الثلاثاء، 6 ديسمبر 2011

دينا انتى مش معتزه باسلامك

"دينا انتى شكلك كده مش معتزه باسلامك"....كانت تلك اخر جمله فى النقاش بينى و بين صديقه عزيزه لى , و لنفهم فى اى مناسبه قيلت تلك العباره ...stop...نرجع الشريط لورا من بدايه الحديث و احكم انت....


بدأت المناقشه بينى "ليبراليه الى حدا ما"...و صديقه 1 بدون ذكر اسماء عشان متزعلش "اتجاه اسلامى سلفى غالبا"...صديقه 2 "وسطيه عموما و مش بتحب تتحيز لرأى مسبق"....كان الحوار بعد انتخابات الجوله الاولى عن الاحزاب و اتجاهتنا خاصه اننا كلنا مرحله ثالثه و عندنا وقت نفكر ...


انا : بعض النظر عن اتجاهات الحزب ده او ده لكنهم كلهم بيتكلموا فى المواضيع الغلط, ستات ايه و حجاب ايه اللى شغالين دماغنا و دماغهم بيهم فى حاجات اهم محدش جايب سيرتها اصلا و الاعجب ان الناخب مش بيفكر حتى يدور عليها


صديقه 1 : زى ايه يعنى؟؟


انا: مثلا الاقتصاد...لو حبايبنا الحلوين -اقصد الاخوان و السلفيين- مسكوا البلد هيطبقوا الرأسماليه مثلا و لا الاشتراكيه و لا مكس؟؟..مش حد يقولنا الاول و بعدين نقرر ننتخب مين!!


صديقه 1: هيطبقوا الاقتصاد الاسلامى طبعا ..


انا : و ان شاء الله بقى الاقتصاد الاسلامى يبقى ايه؟؟


صديقه1: اللى هو الاقتصاد على طريقه شرع ربنا من غير ربا ...ايه مش عجبكوا شرع ربنا


انا: انتى هجيبى لى مصيبه !!....انا بسأل مجرد تساؤل المره دى ...الاقتصاد الاسلامى ده يطلع ايه؟؟


صديقه 1: ما قلت لك "بعصبيه"


انا : "امعانا فى الغلاسه" ايوه اللى هو يطلع ايه؟؟ يعنى مثلا الدوله هيكون ليها دور فى وسائل الانتاج ولا لآ؟؟ ...السوق هيكون حر ولا عليه قيود؟؟...الضرائب متصاعده و لا موحده؟؟..الدوله هتدعم  السلع ولا لا؟؟...هنخصص اللى عممناه و لا هنعمم اللى خصخصناه؟؟..يعنى مثلا الديموقراطيين و الجمهوريين  مقطعين بعض مناقشات عشان مختلفين فى نسب الضرائب ده اللى انا اعرفه مش لمجرد انى مش موافقه على رأيك ابقى غلطان او كافر ..انا شفت كل حاجه فى برامج حبايبنا الحلوين الا الموضوع المهم اصلا.....و الاهم من كل ده السياحه اللى بتجيب ربع ايراد البلد هنولع فيها بجاز ولا بسولار ؟؟


صديقه 1: تغور الفلوس اللى من حرام ....انا مثلا ليا صديقه اجنبيه عايشه فى السعوديه لما كانت بتمشى فى الشارع سافره قبلها واحد و قال لها احتشمى يا مره...فعرفت ان تقاليد البلد كده و بقت بتلبس النقاب و هى ماشيه فى الشارع...


انا : "بعصبيه متزايده" مش من حق حد يجبر حد على حاجه حتى لو كانت صح...


صديقه 1 : انا بقول ان السايح اللى جاى يجى بأدبه ...انتى عارفه ان الشباب بيروح شرم مخصوص عشان يتفرجوا على البنات


انا : و هل معنى كده اننا نحرم نفسنا من مليارات الدولارات و ملايين فرص العمل لمجرد ان شباب قليل الادب مش عارف يمنع نفسه من الطفاسه...و ببساطه اللى هنشيل من قدامه الغلط على الشط هيدور عليه عالنت ببلاش و بالتالى الفكره اصلا غلط....و برضه انا مصره على الغتاته هو النظام الاسلامى الاقتصادى اللى بيقولوا عليه يطلع شبه انهى اقتصاد عالمى اشتراكيه ولا رأسماليه؟؟


صديقه 3: اظن ان النظام الاسلامى شبه الاشتراكيه اكتر...


انا: انتى كده واخده رأى احمد شوقى : الاشتراكيون انت امامهم لولا دعاوى القوم و الغلواء...بس انا دايما بحس ان الاسلام اميل الى الرأسماليه بدليل ان الاسلام كان بيشجع على فرديه التجاره و عمرنا ماسمعنا عن مصادره اموال فى الاسلام


صديقه 2: انتوا عارفيين ان دكتوره عند اختى فى الجامعه بتقولهم ان النظام الاسلامى هو الانجح عالميا


انا: "فى اصرار" اللى هو يطلع ايه؟؟...كلكوا عايزين تطبقوا نظام من غير ما حد يقولنا خطوات النظام ده على الارض ايه ..ان الطريق الى الحجيم مفروش بالنوايا الحسنه


صديقه 2 : طب انتوا عارفين ان بره بيطبقوا النظام الاسلامى و احنا لا...


انا : فين النظام الاسلامى اللى مطبقاه امريكا و اوروبا ده؟؟!!!....


صديقه 1 : النظام الرأسمالى اللى عجبك ده وقع امريكا ...


انا : يعنى اسم الله احنا اسياد العالم فى الاقتصاد....و بعدين استنوا هى امريكا مطبقه الرأسماليه عشان كده فشلت ولا مطبقه النظام الاسلامى عشان كده نجحت؟؟...ايه التناقض ده, احنا مديين نفسنا اكبر من حجمنا الحالى...


صديقه 1 : "بعصبيه" دينا انتى شكلك كده مش معتزه باسلامك......


------------------------------------------------


زى ما انت شايف ابتديت المناقشه فى الاقتصاد و انتهيت بشتيمتى كالعاده ....انا ملاحظه ان المدونه تحولت من سجل لافكارى لسجل للاهانات اللى بشربها من حبايبنا الحلوين...


متفهمنيش غلط انا مش ضد الاقتصاد الاسلامى ولا معاه ببساطه عشان محدش فاهم اللى هو يطلع ايه....انا نقلت لكم المناقشه دى بذات عشان تتخيل شكل البرلمان الجاى و كميه الاهانات اللى هتسمعها

22 التعليقات:

faroukfahmy يقول...

للاسف يا دكتورة الغالبية مش فاهمه حاجه فى اى حاجه
عاملين زى الواحد التايه عن عنوان ولما يسأل واحد من اهل الحى (زى حكاية مناصرى الاسلام) ويدعى معرفته بهذا العنوان حتى لا يوصف بالجهل وعدم المعرفة ويرشده الى مكان آخر مما يزيد من توهانه
هكذا حالنا ندعى معرفة ما نجهله ونتجاهل ما نعرفه لنرضى الآخرين
ربنا يستر عليتا يا دكتوره من المرحلة القادمة

ابراهيم رزق يقول...

ههههههههههههه
صلى على النبى زيدى النبى صلاه
عيسى نبى موسى نبى و كل من له نبى يصلى عليه

تقدرى تدرسى يا دكتورة فى الكلية عندك منهج بدون تطبيق هم كذلك يجعلونا فئران تجارب

عندما تقول لهم اى نموذج ستطبقوه الصومالى او الافغانى او الماليزى يقولون لك نظامن مختلف
و بيفنوا فى كل حاجة
بكار او بوجى المتحدث الاعلامى بتاعهم بيقول لخبير فى السياحة تعالى عندى و انا افهمك و انتوا بتشتغلوا بعشوائية
و الفنادق الاسلامية بتكسب
طب يا عم ما مطاعم الكباب بتكسب لكن عشان الكباب بيكسب نحول مطاعم الفول و الطعمية و الكشرى و الكبدة و البيتزا الى مطاعم كباب
من جهله لم يصل الى ان تسويق اى سلعة يعتمد على التعدد
و بعدين افرضى انا عايز انزل البحر مع زوجتى و اولادى هينزلونى ازاى هيعملوا لكل واحد شاطىء منفصل متر فى متر
شكلنا داخلين على ايام ؟؟؟؟؟؟؟؟؟؟؟؟؟؟ بيضة
و بعدين انتى مش معتزة اكيد انت مش معتزة
انتى انتى انتى انتى دينا

تحياتى

Bent Men ElZman Da !! يقول...

هو كل الاحزاب اصلا مهتمين بالشكليات وحاجات تافهه بالنسبه لحاجات كتير اهم للبلد
الموضوع مش مختصر فى حجاب وميوهات وشرم والسعوديه
واللى عندهم استعداد يختاروا التيارات الاسلاميه ايا كانت هى ايه
مش بيفكروا فى كده
بيفكروا فى انهم اكبر كيان منظم دلوقتى
مش مهم بقى هيعملوا فينا ايه بعد كده والا هيجربوا فينا انهى نظام بالظبط

Ms Venus يقول...

حافظين مش فاهمين

الله يعينك يا دينا

هبة فاروق يقول...

دول ناس معقدين سيبك منهم ..والحوار معهم عقيم
قولى كل اللى فى نفسك ولا تخشين لومه لائم
تحياتى

AHMED SAMIR يقول...

اعاني في الفترة الاخيرة مثل ما تعانيه تماما من مناقشات مع السادة مؤيدي التيار الاسلامي السياسي و الذين يعتبرون اية محاولة للاعتراض هو بمثابة خروج على الدين او في افضل الاحوال هو تدين منقوص
و لأني ليبرالي...و لأن الليبرالية اليومين دول سمعتها مش ولابد..
كان لزاما علي ان اكتب موضوعا عن ليبراليتي اللي اؤمن بها و التي لا تتعارض مع الاسلام اطلاقا
فكتبت موضوعا بعنوان عن الليبرالية التي اعرفها
في مدونة الاغلبية الصامتة
اعتقد انه موضوع سيهمك كثيرا و ياريت اعرف رأيك فيه
تحياتي و احتراماتي

Sara يقول...

بالظبط كدا يا دينا :)

مفيش حد فاهم حاجة و كله بيتكلم و بيألف

يا جماعة طب اشرحوا لنا وجهة نظركم ؟!

مفيش فايدة ...و يطلعوك في الآخر كافر !

حسبي الله و نعم الوكيل

Tarkieb يقول...

كان في واحد عنده خراج ومش بيخف وكل الدكاترة كانت بتكتبله مضاد حيوي وبرضه مانشفش....راح واحد كتبله عمل وبعدها خف الناس استعجبت وراحت فتحت الورقة لقت مكتوب فيها حزب النور والحرية والعدالة هما الحل.....راحوقال ونعم بالله حنتخب النور ونجيب الشحات يمسكنا ويطلع يكسر الاثار المشركة وينضف البلد من الفجر .....وراحو للراجل اللي كتب العمل انتخبت مين يا شيخ قال الثورة مستمرة طبعا هو انا اهبل ...قالو امال كتبت ليه حزب النور والاخوان يا وحش...ضحك وقال دول نشفو الثروة والخير والحرية في غزة وقندهار والصومال والسودان مش حينشفو خراج؟

فافى يقول...

دودى:
صديقتك متعصبه جدا وواخدهانطباع مسبق بدليل انها قالت لك ايه مش عجبك شرع ربنا ؟؟
عموما الفتره الجايه هاتخدى من ده كتير وبكره هاتقولك ثكلتك أمك :)
على فكره العصفورهاللى انتى حطاها فى المدونه دى خيلتنى

د/دودى يقول...

faroukfahmy : و اهو كله توهان فى توهان ...لان عندنا كلمه معرفش عيب

د/دودى يقول...

ابراهيم رزق : عليه الصلاه و السلام...الاهم انهم لسه مخدوش اغلبيه و ابتدى الزن عالودان

د/دودى يقول...

Bent Men ElZman : الغريب ان المضار من تعطيل السياحه بيديهم صوته و مريض الكبد اللى محتاج نقل اعضاء بيدلهم صوته و عجبى

د/دودى يقول...

Ms Venus : بس احن مش هنبصم على حاجه من غير ما نفهم

د/دودى يقول...

هبة فاروق : بس تعبت يا هبه من الشتيمه ومن المناهده كتير و اكتر حاجه من احساسى المتزايد ان مفيش فايده

د/دودى يقول...

AHMED SAMIR : قريت مقالك المميز و هى فعلا الليبراليه العاديه اللى كلنا مقتنعين بيها ببساطه محدش هيتحاسب على اخطاء حد و انت حر ما لم تضر

د/دودى يقول...

Sara : عارفه يا ساره لو الموضوع مناقشه عاديه عين بعين و رأى برأى مكناش زعلنا بس زى ما فينوس قالت هما حافظين مش فاهمين

د/دودى يقول...

Tarkieb : هههههههههههه حلوه و جديده

د/دودى يقول...

فافى : معظمهم كده ..و المناقشات دى بدأت معايا اصلا من زمان بس هستمر بقوه

دعاء العطار يقول...

" سئل الشيخ الشعراوى يوما !!
لماذا لا ينتمى إلى حزب دينى ؟؟
فأجاب ..لأن الأنتماء إلى حزب دينى ليس من ركائز الأسلام ولا يضر إسلامى شىء..
إن لم أنتمى إلى هذا الحزب فأنا مسلم قبل أن أعرفكم ..
وأنا مسلم قبل أن تكونوا حزبا .. وأنا مسلم بعد زوالكم ..
ولن يزول أسلامى بدونكم..
لأننا كلنا مسلمون وليسوا هم وحدهم من أسلموا ..
أننى أرفض أن أنتمى لحزب يستجدى عطفا مستندا على وازعى الدينى
قبل أن يخاطب عقلى ..
هو حزب سياسى قبل أن يكون دينا..
وهو يمثل الفكر السياسى لصاحبة ولا يمثل المسلمين ..
وقال أيضا .. أتمنى أن يصل الدين إلى أهل السياسة ..
ولا يصل أهل الدين إلى السياسة..
فإن كنتم أهل دين فلا جدارة لكم بالسياسة..
وإن كنتم أهل سياسة فمن حقى أن لا أختاركم ولا جناح على دينى.. "

لخص الحكايه كلها .. انا بزعل لما بيتم الربط بينهم وبين الاسلام ... الاسلام اكبر من انه يكون شخص لان فى الاول والاخر الشخص بيغلط ... طب ياااااااااريت الاسلام هو اللى يحكم بس انهى اسلاااااام ؟

ياريت نلاقى حد زى سيدنا محمد فى سماحته " ولو كنت فظاً غليظ الفلب "

يااااريت نلاقى زى ابو بكر فى حكمته

يااااااريت نلاقى زى عمر فى عدله وعبقريته

لو اضمن ان اللى يحكمنالاسلام صححححح ... فيااهلا بيه لكن للاسف معنديش ثقه

دمتى بكل الخير :)

عبد الرحمن سالم يقول...

ربنا يعينك يا د/دينا.. أعتقد إن الحوار ده يلخص مشكلة أي واحد (ممكن تقول عليه ليبرالي) بيحاور أي واحد (ممكن تقول عليه سلفي)، الحكاية مش مجرد تعصب لأجل التعصب، لأ ده تعصب + إقتناع تام، وده بيطلعلنا حاجة أكتر قوة بكتير من التعصب.. معرفش إسمها إيه بصراحة.

تحياتي :)

Umzug Wien يقول...

مع الاسف ... وبلا اى تجريح ..
واضح انها مخاوفك انت ىالشخصية من التيار اللى ظاهر على الساحة السياسية اعنى الاخوان والسلفيين ...
ومع كل التقدير لكِ ...
خلينى ااقولك ... بلاش نفرض اى سوء ظن .. لان الموقف اللى ذكرتيه مش مقياس ابدااااااا
لكنه بيحصل .. وهيحصل ... ولكن
خلى عندنا امل ان الامور قد ما تسوء وقد ما نختلف مع بعض
الهدف فى الاخر واااااااحد هو بلدنا .. وبرلمان يفهم نفسيتنا ويقدم لنا قوانيين عادلة و جادة

غير معرف يقول...

ههههههههههههههههههههههههههههههههههه بصي ما ادام عاوزة تفهمي تبقي ف نظرهم مش معتزة باسلامك .. اي حاجة ف اخرها اسلامية تبقي حلوة .. حتي لو قالولهم خمرة اسلامية هيشربوها و يقولو حلوة :D

إرسال تعليق

حلو؟؟ وحش؟؟ طب ساكت ليه ما تقول....