Die Fälscher بالالمانيه او The Counterfeiters بالانجليزى او بالعربى "مزيفى النقود" هو احدث فيلم لسه شايفاه بالظبط من 7 دقائق لسه مخلصاه ....الفيلم باختصار هو فيلم رائع - عارفه اللى فى دماغك بتقول جواك هى كل ما هتشوف فيلم هتقول عليه رائع- الحقيقه انه فيلم فعلا جميل هو اساسا فيلم المانى ناطق بالالمانيه و حصل على جائزه الاوسكار افضل فيلم اجنبى لسنه 2007 و زى ما قلت قبل كده ان الجايزه دى صعبه المنال .....
الفيلم زى اسمه ما موضح كده بيتكلم عن تزوير الفلوس و زى ما باين من بوستره انه فى اجواء النازيه و معسكرات الاعتقال لليهود...in fact الفيلم عجبنى فى تميزه من حيث وجهه نظره الجديده و الزوايه المختلفه لمعسكرات الاعتقال حيث ركز على سؤال مهم جدا "اذا كان معتقلين اليهود كلهم مدانيين فى نظر الالمان فكيف نجا منهم من نجا؟؟؟؟" " هل اللى نجوا دول قدموا تضحيات و اعمال يمكن غير شرعيه فى مقابل البقاء؟؟" الاجابه هتلاقيها مع معتقلينا فى الفيلم اللى من نوع مختلف شويه عن اى معتقلين بيظهروا فى افلامنا الامريكيه المعتاده حيث الذل التام و التجويع و الموت لكل من يظهر على الشاشه...طبعا الفيلم مش مباين ان معسكرات الاعتقال كانت جنه ولا حاجه لكن فى الواقع ابطالنا اللى فى الفيلم هما اللى كده بس ... حصلوا على امتيازات قد تكون بالقليله فى الحياه ولكنها كثيره فى عالم المعتقل....
الفيلم فى رأيى تميزه ينبع من انه فيلم المانى و ليس امريكى و بالتالى تقل حده اظهار اليهود غلابه و خلاص الى ناحيه استغلال الفكره دراميا لتحقيق النص الرشيق اللى يجبرك على التركيز فى كل ارجاء الفيلم دون هبوط فى الوتيره...من الاخر يبقى فيلم سينما مش قصيده رثاء....
مش عارفه ليه اصرار كتابنا على انكار معتقلات اليهود فى الاساس...ابتدى الموضوع باننا بنقول ان ارقام اليهود مبالغ فيها الى مرحله ان اليهود حطوا 4 اصفار امام العدد الحقيقى الى مرحله مين اللى قال ان اليهود كان بيتقبض عليهم اصلا؟!... ليه مش بعترف بالحقيقه عشان دول اعدائنا؟؟؟ ولا حبنا فى نظريه المؤامره كالعاده؟؟ او حب اننا احنا بس المظلومين؟؟ الله يعلم....
"لا قوه على الارض اقوى من اراده البقاء على قيد الحياه" هو ده سلوجن الفيلم و اللى هيشوف الفيلم هيعلم حقيقه و مطابقه تلك الجمله على احداث هذا الفيلم اللى بقول عنه - وده مدح- انه فيلم سينما بجد...
فاذا اردت مشاهده قصه جيده و تستطيع ان تتغاضى عن معتقدات مسبقه او تكون لديك الجرأه الكافيه لمشاهده وجهه النظر للطرف الاخر ...شاهد هذا الفيلم:
د/دودى
مدونه رفايع..مجرد رفايع
0 التعليقات:
إرسال تعليق
حلو؟؟ وحش؟؟ طب ساكت ليه ما تقول....