حوليات122:عناق عند جسر بروكلين

عناق عند جسر بروكلين
اسم المؤلف: عزالدين شكري فشير
220 صفحة


 يمكن التعليق فى الروايه دى على جزئين اساسيين

الاول :هو التكنيك اللى استخدمه المؤلف من حيث تناول الموضوع من كذا وجهه نظر لكذا شخصيه و هو على الرغم من ابهاره عموما بل و اتقان المؤلف له على صعوبه نسجه ليس بالجديد ابدا فالاسلوب ده معروف عالميا سواء فى السينما او فى الروايات و انا شخصيا قريت اعمال بالاسلوب ده قبل كده منها "ساحره بورتبيلو"باولو كويلو و منها "المقهى الاسبانى"عائد خضباك و حتى "واحه الغروب"لبهاء طاهر فيها لمحه من الاسلوب ده ...لكن عموما هو اسلوب ممتع و مشوق للقارئ و مجهد و صعب للكاتب

الثانى: هو نوعيه الخطوط الدراميه و جودتها و فى هذا الموضع اقول ان المؤلف اجاد فى معظم الخطوط الدراميه و ان فى رأيى معجبنيش بعض الخطوط منها مثلا خط زوج الاخت المتشدد فى رأيى كان خط درامى غبى بل و مقحم على العمل و فج فى بعض الاحوال , ايضا خط لقمان ابو سلمى اللى اتسمى الكتاب بما حدث فيها جاء طويل بلا مبرر و مبالغ فى الرومانسيه بلا سبب واضح ....على العكس جاء الخط الدرامى لسلمى ممتاز و محبوك و ان شعرت بالالم للنهايه شبه التعيسه بدل من استخدام النهايات السيئه السعيده كالعاده

ملحوظه:لم يعجبنى الاسم ..فالاسم يوحى بانك تقرأ قصه رومانسيه مبتذله و بالفعل الروايه تستحق اسم افضل

song theme
فيروز _ اديش كان في ناس

حوليات121: هروبى الى الحرية

هروبي إلى الحرية
تأليف:  علي عزت بيجوفيتش
ترجمة: إسماعيل أبو البندورة


كتاب غزير جدا تشعر بعدد صفحاته الكبير و تعدد مواضيع فصوله و تشعب ارائه بانه كان من اللازم تقسيمه على اكثر من كتاب ...لكنها بالتاكيد صفقه ناجحه ان تقرأه فكأنت قرأت 3 او 4 كتب فى ان واحد

فى البدايه انبهرت بالكتاب و بدأت ادون كلماته و اضعها ما بين الاقواس لكنى بعد فتره اكتشفت بعدم جدوى تلك الطريقه فالكلمات المنيره و المثيره فى ان واحد كثيره العدد بشكل يصعب تدوينه...لذا دونت ما استطعت و حفظت ما استطعت و ارجئت الباقى الى قراءه ثانيه محتمله

لكن لا تنخدع باعجابى القوى و تتخيل انى متفقه 100 فى 100 من جميع اراء الكاتب او حتى انى اعجبت بكافه اجزاء الكتاب فما يلى هى ملاحظاتى السلبيه عن الكتاب التى انقصت الكتاب النجمه الخامسه

الاول:لجوء الكاتب فى غير قليل من مواضع الكتاب الى النقل المباشر حتى دون تعليق او تحليل فى كثير من المرات...قد اتغاضى عن هذا العيب بسبب ظروف كتابه الكتاب ففى السجن يقرأ الشخص المثقف اطنان من الكتب و يتأثر بشكل مباشر بها

الثانى:تحول الكتاب فى بعض المواضع لكتاب شبيه بكتب"هل تعلم؟؟" فهى مجرد تلاوه لمعلومات و احصائيات و معلومات تاريخيه 

الثالث:اختلافى مع بعض اراء الكاتب خاصه المعمم منها فمثلا فى الفصل السياسى جاءت الجمله رقم 625 قائله "شهوه التدمير هى النزعه الدائمه لليسار الراديكالى"...هكذا فقط القى الكاتب تهمته و رحل دون شرح او ايضاح لنظريته و قد ذكرنى فى تلك الجمله بحمله الاخوان المسلمين فى جريدهم الغراء ضد قناع"بانديتا" اللى هو اصلا فانديتا...نفس الاسلوب المتهم بلا مبرر راميا حركات كامله بالفساد و اخراب البلاد...اختلف معه لسببين الاول عدم اقتناعى الشخصى بسوء الراديكالين و الثانى لعدم بيانه سبب التهمه

الرابع:صدمت بكل صراحه فى رأى الكاتب فى المرأه عموما و فى الحركات السياسيه خصوصا و قد بين هذا الرأى مختبأ وراء جمل غير قليله فى عداء واضح للمرأه من نوعيه ان المرأه مكانها الحقيقى هو البيت و ان اى دعوه لخروجها للعمل هو قضاء على فطرتها و فساد لمتعتها...انا من اشد المعارضين لتلك النظريه التى اصر فى كل مره اواجه بها بأنها متخلفه قطعا...بالمناسبه يوم كتابه هذا الريفيو هو 8 مارس اليوم العالمى للمرأه

من النهايه هو كتاب ممتاز لكن لا تجعل انبهارك به يؤدى لدخول كلماته الى وعيك دون تفكير

حواليات120:البوب و ماما 2

بابا: الببلاوى ده لازم يمشى , كفاية كده بقى

ماما: ما احنا كان نفسنا المنيل هو اللى يمسك رئيس وزراء و يظبطها هو لكن هرب يكتئب على راحته فى التكييف و احنا واخدين على دماغنا هنا

انا: تقصدى البرادعى صح؟؟ ياااه يا ماما انتى بتحبى البوب كل الحب ده و بتخبى؟ اللى يحب يبان فى عينيه و مدام تحب بتنكر ليه؟

ماما: بوب؟! اهو جابنا ورا يا بتاعه البرادعى

انا: بتاعه البرادعى ليه؟؟ هو كان ابن اختى؟!

"بعد ما ماما شافت صورة البوب مع الراجل اللى عامل علامه رابعه"

ماما: "تطبطب على كتفى" ارتاحتوا؟ خلاص اتبسطتوا؟

انا: ما يمكن حد عادى بيتصور معاه و هو مش واخد باله

ماما: هس اسكتى خالص...عارفه زر البطاطا اهو انتوا ده

انا: بطاطا ايه؟؟

ماما: مش البطاطا فيها شراشيب فى الاخر كده اهى دى افيد منكوا ...يلا يا بتاعه البرادعى و لا اقول لك يلا يا بتاعه رابعه

انا: يا فضحتى...يا منشف ريقى و فاضحنى يا بوب

يسمعون حسيسها ل أيمن العتوم pdf

لاول مرة على الانترنت و من رفع "رفايع" نقدم لكم رواية يسمعون حسيسها ل أيمن العتوم pdf 

للتحميل

tags: يسمعون حسيسها pdf , يسمعون حسيسها امين العتوم 4shared , يسمعون حسيسها بى دى اف , يسمعوت حسيسها mediafire

حوليات119: الاسوانى و ماما

ماما: تعرفى انهم ضربوا الاسوانى فى باريس؟؟

صديقة ماما: يستاهل كل اللى يجرى له

ماما: ما هو يستاهل فعلا عشان وقف مع مرسى فتره

صديقة ماما: لا عشان وقف مع الانيكلاب و ...و ...

ماما: ايوه بس ده مكنش رايح للسياسة دى كانت ندوه ثقافية عن روايته الجديدة

صديقة ماما: ثقافة ايه؟ ده رايح يعمل بزنس

ماما: بزنس ازاى يعنى؟

صديقة ماما: رايح يعمل اعلانات مع شركة عربيات

ماما: تقصدى "نادى السيارات" ؟؟

صديقة ماما: ايوه هى دى

ماما: ده اسم روايته الجديدة يا حببتى -_-

حوليات118: ايران تستيقظ

اسم الكتاب: ايران تستيقظ .. مذكرات الثورة والامل
اسم المؤلفة: شیرین عبادی
عدد الصفحات: 256

ليه بلادنا -دايما- زى العربية اللى غرقانه فى رمل ناعم؟ كل ما نحاول نطلعها و ننقذها تغرز اكثر و نغرق معاها اكتر؟...ليه كل محاولات انقاذ الموقف او احلام التغيير تنتهى نهايات مؤسفة تخلينا نندم اننا حاولنا..ليه كل الثورات بتنتهى نهايات روايات جورج اورويل؟ لم تكن تلك كلامات شيرين عبدى الدقيقة...لكنها افكار شعرت بانها مشتركة بينى و بين شيرين ****************************** شيرين مثال رائع عن الفيمنست الذكية المتعلمة فى مجتمع قرر ان يكون ظلاميا...من المؤلم ان تكون جزء من حركة التغيير التى لم تكتف بالاطاحة بحلمك المهنى و تتحول شيرين من قاضى الى سكرتيرة فى نفس الدائرة لسبب واحد بسيط و معقد هو انها :امرأة, بل تجاوزت ذلك لتصير حركة تغيير حتى فى خزانة الملابس و اجندة الاحلام و فقدان الاصدقاء اما بالسفر او بالموت او بالقهر ****************************** اتذكر انى -فى 2 اعدادى- سألت مدرسة الدراسات الاجتماعية عن سبب قيام حرب العراق/ايران فى الثمانيات فارتبكت قليلا و اخبرتنى ان هذا سيكون موضوع بحثى المنزلى لاكون انا المجيبة على السؤال الذى طرحته!!..لم يكن عالم يحوى انترنت لتحصل على المعلومة بكبسة زر , ذهبت الى المكتبة لأسأل عن كتاب يتحدث عن تلك الحرب فلم اظفر بجواب فلجأت -كعادتى- الى بنك المعلومات الاولى عندى "بابا" فجاء الرد متقبضا: البترول يا دينا ها انا بعد كل تلك السنوات اقرأ كتاب لكاتبه ايرانية حصلت على نوبل و فؤجئت بانه الرد نفسه لعله بنفس البساطة: انه البترول لعلك تذكر خطاب ايه الله الشهير الذى اخبر العالم فيه انه قبل اخيرا "تجرع السم" لينهى الحرب لكن ما الهدف و ما النتيجة من كل ذلك لم يخبرنا طرف قط ***************************** انها اذا الرحلة...كيف تحولت الثورة الايرانية الى الثورة الاسلامية؟؟...و كيف تحولت من حركة شعبية ضد الاضطهاد الى حركة سلطوية لقمع الشعب ذاته؟...انها اذا القصه الابدية عن كيف تحول اليسارى الى اشد اليمين؟ ...و كيف تتحول الثورة الى سلطة؟

سيندروم ل إبراهيم البجلاتي pdf

من رفع "رفايع" و لاول مرة على الانترنت  نقدم لكم رواية سيندروم ل إبراهيم البجلاتي

للتحميل

tags: 4shared, سيندروم pdf , رواية سيندروم بى دى اف

حوليات117: منقذو الالهه

تصوف: منقذو الآلهة
ل نيكوس كازانتزاكيس
ترجمة سيد أحمد علي بلال
84 صفحة

انك تقرا ل نيكوس كازانتزاكيس الفجر مع كوباية نسكافية كبير و معاها موسيقى بيانو طويلة مريحة للاعصاب و فى ظل قراءة كتاب اخر هو اللامنتهى فى راحة اليد ل جيوكاندا بيللى التى تتحدث عن قصة الخلق و حواء و ادم فى ظل الانبهار الاول من كل شئ و فى ظلال السؤال عن جدوى كل هذا, جدوى الجوع , جدوى الموت,جدوى الوجود ذاته ان تجتمع كل تلك الظروف معا فهو يعنى بالتاكيد انى -ببساطة- عشقت الكتاب و اعمل عقلى اكثر بكثير من وزن صفحاته النسبى ************************ صفحات الكتاب الاولى مبهرة بلا شك- و هو للاسف ما لم يستمر فى الصفحات الاخيرة- ...من السطور الاولى يصدمك كازانتزاكيس بالاسئلة تنهمر , و الاجوبه المحتملة , و الشك و اليقين كل فى جمله واحدة حين يسألك عقلك هل كل ما تجده حقيقى؟ ام انه مجرد وهم و طيف تصنعه الافكار ...كيف التأكد من ذلك و اجدنى اتذكر قصيدة ابحث عنها بين اوراقى القديمة ل تشيسلاف ميلوش تدعى "العالم قصائد ساذجة" يخبرنى فيها بمعنى الايمان http://suchasmallaffairs.blogspot.com/2010/09/blog-post_08.html الايمان حينما يرى المرء وريقه فوق الماء او قطره ندى ويعرف انها موجوده لانها ضروريه حتى لو اغضمت العين و حلمت فسيبقى العالم كما كان و ستحمل مياه النهر الورقه الايمان يكون ايضا حينما يجرح المرء رجله بحجر و يعرف ان الاحجار موجوده كى تجرح ارجلنا انظروا كيف تبسط الشجره ظلالا و فيره و ظللنا نحن والزهور نسقط على الارض لا حياه لمن لا ظل له ************************* بين ايمان ميلوش البسيط و تشكك كازانتزاكيس المتمرد كانت رحلة عقلية ممتعه بجد يصعب وصفه كتاب للانسانية ...يمتاز بانه تعدى اى حدود او فروق او اختلافات

أكابيللا ل مي التلمساني pdf

من رفع "رفايع" و لاول مرة على الانترنت  نقدم لكم رواية أكابيللا ل مي التلمساني

للتحميل 

حوليات115: اللا متناهي في راحة اليد

اسم الكتاب: اللا متناهي في راحة اليد
المؤلفة: جيوكوندا بيللي
المترجم: صالح علماني 
عدد الصفحات: 206

 و نهاية كل اكتشافتنا ستكون
الوصول الى المكان الذى بدأنا منه
و التعرف عليه لأول مرة

ت.س.أليوت
********************************
هكذا اذا فعلت جيوكاندا ببساطة و تعقيد يستحق الدراسة...ستأخذنا الى جنة الخلد الاولى حيث اللامتناهى و الخلود و ادم يقبع وحيدا مستمتع فى هدوء و بساطة ثم تسير معه و مع رفيقة دربه الى اكتشاف الامور لاول مرة

بعد انتهاءك من "اللا متناهى فى راحة اليد" او انتهاؤه منك سترى حواء فى ثوبها الجديد...ليس ثوب العقاب او الخطيئة بل ثوب الخلق المستمر و اكتشاف الحياة الغير منقطع...حواء التى فضلت ان تكون ام و تخلق التاريخ على ان تجلس فى متعه الصمت الابدى بجانب من خرجت من ضلعه

ادم فى حزنه الدائم على الخلود...و حواء التى قررت ان تستمتع بالدنيا و تتذوق اندهاش الرؤيا الاولى لتكون سلسلة كاملة من البشر تبحث عن اللغز

حاول تجنيب الرواية الدينية "الرسمية" لتستمتع اكثر بالعمل و تتذوق متعه السيناريو البديل او لعله الاكثر روعة
**********************************
عندى مشكلة فى الفصول الاخيرة فيها استعجال غير مسبب...عموما جيوكندا اهتمت جدا بحواء لدرجة خنقت العمل شوية

لكن الجزء الاكثر متعه هى تلك العلاقة بين ادم و حواء , عن تلك الورقة التى يلعبها ادم دائما عندما يغضب او يجبرها على اتباع خطاه ورقة "انت من اكلت الثمرة اولا" يحيرها ذلك حينا و يغضبها حينا تخبره بان كان فى امكانه الرفض...لكنه فى وقت السلم يخبرها انه اكل الثمرة لانه تيقن انها ستخرج من الجنة و لو حدث لتبعها بلا تفكير فالمجهول مع حواء امتع من الجنة دونها

حوليات114: انسى يا عم بوب

الاخوان مش عايزين تعاطف انسانى عايزين مشاركة سياسيه...مش عايزين تقول لهم ان شهدائهم زى شهداء محمد محمود و ماسبيرو و مجلس الوزراء لا يزيدوا ولا يقلوا عنهم تؤ تؤ عايزين تلطم و تعمل شغل الحسينيات و تقول لهم ان رابعه هى هولوكست هذا العصر

مش عايزين تقول لهم ان السيسى زيه زى طنطاوى "اللى كرموه و اتعاونوا معاه" عايزين تصرخ انه كافر و دمه حلال 

مش عايزين نفصل بين رابعه و اللى ماتوا فيها و الناس اللى اتقبض عليها و بين مرسى الاهبل و الشريعه التى لا تزال فى جيبه...عندهم كله باكدج على بعضه كده

التوافق_مش_نافع ....نسى_يا_عم_بوب

حوليات113:حوار مع شاب نحنوح

"حوار مع شاب نحنوح"

-اللى حصل مع مرسى ده انكيلاب عسكرى و ده رئيس شرعى منتخب

-و انت عاجبك مرسى يعنى؟

-لا طبعا

-ايوه عايز ايه طيب؟؟ اهو مشى

-لا بس الطريقة غلط

-اممم تحب ايه؟

-كان يعمل استفتاء و يمشى بشكل شرعى

-طب ما هو مرضيش؟

-كنا نضغط عليه

-ما احنا كنا بنضغط بقالنا سنه يا ابنى...المهم عايز ايه يعنى؟

-نرجع مرسى

-اممم نرجعه و ماله؟ و بعدين

-نجبره يعمل استفتاء او انتخابات رئاسية مبكرة

-يعنى نرجعه عشان نخلعه؟؟

-اه بس يمشى بشكل شرعى

-متشكرين جدا على رأيك ده...اتفضل اقعد جنب الوالدة بقى لما نعوز اراء سديدة هنجيب حضرتك

حوليات112: التشكيك في السلطة

التشكيك في السلطة
تأليف: مجموعه كبيرة من اعلام الليبرالية
من ضمن مجموعه "مفاهيم الليبرتارية وروادها" المكونه من 7 كتب
100 صفحة

مش بحب اقرا "تناتيش" ...انا طبعى فى القراءة مختلف شوية مش بحب اقرا مقالات مقطعه او مجتزءة من مكانها الاصلى و مجمعه على حسب موضوعها

فكرة مجموعه الكتب دى انها تجمع مقالات لاعلام الليبرالين فى موضوع محدد...و هى للوهله الاولى تبدو فكره رائعة لكن التنقل السريع من فكر لفكر و من مؤلف لمؤلف خاصه فى ظل عدم قراءتى للكتب الاصلية -فيما عدا كتب سيتورات- جعل متعتى قليلة نوعا
*******************
فى كتاب سلسلة اكسفورد عن "الاناركية" جزء ذكرنى بالكتاب
https://www.goodreads.com/review/show/463222026

يحدثنا كولين وارد عن ان الليبراليه فى اصلها هى جزء من الاناركية تطورت بشكل ما و تمايزت عن غيرها من نفس ابناء الاناركية

فى هذا الكتاب مجمع مقالات عن مبدأ الليبرالين فى "التشكيك فى السلطة" و بها تستطيع ان تجزم ان لا يوجد شئ مسمى حكومه ليبراليه على الاقل فى الليبرالية التقليدية...فالليبرالى "التقليدى" يحتقر الحكومات عموما و هى فى احسن الظروف شر لا بد منه و فى اسوءها مجموعه من اللصوص و منفقى الضرائب العامة 
******************
عيب الكتاب فى رأيى انه بيتبنى الليبرالية العتيقة..مش معقول نرجع لكتب القرن ال19 عشان نطلع منها افكارها فى عصرنا ده...اظن اننا فى حاجة لكتب اكثر حداثة


لتحميل الاجزاء ال7 معا
mediafire

حوليات111:مغامرة العقل الأولى

مغامرة العقل الأولى

المؤلف: فراس السواح

386 صفحة

حين تحل الاسطورة محل التاريخ و الدين و تفسير ظواهر الطبيعة...هكذا سر بنا فراس السواح بين الواح الفخار و المخطوطات المتفرقة يجمع بين كسرات لوح فخارى ظل نصفه فى برلين و نصفه فى لندن و كسراته بين ارض العراق و سوريا ليكمل لك صورة قديمة قدم الزمن لكنها مازالت مبهرة محتفظة بالالوان و الحركات فى ذلك العصر السحيق حين ابدع الانسان فى نسج الاساطير لتحل محل ما لم يجد العقل البشرى له من حل...مرات مشتق من نص اقدم و مرات يضيف لمسات عبر العصور و فى مغامرة العقل الاول تلك تطل لمحات ثابته بين الاديان بشكل غريب استدعى الدراسه فى ذلك الكتاب الممتع الشقى الجرئ و يستدعى مزيد من الدراسة فى كتب اخرى...فوجه التشابه الصارخ يمنعك ان تبرر ذلك بتوارد الافكار و كفى و الطريقة التى اتبعها فراس السواح كانت شديدة الامتاع و الذكاء فالقصه واحدة فى 3 نصوص ل3 حضارات و تستطيع ان ترى رؤيا العين مراحل التطور اليسير شكلا و ذلك الثبات و الجمود موضوعا "قراءة هذا الكتاب صفعة حسية للادراك" هكذا اخبرنى صديق فى القراءة و هكذا اعلن انه كلام صحيح حتى النخاع الكتاب عموما من الكتب "القليلة" الشيقة فى علمالميثولوجيا الذى حبسه بعض الاكاديمين فى رفوف الكتب احيانا , و اكتفى المترجمين دول تحليل و تفسير لها احيانا الاسطورة حين تكون اكثر من مجرد قصة

حوليات110:الفتنة الكبرى 2 طه حسين

الفتنة الكبرى الجزء التانى: على و بنوه
المؤلف طه حسين
250 صفحة

و انا فى المدرسة و بالتحديد فى اولى ثانوى عام كان عندنا مدرس عربى و دين من النوع المتحمس شوية...كنا طالبات غير قارئات طبعا زى كل بنات و شباب مصر و كنت انا فى سنين العطلة فى الثقافة بحجة التركيز فى الدراسة و خلافه ايا كان اتذكر يوم كان استاذ "وليد" ده بيشرح لنا حصه دين...و اتذكر بوضوح بصوته معلنا فى ثقة غريبة: ان معركة "صفين" تلك هى اكبر كذبه فى تاريخ الاسلام و انها بكاملها دخيله على تاريخنا لم اكن على وعى ما هى "صفين" اصلا و كانت معلوماتى عنها ضئيلة لحد كبير لذا دخلت تلك الكلمات الى الوعى دون حذر كبير و الان بعد مرور 9 سنوات...الفصل اللى كان فيه 60 طالبه مازال فيه 59 طالبه -او يمكن 58 لان صاحبتى دخلت دار العلوم فاكيد درست التاريخ - عندهم قناعه ان مفيش معركة اسمها "صفين" اصلا كانت فى التاريخ الاسلامى سعيدة انى استثناء القاعدة دى ...لكن تعيسة من انه اقحم رأيه الشخصى فى التعليم و فى قناعات بناتيت صغيرة ************************** ليه حكيت القصه العجيبه الحقيقيه دى؟؟ لان من ساعه ما بدأت اقرا الفتنة الكبرى و انا بقابل ناس تحذرنى انى اقراه !!!...ناس تشتم فى طه حسين و تقول انه اصلا ملحد "عمى قال لى كده فعلا" ...ناس تقول لى ان طه حسين استعان كتير بروايات الشيعة...و ناس تقول لى ان القرايه فى الفترة التاريخيه دى اصلا غلط لانه جالب للبلبة..و ناس تقول لى اقرى براحتك بس يا ريت ما تقوليش لحد اللى قريته بالمناسبه يا ريت محدش يستخدم الاسلوب ده فعلا لانه حمسنى -رغم ملل الكتاب فى كثير من اجزائه- انى اكمله للاخر مهما كان الثمن او العواقب ************************* و الحقيقة انه كتاب يستحق المجهود لانه يجلب لك ببساطة متعه التفكير و يتيح لك طه حسين بطريقه تفكيره المبنيه على الشك اولا اكثر من رواية لنفس الحدث فيفكر معك و يجعلك شريك فى التفكير و جريمة التدبر و استرجاع جزء هام جدا ليس فقط من تاريخنا لكن ايضا من السياسة و الدين لم تكن هناك شيعية او خوارج او سنية فى عهد النبى او عصر الخلفاء الاول لكن تلك الملحمة فى ما يزيد عن ثلاثون عام خلقوا حالة مختلفة سياسية فى المقام الاول ثم دينيه فى عصور لاحقة كيف اصبح للخوارج ثأر عن الشيعة...و للشيعة ثأر عند الخوارج..و للاثنين ثأر عند بنى اميه ...و لبنى اميه ثأر عند الشيعة ...و ما ترتب على ذلك فى عصور الاسلام المختلفة كيف تحولت الخلافة الى ملك؟؟ و كيف تحول الخليفة الى ملك؟؟ تلك ببساطة هى قصه الكتاب...ما كتبه طه حسين ليس نبش فى كتب التاريخ بلا هدف او اثارة لفتنة قديمة نائمة بل بيان لكيف أثرت تلك السنوات القليلة فى عمر الاسلام فى مستقبله و فى حاضرنا كيف تشبث الكل برأيه و رأى دائما فيه الحق...كيف قتل الالالف من المسلمين...و الاهم الاهم: كيف نتعلم من هذا كله فى حاضرنا الاقل تعقيدا

حوليات109: الفتنة الكبرى 1 طه حسين

الفتنة الكبرى الجزء الاول: عثمان
المؤلف طه حسين
232 صفحة

قال قائل يوما: ان المؤمن لا يمكن ان يكون باحث...و ان الباحث لا يمكن ان يكون مؤمن, فالايمان الراسخ و البحث دون تحييز على طرفى النقيض لكن ها هو طه حسين يصنع شبه معجزة و يناقش التاريخ الاسلامى "شديد الحساسية" بقلب المؤمن و روح الباحث معا فينجز لنا كتاب يستحق الاطلاع و الوقت و التركيز حين تتناول قضية شائكة فى التاريخ العربى و الاسلامى كقضية "عثمان" و خلافته و ما تلاها من ثورة ادت الى مقتله فانك عاده ما تتحيز الى مدرسة من اثنين : فاما مدرسة اهل العادة و تجد نفسك قد قدست كل الصحابة و لكنك تصطدم بتلك الحقيقة الراسخة بين هناك فتنه قامت بالفعل بين هؤلاء...او تتخذ مدرسة المستشرق الذى يتحرر من اعباء الايمان و الاحترام الدينى فيناقش و يناظر و يصدر الاحكام لكن مع طه حسين تتطبخ مدرسة ثالثة: هى المؤمن المفكر ...الذى يناقش و يحلل و يتحول ل ديكارت جديد يشك اولا ثم يقتنع و لكنك تحمل فى نفس الوقت قلب المؤمن الذى "يعذر" هؤلاء و يبرر لهم من خلفية احترام و ود فاذا فعل ما فعل غير عثمان ما تهاون معه طه حسين ابدا...لكنه بن عفان فى القلب و الوجدان المسلم فتجد ذاتك -وربما خروجا قليلا عن قواعد الحيادية- تبحث له الاعذار و تقدم حسن النيه و تتحلى بجميل الظن و تجد طه حسين يخبرك الا تشدد فى الحكم او تقف منهم موقف القاضى فى ضوء ما فعلته الحضارات الاخرى و ضوء مقتضيات عصر كانت السياسه فيها و علومها طفل يحبو ********************* مقدمة طويلة بعض الشئ يحدثك فيها عن شخصيات و اماكن و يهيئ لك مسرح الاحداث تمهيدا لجعلك تشاهد ما حدث عن علم و تقدير لظروف العصر و الاشخاص عموما...ستكتمل القصة بالجزء الثانى "على و بنوه" و اعتقد انه الجزء الاهم

حوليات108: الاوبانيشاد

الأوبانيشاد "الكتاب المقدس للهندوسية"
ترجمة:عبد السلام زيان
232 صفحة


 أووووم

سكون...هدوء...صفاء
****************
هكذا ينتهى كل فصل من فصول الاوبانيشاد الكتاب المقدس للهندوسية ...الديانه التى تدين بها 900 مليون شخص على الارض و مع ذلك لم نهتم قط بمعرفة ماذا يعبدون؟ ما هى افكارهم

الهندوسية تلك الديانة المجهولة لنا بسبب عدم توفر الحمية الكافيه لنا لان نقرأ عنها حتى

لكنى اشكر وول ديورانت الذى عرفنى و قربنى منها فى ثالث اجزء قصة الحضارة فى هذا الجزء الممتع عن ارض الاديان ارض الهند

و ها انا اقترب من كتابهم المقدس...لكن و يالحظ السئ تقف مجددا مشكلة الترجمة العتيده

الترجمة غير ممتعه على الاطلاق و تقريبا ترجمت عن غير النص باللغة الاولى 

فيدا ده الاسم الكبير اللى بيضم 4 كتب: ريك فيدا , سامافيدا , ياجورافيديا,اتهرفافيدا 

الاوبانيشاد بقى اشبه هو الجزء "الصوفى" فى الهندوسية ...و تعنى حرفيا: ان تجلس عن قرب بخشوع
**************
للتأريخ الشخصى..ظروف قراءة الكتاب
-ماما: بتعملى ايه يا دينا؟

-انا: "ممسكة بالكتاب" بقمع باميه!! هو مش واضح انى بقرا ؟

-ماما: ايوه بتقرى ايه يعنى؟

-انا: بقرا "الاوبانيشاد"

-ماما: ايه؟؟

-انا: الاوبانيشاد يا ماما...ده الكتاب المقدس للهندوسية حاجة كده زى الانجيل بتاعهم

-ماما: بتقرى انجيل ليه ؟؟

-انا: يا ماما مش انجيل ..ده تشبيه...المهم انه الكتاب المقدس للهندوسية

-ماما: ايوه بتقريه ليه يعنى؟

-انا: عايزانى اعيش و اموت جاهله؟؟ ده ديانه 900 مليون انسان و انا ما اعرفش عنها حاجة

-ماما: "متعجبة" كل ده و هتموتى جاهله؟؟ ...يا بنتى ذاكر شوية

-انا: حاضر من عينى...بس بعد ما اخلص الاوبانيشاد

حوليات107:أبناء الايام ل ادواردو جيالنو

أبناء الايام ل ادواردو جيالنو
ترجمة صالح علمانى
293 صفحة

و كل يوم تفتح الجرنال و تقرا: حدث فى مثل هذا اليوم....و تقطع ورقة النهاردة من نتيجة المكتب لتقرأ فى خط رفيع عن ان هذا هو مولد فلان و مقتل فلان و قيام حرب كذا لكننا تلك المرة سنقرأها Galeano style و كعادته يكون لنا جيالنو فكرة التاريخ الموازى...تاريخ تلك البقع التى قرر التأريخ النمطى ان ينساها , و تلك الاحداث الصغيرة التى تعمدنا نسيانها , و القضايا البسيطة التى غضينا الطرف عنها تعمدا حينا و حادثة حينا...لكن ها هو جيالينو يكون لنا فكرة التاريخ الاخر باجندة جديدة الطباعه قديمة قدم الشمس و كعادته جيالينو يتركك مبهورا منقطع الانفاس سعيد و مفكر الى اخر مدى و عموما هو ليس اسلوب جديد على عزيزى الذى تستطيع جمع كتبه جمعاء لتصنع منها كتاب واحد كبير باسلوبه المميز الذى لم يستطع احد تقليده معتمدا على المفارقات و المتضادات يجلب لك المتعه و السعادة و الابتسامة حينا و يخلد بقلمه الذى يترجم لكل لغات الدنيا لاحداث نراها صغيرة و يراها هو مؤثرة واضحة مهمه لا تقل عن تاريخ اوروبا التقليدى..و هنا اضرب مثال باقصوصة 8 كانون الثانى فمن هى تلك ال"مانويلا" التى كتب لها جيالينو الخلود فى كتابه؟ ماذا يهم القارئ الامريكى او الاوروبى او أنا بتاريخ الاكوادور؟ لكن ها هى مانويلا اعيش معاها فى دقيقة لاتخيل مشهد موتها و لتكون جزء من يومى ******************* جيالينو "و على طريقة ماكدونالد التى يكرهها" انا احبه

حوليات106:وكالة عطية ل خيرى شلبى

وكالة عطية ل خيرى شلبى

528 صفحة

خيرى شلبى يتجلى من جديد ستجد حيرة فى تحديد اذا كانت وكالة عطية هى يوتوبيا الاوباش ام ديستوبيا المجتمع...حين تكون داخل الجحيم ذاته فلا توجد نار يا عزيزى , و حين يكون المجتمع خالى من الشرف فلا وجود للعار , و فى داخل وكالة عطية لا يوجد مجرم او خاطئ يدخل بك خيرى شلبى فى العالم السفلى حرفيا ************************* بين حرافيش نجيب محفوظ و اوباش خيرى شلبى..هناك فارق و تستطيع بالعين المجردة ان تعرف الفرق فانت لست مجرد متفرج او متابع للاحداث بل جزء لا يتجزء من هذا العالم المختلف..و انت لا تستطيع تحسين او تطوير حياة الشودافى و اخوانه كما تمنت عائلة الناجى فجل ما تستطيع عمله هو ان تنصهر وسط هذا العالم الاسطورى لتقع فى حباله للابد *************************** بين أميات نجيب سرور و وكالة عطية خيرى شلبى...هناك تشابه كلاهما فى رأيى قرر ان يصدم القارئ المنعم على كرسى مريح فى اضاءة مريحة للعينين بما فى بلدنا الذى لا نعلم عنه سوى ما تنقله لنا الاذاعات ...و لتسمع تلك المفردات و "الحركات الصوتية" التى تشكل عالم لا تجرؤ على دخوله ************************** لا استطيع ان اتخيل ان كل ما قرأت هو فقط من بنات خيال عمنا خيرى شلبى فمن اين له بكل هذا الكم من التفاصيل و الحكايا و الدقائق و طرق السرقة المبتكرة و شغل النور و الحلب و الغجر بذكات يجلب مئات الجنيهات فى لحظات و يذهب سنوات العمر فى السجن ايضا فى لحظات و مع بطلنا الذى لم يصرح لنا شلبى باسمه فيظل "فلان" او "يا اخ" نطل على هذا العالم المتشابك الممتع لتسمع حكايا و قصص اقوى من الف ليلة و ليله و مغامرات سيف بن ذى يزن و لا تقل حقيقة عن كف يديك و اظل افكر كيف وصل خيرى شلبى لكل تلك التفاصيل؟؟ فتلك ليست كتابات كاتب يكتب فى ظل مكتب مريح و سيجارة و كوب شاى مظبوط بل كاتب يكتب من عرق الشارع و بالشارع ************************* خيرى شلبى و اخوان عصر ناصر فى قلب قصص دميانه و الشوادفى و زناتى و مسالك وكالة عطية يلقى قنبلة سياسية ...انها تلك القصة الخالدة عن ناصر و اخوان البنا و يتنبى خيرى شلبى موقف المناهض لحركات الاعتقالات بل و يخبرنا من سياق موقف درامى ممتع ان الشعب قد تعاطف من الاخوان كراهيه لنظام رأى فيه ظلم غير مبرر ..و كم اتمنى ان يكون خيرى شلبى بيننا الان لاستمع الى رأيه فى المحنه الثانية لكن الشودافى -و ما ادراك ما الشودافى- يضيف رأى خاص به فى الاخوان ليكون امثولة عبر الزمن و من هنا اتساءل عن موقف قرد دميانه من هذا التصنيف؟ :D ************************* Song Theme استمع الى قصه حب الفكهانى و فكهانيه على نغمات حب اهل الحب Egyptian Project - سقانى الغرام

حوليات105: الحادثة ل احمد ابراهيم

الحادثة ل احمد ابراهيم

من الصعب تقييم الروايات الجديدة و الكاتب الجديد ...لان القارئ بيطالب هذا الشاب ان يضاهى محفوظ و نجيب و الحكيم و جاليانو و ماركيز...و الاصعب حين يطالب الكاتب نفسه ان يكون كل هؤلاء و اكثر

و فى وضع متشابك كهذا...اكون فى وضع مشابه لحالى الان

كم كنت اتمنى ان يكون "الريفيو الاول" للحادثة على جودريدز ريفيو ايجابى...و كم كنت اتمنى ان اكون معجبة جديدة بأحمد ابراهيم اسماعيل فى انتظار اعماله القادمة

لكن لا مجال هنا للتمنى او المجاملة...فهذا ببساطة و وضوح لم يكن

كانت تلك مقدمة منطقية و استهلال لابد منه و هنا يبدأ الريفيو الفعلى
****************************
رواية الحادثة ببساطة : هى الافورة فى اقوى صورها

كل حاجة فى الرواية دى متكلفة و مبالغ فيها و اوفر و لابسه طربوش...حاله عامة من التكلف و الاهتمام المبالغ فيه و بعد -غير مبرر- عن الواقع...تقدر تقول كده: فى البدء كانت الافورة
*****************************
اللغة 

حتى انا كناقد هاوى مش دارس ولا حاجة حسيت انها اللغة الغير مناسبة على الاطلاق لنوع الاحداث و الحبكة

تخيل معايا ناس قاعدة على قهوة البورصة بيشربوا شاى بلبن و بيسمعوا حمزة نمرة و وسطهم واحد لابس طربوش...هكذا كانت حال اللغة

البطل حرامى و مع ذلك بيتكلم كأنة عميد كلية دار العلوم جامعه القاهرة !!! و اصحابة عصابة و جرابيع و "بيتحدثوا" كأنهم اعضاء مجمع اللغة العربية!!! و خد بقى كده للصبح

اذا كانت اللغة هى الوسيلة اللى بينقل بيها الكاتب افكاره الى القارئ فاعتقد ان المؤلف ظلم نفسه و ظلم القارئ و ظلم الكتاب لما استخدم لغة الاربعينات عشان يعبر عن احداث شعبوية جدا
****************************
الحبكة

باختصار: فيلم هندى...و مش فيلم هندى عادى...تؤ تؤ...فيلم هندى من القدام اللى بيخلص و البطل و البطله اخوات و ينتهى و البطل بيقول: اشهد ان لا اله الا الله قبل ما العصابة تقتله

حبكة تقليدية جدااا و مملة جدااا و متوقعه جداا و اتعملت 100 مره جداا 
****************************
طريقة السرد

فى بداية كل فصل سيضيع الراوى ربع الصفحة تقريبا فى جمل انشائية لا مبرر لها اطلاقا -فى رأيى- سوى نوع من فرد العضلات اللغوى 

و هى عاده معروفة عند الكتاب القدامى من امثال "المنفلوطى" و "يحيى حقى" و هكذا...و اتخيل انها بمثابه البكاء على الاطلال اللى قبل اى قصيدة ...عادة قديمة "سيئة" انقرضت و لا ارى فائدة من اعادتها للحياة بصراحة
**************************
احم عارفة انى "رخمة" لكن اللى فى قلبى على لسانى و بكره المجاملات

انا قريت جزء كبير منها و انا فى "المرور" باجدد الرخصة يعنى اسوء مكان فى الوجود لكن فى لحظة اتمنيت انى اقف فى الطابور لانه ارحم بكتير من اكمال هذا "الشئ" ...اجمالا تجربة سيئة للاسف

اتمنى ان يغير المؤلف اسلوبه بالكامل خاصة اللغة
(less)

حوليات104: وعاظ السلاطين على الوردى

 وعاظ السلاطين على الوردى
272 صفحة

لعن الله السياسة وساس ويسوس وسائس ومسوس، وكل ما اشتق من السياسة فإنها ما دخلت شيئًا إلا أفسدته...هكذا قيل على لسان حكيم -هو الشيخ محمد عبده- فى يوم ما على قطعة من ارض الله الواسعة و هكذا يثبت لك الوردى طيلة الكتاب فهو يبين لك ببساطة و اقناع و اساليبه المنطقية ليريك ما تفعله السياسة حين تختلط بالدين و الوعظ اخبرنى احد الاصدقاء ان على الوردى قد خدع القارئ باسم الكتاب...و اعتقد ان صديقى محق بدرجة ليست بالقليلة لان موضوع وعاظ السلاطين ذاته خالصا لم يتعدى الفصول الثلات الاولى ثم يتخذ على الوردى هذا المبدأ كمنطلق ليروى فيه نسخته الخاصه من التاريخ الاسلامى و العربى حيث لا يكتفى بسرد الاحداث انما يفعل ما فعله قبله العقاد و طه حسين حين اعملوا عقولهم ليكون التاريخ تحليلا و نقاش و ليس مجرد تواريخ و احداث ************************** و اذا كنت قد قرأت كتابى "لصوص الله ل عبد الرزاق الجبران" و كتاب "الحقيقة الغائبة ل فرج فودة" و اعجبت باحدهما او كلاهما...فاعتقد ان كتاب وعاظ السلاطين سيكون كتابك المفضل القادم ان كنت من هواه كتب السلفييه من نوعية "الناهية فى سب امير المؤمنين معاوية" و ان كنت من المؤمنين ان الشيعة هما جنس اخر من البشر لا يستحق حتى لقب الاسلام , و ان كنت من محبى التاريخ التقليدى فاعلم ان هذا الكتاب ليس افضل ما ستقرأ بل و قد تكره على الوردى بسببه فعلى الوردى ببساطة يسحب القدسية و عباءة الدين و هاله العصمة من حول التاريخ العربى و الاسلامى ليناقش و يفكر و يربط الاحداث ...و من الطبيعى الا يعجب الكثيرين بتلك الطريقة فهى تلغى عامل الجاذبية الارضية من لمسلمات ليجعلك كرواد الفضاء دائخ لكن حر طليق و ينحاز على الوردى عادة ضد التأريخ النمطى و طرقه المعتادة فى التصنيف البدائى بين الخير و الشر ************************* بعض الفصول تتناول تلك العلاقة التاريخية شديدة التعقيد بين الثورة و الدولة...اما الدين فيعمل كعامل للثقل غالبا فاما ان ينحاز لجانب الثورة فتصير الثورة الاسلامية ضد الظالمين او ينحاز -كمعظم الاحوال- الى جانب الدولة فتصير "هوجة الصعاليك" ضد الملك الشرعى او ثورة الخوارج على الدين الحنيف ************************* و يقدم الكاتب ايضا معادلة رائعة للتوفيق بين السنه و الشيعة مزود الكاتب باسباب الشقاق الاصلى...فكما يقول الانجيل "فى البدء كانت الكلمة" ففى قصتنا بين السنه و الشيعة نستطيع ان نقول ان: فى البدء كانت السياسة الشقاق السياسى و ما اتبعه من شقوق عميقة اخدت فى التعاظم بين الاجيال و نشأت العادات الاجتماعية عبر العصور لتخلق ما لم يكن متواجد فى البدء ************************ اجمل ما فى الكتاب انى استفدت منه كم هائل من الكتب الاخرى التى سأبدء بها لتكمل لى الصورة و منها كتب سيد قطب عن العدالة الاجتماعية مثلا و كتب طه حسين عن الفتنة الكبرى و ضحى الاسلام ل احمد امين باجزائه الثلاث و كتب اخرى كتاب ثرى ...من ذلك النوع الذى سيجبرك على التفكير و الاطلاع

يا طالع الشجرة ل توفيق الحكيم pdf

فى محاولة لسد فراغ فى المكتبة الاليكترونية لاعمال توفيق الحكيم نقدم لكم مسرحية "يا طالع الشجرة" ل توفيق الحكيم حصريا لاول مره على الانترنت على رفايع

للتحميل

طعم الأيام ل أمينة طلعت pdf

لاول مرة على الانترنت "طعم الأيام ل أمينة طلعت"...من رفع "رفايع" حصرى

للتحميل

خيانة القاهرة ل شيرين ابو النجا pdf

لاول مرة على الانترنت...من رفع "رفايع" حصرى

رواية "خيانة القاهرة" ل شيرين أبو النجا

للتحميل

حوليات 100: عمو -_-

عمى: عبد الناصر ده راجل حمار

انا: اممممم عبد النااااصر حمار؟؟؟ طب و محمد مرسى؟؟

عمى: محمد مرسى ده رمز الاسلام 

انا: اممممم يعنى ناصر حمار و مرسى رمز الاسلام؟؟ انا بتأكد منك اهو

عمى: اه طبعا

انا: و طبعا كمان؟؟ اشمعنى يا عمو؟

عمى: ده راجل مسلم حقيقى كفايه خطاباته و استشهاده بالقرآن

انا: "ما زالت تحت تأثير الصدمة" خطاباته؟؟؟ انت معجب بيه عشان خطاباته؟؟ و بعدين استشهاد ايه ؟؟ ده الراجل لما حب يستشهد بآية من اللى اى عيل فى ابتدائى حافظاها طلع لها ورقه من جيبه

عمى: مين اللى قال كده؟؟ متتكلميش زى البغبغان

انا: يا عمو انا شايفاه بعينى 

عمى: محصلش

انا: "فى استسلام" طيب

أثقل من رضوى ل رضوى عاشور pdf

و تتوالى المفاجأت ...احم احم نقدم لكم كتاب رضوى عاشور الجديد : أثقل من رضوى مقاطع من سيرة ذاتية Pdf لاول مره على الانترنت

للتحميل

مدونة رفايع
tags: اثقل من رضوى pdf , كتاب اثقل من رضوى pdf , اثقل من رضوى 4shared , أثقل من رضوى ل رضوى عاشور , أثقل من رضوى مقاطع من سيرة ذاتية , أثقل من رضوى mediafire

حوليات99: فى عالم موازى

فى عالم موازى: بعد ما اتفرج على اوبريت امبارح و اتقرف من مستواه الفنى و بعدين اغير و اجيب قناة الجزيرة و اتفرج على الامن و هو بيبهدل الاخوان فالكائن الثورى الصغير اللى جوايا يصحصح و يوحشنى هتاف "يسقط حكم العسكر" الحبيب و اقرر انزل مع الاخوان مش عشان مرسى الاهبل او البلتاجى ابن 60 الهرمة لكن عشان البلد ما تتعسكرش و عشان الداخليه اللى لسه بلطجية

و انا فى نص المسيرة يجى قرار الانسحاب المنطم للاعضاء فاتفاجئ انى واقفه تقريبا لوحدى و الاخوان خلعوا...اقول المبادئ هى المبادئ و انا اتظاهر و لو لوحدى و افتكر كلام سيدنا على "يعرف الرجال بالحق ولا يعرف الحق بالرجال" و يمكن اغنى بينى و بين نفسى مكمليييين...و انا عامله اسرح و اغنى كده اخد طلقة فى دماغى

يوم جنازتى بقى يقترح حد انهم يحطوا صورة مرسى فى قبرى عشان يخفف العذاب "زى ما اقترحوا مع شهداء الحرس الجمهورى" ...و بعدين بنت اخوانيه تقلب فى صورى على صورة نضيفه اكون لابسه فيها بنطلون و ببضحك قوى و مبتسمة و كلى براءة "امممم اقترح لكم صورتى و انا باكل سوشى كان شكلى بنت ناس" و تحط تحتها "شهيدة الشرعية" , ارحل يا سيسى مرسى رئيسى و يمكن علامه رابعه كمان مع انى ما موتش فى مدينه نصر اصلا

سرور ل طلال فيصل pdf

احم احم و اخيرا تتوفر رواية "سرور" ل طلال فيصل على النت 

للتحميل

رفع مدونة رفايع

tag: سرور pdf,سرور طلال فيصل 4shared , سرور طلال فيصل mediafire ,تحميل رواية سرور طلال فيصل , تحميل سرور , تحميل كتاب سرور طلال فيصل

حوليات97: مكنش اتعذر

الحقيقة ان لو المؤسسة العسكرية واثقة و متمكنه قوى مكنتش هتحتاج الاستناد على 6 اكتوبر و البروباجندا المتوقعه  و تسلم الايادى ولا كانت هتحتاج لبعث عبد الناصر من قبره عشان يحارب الاخوان

و لو الاخوان جامدين *** قوى كده مكنش وصل بيهم الحال انهم يأجروا توكتوك يعدى من تحت بيتى يغنى "الانيكلاب هو الارهاب" ولا كانت قناتهم الجزيرة تكون بكم البؤس ده و العبط الصريح كده

و لو كان عندنا شباب ثورة فعلا مؤثر مكنش هيبقى مجرد عامل حسم ينضم للجيش او الاخوان و ملوش اى قيمة تزيد عن 3 شلن من غيرهم

و الحقيقة انه مكنش اتعذر ولا باع جزر و لا قلش اسف و اعتذر :/

حوليات96:رخامة برخامة

الاخوان استخدموا حركة جديدة عندنا فى المنطقة ...بيجبوا توكتوك و مشغل "صوت مظاهرات الاخوان" على شوية "ثورة دى ولا انيكلاب" و شوية "الانيكلاب هو الارهاب" و كده يعنى...و يفضل التوكتوك مشغل بصوت عالى "الله يرحم ايام اوكا و اورتيجا يلا" و يروح اول الشارع و يرجع و بعدين يروح و يرجع و كده على طول

فى الاوقات العادية ولا بناخد بالنا لاننا اولا: منطقة زحمه مليانه دوشة , و ثانيا: لاننا بيت مشغل طول الوقت فيروز او التليفزيون او كلاهما  فمش بتسمع الشارع كتير

تكمن المشكلة ان النور قطع من شوية و المنطقة بقت هس هس و وصلت الينا اخيرا الدوشه بتاع الاخوان

احم احم...اختى و امى حاربوا الغزو الثقافى ده على طريقتهم ...جابوا موبايل صينى من اللى صوته عالى و فضيحة ده و شغلوا فى الشباك "تسلم الايادى" و غطوا على صوت التوكتوك

بصوا انا مش بكره فى حياتى قد "تسلم الايادى" دى اغنية امير الميكروباصات الاول لكن عجبنى المقاومة و الكفاح بتاع امى ...و اصلا اى حاجة تفقع الاخوان تبقى صح و ميه ميه

حوليات95: و ادعى عالبشر

و هتلاقى حد "غالبا بنت" يقول لك: ازاى بتقرا و اخلاقك لسه كده؟؟ المفروض القراءة تحسن النفس

مين التيت اللى فهمكوا كده؟؟ دا انا كل ما اقرا اكتر و كل ما اعرف اكتر يبقى نفسى امشى احدف الناس بالطوب و امشى فى الطرقات زى الدراويش بهدوم مقطعه و ادعى عالبشر الميتين منهم و الاحياء

القارئ ده شخص تعيس و النعمه...الجهل نعمه يا ابنى
**************
هتقرا فى التاريخ الحدث و تقراه هو هو بعدها ب100 سنه و بعدها هو هو ب 1000 سنه ...و تفضل تلطم للناس انتوا هيتكرر تانى و يتكرر و تفضل تلطم

هتقرا فى الادب مجتمع خيالى له مشاكله الخياليه...ترجع للواقع تلاقى مجتمع حقيقى بكوارث حقيقية

هتقرا فى علم مش موجود فى بلدك اصلا
*************
و ما زادنى العلم الا رجفه...صلاح عبد الصبور

حوليات94:الماضى نط فى وشى

و انا بقلب فى الدرج اللى عادة مش بستخدمه لقيت حاجات من زمن فات:

-لقيت البوم صور كنت اشتريته تذكار من الاقصر مليان صور من الكرنك و وادى الملوك

-لقيت عملات قديمة لدينار كويتى و فلوس من ليبيا و كده

-لقيت سماعه بايظة 

-لقيت كتاب انجازات مرسى فى 100 يوم ...اه و النيعمة ...و وراه صوره لادروغان و هو بيشكر فى الاخوان..ده انا ضحكت ضحك ..كانت ماما جابت لى الكتاب عشان انقده و اعمل عنه ريفيو و فضلت أجل فيه أأجل فيه لحد ما الراجل كله اتأجل يا عينى

#نوستالجيا 
#ترو_ستورى
#الرئيس_مرسى_الله_يرحمه 
#اردوغان_ابن_الورمة

حوليات93: التاريخ الممكن

و لكن من سيكتب التاريخ الذى كان من الممكن ان يكون....سارامجو

نفسى يا عم سارامجو انفذ فكرتك المجنونه اللى كتبتها كجملة فى وسط روايه طويله...ممكن فى يوم اقعد اكتب "التاريخ كما كان من الممكن ان يكون"...كنت هاقعد اكتب تاريخ موازى مع افتراض نتائج و سكك مختلفة

مثلا:
فى عالم موازى 

سنه 1954: كان عبد الناصر مقلبش على الاخوان...و كانوا صقفوا له زى ما عملوه قبله لنجيب ...و طبلوا لكل قرارته مقابل انه يسيب لهم الجوامع و الجماعه و "عضمة" هنا ولا هناك

سنه 2013: كان زمان مرسى بيحط باقة من الزهور على قبر "الزعيم الراحل" و يمسح دموعه بطرف منديل فرنسى مستورد من فلوسنا...و يلقى خطبة "عصماء" فى محاسن الرجل و تعاونه التاريخى مع "سيد قطب" لتحويل مصر الملكية الفاسدة الى جنة العدالة الاجتماعية
***********************
طب و الله فكرة كتاب عبقرى ....تخيل..تتتخيل

خلوها فكرة مسجلة باسمى...يمكن اكتبه فى يوم من الايام