السبت، 17 ديسمبر 2011

علاء مات!!

اخر كلماته عالفيس


علاء مات....مش علاء مبارك هو اللى اتضرب بالنار فى دماغه فى الشارع...اللى مات علاء عبد الهادي صاحب ال23 سنه ...اللى مات علاء عبد الهادي دفعتى :"((...علاء عبد الهادي خامسه طب عين شمس دفعتى.....علاء عبد الهادي اللى اتضرب بالرصاص الحى...علاء عبد الهادي اللى كان فى المستشفى الميدانى بيحاول يعمل اللى عليه على الرغم من قله خبرتنا الطبيه....علاء عبد الهادي اللى عيد ميلاده بكره مااات.....


المره دى مختلفه معايا...اول مره ابكى على شهيد بجد دموع حاره ....اول مره احس احساس اهل الشهداء اللى قلبهم محروق من غير ما يتاخد حقهم....المره دى دفعتى...اه مكنتش اعرفه شخصيا لكن اكتشفت ان اصدقائنا مشتركين ...المره دى مختلفه لانها قريبه منى قوى


مش متخيله اننا دخلنا الكليه مع بعض..قضينا خمس سنين مع بعض...بس هو اتخرج النهارده من مسجد النور مكفن بدلا من ان نتخرج معا...


المره دى حاسه بثأر شخصى...علاء مش اول شهيد لكنه مختلف بانى اعرفه ممكن ميكونش سبب مميز ليك لان مع الوقت تحول عدد القتلى الى مجرد عدد ...قلبى مش هيصفى من الجيش المره دى...المره دى ثأر شخصى


كان مع علاء صديق دفعه اخر محمد نزيه اللى اختفى فجأه و موبايله اتقفل...و كان نفسى تتفرج على منظر قلق الدفع من -حسب تعبيرهم- حرقه قلب تانيه و شهيد تانى ....و لما اطمننا عليه انه بخير و موبايله فتح اتشهدنا ...صحيح الحرج ملمش لكننا بالتاكيد مكناش ناقصيين...




http://www.youtube.com/watch?v=J3WlB07gwFM


التفاصيل المتتابعه موجعه بشكل غريب...اصر عميد كليتنا الدكتور الكفراوى على حضور تشريح علاء -على حسب تعبيره- عشان حقه ما يضعش...والده علاء اللى جت من طنطا بتسأل سؤال واحد محدش عارف يجاوب عليه : هو مين اللى قتله ؟؟


كان فى مسيره النهارده بعد الدفن راح فيها اصدقاء كتير لكنى للاسف مقدرتش انزل لظروف عائليه....لكنى هاعوضها فى وقفه صامته بكره بالملابس السوداء فى الكليه هتكون اول اشتراك ليا حقيقى فى اى شغل الارض بس لانها المره دى مختلفه ...المره دى الثأر شخصى



الله يلعن ابو المجلس العسكرى و المجلس الاستشارى و مجلس الشعب و مجلس الشورى و المجلس المحلى .....و اى مجلس بيموت شاب زى الورد فى اول عمره:(



8 التعليقات:

ابراهيم رزق يقول...

رحمة الله عليه نفس اللى حصل للشيخ عماد انا اعرفه و اتكلمت معاه كتير لكن اول مرة اعرف اسمه لما استشهد

دينا استفسار هى الوقفة بتاعة بكرة مقتصرة على الطلبة فقط او ممكن تسمحوا بحد معاكو يا ريت تردى عليا

تحياتى

AHMED SAMIR يقول...

الله يرحمه
و يحرق قلب كل من احرق قلب والدته عليه
في الجنة ان شاء الله

نيسآان يقول...

الله يرحمه ويجعل مثواه الجنه.

عبد الرحمن سالم يقول...

رحمة الله عليه :(

غير معرف يقول...

يسقط يسقط حكم العسكر

Sara يقول...

البقاء لله يا دينا

حاسبي على نفسك

و ان شاء الله حقه هيرجع تالت و متلت

اخبار الرياضة يقول...

الله يرحمه ويسامحه ويسامحنااااااااا

أع ـقل مـ ج ـنـونــة يقول...

وجعتي قلبي :(
ربنا يرحمه ويرحم كل الشهداء
وناخد حقهم بقققي

إرسال تعليق

حلو؟؟ وحش؟؟ طب ساكت ليه ما تقول....