه ليا مع الميكروفون كانت مرعبه حقيقه و طلع صوتى متردد شويه و سريع حبتين لكنه اتصلح بعد كده مع الحلقات ....

اما الحلقه التانيه فكانت مفاجأه بحضور / احمد المسلمانى الى مقر الراديو البسيط للغايه و اجريت صديقتى نورا فى الفقره اللى قبلى على طول حوار مطول و رائع مع المسلمانى اعجبت بيه للغايه حيث الصراحه و السياسه و عدم رهبه او خوف نورا - وهى اصغر اعضاء الراديو لانها كانت فى سنه اولى وقتها- من المسلمانى رغم هيبته....

و جاءت الصوره اللى كانت فوق دى بعد خروج المسلمانى من الاستديو فاصريت على انى اخد صوره معاه للذكرى و لانى كنت معجبه بيه جدا لصراحته و اصراره على الحق و هو النجم المفضل ل ماما اللى متبعاه حلقه بحلقه و وصتنى بانى اسلم عليه لما اشوفه مع انى اتكسفت اقوله "ماما بتسلم عليك" نظرا لاحراج الجمله.....

يذكر ان الراديو استمر للحلقه السادسه فقط ثم توقف للامتحانات ثم توقف تماما لاجل لم يسمى بعد......


امضاء
د/دودى
مدونه رفايع ...مجرد رفايع

4 التعليقات:

ماشي بنور الله يقول...

احمد المسلماني المفروض هو اللي ياخدمعاكِ صورة للذكري!
فيبدوا انك ستنافسيه بقوة في المستقبل القريب
بسم الله ما شاء الله
مستقبل واعد دكتورة دودي
وفكرة المدونة جميلة جداً

د/دودى يقول...

اشكرك على المجامله الظريفه ...اتمنى يكون فى مستقبل اصلا واعد بقى مش واعد بس يكون موجود و هى ليست بالامنيه السهله اليومين دول....

نورت رفايع....وعلى فكره واحه الافكار بقت جميله قوى اليومين دول

سكندري يقول...

هو مين اللي جنب الدكتورة دودي ده؟ ... شكله مش غريب عليا
مش ده مذيع برضه (: (: (:
تدوينة جميلة مليانة حماس ... أتمني لك التوفيق في حياتك الإذاعية و الطبية و يا رب دائماً من نجاح إلي نجاح

د/دودى يقول...

الله يكرمك يا رافع معنوياتى ....

إرسال تعليق

حلو؟؟ وحش؟؟ طب ساكت ليه ما تقول....