tag.. ليه انا مدون؟؟

كنت فى مدونه "البتاعه" كعادتى فى متابعتها الدائمه ليها و لاقيت اسمى فى لائحه الواجب العكسرى اقصد الواجب التدوينى بانى اجاوب على اسئله "ليه انا مدون؟؟" اجابات مدونه البتاعه هتلاقيها هــــــــنــــــا ....احب اقول الاول ان كان فى نيتى انى اكتب فكره التدوينه دى من فتره و كنت already محضره شويه كلام اقوله لكن كنت مستنيه اعملها بمناسبه مرور 6 شهور على المدونه او فى السنويه الاولى مثلا  و كنت ناويه اسميها "تدوين تدوين ...بس نعيش " لكن خلاص السهم نفذ و استدعاء الوطن لا رجعه او تخاذل فى اطاعته....و على رأى محمد عبد الوهاب " دقت ساعة العمل الثوري لكفاح الأحرار. تعلن زحف الوطن العربي بطريقه الجبار." SO انا هبدء اجاوب اسئله من سيربح المليون تدوينه  فلتطفأ الانوار و ترتفع الموسيقى :

1- تعريف مختصر بالمدون :

اسمى فى الواقع الافتراضى : د/دودى و اسمى فى الواقع المفروض عليا : دينا نبيل ...جت حكايه د/دودى من انى ادرس فى كليه الطب جامعه عين شمس و انا حاليا فى سنه رابعه فقررت يوم ما دخلت الكليه انى مش هاعيش دور الدكاتره و اعمل فيها  شخصيه فقررت ان يكون اسمى الافتراضى متناقض حيث دال الطب تدل على الوقار و دودى تدل على شخصيتى اللى يقال انها مرحه و منطلقه و بالتالى قررت ان اكون اه طالبه طب لكن لا شخصيه مغلقه مقفوله تقرا كتب الدراسه تحفظ و تصم من غير ما تبص للحياه...

اما اسمى : دينا نبيل فانا اسمى دينا و انا الوسطى بين 3 اخوات بنات و والدى هو المهندس نبيل مهندس ميكانيكا و والدتى مديره مكتب فى حى من احياء الحكم المحلى..اعيش فى ارض شبرا الخيمه اللى اعشقها و اتنفسها فخارجها كالسمكه بره المياه....اعشق اللون الاصفر و صوت الست بالعربيه و سيناترا بالانجليزيه و اديت بايف بالفرنسيه و بفاروتى بالايطاليه و خوليو اجليزيوس بالاسبانيه...

بحب القراءه جدااااااااا و بيعتبرونى ك دوده قرايه حيث اقرا اى حاجه بتمر تحت ايدى لكنى طبعا بفضل الروايات - خاصه الطويل منها- و كتب التاريخ  و الفلسفه و اى حاجه المهم متكونش غاليه قوى لانى بشترى حيث نفذت المكتبه من الكتب حيث قرأت اكتر من نصف كتبها و اسبعدت فكره قراءه النصف الاخر...

2- مكانته العلمية والدراسية  التى وصل اليها والتى من خلالها يستطيع أن

 يقدم  خدماته للمجتمع

مكانه علميه كلمه كبيره شويه لكنى عموما طالبه طب و واجبى انى اخلص دراستى وابدأ حياه عمليه طبيه قررت انها تكون فى الاول و الاخر خدمه للمجتمع و للبلد اللى كلفتنى دم قلبها عشان ابقى دكتوره فاعامل المريض بالرحمه قبل العلم و بالادب قبل الطب و بالشفقه قبل المال...و اتمنى انى امشى على الخط ده اللى رسمته لنفسى ان شاء الله فيمنحنى التخرج و يمهلنى العمر...

3- متى كانت البداية فى التدوين (بالتاريخ )؟

19 اغسطس 2010

4- كيف كانت البداية فى التدوين ؟

 "بالمناسبه كان فى رمضان" كانت اول التدوينات الـــبــدايـــه...الفكره نفسها كانت بتروادنى كتيييييير قوى و ترددت حوالى سنه لشعورى بان ما اكتبه لا له قيمه و لا يجذب من يقرأه بالاضافه لتخيلى بان موضوع انشاء مدونه صعب و يمكن يعوز فلوس زى انشاء المواقع و محتاج استضافه و موال...و اذا بى اشجع نفسى مره و ادور على الطريقه فجائت المفاجأه بسهوله الموضوع و ان كل المطلوب انى املا استماره فاذا بى افاجأ بان بمجرد ملأ الاستماره احصل على مدونتى الخاصه مجانا بلا صعوبات ...و انا بملى الاستماره طلب منى اسم المدونه فلقيت نفسى محتاسه تماما لانى مكنتش محضره اسم معين فلجأت لبابا و سألته سؤال بما انه غاوى كتابه و له مؤلفات و جرى الحوار التالى :

أنا : بابا ...لو عندك عمود يومى فى جريده تكتب فيه اللى انت عايزه كل يوم تسميه ايه؟؟؟

 

بابا : يااااه دا انا محضر اجابه السؤال ده بقالى 30 سنه اصل ده كان حلم قديم...كنت هاسمى العمود "شئون صغيره"

 

و بالفعل سميتها "شئون صغيره" و دام هذا الاسم لمده اسبوع كنت كتبت كذا تدوينه و طبعا كان شكل المدونه شكل تانى خالص بعيدا عن اللون الوردى و علامه مكافحه سرطان الثدى و الكيبورد البمبى فقد كان شكل المدونه مزود بالكتب و لونه بنى و اسوء شكلا كثيرا من الان...و بعد فتره اكتشفت ان already فى مدونه اسمها "شئون صغيره" فبحثت عن اسم اصغر و عامى و يدى نفس المعنى الى ان توصلت لاسم "رفايع"....

such   a small  affairs .blog

- ليه أنت مدونة ؟؟؟؟؟ وما هى طموحاتك فى هذا المجال 
وماذا تسعى له بموقعك وإلى أى مدى تريد أن تصل فى التدوين ؟؟

اه دخلنا فى الاسئله الصعبه ...انا بدوّن عشان اطلع كل اللى جوايا بصوره واضحه يمكن حاجه منها تطلع حلوه و لو حاجه بايخه تبقى خرجت منى و اقدر اميزها بدل ما اقول دا انا لو كنت كتبها كانت هتبقى و هتبقى لا انا اطلعها و اخلص من غير ما اخاف نقد ناقد او اتمنى تشجيع معجب ..و كنوع من التأريخ للاحداث او كما اسميها "مذكراتى الاونلاين" و هى بصراحه بقت جزء من يومى و جزء من شخصيتى  طبعا مش طالبه انها تبقى مسلسل ولا كتاب كفايه انها تستمر لسنين دون فتور منى ولا فتور و نفور قرائى ...نفسى احقق المعادله الصعبه بان عدد قرأيي يزيد من غير ما يبقوا ضغط عليا انى اكتب اللى بيعجبهم و اتجنب ما يكرهوه مش عارفه تتعمل ازاى دى بس يا رب..

و جائت اللحظه الحاسمه التى يجب فيها انى اسلم الرايه لمدون اخر يعرفنا نفسه و تذهب التاج الى :

بره الشبابيك 

ثقافة وابداع

واحــة أفكاري

Do .. Ra .. Mi