الاثنين، 29 نوفمبر 2010

عيل صغير عمل صوبعه كده مسدس


عيل صغير عمل صوبعه كده مسدس و قال لصاحبه طريخ طراخ
قام صاحبه طوعه و ساقله فيها و عمل له ميت و اهله قالوا ده طخوا طخ


هو ده حال الانتخابات فى مصر اليومين دول...كأنه فى ديموقراطيه و كأنه فى حريه و كأنه مفيش كوسه ....و بما ان الحكومه بتستعبط و بتقول ان صوتى هو اللى هيحدد النتيجه مش ال تييييييييت اللى بيعملوه بعد ما اللجنه تتقفل فقررت انى انى استعبط انا كمان و اروح ارشح و اهى تبقى تجربه جديده و اولى ليا ....

و بالفعل رحت مع ماما بما انى امى مثقفه و حبت تعلمنى الحياه السياسيه و تبطلنى سلبيه - او هكذا قالت- و بالفعل رحنا اللجنه و هناك فوجئت باننا الوحيدين اللى معانا بطاقه انتخابيه بلونها الاحمر المميز و الكل بيدور فى كشوف بالالف على اسمه و الغريب ان الكل بيشتكى من  انه مش عارف يدخل مع ان مع البطاقه الانتخابيه الموضوع ابسط بمراحل....

اغرب حاجه شوفتها هى سياسه التحالفات ...احنا فى ديرتنا شبرا الخيمه تانى النائب الحالى عمال هو جمال شحاته و ده اخوانى و النائب الفئات ه د/جمال زهران و ده معارض سياسى مشهور و مشاغب سياسى من الدرجه الاولى...فاذا بى افاجئ ان الدعايه مبينيه للنائب الاخوانى بان انتخوبنى عمال و انتخبوا الحزب الوطنى فئات!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
يعنى عنده يحط ايده فى ايد الحزب الوطنى -عدوه اللدود- على انه يحطها فى ايد نائب مستقل ليبرالى...
و الاغرب هو احساس ان انتخابك له واجب دينى و هو فرض عين و ليس فرض كفايه....

انا انتخبت مين؟؟؟ فى الفئات انتخبت المستقل المعارض المشاكس د/جمال زهران -اللى ما اظنش انه هيكسب السنه دى- اما العمال فمخترتش مرشح الحزب و لا مرشح الاخوان و قررت اشتت صوتى فى اى حد مستقل غيرهم...

فاذا كان امامى الاخوان او الحزب الوطنى فقط ....فهبطل سياسه احسن فهم احلى ما فيهم مر....

اه بالمناسبه دى صوباعى مغموس فى الحبر الفوسفورى كنوع من الفضيحه عشان الناس تعرف....

عيل صغير عمل صوبعه كده مسدس و قال لصاحبه طريخ طراخ
قام صاحبه طوعه و ساقله فيها و عمل له ميت و اهله قالوا ده طخوا طخ

امضاء
د/دودى
مدونه رفايع...مجرد رفايع

5 التعليقات:

غير معرف يقول...

عيل صغير عمل صوبعه كده مسدس و قال لصاحبه طريخ طراخ
قام صاحبه طوعه و ساقله فيها و عمل له ميت و اهله قالوا ده طخوا طخ

ياااااااااه انا فاكر اني سمعت البتاعة دي قبل كده بس مش فاكر امتا وفين !!!!!!!!

بتيجي ف دماغي بألحان شبه بتاعة ثلاثي أضواء المسرح

أما بالنسبة للانتخابات واللي حصل فيها فالسينهاريو كان متوقع من زمااااااااان


للأسف

غير معرف يقول...

انا شايف ان الانتخابات بصورة عامة غير صالحة لإفراز العناصر الصالحة من المجتمع
فدائما يستغلها اصحاب النفوذ والسلطة والاغراض الشخصية
ولكنني في النهاية اضطررت للذهاب للجنة الانتخاب
وذلك(( حتي لاأزيد الطين ...))

د/دودى يقول...

بص يا سمو الامير الاغنيه دى كانت اول حته من اغنيه اشرف عبد الباقى فى فيلم رشه جريئه....

عجبنى موقفك يا ماشى بنور الله حتى لو احنا معترضين او حتى حاسيين ان التزوير هيحصل فمينفعش اننا نبقى سالبين و منروحش

عماد هلال يقول...

.كأنه فى ديموقراطيه و كأنه فى حريه ، وكأن فيه انتخابات ، وكأن فيه نظام واعلام وكلام فارغ والسلام
وكأن فيه تعليم ومدارس كمان ، وكأن الصحة تمام
هذا هو المنهج التلفيقى الذى نحياه والسلام ختام .

د/دودى يقول...

و كأننا ....و كأنه....و كأنها....و كأنهم...هى دى الحياه السياسيه اليومين دول و الايام القادمه

إرسال تعليق

حلو؟؟ وحش؟؟ طب ساكت ليه ما تقول....