الأربعاء، 23 مارس 2011

لصوصى الاعزاء...شكرا!!




اوعى تفتكر انى بعنوانى "لصوصى الاعزاء شكرا!!" انى اقصد ان حراميه كريما المجتمع عملوا معروف فينا لما اكثروا السرقه فدفعوا بانفسهم للهاويه و استطاعوا انهم يصحوا حاجات كانت ماتت من زمان..اوعى تظن انى باقول انهم لولا انهم ضغطوا علينا ضغط الجبال ماكناش قومنا و خلصنا منهم و من سرقه فلوسنا و حريتنا  و كرمتنا اللى راحت ردح من الزمن و اهى كانت ماشيه ...لما سرقوا عالمكشوف علانيه دون خشى او ادب على طريقه "اذا كان  عجبكم " حمسونا لدرجه ال  firing level اللى مستحيل نرجع بعدها الا لما حد فينا يختفى من الوجود...اوعى تفتكر انى بشكر من كل قلبى صفوت الشريف و عز و جرانه و جمال و علاء و كل اللى كانوا بيقلبونا كحراميه الاتوبيسات فى عز النهار يوم واحد فى الشهر انهم رجعوا حاجه كانت انتكسرت من زمان... هو الاكيد كمان انى مش بشكرهم على انهم هيوفقوا على انهم "يرموا" لينا عضمه شويه فلوس و يطلعوا يجيبوا ضعفهم فى اسبوع بعقليتهم الماليه الفذه اللى جمعت كل هذا القدر من الاموال فى زمن قياسى ...

عزيزى القارئ المسكين اللى شبعت كلام فى السياسه شفت اهو مجرد ما ذكرت اسم "اللصوص" افتكرت السياسه لانك خلاص مخك اتفرمت على كده ...انا بتكلم عن حراميه المترو انا اللى اتسرقت مش مصر..



انا اتسرقت!!! ....

فاكر التدوينه دى الاسبوع اللى فات لما قلت لكم انى اتسرقت فى المترو و اتقلبت فى البطاقه و اشتراك المترو و انى مروحتش الاستفتاء ....امبارح و انا فى الكليه مريت على امن الجامعه اللى عالباب عادى (و طبعا دول بقوا مدنيين و الشرطه مشيت ...و الله النجوم و الرتب كانت بيدينى احساس بالامان اكتر من دلوقتى لكن هى الديموقراطيه كده بقى ) و انا مشيه لقيت صورتى عالباب !!! رحت لاقيت اشتراك المترو + بطاقه الرقم القومى + كارنيه سنه رابعه !!! اتارى الحرامى -او الحراميه- بعتت ورقى عالكليه كنوع من قواعد المهنه الشريفه ...و الله العظيم انا سعيده جدا ان حتى الحراميه عندهم اصول و ان كان فى رأى بيقول ان الحرامى رمهم و ان حد تانى ابن حلال لقاهم و قرر اعادتهم ...تعددت الاسباب و الموت واحد المهم عندى انى حصلت على ما سرق منى عقبالك يا مصر ...لصوصى الاعزاء شكرا!!!

د/دودى
مدونه رفايع..مجرد رفايع

8 التعليقات:

آخر أيام الخريف يقول...

هاهاهاهاهاهاهاهاها المال الحلال ما بيضعش :)

د/دودى يقول...

البطايق الحلال ما تروحش..

غير معرف يقول...

ايه الحرامية الشرفاء دول !!
هههههههه
مبروك رجوع حاجاتك وعقبال حاجات مصر ^_^

د/دودى يقول...

اهو دول الحراميه ولا بلاش ...هى مصر ضايع منها البطاقه برضه؟؟يمكن الحرامى بتاعى يعرف يساعدها برضه الحراميه عارفين بعض

Kem يقول...

ع فكرة اخويا كل مرة يضيع المحفظة حد يكلمه و يرجعاله بس من غير الفلوس اللى جواها و الغريب انهم بيبقوا ناس اغنيا و محترمين افتكر انهم يبلاقوها بعد الحرامى ما ياخد الفلوس و يرميها ماهى الاورق دى تعمله مصيبة برضو
فكرتينى زمان فى المدرسة مرة واحد اصغر منى قالى انه دخل عليه حرامى فتح الحصالة بتاعته اخدت منها 20 جنيه و ساب 15 :):):)

الظل يقول...

الف مبروووك رجوع البطاقة
على فكرة نفس الموقف بالظبط حصل مع واحد صاحبي
الفرق ان الحرامى بعتله الحاجات على البيت
أخد العنوان من البطاقة وبعتهومله
أهم حاجة ف الحرامى ضميره

د/دودى يقول...

اغانى الشتا :نفسى مره المحفظه ترجع بفلوسها كنوع من التغيير...

د/دودى يقول...

الظل : و كمان الحاجه رجعت عالبيت ؟؟ ده ايه السرقه الفول اوبشن دى بخدمه التوصيل للمنازل

إرسال تعليق

حلو؟؟ وحش؟؟ طب ساكت ليه ما تقول....