تفاصيل يوم قصيييير جدا

الخطة الاصلية ليوم 3 أبريل : المفروض انى اروح الكلية و اعمل حاجاات كتييير...احضر الراوند الجديد اللى النهاردة اول يوم فيه...اطلع قاعة الكمبيوتر و اترجم ورق و اطبعه...يعنى اليوم المفترض من 10:30 الى 2:30 فى الراوند نفسه...و يمكن من 2:30 الى 3:30 ....لكن ليس كل ما يشتهيه المرء يدركه

**************************************
اللى حصل فعلا بقى:

مشهد "1" نهار داخلى الساعة 9:30 ....صحيت من النوم بنشاط لاول مرة من فترة طويلة..بقالى كتير ما روحتش الكلية و نفسى مفتوحه بعد سده نفس طوييله لانى احضر راوند "جراحة الاطفال" اللى النهاردة اول يوم فيه...لبست تيشرت ميكى ماوس و طرحة بيضاء خفيفة عشان الحر و طبعا جزمة واطية لان ده يوم طويل و محتاج راحه

مشهد "2" نهار خارجى الساعة 10:00 ....انا فى الميكروباص محشورة اه بس فى كرسى الحمد لله -حد لاقى- معايا كتاب "صح النوم" يحيى حقى و بغض النظر ان الكتاب أقل من توقعاتى لكنى بقرا بسرعه و بشغف كعادتى ايام الامتحانات...الاجرة جنية و ربع بصيت فى المحفظة مفيش ارباع....اديت التباع 2 جنية فاخدهم بمنتهى الاريحيه و كأن دى الاجره العادية ....التلج ساح ساح ساح فى كاس اللمون بقاله ساعات و بقينا قرب اخر الخط و لسه الباقى مجاش برضه...استجمعت شجاعتى و طالبت بالباقى فؤجئت بالتباع بيدينى جنيه و يقولى لى اسف معييش فكة و طبعا كانت مفاجأة لان فى الحالات دى باخد 50 قرش و اسكت...فتحت المحفظة لاقيت ربع جنيه ...ضميرى لعب بقى هيجرى ايه لو اخدت الجنية و سكتت ...و كالعادة ضميرى الكويس ضحك عليا و رجعت الربع جنيه مش طالبه اخش النار على 25 قرش خالص ....خلينا نخش النار على حاجه محترمة على الاقل.

مشهد "3" نهار شبه خارجى الساعة 10:20 ...انا فى المترو فى طريقى للكلية , اكتشفت انى ما اعرفش السكة للراوند الجديد...اتصلت ب6 اصحابى كلهم خارج نطاق الخدمه او مش بيرد ...واضح انى مش بكتب الارقام الجديدة كعادتى ...يخرب بيت الزهايمر...المهم بعد محاولات مضنية حد رد عليا و اتشرح لى السكة اللى تبين انها معقدة اكتر مما اتخيل

مشهد "4" نهار خارجى الساعة 10:30...بلف فى الكليه و كل شوية اتوه اكتر...ادى اخر الاجتهاد و العلم ما انا كنت فى البيت بلاش هم....يااااا فرج الله حد اعرفه اهو...6 من البنات و ولد من المجموعة بتاعتى ...اقترب لاكتشف انهم كمان تايهين زيى..و بعد كثير من البحث المضنى نجد الدكتورة الصغيرة "النائب" بتاعه الراوند بتاعنا....كثير من التليفونات ينتج عنها اننا فقط اللى موجودين من اصل 40 و ينشأ السؤال الجاد: هتحضروا ولا تروحوا و خلاص....ننقسم شقين الاول يرى اننا نمشى و خلاص , و الاخر و انا معه رأيى اننا مدام جينا نحضر و امرنا لله....تشير لينا الدكتورة عشان نمشى وراها فى رحله طووويلة

مشهد "5" نهار داخلى الساعة 10:45...احنا فى مكان غريب فى المستشفى الله و اعلم وصلنا له ازاى بعد السلالم دى كلها....مازالت محاورات كامب ديفيد على التليفون مع الدكتورة اللى بتقول لنا ان الدكتور هيدرس لكوا فى مكتبه...و غلاسة منى قلت و ماله...لكن مدام الحزينة جت تفرح فايجاد المطرح شئ معقد كالعاده و بعد فصل جديد من التليفونات تخبرنا الدكتورة فى هدوء مستفز اننا نروح...لان الدكتور جه الساعه 10 "قبل ميعاد الراوند ب30 دقيقه" و ملقاش حد و روح

مشهد "6" نهار خارجى الساعة 11....مشيت من المستشفى و رحت الكلية و كالعادة البلاط مخلوع و البوابات متشاله و بيعملوا تجديدات...و ان اردت ان احكى العلاقة التاريخية بين كليتنا و البلاط فلن استطيع تلخيصها و لنكتفى بانى خلال 6 سنين شاهت عملية تغيير البلاط دى 3 مرات...و كأن البلاط هو سبب الحرب الاهليه فى لبنان و العقد الاسود فى الجزائر و سبب الغاء الراوند فى طب....انها الجودة يا عزيزى و لهذا حوار اخر يضيق به المكان و يضيق به صدرى اصلا

مشهد "7" نهار داخلى 11:05....انا فى معمل الكمبيوتر اللى كان فيه -على اخر معلوماتى يعنى- حوالى 12 جهاز متاح للطلبة باسعار رمزيه حوالى 2 جنيه فى الساعه ...نت و طباعه و كله براحتك و انا عندى شغل على الفلاشة عايز نت و عايز يطبع و عايز وورد كويس ان الراوند اتلغى عشان اشتغل براحتى بقى....استنى كده مين دول؟؟..فين الاجهزة؟؟...اااااه شالوا الاجهزه وموجود 3 بس عليهم مواظفين امال انا هاشتغل الورق ازاى؟...و ايه فايدة البلاط مدام مفيش جهاز اخلص عليه شغلى ....برضه الجودة؟؟ طيب

مشهد "8" نهار خارجى 11:40 ....انا فى البيت ما شاء الله....لا دراسة و لا خلصت الورق...طيب نتفرج على Family guy بقى...كمان الحلقة مكررة؟ و ماله اهو احسن من مفيش....


شاهد ايضا
يوم طوويل جدا
http://suchasmallaffairs.blogspot.com/2013/03/blog-post_2740.html