السبت، 29 يونيو 2013

تبريرات لعدم وجودهم فى 30 يونيو

البوست ده هيزعل منى ناس:

بعد جوله سريعة على بروفيلات الفريندز لاقيت عده اسباب او لنقول تبريرات لعدم وجودهم فى 30 يونيو:

1-نوع اخوان اصلا من النوع الرسمى و ده الذ نوع لانه واضح مع نفسه و مع الناس مع انه بيرفع الضغط

2-نوع اخوان بشرطة و دول يشلوا بلد بزيها

3-نوع ثورى بس "قرفان" من الناس العادية...مش بيحب اللى رشحوا شفيق...و اى حد عنده منزلش مظاهرات العسكر لاحس بياده و يع و كده "و بيرجعوا يشتكوا انهم بعيد عن الناس"

4-نوع شباب الاحزاب "الملتزمين حزبيا" و دول بروفيلهم مسخرة زى اليويو رايح جاى على حسب كلام الحزب ...لو ادى اشاره خضرا تلاقى 20 بوست مدح فى 30 يونيو ورا بعض..و مع اول قلق فى الحزب يشتغل على طريقة لف و ارجع تانى

5-نوع من بتوع "انا لا مع دول ولا مع دول" و ده نوع وسطى متميع كده طول عمره متعرفش هما عايزين ايه اصلا

6-نوع موافق على اهداف يونيو بس خايف من العنف..و الغريب ان النوع ده اغلبه ولاد مش بنات !!!!

7-منوعات بقى و خد كتير : انا مش نازل لانى محتاج اعمل ثورة على نفسى الاول , انا مش نازل لان البلد محتاجة ثورة فى الاخلاق مش فى السياسة !!!!!!!!!!!!!!!
**********************
رسالتى للنوع ال3 بس : لانى بعتبر نفسى منكم...وجودك بس هو اللى هيخلى المظاهرات تروح الناحية اللى تحبها...منعك بوجودك لهتافات العسكر هو الحل ...متقرفش من السرسجيه اللى نجحوا ثورتك قبل كده...و شباب ولاد البلد اللى بتقرف من شكلهم و كلامهم هما اللى بيلحقوك وقت ما بتقع مش ولاد الذوات....اهتف بعيش حريه عداله اجتماعية محدش هيعترض , شكل وجدان الناس بكلامك معاهم

4 التعليقات:

ALLELIO- موطنـــــــــــــــــــــــــــى(ma patrie) يقول...

انا مع النزول يوم 30 لكل طوائف الشعب مع انى اعلم ان الاخوان لن يتم ازاحتهم بثورة لكن سيتم ازاحتهم بانقلاب عسكرى لكن ربما الدم الذى سينساب ذلك اليوم يدفع السيسى اللى انا بدات اشك فى انتمائاتة الى التخطيط لانقلاب عسكرى على الاخوان والدفع بيهم الى اشداق السجون

اللهم خلصنا من الاخوان ومن حكمهم واعد لمصر رونقها لان بجد مايحدث الان من طوابير عيش وطوابير سولار وانقطاع كهرباء وقريبا جدا حرب المياة كل هذا لايليق بمصر العظمى صاحبة قاهرة المعز


شاكر ومقدر لحضرتك وتقبلى مرورى

karim يقول...

أنا كنت مع الثورة لحد يوم موقعة الجمل, بس بعد كده حسيت إن كل الأمور ماشيه في إتجاه غلط فقررت أعتزل كل حاجة لحد ما افهم ودلوقت بدأت أفهم. ولكن في نظر الكثير فأنا(فلول-يتيم من أيتام مبارك-لاحس للبيادة و...)
بس دلوقت الموضوع بقى أكبر من حاكم سئ أو ديكتاتور, الموضوع هوية بلد بعادتها باخلاقها بثقافتها. الموضوع بكل صراحة كبير. والأيام الجاية إن شاء الله هتبقى أحسن
-----------------------------------------
لو أنا واحد شايف إن فكرة الجواز فكرة فاشلة تنصحيني بكتب إيه علشان أغير رأيي؟
-----------------------------------------
مدونتك رائعة

د/دودى يقول...

انا اصلا مقتنعه زيك ان الجواز فكره فاشله
:D

karim يقول...

يااااا حلاوة جبتك ياعبدالمعين ...طب الواحد عايز يقرا اي وجهة نظر تانية علشان يبقى الواحد مريح ضميره برده. معظم اللي قريته -نظرة سلبية- عن الجواز باشوفه بتحقق مع ناس حوالياعايز أي حد متفائل كده -حتى لو بيكدب- علشان ابقى موضوعي قدر الإمكان, ولكن مع الأسف أعتقد إن النتيجة شبه محسومة بس برده الواحد خايف يكون قراره غلط ويندم.

إرسال تعليق

حلو؟؟ وحش؟؟ طب ساكت ليه ما تقول....