الأحد، 4 ديسمبر 2011

دينا 2000



لطالما اعتبرت الكتابه عن الاصدقاء و فقدانهم او تغييرهم شئ مبتذل , خاص بمجموعه معينه للكتاب عاده كاتب او كاتبه من نوعيه طلبه الكليات و حديثى التخرج ممن ينجرحوا بسهوله و تدمى انفسهم لاى سبب و تدمع عيونهم كما تسرب حنفيه حوض بيتى.....لكنى ها هنا اكتب عن الاصدقاء و الزمن و التغيير ككل الناس من الواضح انى لست مميزه كما اظن او كما ادعى....






طيله المرحله الابتدائيه و الاعداديه و الثانويه و انا مرتبطه بصديقه "انتيم" كما يطلقون ...خمسه سنين ابتدائى و ثلاثه اعدادى و ثلاثه ثانوى بلا شك هو زمن طويل خاصه بالنسبه لسنى  فعمرى كله 21 سنه فاذا كان منهم 11 عام كامله مرتبطه بشخص واحد فهو بالتاكيد هام....اكره عندما احاول ان اشكل احساسى على هيئه كلمات فمثلا كلمه "مرتبط بشخص واحد" بالتاكيد لا تعبر عما اريد اخراجه منى ..."مرتبط" ها انا عايزه اعبر عن كونا شخصين لا ينفصلا بتاريخ عائلى و شخصى بكل تفاصيله لمده 11 سنه و ها انا احاول تشكيل 11 عام من الحياه المشتركه و لا تنعم عليا اللغه غير بهذا اللفظ الجامد ..."متربط" انا عايزه اقول انى كنت بقولها حاجات مكنتش بقولها لاختى , ان طريق حياتها اتغير بسببى لما نصحتها بنصائح قررت تطبيقها  و تحويل مسار حياتها الدراسى و الشخصى ....بقى كل المعانى ده عايزنى ادخلها فى لفظ سخيف زى "مرتبط" او اننا كنا "قريبين من بعض" بس ؟!!!!


كان ليا دائما شيله غيرها لمشواير الدروس فى الثانويه العامه و شله الفصل فى المدرسه فى الاعدادى و شله الجامعه نظرا لانها دائما كانت فى فصل تانى فى الاعدادى...و كانت هى ادبى فى الثانوى بينما انحشرت انا فى شعبه العلمى علوم ...و دخلت هى كليه ادبيه بينما ربنا ابتلانى بكليه الطب.....لا انكر حبى لاصدقاء كل تلك الشلل -جمع شله مش الشلل الرباعى خلاص- ...كل شله من دول كانوا اصدقاء قريبين و احبابى على اختلاف انواعهم ...شله اعدادى كانوا متفوقين و مفيدين جدا فى الدراسه و الدروس , شله ثانوى كانوا شله علمى من اصحاب دود الكتب و الدرجات العاليه اللى ياما استحملوا عبطى, شله الجامعه اللى مع بعض بقالنا 5 سنين و استحملونى كتير و ربنا عالم انهم عوضونى فى فيما حدث لى من فقدان و زملاء اطباء المستقبل و اللى عرفونى عالدنيا من بعد ان كنت سلحفاه تعيش فى صدفه....


لكن.....


كان دائما عندى احساس انى عندى البديل ....ممكن فى اى لحظه الاقى حد انتيمى جاهز ليحتوينى عندما افشل ...كانت بمثابه شبكه امان للاعب جمباز فوق حبل .....حيطه ورا ضهرى اذا اتقفلت السبل....لا تتخيل ان النهايه ستكون دراميه بموت تلك الصديقه مثلا عزيزى القارئ فالدنيا اكثر تعقيدا من هذا.....


بعد الثانوى و كعادتى السيئه ....بدأ يقل الاتصال حاجه حاجه , فى السنه الاولى كانت الرنات و الرسائل  و المكالمات الطويله بل و الزيارات المطوله متوفره....فى السنين التاليه تتطور الامر الى رنات و زياره فى اعياد الميلاد ....ثم حدث المتوقع فى تلك الحدوته من تغيير نمر الموبيلات و انقطاع الزيارات ....و تمر السنين و دائما جوايا احساس دائم بامكانيه الرجوع فى اى لحظه و كأن الزمن لا يتغيير فمجرد زياره او مكالمه ترجع الماء لمجراييه كاحساس العاصى بانه يستطيع التوبه فى اى وقت ...


لماذا اطيل الكلام عن ما حدث عموما....و احاول تأخير ما حدث اليوم؟؟....هل احاول محو ما حدث مع علمى انه لن يمحى....


النهارده رن التليفون...و كانت هى ....كانت صدمه ما انكرش خاصه اننا بقالنا 3 سنين مشفناش بعض...حاولت اجمع شتات نفسى لاتحدث ....بعد العتاب الخفيف و التحيات التقليديه بدأ الجد.....


و جاء سؤالى التقليدى : ها عملتى ايه بقى فى الفتره اللى فاتت؟؟....و جاءت الاجابه لتذكرنى بمرور السنين ف"انتيمى" قد تخرجت من الجامعه نظرا لانها كليه ادبيه 4 سنين بس....لم تتزوج او تخطب...اخواتها كبروا قطعا....نقلوا من شقتهم اللى تبعد عنى 20 دقيقه الى مدينه بدر اللى نظريا فى اخر الدنيا...غيرت رقم موبيلها قطعا...لبست نضاره....اصبحت اخوانيه!!!!


و جاء السؤال المقابل بنفس اللهجه و جاءت اجابتى على نفس المنوال....بقيت فى سنه خامسه و لسه قدامى ميت سنه...مش فى قسم معين للطب لان التخصص عندنا بعد التخرج...كنت هاتخطب لكن بدلع و برفض عرسان تقريبا بدون سبب....غيرت رقم موبيلى...لبست نضاره....بقيت ليبراليه !!!!


نظريا التغيير ليس جذرى او لنقل شكليا لكنى بالتاكيد لست نفس الشخص من 5 سنوات ...تغيرت بالتاكيد و حدثت لى زوابع نفسيه لم تحضرها...


اخبرتها بموت خالتى ....فاخبرتنى بصوت لا مشاعر فيه بان "البقاء لله"...فقط هذا؟!!....خالتى الصغرى و اقرب عائلتى لى صاحبه ال40 سنه و اربع اطفال اصغرهم 4 سنوات تموت و كل ما احصل عليه من "انتيمى" البقاء لله!!!....لم تحضرنى و شبح الموت يحوم حول عائلتى التى يخطف منها عزيز كل عام ...لم تحضرنى و وجه امى اصفر و دموعها كالانهار...لم تحضرنى و انا ارتدى الاسود بالكامل لمده اسبوع دون ان يستطيع كل الناس اثنائى عن رأيى...لم تحضرنى و الاولاد خالتى اليتامى فى بيتنا ...لم تسألنى حتى كيف ماتت ...ببساطه لانها لم تتذكر سنها و السبب لانها لم تتذكرها لانها اصلا لم تتذكرنى بالكامل....


قدمت لى واجب العزاء فى انيس منصور  و تخيلت انى منهاره لموت كاتبى المفضل....لم تعلم بان علاقتى بانيس انتهت من 4 اعوام عندما انتهيت من قراءه كافه اعماله فقررت اغلاق هذا الملف و التوجه لكتاب اخريين انهل منهم ...مازالت مقتنعه بانى لا اقرا سوى لانيس و لم تعلم ان تلك الاخبار انتهت من 4 سنوات....


هى ما زالت مفتنعه بانى مستمعه لام كلثوم...هى لا تعلم انى لم اسمعها منذ 5 سنوات...هى لا تعلم بادمانى الجديد لفيروز و زياد الرحبانى..لا تعرف تأثير اغنيه "فى امل" على مود يومى...لا تعرف دندنتى لاغنيه "يا ليلى ليلى" لمده اسبوع متواصل


سألتنى عن من سارشح فى الانتخابات...و لانى احسست باننا لم نعد اصدقاء كعادتنا احرجت ان اخبرها بتأييدى للكتله المصريه لانى توقعت بانها ستستغرب من اعطاء صوتى لحزب"المسحيين" كما اشيع عنه...اردت ان اهدأ الاجواء و فضلت ان اخبرها بانى سارشح الوفد خاصه و انى لم احسم امرى...اخبرتها بانى نازله مخصوص انقص الاخوان صوت...و جدتها تصرخ فى اذنى بس دول ليبرالين ؟!!....ضحكت بينى و بين نفسى فهى لا تعلم بعد...اخبرتها بانى اصلا ليبراليه..اسوء ما كان فى المكالمه هو محاولتها باقناعى بتيار الاخوان ..هى لا تعلم بانى اخر شخص فى الكون يمكنه الايمان بهم....و تقارن لى بين تعريفات اليبراليه و كم هى بعيده عن الاسلام و هى لا تعلم انها ظلت تشرح لى معنى العلمانيه طوال الوقت...اثرت الصمت و فضلت الا احول المكالمه لمناقشه جديده من مناقشاتى الاعتياديه المستمره فى هذا الموضوع.... 


هى لا تعلم بالمدونه فهى لم تحضر تكوينها ...لا تعلم انها اصبحت جزء منى...


لا تعلم بادمانى الجديد للتويتر و الكاكاو الساخن...


لا تعلم بانقطاعى عن اكل اللحوم الحمراء...


لا تعلم باقتنائى للاب توب و هو صديقى الانتيم حاليا...


لا تعلم بسفرى لاقصر و اسوان , لمطروح, لبورسعيد, راس البر, السويس, فى عامين ...


لم ترى صور رحلاتى...


لم تعلم بقراءتى ل 150 كتاب فى السنه...و فخرى الطفولى بهذا


لا تعلم بحبى للجلوس فى سيتى ستارز دون فعل شئ سوى المشاهده الساعه 10 الصبح و هو تقريبا فاضى...


لا تعلم موقفى من مسلسل "العشق الممنوع" و "الامريكان اديدول" .......هى لا تعلم لانها لم تكن موجوده.....


Friendship isn't a big thing - it's a million little things.


هى تعرف "دينا 2000" لكننا للاسف 2011 :(

4 التعليقات:

MSMO يقول...

عجبني البوست كتير برغم إني شايف وعن تجربة شخصية إن الصداقة ممكن تستمر برغم الفوارق المكانية أو الاتجاهات الايدلوجية أو الدينية
تحياتي لك بس ياريت ميبقاش لاب توب والكتب هم بدائل البشر

ابراهيم رزق يقول...

على فكرة لا علاقة للصداقة بالفوارق الايدلوجية
كلنا هذا الرجل كل مرحلة لها اهتمام طبقا لطبيعة العمل او الظروف لكن يبقى فى النهاية مجموعة اصدقاء لا يمكن ابدا ان يتساقطوا ابدا
صديقتك من الممكن بسهولة ان تعوض الى حديقة صداقتك بكل سهولة رغم اختلاف التفكير
اكبر عدد من اصدقاءى اخوان و سلفيين و بتاخذ جانب كبير من مناقشتنا و كلامنا و لكن فى النهاية تبقى الصداقة التى هى فى مرتبة تعلو عن الاخوة لان الصديق باختيارنا اختارتك ان تكون صديقى
تحياتى
ملحوظة اسفت جدا لان طالبة جامعية لا تعرف الفرق بين الليبرالية و العلمانية و الالحاد حتى الجامعيين انضموا الى طابور القطيع و لم يعودوا يفكروا و تلك هى الماساة الحقيقية

د/دودى يقول...

MSMO :انا مزعلتش عشان هى بتتجه لفكر الاسلام السياسى فاولا و اخيرا هى حره و فى اصدقاء كتير عندى بيفكروا بنفس الطريقه...اللى حز فى نفسى انى حسيت انها متعرفنيش اصلا مع اننا كنا قريبين قوى

د/دودى يقول...

عزيزى ابراهيم : المشكله ليست سياسيه ابدااا...لكنه احساسى الكئيب بان ما ادخرته دايما و اعتبرته خط امان مش امان قوى كده و ان التفاصيل الصغيره ضاعت فى الزحمه

إرسال تعليق

حلو؟؟ وحش؟؟ طب ساكت ليه ما تقول....