الجمعة، 25 مارس، 2011

زيزو vs شفيق




فى حاجه فى مخى بتجمع بين شخصيتين فى مجالين غير بعض خالص لكن بما ان هذا الهاجس سيطر عليا قررت تأريخه فى تدوينه...

اوجهه التشابه بين عبد الكابتن العزيز عبد الشافى و الفريق احمد شفيق :

1 : التعيين بعد فشل المسئول السابق...زيزو جه بعد اللى عملوا فينا حسام البدرى من خروج من البطوله الافريقيه و سلسله هزائم فى الدورى , احمد شفيق بعد اللى عملوا فينا احمد نظيف من "تنظيف" مصر من كل حاجه حتى الفلوس.

2: الغضب الجماهيرى ...فى الاهلى كان الالترس فى الملعب شكلهم مرعب لفرق افريقيا نفسها من نار و اعلام و لسان طويل لا يتحمله احد و كون تلك الجماهير الغاضبه هى اللى خلعت حسام البدرى اللى مقدرش يستحمل...الوضع مع احمد شفيق كان مشابهه بس على مصر كلها اللى خلعت احمد نظيف كالضرس المسوس فى حاله ثوره اصلا و جماهير تخلع قلب اى مسئول.

3 : ضيق الوقت...مع زيزو كانت فتره الاعداد اسبوع مطالب فيه بتغيير كل شئ من الروح المعنويه الى الخطه الفنيه لفرقه شغاله بنفس النظام لمده 20 سنه..مع احمد شفيق كان معاه حوالى اسبوع برضه لتغيير نظام البلد اللى كانت شغاله بنفس النظام لمده 30 سنه.

4: التربص الاعلامى..مع زيزو كان التمرين يحضره جميع وسائل الاعلام فى التاريخ مع تربص و مراقبه لكل ما يفعله او حتى ما يفكر فى فعله..مع احمد شفيق كان برضه الاعلام مركز معاه زياده مع مراقبه لصيقه..

5: انجازات فى فتره بسيطه .. مع زيزو على الرغم من سلسله التعادلات الا ان شكل الاهلى كان افضل كتير من شكله مع حسام البدرى ..و مع احمد شفيق الدنيا كانت اتحركت شويه بعد ركود الا ان فى الحالتين النتائج لم تكن مبهره 

6: انقسام...الاتنين انقسم عليهم الناس فى جوده ادراتهم منهم من حمل زيزو على الاعناق و منهم من طالب بعنقه ..و احمد شفيق قام الفيس بوك بحمله معاه و حمله ضده..

7: ارتياح بعد الرحيل..على الرغم من عدم اعجابى بمن خلفوا زيزو وهو جوزيه او شفيق و هو شرف الا ان كان هناك راحه بعد ان تولى السلطه لجوزيه و شرف و توفر لهم عنصر الوقت و الرحرحه و الدعم النفسى فجوزيه لو فاز او خسر يبرر له بضيق الوقت و انه بيجرب و لما تعادل زيزو قامت الدنيا و لم تقعد...و وزراه شرف التى لم اراها مبتكره او مبدعه حتى الان الا ان الشارع بيبلع لها الزلط بينما تمنى لشفيق الغلط..

8: النضاره ...اضحك براحتك لكن شنبر النضاره متشابهه فى الحالتين قوى برضه ذهبى مدور تقليدى.

9: الملامح... حط الصورتين جنب بعض كده كأنهم اخوات و الله , الشعر الابيض و ملامح الوجهه  بالجبهه الواسعه.

10: الملابس...البلوفر و القميص المفتوح دون كرافته او القميص المخطط بجاكيت دون تكلف ..

.شبه بعض صح؟؟

10 التعليقات:

اغانى الشتاء يقول...

فى رأيى انه شفيق مكنش مناسب و مكنتش مستنيه يغلط لانه هو اصلا على بعضه غلط

عليم يقول...

انهم الرجال المناسبين فى الوقت غير المناسب....شبه بعض صح؟؟
باختصار شديد هي دي العبارة اللي تعبر بصدق عن احمد شفيق عن نفسي كنت حاسس انه كويس بس مش بتاع ازمات او انقاذ يعني لو في وقت تاني كان عمل حاجات احسن اما شرف برائي هو المناسب لانه مفكرش في الفروع بل اتجه رأسا الي الاصل فكان نزوله للتحرير ( وقال انه هياخد شرعيته منه ) وكان اول حاجه اهتم بيها الامن وده اهم شئ غفل عنه د شفيق
ميرسي ع المقال

د/دودى يقول...

اغانى الشتا : عموما برضه رأيك يندرج تحت بند الانقسام مع و ضد...يعنى انا مثلا رأيى انه كان افضل بكتير من شرف اللى مقدرش يحسسنى انه اكتر من موظف او دكتور جامعه مش صاحب رؤيه يعنى

د/دودى يقول...

عليم : الاول شرفتنى و نورت رفايع...ثانيا اتفق معاك فى حته الامن دى بذات بصراحه لان واضح انه حط الموضوع ده كاولويه وصلته بسهوله للناس و قدر يرضى التحرير و يهديهم شويه..لكن متنكرش اننا اخدنا موقف مسبق لشفيق بمعنى انه ملحقش اصلا

الظل يقول...

بصراحة دى أحلى تدوينة قريتها ف الفترة دى

كلام جميل جدا وعميق جدا

أنا كمان زعلت جدا على رحيل شفيق

وشايف انه الرجل المناسب ف المكان المناسب بس الوقت مش مناسب

د/دودى يقول...

الظل : ربنا يكرمك على كلماتك المجامله ..ده ميجيش زى مدونتك الجميله و الله بستمتع بيها..

انا كمان من الناس اللى اتضيقت لما فضلوا يتضغطوا عليه بالطريقه دى و اللى يغيظ اكتر هو عدم اعجابى بالوزراه الجديده التى اراها بضعه من الموظفين غير المبدعين..

Casper يقول...

فعلا وجه الشبه بينهم عالي جدا والاتنين جم في ظروف وحشة جدا لكن من وجهة نظري فانا بقدرهم هما الاتنين جدا

______

خالص تقديري واحترامي
تقبلي مروري

Casper

د/دودى يقول...

كاسبر : اهلا بيك فى رفايع اصل انا من متابعك فى مدونتك بصراحه...

فعلا الشبه فى الظروف و الشكل غريب و انا بحبهم الاتنين و شايفاهم اتظلموا

قهوة بالفانيليا - شيماء علي يقول...

ايه داااااااااا :)
صح ...!!!
ايه الشبه الغريب دة ..!!
أنا أول مرة أنتبه للموضوع دة على فكرة ..!!
تدوينة حلوة اوي :)

د/دودى يقول...

انا برضه نطت فى دماغى من التشابهه العجيب ده...شيماء منوره

إرسال تعليق

حلو؟؟ وحش؟؟ طب ساكت ليه ما تقول....