الثلاثاء، 7 ديسمبر، 2010

الاستهياف...



تقولى تكرهى ايه فى حياتك اكتر حاجه اقولك اولا الليمون - بس بما ان ده مش موضوعنا النهارده فملهاش لازمه الحته دى - اما اكتر تانى حاجه بكرهها فعلا هى "الاستهياف و توابعه" بمعنى انك تقرر ان اللى قدامك هايف و تافه فتعامله على هذا المستوى فان كان عالى المستوى الفكرى فيقلل تباعا تباعا الى ان يصل لمرحله الهيافه الحقيقيه...وان كان هايف فعلا و عنده طموح و لو 1% انه يبقى احسن يبقى الامل ضاع و هيفضل محلك سر بسببك.....

اما ايه سبب تلك المقدمه الصاخبه ف لانى اتخنقت مما تفعله دور النشر من الاصرار على معامله الشباب المصرى على انه قاصر الذهن او متخلف عقليا و ذو قصور ذهنى....انا كنت امبارح فى احدى معارض الكتاب الصغيره حجما القويه فى محتواها اللى بتتعمل فى الكليه عندنا لانها بتكون مركزه من غير "الواغش" اللى بيبقى موجود فى معرض الكتاب الدولى و بيركز على الكتب الجيده او واسعه الانتشار و اعلها مبيعا فوجدت - فيما وجدت- سلسله عملاها دار نشر نهضه مصر "للشباب" بتعرفهم الحياه السياسيه  بما اننا مش فاهمين حاجه و محتاجين تعريف الكتب دى صغيره الحجم لا تزيد عن ال100صفحه فى غلاف منمق كعاده "نهضه مصر" بسعر 10 جنيه و هو عادى كالعاده بالناسبه لحجم الكتاب برضه كعاده "نهضه مصر" طبعا محطوط فى اسماء براقه تشد عشان تشترى بدل ما تفكر ولا توجع دماغك و دى عينه من عنواين الكتب و مؤلفيها :

* الخصخصة ل احمد جمال الدين موسى 

* الاصولية  ل عمرو الشوبكي

* حوار الحضارات ل وليد محمود عبدالناصر

* الدساتير المصرية  ل سيد عيسى محمد 

 


* الهجرة غير الشرعية ل سيد الاوندى

* الانتشار النووى ل احمد عبد السلام

* التدخل الدولى ل عماد جاد

* الاعلام و صناعه العقول ل نسمه البطريق

* الدعايه الانتخابيه ل صفوت العالم

* المواطنه ل عماد صيام

* العنصريه و صدام الحضارات ل اسامه نبيل

* الليبراليه ل ياسر قلنصوه

* اسلحه الدمار ل محمد عثمان

* الحكم الرشيد ل سامح فوزى

* الديموقراطيه ل صبرى سعيد

*الايدلوجيه ل حسن عمار

* الرأى العام ل صبحى عسيله

* الاستشراق ل سهام ربيع

* التحديث ل عزمى عاشور

* المجتمع الدولى و الدوله ل محمد عثمان الخشت


طبعا مؤلفين الكتب دى على العين و الراس و كلهم دكاتره و اساتذه فى مجالتهم لكن اللى جننى هو افتراض ان الشاب المصرى لا يعرف معنى "الاستشراق" مثلا او "الرأى العام" او ميعرفش يعنى ايه "عنصريه"؟؟؟؟ بما استفزنى نظرا لان كل عنوان من تلك الكتب بيتحضر فيه 100 دكتوراه و ميخدش حقه فى البحث و الدراسه فى الاخر بما يعنى ان الكتب دى - لصغر حجمها - موجهه للمعرفه العامه بالمفهوم و ليس للدراسه المتعمقه....

طيب اذا كان هو ده موقف دور النشر الخاصه لكن اللى رعبنى حقيقيه هو موقف الدوله بقى حيث وجدت كتاب صادر عن هيئه قصور الثقافه عن قصه انشاء قناه السويس و بما انى بحب اشترى كتب الهيئه و بما انى عندى نقص نسبى فى كتب التاريخ فقلت اقلب فيه علانى علانى الاقى حاجه مثيره فى ذاك الكتاب....فاذا بى افوجئ بان الكتاب كله على بعضه 80 صفحه و مكتوب بصياغه شديده التبسط كانها للاطفال فاذا بى اقرا بانها جزء من سلسله شهريه تصدرها الهيئه لنشر الوعى التاريخى بين الشباب؟؟؟؟
قصه قناه السويس اللى اتعمل عنها مجلدات و رسائل دكتوراه اجدها ملخصه بهذا الشكل المهين!!!!!!

و ارجع و اقول اذا عاملنا شبابنا بانه غبى فلا نلوم احد الا انفسنا اذا اصبح كذلك.......

د/دودى
مدونه رفايع...مجرد رفايع

 

10 التعليقات:

آخر أيام الخريف يقول...

معاكى من الألف للياء ..حاجة تفقع المرارة و الله يا بنتى :(

عماد هلال يقول...

أنا شفت كتيبات من هذه ، وحقيقى حقيقى - على راى واحد صاحبتا - هناك بعضها مفيد ويفتح لك الطريق لبعض المعارف خاصة للشباب الصغير غير المضرب على القرأة من أصله - يعنى مش زى ناس متعودة على المدفعية الثقيلة من الرويات - وهناك منها ما يسد النفس .
تحياتى

ماشي بنور الله يقول...

عندك حق... بس مين يفكر ويتعلم؟!!

سمو الامير يقول...

هم أكيد بيعملوا الكتب دي عشان الناس اللى بتعاني من قصور في الثقافة السياسية وبخاصة مصطلحاتها العجيبة

زي حالاتي كده :D

انا مش شايفها عيب بصراحة إلا لو كانوا مبيطبعوش غير الكتب دي بس

يعني في رأيي ان المفروض يراعوا انهم يغطوا شريحة كبيرة من الناس سواء المثقفين و غير المثقفين

ومتستغربي على فكرة عشان انا اعرف ناس بالاصح شباب ويمكن كبار كمان ميعرفوش ولا كلمة من اللى قولتيهم فوق دول
فلما يبدأوا معاهم واحدة واحدة يبقا هم كده ماشيين صح

السؤال الأهم بقا هل المكتبات دي بتنزل للناس من المستويات الفكرية اللى قلت عليها ولا بيسيبوا الكتب للي ييجي يدور عليها ؟ اللي هم غالبا من فئة المثقفين ؟؟ اعتقد ان هي دي المشكلة

د/دودى يقول...

اخر ايام الخريف : تسلم مرارتك ...

د/دودى يقول...

استاذى عماد هلال : معاك ان فى منها اللى بيفتح الباب لمعرفه اكبر و ده طبعا رائع لكن الاكتفاء بيها فى ظل مواضيع كبيره يبقى كارثه طبعا...

د/دودى يقول...

ماشى بنور الله : احنا نفكر و نتعلم امال احنا بنلعب؟؟ ..نورت

د/دودى يقول...

سمو الامير :

هما طبعا بيسيبوا الكتب للى يدور اللى هما المثقفين اساسا ... اما فى رايى نوع الكتب دى المفروض ما تزيدتش عن سن 15 سنه مش يبقى هدفها شباب الجامعه...بقى انت برضو متعرفش سياسيه؟؟!! ولا امن الدوله واقف عالباب؟؟

سمو الامير يقول...

لازم تحرجونا يعني ^_^

بجد عايز اقولك اني لغاية سنة ونص مكنتش اعرف الالف من كوز الدرة في السياسة لغاية ما فوجئت ان الوضع متأزم وانا باحضر لندوة تثقيف سياسي تبع برلمان الشباب كنت حاسس اني زي قفص الجوافة
ومن ساعتها بدأت اهتم بالسياسة

لذلك انا مش بانكر اني مازال عندي قصور في الثقافة السياسية لكنه من سنة ونص كان أمية سياسية بالكامل :)

د/دودى يقول...

عموما كل واحد فينا كان ليه دافع ما خلاه يدور و يتعمق اكتر..

ايه برلمان الشباب ده؟؟؟

إرسال تعليق

حلو؟؟ وحش؟؟ طب ساكت ليه ما تقول....