بس يا سيدى و رحت العياده الخارجيه!!

معادنا الرسمى: 9 صباحا بالظبط (طبعا ده المفروض)...و بما ان المفرود عند المكوجى فقررت ان اروح متأخره 20 دقيقه بحالهم لعلى لا انتظر كثيرا......


الزمان : 15 مارس 2012
المكان : قسم الكلى بكليتى المصونه (طب عين شمس)




لان قرارى كان بالتأخير تلت ساعه فقط ,كان واجب على ان اقوم ببعض التضحيات حتى لا تزيد تلك الفتره الى ساعه مش تلت ساعه....و كان القرار ب"الشعبطه" فى اى ميكروباص و السلام و قد كان انى قضيت ساعه الا ربع من البيت الى الكليه نصى جوه و نصى حرفيا فالشارع, بالظبط زى وضع اى صبى ميكروباص مكنش ناقص غير انى اهتف : عتبه عتبه عتبه....


وصلت فعلا 9:20 دقيقه بالظبط....و كالعاده كنت برضه الاولى فى الحضور.....اكتمل العدد عن الساعه 10 برضه كالعاده لكن لا تنخدع فالدكتور المكلف ايضا بالشرح لم يأتى ....الوقت مهم فى كل حته الا مصر


من 9:20 الى 10:30 خلصنا انا و اصحابى كل الكلام....سياسه و اتكلمنا ,كوره و شجعنا, اخوان و شتمنا , عرسان و شكينا , امهات و حكينا .....و فى النهايه جاء الدكتور الصغير معلنا عن ان اليوم هو "يوم العيادات الخارجيه" ....مازالت مقتنعه بان الدكتور لجأ لكده لكون الدكتور مجاش لكن دعونا لا نتتهم الناس زورا...


اكمل الدكتور بان تقسيمه الطلاب على العيادات مع الدكتور حسين فى "الكليه الصناعيه رقم 1" ...بعد تقصى اكتشفنا انه مكان فالدور الثانى.....رحنا هناك و سألنا عالدكتور قالت لنا الدكتوره ببساطه مطلقه : دكتور حسين فى الكليه التانيه ...هههههههههه مش عارفه ليه الحته دى بتضحكنى ....


شفنا التقسيمه اكتشفنا ان كل 5 هيكونوا مع بعض فى عياده....ناس عياده قلب ناس اعصاب و هكذا...و طلعت انا عياده الروماتزم ...ابص يا ابنى على ال4 اللى معايا اكتشف ان كلهم غياب !!!!!....كل الناس ماشيين خمسات خمسات الا انا ماشيه لوحدى


الاول قلت اروح مع ناس اعرفهم وحده العلاج الطبيعى و خلاص...فؤجئت بالمكان مليان اجهزه و الدكتور بيقول لنا : العبوا !!!!!....العب؟؟!! هو انا جايه هنا عشان العب على اجهزه المرضى زى العيال ؟؟!!


هنا قررت ان استجمع شجعاتى و اروح عياده الروماتزم لوحدى و ليكن ما يكون.....


دخلت العياده لاقيت 2 دكاتره females كبار قاعدين كلا منهما على مكتب ....و جنب كلا منهما دكتور نائب اصغر و دكتور امتياز ...و بالفعل الدكتوره الكبيره قعدتنى جنبها على يمينها عشان اتعلم براحتى....


العيان يدخل ....يتكلم مع الدكتوره و يعرض لها حالته ...تسأله اسئله بالعربى و بعدين تترجم لى معنى اللى قالته طبيا بالانجليزى عشان افهم....تدخل تعمل فحص اروح اقف جنبها عشان اتابع بنفسى....يرجع المريض المكتب تكتب له الدكتوره العلاج ...يخرج المريض تشرح لى بالانجليزى التشخيص و العلاج و تفهمنى .....و فضلنا على كده 5 حالات ثم انتهى اليوم ,,,شكرت الدكتوره اللى للاسف معرفتش اسمها على اليوم الجميل و خرجت.....


قلت اروح مع صحابى فى عياده الاعصاب اتفرج على نظام العيادات الاخرى......


رحت اتخضيت ..مفيش دكاتره كبار تماما لان كلهم فى عيادتهم الخاصه...10 دكاتره كلهم نواب صغيرين هما اللى بيشخصوا و يعالجوا ....حواليهم 20 دكتور امتياز اسفه فى اللفظ "بيعكوا" فالمرضى...حواليهم 30 طالب بيرغوا او بيحاولوا يركزوا و يفهموا حاجه لوحدهم من غير مساعده......الدكاتره و الطلبه قاعدين و المرضى واقفين ؟؟!!!!......صراخ و زعيق و صوت عالى و كأنك فى مولد.....


و انا اللى كنت فاكره ان اللى انا كنت فيه ده الطبيعى .....اللى اتعملته فى اليوم ده ان الموضوع حظ يا اما تطلع فى دكتور طيب يحب يعلمك يا تقف فى وسط المولد تدور على نفسك.....