الاثنين، 14 مارس، 2011

انا اتسرقت!!!



انا اتسرقت!!!...اوعى تفتكر انى اقصد انى حاسه انه الثوره اتسرقت و ان الاتجاه الدينى -سواء اسلامى او مسيحى- "قلّب الثوره و جردها من احلامها الليبراليه الورديه ولا ان التعديلات الدستوريه صربعه كدابه و تلبيس للعمه للثوره هيتاكل نصها فى بين كتله الحزن الواطى الديمقراطى الجاهزه بفلوسهم و كتله الاخوان الجاهزه بقاعده جماهريه...لا لا لا خالص انا بقولك انا اتسرق فعلا!!

 و انا فى المترو و على الرغم من انه ماكنش زحمه للدرجه دى فوجئت بواحده بتزنقنى زياده عن اللزوم و بحاسه الكلب البوليسى حسيت انى هاتسرق فقررت ان اتحتاط (حلوه اتحتاط دى) و بسرعه المطر قصدى البرق حطيت ايدى على سوسته الشنطه اللى بره بما انها تحتوى على كل ما لذ و طاب للسرقه موبايل بقى و فلوس و خزنه على بابا جوه احم احم صحيح الموبايل مش نوكيا n 1500 ولا حاجه لكن العشره برضه تحكم و اعجبت قوى بنفسى بحاسه شارلوك هولمز اللوزعيه (حلوه اللوزعيه دى برضه) و خدت نفسى و شنطتى لبر الامان....و طلعت من المترو حامله اكاليل الغار (ايه الكلام العجيب اللى بقوله النهارده ده؟) و ركبت العربيه تاتاتاتااااااااااا لاقيت السوسته الصغيره مفتوحه و فاضيه (مرسى ابن المعلم زناتى اتسرق يا مينز) كان فيها التالى : عدد واحد بطاقه شخصيه رقم قومى ام صوره وحشه و عدد واحد اشتراك مترو 3 شهور خلص من اسبوع بس ناويه اجدده!!!!...اوبااااا انا اتسرقت البطاقه و اشتراك المترو بس؟؟ المحفظه فيها شئ و شويات و الموبيل لما يتسرق يجيب قرشين حلوين برضه قوم اللصه تسيب ده كله و تسرق الورق ليه؟ طبعا يؤتى الحذر من مأمنه حميت الجيب الامامى فتقلّبت من الجيب الخلفى ...

طبعا الحمد لله انها جت فى ورق و مش فى حاجه جامده لكن...
ده ادى لحاجه اخرى هامه جدا فى تلك المرحله التاريخيه من مصير بلادى يا بلادى يا بلاد امل الربيع انى مش هقدر اروح الاستفتاء للاسف و بالمناسبه دى اول كلمه نطقت بيها وسط دهشه اصحابى و هى : ايه ده؟ انا كده مش هاروح الاستفتاء؟؟...كنت هاقول ايه بصراحه كنت هاقول لا اما لا ليه فده بقى موضوع تانى...

س/ للدرجه انا انا مهمه لدرجه انا فلول امن الدوله و جماعات الاخوان و حبيب العادلى من محبسه يقعدوا سوا يتفقوا عشان يبعتوا حد يسرق منى بطاقتى عشان مااروحش الاستفتاء؟!!!!! 

7 التعليقات:

عماد هلال يقول...

ممكن يكون حصل .. فيه ناس تسرق الكحله من العين.. بس أعتقد أن هذا موقف سلبى عدم الذهاب للاستفتاء .. نذهب وتقو لا لو مش مقتنعين .

د/دودى يقول...

والله كنت هاموت و اروح خصوصا انى بروح حتى الانتخابات التشريعيه بس اعمل ايه بقى؟ السجل المدنى عندنا اتحرق و صنع بدل فاقد هياخد وقت اطول مما توقعت...

غير معرف يقول...

انا حمان اتسرقت و كنت حقول لا بردوا ايه دا بقي هي حملة عشان منرحش نستفتي

د/دودى يقول...

اصحاب نظريه المؤامره مسليين قوى فى المواقف اللى زى دى يقولك ده الحزب الواطى الديمقوطراقى اتقفوا مع امن الدوله مع الاخوان عشان يلموا بطايق اللى هيقولوا لا....ههههه و الله فكره جامده

سكندري يقول...

ههههههههههههه يعني ما يسرقش غير البطاقة ، و اشترك خلص كمان
دي ايه الحرامي ده ؟
ابقي دوري عليها في المترو ممكن تلاقيها علي شباك قطع التذاكر لانه تلاقيه رمي البطاقة و الاشتراك و قعد يشتم لما قال يا بس ههههههههههه

د/دودى يقول...

حراميه تييت قوى اكتر حاجه ضيقتنى انها ست و لصه اصلى متحيزه للستات بس مش لدرجه دى...اديها خفيفه بصراحه كانت تطلع دكتوره سنان تحفه,...يعنى اتسرق و اتشتم كمان حاجه بايخه قوى

Sara يقول...

عملتي ايه طيب D: ?
ما روحتش الاستفتاء ؟؟ خسااااااااااااااارة XXD
بس أهم حاجة إن البطاقة اتسرقت ...أهو عشان تعملي بطاقة جديدة حلوة كدا بدل بطاقة مسجلي الخطر اللي بيطلعوها لنا D:
ربنا معاكي يا دكتورة
و خلي بالك بعد كدا و شيلي شنطة سوستة واحدة !

إرسال تعليق

حلو؟؟ وحش؟؟ طب ساكت ليه ما تقول....