امسكت بالريموت كنترول باحثه عن اى شئ غير السياسه التى احرقت دمها كالشمعه فى يوم من ايام قطع الكهربا الصيف اللى فات....قررت ان تستبعد ايضا البرامج الرياضيه بسبب "فرش الملايه" المستمر او بالالفاظ اكثر احتراما تراشق الالفاظ بين القنوات...سألت امها سريعا : هو النهارده ايه؟؟فكان الرد بتاريخ اليوم مزودا بيوم الاسبوع , فكان كل ما التقطته اذنها انه ليس الجمعه او السبت و بالتالى فبرنامجها الوحيد المفضل بتقديم الدكتور باسم يوسف ليس اختيارا و ذيلت الجمله ب "للاسف" .....
سألتها اختها الصغيره عن معنى اسم سلسله الافلام ....مترديه عباءتها السينمائيه شرحت بان الفعل see بمعنى يرى ....له فعل ماضى بسيط و اضافت موضحه "تصريف ثانى" و هو saw ....ختمت كلمتها الطويله بذكر عدد مرات رؤيتها للفيلم ...
و حين تم سؤالها عن ارتباط الرؤيه بالفيلم ...صرحت بكل ثقه: لان الراجل اللى بيبلس وش بيراقب الناس و هى بتتعذب و كمان بيخليهم يشوفوا بعض وهما بيتعذبوا ...و بالتالى فالفيلم كله متعلق بالرؤيه ...و اردفت فى رأيى ان اسم الفيلم ده عبقرى فى حد ذاته لانه اسم غير مبتذل و يحتاج ذهن لفهمه
جلست مستريحه تشاهد الفيلم مبتسمه فاذا بالبطل يصرخ : the saw made this ...و جاءت الترجمه : لقد فعلها المنشار ....
و كأن هذا المشهد جاء كهديه ملفوفه من السماء صرخت اختها : ايه ده saw هنا بمعنى منشار مش بمعنى الرؤيه ...امال انتى بتفتى فى ايه؟؟
تسونامى فكرى على ذهنها ....هل كانت تشاهد كل هذا العدد من الساعات دون ان تعرف اسم الفيلم؟؟!!!
و جاء السؤال الاهم فى ذهنها دون اجابه : امال هو اسمه منشار ليه؟؟؟!!!
و بدلا من التفكير قررت ان تشاهد ذلك البرنامج السياسى المستفز فحرقه الدم لا تنتهى...ولا مهرب
1 التعليقات:
... ???
خااااالف تعرف
إرسال تعليق
حلو؟؟ وحش؟؟ طب ساكت ليه ما تقول....