الاثنين، 5 ديسمبر 2011

هو ده معنى الوطن







لن ابدأ مقالتى عن الوطن بالاشكاليه القديمه على طريقه محمد فؤاد: يعنى ايه كلمه وطن؟؟ نشع الرطوبة فى الجدارو لا شمس مفرقة برد النهار و لا أمك .. و لا أختك و لا عساكر دفعتك و الرملة نار....






و على الرغم من اعجابى بعمر خيرت الا انى مش هعبر عن مصر على طريقه ان فيها حاجه حلوه ...فن سيما و غنا و تياترو حفله تلاته فى سيما مترو ..

لن استخدم طريقه يعنى ايه كلمه وطن...يعنى واو و طه و نون...واو دى واحه, طه دى طيبه , اما نون دول ناس بلادى اللى يتحدوا الزمن

لن اعدد لك الاشياء الصغيره على اعتبار انها وطن ..مش هاقولك ان مصر عندى يعنى لما تلاقى خناقه قامت فى الاتوبيس فى ثوانى و تجدها قد انطفئت فى لحظه بايفيه او نكته تسكت الجميع ليبدؤا فى الضحك....

مش هاعبر عن وطنى بانه مجرد احساسى بالسعاده لما الاقى شاب وقف فى اتوبيس بياخد رحلته فى ساعه ليقف على قدميه فى الزحمه فقط ليسمح لسيده "فى سن امه" بالجلوس وسط جو يشجع الملائكه على الانانيه...

برضه الوطن مش مجرد ريحه الفول و الطعميه الساعه 6 الصبح ايام الشتا ...ولا هو جارتك المسيحيه اللى بتجيب لك كحك فى عيدهم ...لا اعلم لماذا حين يقولوا مصر ام طرحه و جلابيه اتخيلها بوجه مريم العذراء ..

مش هاسمح لنفسى بتقليص الوطن فى علم بثلاثه الوان اقف امامه متراخيه باثار النوم فى عينى بمدرسه ثانوى ...احتضنه بقوه و اقبله حين يضع ابو تريكه الجون فى ماتش نهائى افريقيا...اكفن به شهداء سقطوا من اجلى حريتى -انا- التى لم و لن يعرفوها...اراه من بعيد على سفارتى فى بلد بارد فاشعر بالدفء....


صلاح جاهين , ابراهيم اصلان, بليغ حمدى, الخال الابنودى, الست ام كلثوم,الخطيب,صلاح عبد الصبور,طه حسين,محمد قنديل,انيس منصور

الوطن صحيح كل دول لكنه كمان المكان الوحيد فى الكون اللى تستطيع ان تقول من كل قلبك انه ملكك و انك ملكه...انت عمرك ما بتوضب شقه ايجار لكنك تضع كل عمرك فى حته ارض ملكك...الوطن هو البلد الوحيد اللى انت فيه مواطن مش ضيف او زائر عابر ...انت عمرك ما تموت عشان قطر و انت بتزور اخوك لكنك تستطيع ان تضحى بعمرك بسهوله من اجل رجل لا تعرفه فى ارض المحروسه....

8 التعليقات:

Unknown يقول...

العزيزة دودي
نعم يادودي الوطن حالة نعيشها أشبه بالتطور الغريزي لعواطف البنوة والتي لا نستعيدها ولو مع مليون أم بديلة مهما زاد حنوهاعلينا. تعرفي أنا مغترب من وقت قصير، ويمكن ساعات باعيش لحظات حلوة في أماكن جيدة من حيث النظام والخدمات لكن الغريب إن كل مرة بتنط في بالي جملة "بس لو كان كده في بلدنا" الوطن اللي إحنا بنحلم بيه وليه كل الوقت. تحياتي علي الفكرة اللامعة والطرح الجيد. مع خالص التحية والتقدير.
د. محمد زكريا الأسود

ابراهيم رزق يقول...

بس تصدقى كل اللى انتى قلتى عليه و مش عايزة توصفيه هو الوطن
تصدقى انك لو لم تشاهدى اتوبيس نقل عام هتشعرى بالوطن
لو مفيش ازمة عيش و بوتجاز هتشعرى بالوطن
طبعا انا مش بهزر و لا بسخف الامور
قصدى ان المعاناة اصبحت جزء من الشعور بالوطن
تحياتى

غير معرف يقول...

جميله معبره جداً
الأغاني دخلتيها بشكل غير مقحم لكنه أضاف جمال و الجمله الأخيره تحمل الكثير من مشاعرنا.

تسلم إيدك و أرق تحية لكي

شيرين سامي

Emtiaz Zourob يقول...

لا اعلم لماذا حين يقولوا مصر ام طرحه و جلابيه اتخيلها بوجه مريم العذراء ..

هي فعلا كذلك .. ربنا يحفظها يارب ويحفظ أوطاننا جميعا

Bent Men ElZman Da !! يقول...

الوطن هو كل دول
مع حاجات كتير اوووى مهما اتكلمنا فيها بردو مش هنقدر نوصفه باللى يستحقه
لانه هيبقى وطن اجمل واغلى من كل الوصف :)
تسلم ايدك

حَنيّـن نِضال يقول...

يارب تشوفو مصر متل ما انتم بدكم تشوفها عما قريب و احسن بشويه صبر من خيره اخناد الارض

faroukfahmy يقول...

د- دودى
على الرغم من اعجابك بمحمد فؤادوعمر خيرت وشباب الاتوبيس والفول والطعمية والعلم الا ان الشعور بملكية المكان وانتمائك يفوق كل شعور واحساس لان الاحاسيس السابقة احاسيس موقوته اما حب الوطن واتمائك فهو دائم فى الروح قبل الجسد
اجدتى فى اظهار تعبيرك الصادق كعادتك
الفاروق

هبة فاروق يقول...

جميله الجداريه اسلوبك وكتابتك راقت لى كثيرا ..واكتملت الجداريه بكلماتك النابضه بحب مصر
سلمتى حبيبتى

إرسال تعليق

حلو؟؟ وحش؟؟ طب ساكت ليه ما تقول....