حوليات 92: البوب و ماما و انا !!

-انا: البرادعى بعت تويته و قلب بيها الدنيا

-ماما: عايز ايه ابو ودان ده؟

-انا: هاااااااا بقى البوب يبقى اسمه ابو ودان...و كأن ثورة لم تقم

-ماما: ايوه عايز ايه يعنى؟

-انا: بيقول "حملة فاشية ممنهجة من "مصادر سيادية" وإعلام "مستقل" ضد الإصرار على إعلاء قيمة الحياة الإنسانية وحتمية التوافق الوطني.. العنف لا يولد إلا العنف"

-ماما: يعنى ايه؟

-انا: يعنى بيقول ان المخابرات ضد المصالحة و التوافق مع الاخوان و كده

-ماما: مش من حقه يتكلم اصلا...مدام سابنا و سافر فى بلاد التكييف بيبقى مش من حته يتكلم اصلا..و هو الاخوان كانوا بيعملوا توافق وطنى؟؟ مش اول ما مسكوا لموا شباب الثورة بناتهم قبل ولادهم فى السجن؟ مش من حقه يتكلم...اللى قاعد هنا و حاطط روحه على ايده بس هو اللى من حقه يتكلم...كنا عايزنه يفضل و هو اللى يلقى خطاب مصر فى الامم المتحدة لكن مدام سابنا مش من حقه يتكلم

-انا: ما هو له وجه نظر يا ماما

-ماما: قومى حطى بدلة بابا فى الشماعه يا بتاعه البرادعى

-انا: و انا بقيت "بتاعه البرادعى" كمان؟!! و انا مالى يا ماما

-ماما: مش انتى اللى اقنعتينى بيه...فالحة بس "البوب يا ماما..قال يا ماما..راح يا ماما" 

-انا: يا ستى انا مالى؟ هو البرادعى كان جوز اختى!!

-ماما: خليه فى كوزه لما نعوزه

-انا: حاضر  هابقى اقول له -_-
***************************
يبقى اذن تعليق اخير:

بالمناسبه ...نصيحة لك عزيزى البوب و رفيق الدرب و مثالى الاعلى "سابقا" : اعمل اى حاجه تحبها اى حاجة الا انك تقول لنا اتحدوا مع شباب الاخوان و اعملوا ثورة على النظام الظالم و برضه تجى قبلها بيومين


لو سمحت فكر باى طريقة الا دى...اولا لاننا مش قراطيس لب هنمشى وراك من غير ما نفكر...ثانيا: لانك هتأكد كل الشتيمة اللى شربتها...ثالثا: لان اللى يلبس الخازوق بمزاجه يبقى تيت و لا مواخذة


اممممم طب ما نجرب حلول البرادعى و نقعده شوية مع بتوع "انصار بيت المقدس" فاما يقنعهم و يبقى عساسيل كده و نتوافق اجتماعيا ...او هما يقتلوه...و فى كل الحالات يبقى حلينا المشكلة

استكمالا بقى لسيمفونية البرادعى ...افكاره و خططه فى التعامل مع "رابعه" كان غير واقعى و غير فعال و كل اللى عمله انه فتح البلد عالبحرى للرايح و الجاى و وزراء خارجيه بلاد مكناش بستنضفها حتى بقت تدى لينا نصايح و تتدخل فى قرارنا القومى ...و ده بالاضافه انه بيمحى احساسنا بالاستقلال كمان كان غير فعال و غير ناجح و كل اللى عمله انه خلى الاعتصام يتسع و يكبر و وصل ان المغير كان عايز يحول العشش و الخيام مبانى طوب و اسمنت 

هتقول لى و يعنى عجبك فض رابعه بالقوه و قتل اكتر من الف انسان؟ هاقول لك هو حل "فاشى" و "ابن وسخة" لكن حل امنى

اختصارا : حل البرادعى فشل فشل مبين و اثبت ان افكاره غير قابله للتطبيق الفعلى على الارض و ان عالم تويتر انضف من اللازم...و السياسه فيها قرارات "ديرتى" مش عالم ديزنى هو


انا بقيت شريرة مع البوب  لا بس يستاهل 

حوليات91: ابو الفتوح و امى !!

-ماما: "بدون مقدمات" الراجل المعفن اللى اسمه مرسى ده ورانا سنه سوده

-أنا: ما احنا اللى عملناه فيهم مش شوية برضه يا ماما...مش بعيد ربنا يكتب الشتات عليهم 40 سنه زى اليهود

-ماما: ابو الفتوح ده لو رشح نفسه هنولع فيه

-أنا: على فكرة قال انه مش هيرشح نفسه

-ماما: و صدقيته؟؟

-أنا: واى نوت يعنى؟؟ هو اخوان بشرطة بس اظن صادق

-ماما: ده راجل *** و طرى 
***********************
و زى ما انتوا شايفين اى حوار فى بيتنا بيبدأ بمرسى "حاجة كده زى البكاء على الاطلال لازم يكون فى بداية اى قصيدة" ...و بعدين الحوار يلف يلف يلف و ينتهى بشتيمة ابو الفتوح...و النعمه الراجل ده ابتدى يصعب عليا

حوليات90:هالة الكتب

بالمناسبه بقى فى كتب نسج حواليها هاله ضخمة كده زى كتب "نوال السعداوى" و "سيد قطب" و "سيد القمنى" و "فرج فودة" لكل لسبب مختلف

و اهلى كانوا بيصوروا الكتب دى ليا كأنها "شمس المعارف" كده اول ما هتفتحتها هيتحضر العفريت و مش هتعرف تطرده...هتلاقى الافكار نطت فى وشك زى الوطواط و هتقنعك بيها غصب عنك

الحقيقة ده هرى...كتب الجماعه دول فيها اخد و رد و نقاش و تنقنع بحاجات اه و حاجات لا

ههههههه اذكر يوم ما بابا شافنى لما كنت بقرا كتاب لنوال السعداوى و لاجل الحظ المنيل كان اسمه كمان "المرأة و الجنس" الراجل وشه اصفر و اخضر و قعدت اقنع فيه انه كتاب عادى و ان دماغى مش هتبوظ ولا حاجة

و يوم ما ماما شافتنى بقرا "معالم فى الطريق" وشها اصفر برضه قال يعنى تخيلت انى هاخلص الكتاب من هنا و البس خمار و اشيل صورة مرسى و شارة رابعه و انزل اهتف: الانيكلاب هو الارهاب

حوليات89: المكتبة و انا

كنت فى المكتبة امبارح بستعير كتاب "ضحى الاسلام" بتاع احمد امين...اولا جبت الجزء الاول منه من اول المكتبة و الجزء التانى من ااااااااخر المكتبة فى تصنيف تانى تماما و ملقتش الجزء التالت خالص و قررت اقريه بى دى اف و طبعا امين المكتبة لا عارف حاجه ولا فاهم حاجه اظن ولا يعرف احمد امين ده مين اصلا

و اروح الجودريدز الاقى النسخ اللى هناك معمولة غلط و اضطريت اشغل الاسكانر و ارفع الاغلفه الصح بنفسى للاجزاء الثلاثة و اعمل صفحات جديدة للكتب بالاجزاء السليمة

هو مال مفيش حد مهتم بالكتاب ده ليه كده؟؟ ده حتى كتاب مهم جدا

حوليات88: مزاجى

و انا فى راوند النسا "اللى الغياب فيه شديد" الدكتور اتأخر 20 دقيقة فقلت بدل ما انا قاعده زهقانه او بدل ما ارغى مع اصحابى فى النميمة فى خلق الله اطلع رواية خيرى شلبى اللى كنت بقراها و اكملها ...و كانت "صالح هيصة" طلعت الرواية و كملت من حيث توقفت

و كان فى الجزء ده صالح هيصة قرر انه يسيب الشغل و يستقيل بعد ما عمل "هيصة" تقيلة شوية و لما سألوه انت بتستقيل ليه؟؟ قال لهم: مزاجى قال لى سيب الشغل قلت له حاضر يا مزاجى

و سمعت دوشة جايه من الطرقة ان الدكتور جه...فاخدت شنطتى "من غير ما اخد الغياب" و قررت انى اروّح ...صحابى قالوا لى انتى اتجننتى يا دينا ؟ ده انتى لسه جاية من نص ساعه؟ و الدكتور جه خلاص اهو؟ ...بصيت لهم نظرة عميكة و قلت لهم: مزاجى قال لى سيبى الراوند قلت له حاضر يا مزاجى

طبعا هما مفهموش حاجة و لو كنت شرحت لهم 3 سنين مين هو صالح هيصه او ايه هى فلسفته او مين هو خيرى شلبى اصلا مكنوش هيفهموا

الخلاصة للاجيال اللى جاية: متقراش لعمنا خيرى شلبى جوه المستشفى خالص...تخيل لو كنت قريت الجملة دى قبل امتحان
:D

حوليات87: جريمة كاملة ل شريف عبد المجيد

 قريت الكتاب ده فى ظروف غريبة جدا...كنت فى المكتبة بستعير "ضحى الاسلام" ل احمد امين و الموظف المسؤول عن الاستعارة اتأخر...و لقيت قدامى الكتاب ده بحجمه الصغير و فكرة قصصه القصيرة جدا

كانت ساعه الا ربع كافية للانتهاء و الاستمتاع بالكتاب و دعونى اشكر الموظف على اهماله و فشله الذى اتاح لى تلك الفرصة المثيرة للاهتمام
**************************
للوهلة الاولى يبدو لك الكتاب بسيط و ربما ابسط من اللازم باقصوصات تشبه استايوس الفيس بوك...لكنك ما ان تصل الى منتصفه حتى تجد نفسك قد اندمجت به بالكامل و صرت تنسج المواقف فى ذهنك و ما ان تنتهى منها حتى تشرع فى المواقف التالى 

لكن للاسف لم يصل شريف عبد المجيد الى مستوى ادواردو جاليانو فى كتابه الامتع على الاطلاق "افواة الزمن" ستسألنى و ما هو وجه المقارنة اصلا؟ فسأجيبك انه نفس اسلوب جاليانو الرائع بالاقصوصات المركزة التى لا تتعدى السطور ال6 و لكنها تروى قصة قصيرة كاملة المعالم

فينما كان جاليانو متألقا فى كل اقصوصة تقريبا كان شريف عبد المجيد متأرجح فى المستوى بين الواحدة و الاخر

لكنها عموما تجربة ممتعه جدا

حوليات86: الحمامة ل باتريك زوسكند

نعم عزيزى القارئ نحن البشر بتلك الهشاشة و الضعف بل و التفاهه...هكذا يوحى لنا باتريك زوسكيند طيله الصفحات ليصعقنا بمدى سهولة هدم ذلك البناء المعقد الذى نفنى فيه عمرنا

يرى جوناثان "بطل قصتنا" ان الحرية هى ان تملك حمام مشترك....الغاية ان تجد مكانا بحوائط اربع تقضى فيه حاجتك دون عين تلصص او هواء بارد يجتاح بدنك...الحرية ان تملك حمام تهرب اليه حين تريد الخلوة و الاكتفاء بذاتك

ربما كان الطريق الاسهل ان يخبرنا المؤلف ان جونثان مريض بمرض ال
Obsessive-compulsive disorder (OCD) 
المشهور عربيا ب الوسواس القهرى...و مشاهدى احد افلامى المفضل 
As Good as It Gets
بطولة الرائع جاك نيكلسون الذى فاز به بالاوسكار يعرفون ما هو المرض و اعراضه
http://www.imdb.com/title/tt0119822/

لكن زوسكيند يسلك بنا الطريق الاصعب و الاكثر خطورة فهو يفترض صحة البطل النفسية و ان كل ما الامر ان كل هذا هى مجرد عاداته العادية المتحفظة...اذا فنحن جميعا ممكن ان تقع ضحية تلك المخاوف يوما

يجتاز بنا زوسكيند يوم خاص من حياة البطل الذى اخبرنا ان ما يقرب من عشرين عام من حياته مرت بلا احداث تقريبا ...يوم كان من الممكن ان يكون عاديا و نمطيا كما يحب جونثان لكن تلك الحمامة فى الممر تغير من مجرى حياته بأكملها و يهد مخططات رسمها فى هدوء و تأنى

و لكن هل يمكن ان يكون الانسان مجرد عنكبوت بسيط يمضى عمره فى صنع شبكة هشة يتخيل فيها الامان و الاستمرارية لكن اى ظرف او طارئ يهدم شبكته و تضعه مره اخرى فى العراء؟

 قصة انسانية فى المقام الاول 

حوليات85: يا محظورة

جالى خبر  ان الاخوان اتحظروا تانى...ياااااه انا سعيدة انى دخلت اولى كليه و هما واخدين على دماغهم و هاطلع منها و هما واخدين على دماغهم و كل اللى شفته فى السنين اللى فى النص اثبت لى ان ده مش ظلم ولا حاجة

بالمناسبة بقى احنا فى مظاهراتنا ب"يسقط حكم العسكر" كان عندنا مطالب معروفة , كان فى الاول هدفنا : تحديد ميعاد للانتخابات...و فى فى المظاهرات المتأخرة كان هدفنا تقديم موعد الانتخابات و تقصير المدة الانتقالية

الاخوان عايزين ايه بقى؟؟؟ عايزين انتخابات ولا عايزين مرسى؟ اصلهم لو عايزين انتخابات-باشراف دولى- انا ممكن انزل معاهم و اشيل شعار رابعه لو عايزين كمان...انما لو عايزين مرسى يبقى من حقى شرعا انى ادلق عليهم مياة وسخة

احنا انكلاب و انكلابيين و ولاد 60 فى 1500 ...يعنى مينفعش تنزلوا قدامنا فى الانتخابات...لو الاخوان نزلوا الانتخابات تبقوا معترفين بالانكيلاب و كده يا كابتشن...قاطعوا الانتخابات و ريحوا دماغنا

يا محنى ديل العصفورة ...جماعتهم رجعت محظورة

حوليات84: العسكرى الاسود

ريفيو رقم "1" بتاريخ 8 اغسطس سنه 2011

الحقيقه دى يمكن اقل عمل درامى عجبنى ليوسف ادريس ...حسيت انه بيحاول يقول حاجه و مش عارف
***************************
قراءة كتاب حيونة الانسان للرائع يوسف ادريس بتاريخ 14 ديسمبر 2012
***************************
ريفيو رقم "2" بتاريخ 22 سبتمبر سنه 2013

على الرغم من انى لم اطلع عليها لمرة ثانية لكن ببساطة ممدوح عدوان فتح عينى و قلبى لاحداث العسكرى الاسود لارى بها ما هو ابعد بكثير من مجرد قصه عن الانتقام

يوسف ادريس قدم لنا قصة حقيقية عن تحويل الانسان الى وحش حقيقى لا يستلذ سوى بطعم اللحم البشرى ولا يهوى سوى رئحة الدم الطازج

يقدم لنا يوسف ادريس قصة انسانية فى المقام الاول تصلح لاى عصر او زمن او بلد..قصة الضحية و الجلاد حين يفقد كلاهما انسانيته فى النهاية فيتحول الاول الى ارنب مذعور و الثانى الى وحش بلا قلب

حين يلخص لك يوسف ادريس فلسفة الزمن على لسان سيدة تنطق فى بساطة: "لحم الناس يا بنتى... اللى يدوقه ما يسلاه... يفضل يعض انشا الله ما يلقاش الا لحمه

شكرا ممدوح عدوان...شكرا يوسف ادريس

حوليات 83:حته من الموال

فى كتب بابقى نفسى اطبعها و انزل اوزعها على الناس فى الشارع تقراها ...منهم كتاب "عن الحرية" و كتاب "معالم فى الطريق" ....اقف فى ميدان عام و اقرا للناس بميكروفون يمكن يفهمونى

هتقول لى ليه سيد قطب ...هاقولك  ما هو لو صدقوه يبقوا عبط و يستاهلوا بقى...ما هو الناس لازم تفهم ورا الضحكة الصفرا دى فى دماغ شكلها ايه و فكر مصدره ايه

هتقول لى ليه جون سيتورات؟...هاقولك لانه  بيقارن الكاتب بين المؤمنين الاوائل فى الاديان ...هؤلاء من تحلقوا حول الرسل و قاوموا المجتمع و قواعده الراسخة , و بين هؤلاء المؤمنين الجدد ممن يرثون الايمان مع ملابس الوالد...مقارنه بين هؤلاء ممن اقتنعوا بعقولهم قبل قلوبهم و بين هؤلاء المترددين ممن يرهبون حتى من النقاش خوفا على ايمانهم الهش..هؤلاء من تحميهم القوانين من كتاب الكفار خوفا على عقولهم الفارغه فى الاصل

و فى الشعر اقعد قدام الاذاعة الداخلية بتاعه المترو و اجبر الناس تسمع امل دنقل و نجيب سرور يمكن الاقى ناس لمعناه الكلام يتلوه

و افضل الف بالكتب و الشعر ده على القرى و النجوع و احياء القاهرة الزحمة , وكل شبر و حته من بلدي .. حته من كبدي .. حته من موال

حوليات82: تابلت

البوست ده للذكرى...النهاردة اشتريت تابلت :) 

و ده اول كتاب اقراه عليه

حوليات81:صورة عائلية

للمواليد التسعينات و الثمانيات اقدم لكم قطعة من النوستالجيا...ده غلاف كتاب الانجليزى بتاع 5 ابتدائى



بالمناسبة دى شبه صورة عائلية....
اللى تحت بضفيرة دى تبقى: دينا "اللى هيا انا"
و اللى فوق بشكل طويل ده يبقى: نبيل "اللى هو بابا"
اللى على الجنب بتوكه زرقا تبقى: هبه "اختى الكبيرة"

اللى يفقع بقى ان اللى لابس قميص ابيض ده يبقى "على" عائلتنا مفهاش "على" ده خالص...ده دخيل يا جماعه غالبا مخابرات :D

كنت بكون فخورة قوى و انا بشرح لاصحابى فى المدرسة اننا عائلة مشهورة

حوليات80: ذهبت الى الشلال ل بهاء طاهر

تختلف تلك المجموعه القصصيه عن قصص بهاء طاهر المعتاده فهى حالمه اكثر حينا و واقعيه اكثر حينا

قصتى "اسطوره حب" و "فرحه" : قصص خياليه مرهفه كانك تشاهد فيلم من افلام ديزنى الساحره مطعمه بخيال بهاء طاهر الخصب

قصه "الملاك الذى جاء":تجمع كل القواعد الصحيحه للقصه القصيره من حيث الايقاع السريع و عنصر التشويق بالاضافه للنهايه مفاجئه ممتعه

قصه"من حكايات عرمان الكبير" :جميله و مسليه لاقصى حد..لا تستطيع ان تغلقها فى وسطها او ان تسرح بخيالك خارج موضوعها فاذا بك تنتبه كطفل صغير

قصه "شتاء الخوف" : اقرب الى الروايه منها الى القصه القصيره..السياسه بجانب الذل و الخوف هما اساسها

قصه "ولكن" تتداول عالم التاكسى المثير دائما و يصلح دوما كماده دراميه

حوليات79: البستان ل المخزنجى

دعونى اعترف بكل جراءه ان المجموعه القصصيه دى لم تعجبنى بالقدر اللى توقعته ...اصدقائى سواء هنا او فى الواقع اعجبوا بيها جدا و قريت ريفيوهات ممتازه عنها لكنها ببساطه خيبت املى

كل القصص ليست اكثر من جيده بل و طويله ممله احيانا -وهى امر شديد العيب فى عالم القصص القصيره-الا من رحمه ربه و بهذا اعنى قصه "العميان" الممتعه التى هى فى رأيى مزيج رائع بين الطيور لهتشكوك و العمى ل سارامجو

 و "خمسه دقائق للبحر"الممتازه و اكثر ما صدمنى سوء قصه البستان نفسها

حوليات78: مقدمة قصيرة عن الالحاد

ثانى تجاربى مع سلسلة اكسفورد الرائعة ...و هى سلسلة تعريفية باللغة الانجليزية

لعل اجمل حاجة فى السلسلة عموما و فى الكتاب ده خصوصا ان الكاتب متنمى للفكر اللى بيتكلم عنه

اظن كفايه قرايه عن الالحاد ل مصطفى محمود! ....بستغرب اننا كلنا -ولا استثنى نفسى- قرينا عن الرد عن الملحدين قبل ما نعرف هما مين الملحدين دول و عايزين ايه من اساسه, تاريخهم ايه,افكارهم ازاى 

استمتعت بوجهه نظر من الجانب الاخر من النهر ..و لغة الكتاب الانجليزيه البسيطة و الواضحة سهلت المهمه للغاية

بعد مقدمة قصيرة عن الاناركية ذلك الكتاب الممتع
http://www.goodreads.com/review/show/463222026

للتحميل
http://www.4shared.com/get/wO0619O3/atheism_-_a_very_short_introdu.html
*************************

حوليات77:الملهمات ل فاتحة مرشيد

حاولت فاتحة مرشيد ادخالنا فى عالم الابداع و الالهام و غزل الادب و الفن من خيوط اشعة الشمس الذهبية....حسنا لقد حاولت , لكن هل وصلت لما رسمته لنفسها و ما هيأتنا له؟؟ اعتقد ان اجابتى هى ببساطة : لا

رأيى ان فاتحة انزلقت بعيدا عن المسار و ادخلت روايتها فى دوامة قصص المسلسلات العربى فى سلسلة طويلة من الخيانة و العلاقات المتشابكة بالاضافة لقدر كبير -و غير محتمل احيانا- من التفاصيل الجنسية غير الضرورية ...و ربطت عن وعى او دون وعى الفن بالانحلال الاخلاقى احيانا و بالخيانة احيانا و بالدعارة احيانا اخرى 

لكن تميز الرواية لغة سرد ممتعه بالقطع و تحوى كم هائل من الاقتباسات 

عموما رأيى انه فكرة جيدة افسدها التنفيذ

حوليات76:آلموت ل فلاديمير بارتول

ببساطة يروى لك "بارتول" فى قالب قصة تاريخية و وسط ظروف سياسية فى ثلاثنيات القرن الماضى وقت كتابة القصة الوصفة السحرية لتصنع جندى بارع فى الارادة و فى نفس الوقت لا يملك عقل يزيد عن عقل عسكرى على رقعه شطرنج

انه علم النفس اذن....الاجابة على ذلك السؤال الكبير الذى حير قادة العالم لبناء الجيش الافضل و الاكثر وحشية و الاعلى قوة دون ان يؤدى هذا التفوق الى التمرد و العصيان

الخطوات بسيطة للغاية...وضح لهم ان مفاتيح الجنه فى يدك و انك وحدك القادر على ارسالهم , قد لا تستطيع ان تفعلها بتلك المباشرة التى فعلها بها ابن الصباح لكن -و يا العجب- تلك الطريقة مازالت تنجح فى وقتها الحاضر بقليل من التعديل فى الوصول الى هدفها 

وضح لجنودك انك -وحدك- صاحب الحق فى ملك الدنيا و انك -وحدك- صاحب القعيدة الصحيحة و انك -وحدك- المظلوم و  ان جهاد جنودك المسلح هو الحل الوحيد للحياة و ان اى سلام او استسلام يعنى الموت و الموت فقط و لكنه موت يختلف عن موت الشجعان الذين سيحظون بالفردوس

حسنا انها "آلموت" القصة الخالدة لطموح يقتل الجميع سوى صاحبه
************************
اذا كنت قد قرأت "سمرقند" ل أمين معلوف فلديك مقدمة اكتر من رائعه لقراءة تلك الرواية...فبها ستعيش مع عمر الخيام و نظام الملك و حسن الصباح لكنك بشكل رئيسى ستقع فى غرام الخيام و خياله الفنى

لكنك هنا فى "آلموت" ستركز ذهنك فى صديق الخيام اللدود و تدخل بقدميك الى داخل القلعة الحصينة التى حدثنا عنها "يوسف زيدان" فى كتابه الاجمل دوامات التدين و بالمناسبه هو مقدمة رائعه لتعلم من هم الاسماعيليون اصلا و ما الفرق بينهم و بين باقى طوائف الشيعة الاخرى
*********************
ريفيو سمرقند
http://www.goodreads.com/review/show/207051402

ريفيو دوامات التدين
http://www.goodreads.com/review/show/572983268
********************
للتحميل
http://www.4shared.com/office/liASykfD/___.html

حوليات75:زمن الضباع

رواية زمن الضباع ل أشرف العشماوى

  هتقول لنفسك فى اول صفحات الكتاب "متقارنش بينها و بين مزرعة الحيوانات ل جورج اورويل" ...و هترجع تكرر كل كام صفحة ده لنفسك و فى الاخر صدقنى هتفشل زى ما انا فشلت

هتقول لنفسك دى حاجه مختلفه عن كليلة و دمنه ابن المفقع و هترجع تكرر كل كام صفحة ده و برضه مفيش فايدة

و هتلاقى أفة المقارنة بتنط فى دماغك للاسف
*************************************
فضلت اقول لروحى الضبع يعنى كذا و الاسد كذا و التعلب كذا...بس فى الاخر الرمزيه فى رأيى زى كروت
Rorschach test
بتخليك تشوف قناعاتك مش تشوف حاجات محدده...الرمزية عموما كأنها صفحات فاضية بتملاها باللى فى دماغك
**************************************
بس بصراحة انا محبتش الرواية بشكل عام...امممم يمكن عشان رسم الشخصيات نمطى شوية و فيها حشو و مواعظ كتير

حوليات74:سمرقند امين معلوف

رواية سمرقند ل أمين معلوف

الزمان: شهر سبتمبر 2013
المكان: مرسى مطروح
الحدث: انتهائى من الصفحة الاخيرة من سمرقند

أجلس على البحر فى ليل وافر الرياح , و بعد نظرات سريعه للتأكد من غياب عيون مراقبه او متلصصة على شاطئ المدينة الجامعية الخاص انزل حجابى ليستقبل شعرى لمحات هواء البحر بعد فراق طال لسنوات و افكر للحظة فى تلك التحفة المسماة سمرقند امين معلوف لتمر بى قشعريرة سريعه , لن نعرف ابدا ان كان سببها هو التأثر بالخيام و ايامه او بسبب الهواء البارد

و بجانبى يعلو صوت شربينى مع فرقته "نغم مصر" يشدو كلمات فؤاد حداد:باحلم انى فى اسطمبول..بالعب طاولة مع السلطان..بيحمرق اعمل مش شايف..و يِبَرَّق اعمل مش خايف..و الحظ محالف و مخالف..لو اخسر ابقى انا مسطول..لو اكسب ابقى انا غلطان

ربما لم يتكن اسطنبول مقر احداث رواية أمين معلوف لكن سلطانها ينطبق عليه و على حالى معه : كل ما ايده الزهر بتلمس...باحلم على انفاسي بتكبس..انه بيضرب و انه بيحبس..اشي بالعرض و اشي بالطول..اشي فى الفاضي و فى المليان

و ربما لم يكن الخيام يلعب مع السلطان طاولة لكنه بالتاكيد: فنان فقير على باب الله...الجيب ما فيهشي ولا سحتوت...والعمر فايت بيقول آه...والقطر فايت بيقول تووووت

و تمر فى ذاكرتى كلمات امى ناصحة "السلطان يا دينا هو من لا يعرفه السلطان, اول ما تدخلى الحاشية و الدايرة الضيقة حولين السلطة قواعد اللعبة بتتغير" ...و يمر فى ذهنى صوت ابى مرتلا القرآن بصوته الرخيم قصة سبأ و بلقيس "قَالَتْ إِنَّ الْمُلُوكَ إِذَا دَخَلُوا قَرْيَةً أَفْسَدُوهَا وَجَعَلُوا أَعِزَّةَ أَهْلِهَا أَذِلَّةً ۖ وَكَذَٰلِكَ يَفْعَلُونَ" و استرجع شرحه لى الايات بعدها

و تأتى تلك الافكار -او ربما هو تأثير هواء البحر مرة اخرى- بمزيد من القشعريرة
****************************************
الزمان: صيف 1072
المكان:سمرقند
الحدث: انه عصر الخيام

يأخذك أمين معلوف بقلم رشيق و ترجمة اكثر من رائعة لدكتور عفيف دمشقية من يدك ليدخلك عالم الخيام الرائع و بين سمرقند و أصفهان و ما بينهما تقترب منك التفاصيل لحد اللمس

ها انت تقف فى وسط بهو الملك يوزع اموال حينا , يوزع اقوات حينا , يوزع الذل حينا, و يوزع الموت كثيرا

لترى مأساة فنان رقيق الحال اقترب -ربما اكثر من اللازم- من السلطة و لا ارى فارق بين مصيره و مصير فراشة حول النار
****************************************
الزمان:نهاية صيف 1895
المكان: ايران الحديثة
الحدث: البحث عن مجلد شهير/مجهول

فى رحلة البحث عن مخطوط سمرقند يمر بك التاريخ المعاصر شارحا مناطق مظلمة من تاريخ أمة ضاع مجدها بكثير من المقدمات...و تماما كخط ايلا فى "قواعد العشق الاربعين" لم يحظ الخط الدرامى الحديث بكثير من حبى و اهتمامى و كان سبب النجمة المفقودة للاسف
****************************************
SONG theme
نغم مصرى- اسطمبول
http://www.youtube.com/watch?v=gYUg6a2d4lo

حوليات73:سيد قطب و ثورة يوليو

كتاب سيد قطب و ثورة يوليو ل حلمى نمنم

مخطئ من يظن انى قريت "سيد قطب و ثورة يوليو" بقلم حلمى نمنم...الحقيقية ببساطة انى قريت "سيد قطب و ثورة يوليو" بقلم سيد قطب

الكتاب منقسم لقسمين الاول هو سرد لقصه حياة قطب و افكاروه و تحليل مبدئى لها من بنات افكار حلمى نمنم...و الثانى هو عبارة عن 15 مقال نشر فى الجرائد المصريه بقلم سيد قطب يشيد فيها بالبطل المغوار محمد نجيب و ثورته المباركة

و عشان نكون واضحين فاكيد حلمى نمنم ليس الشخص المناسب فكريا على الاقل لقراءة تحليله لافكار سيد قطب...كما انه كغيره من غير ابناء تيار الاسلام السياسى يخلط بين التكفير و التجهيل و هى غلطة شهيرة لى شخصيا و لها مكان اخر لشرحها

و لانى كنت قررت من فترة طويلة الا اقرأ "عن" سيد قطب قبل ان انتهى من كتابات سيد قطب ذاتها..فببساطة قد تجاوزت الشق الاول من الكتاب و شددت الرحال لقراءة افكار قطب بقلم قطب نفسها تجنبا للتحييز
***************************
الكتاب يضم 15 مقال كتبت بين اغسطس و اكتوبر 1952 و هى مقالات مذهله بالنسبه لى

فببساطة لم اجد بينها اى شئ مما ادعاه الاخوان

رأيت الاخوان يصرخون عبر الزمن من تغول عبد الناصر على الديموقراطية و انقضاضه على الاحزاب و منع الانتخابات ..لكنى لم ار سيد قطب سوى انه يدعو نجيب لاغلاق تلك الاحزاب العفنه المتهتكه الفاسدة التى جلبت لمصر العار بل و يغسل يد نجيب من قتلها ليقول ببساطة ان الثورة لم تقتل تلك الاحزاب و انما ماتت بالشيخوخة

رأيت الاخوان يصرخون عبر الزمن من حبس الحريات على يد ناصر و "انقلابه" لكنى وجدت سيد قطب يدعو نجيب و "ثورته المباركة" لكتم افواه محمد عبد الوهاب "رأس الافعى" و معه محمد فوزى و كل مطربيين العصر البائد و لم يذكر ام كلثوم التى كانت ممنوعه بالفعل من الغناء انذاك

رأيت الاخوان يصرخون عبر الزمن من الظلم لهم و الاضطهاد لابنائهم و عدم وجود محاكمات عادلة على يد ناصر ...لكنى رأيت سيد قطب يدعو محمد نجيب الى ان "لان نظلم عشرة او عشرون من المتهمين خير من ان ندع الثورة كلها تذبل و تموت" لكن الفرق الوحيد ان قطب حين تحدث بها كان يقصد بها رجال غير رجاله

رأيت الاخوان يصرخون عبر الزمن عن دمويه ناصر و اندفاعه على ابناؤهم لكنى قرأت لسيد قطب يكتب ببساطة :"فلنضرب و لنضرب بقوة و لنضرب بسرعة اما الشعب فعليه ان يحفر القبور و يهيل التراب" عن اعداء ثورة نجيب المباركة
*****************************
و اسمع كلمات نجيب محفوظ فى اولاد حارتنا تتردد فى ذهنى

والله ما كرهتم الفتونة إلا لأنها كانت عليكم، وما أن يأنس أحدكم في نفسه قوة حتى يبادر إلى الظلم والعدوان، وما للشياطين المستترة في أعماقكم إلا الضرب بلا رحمة ولا هوادة، فإما النظام وإما الهلاك

حوليات72:برطمان النوتيلا pdf

برطمان النوتيلا ل فاطمة محمد العوا

للتحميل من رفعى الخاص
http://www.4shared.com/office/JJwedsXM/_-__.html 

مجموعه قصص قصيرة عن الخادمات و المهمشين ... ربما مشكلتى الكبرى مع الكتاب انه جاء "متوقعا" لحد كبير...ملئ بالاكليشيهات و القوالب الجامدة المسبقة

فدائما عنصر "الاعتداء الجنسى" و عنصر "الاهمال" و شوية حاجات فوق بعض

و كثيرا ما لمحت ملامح من
nanny diaries
بتفاصيل اكثر مصرية و شعبية

توقعت مفاجأت اكثر عند الاركان او قبيل النهايات...لكنها عموما مجموعة قصصية انسانية بشكل كبير

 لاسف مش موجوده عالنت..هى عندى ورق هاحاول ارفعها قريب

حوليات71: مولد العدرا

و كان يجى شهر أغسطس من كل سنه يحمل معاه اهم حدث فى "مسطرد" انه عيد العذراء كما ينطق به المتحذلقين و "مولد العدرا" كما ينطق به اهل البلد

و فى ظرف اسبوع تكون قد تحولت منطقة ما حول الكنيسة الأثرية الى معسكر كامل...يضم السيرك الفاشل "كما كنت ادعوه" , منطقة المراجيح و خاصة العربيات الكهربائية اللى كان الدور فيها ب3 جنيه فى عز الفقر , منطقة الحمص و الحلاوة , و طبعا منطقة بيع الصلبان كمدليات و كل الاشكال الممكنه, جانب لدق الوشم اللى اما صليب صريح على الايد للصغيرين او صور اكثر تعقيدا زى الفارس اللى بسيف او صورة لمريم و ده كان عادة للقرويين الزائرين

و زى كل سنه تشتكى عمتى "اللى بيتها جنب الكنيسة" من الناس اللى بتنام قدام بيتها و حواليه على الارض , ناس عادية جايين من سفر فارشين الملايات على الارض و بياكلوا و يشربوها و يناموا فى هدوء غريب ...و تطلع عمتى توزع المية الساقعه فى الحر ده و تهدى بالحلويات لو عندها

و يجى عمو "ملاك" صاحب بابا فى الشغل لبيتنا الهدف المعلن انه يزورنا و الهدف الحقيقى انه يلاقى مكان هادى قريب من المولد يحط فيه عياله عشان لو حب يروح مع مراته الكنيسة لوحدهم...معاهم مينا ابنهم الصغير و بنتهم اللى بحاول اعصر دماغى مش فاكرة اسمها

و تشتكى طنط مرات عمو ملاك انهم مرضيوش يدخلوها الكنيسة و افتكروها مسلمة لانها كانت غاوية تلبس "بونية" على شعرها ...و تضحك و نضحك معاها خاصه ان امى كانت بتلبس نفس شكل البونية ده فى الفترة دى

و يعيط "مينا" زى كل سنه انه عايز يدق صليب على ايده و ابوه مش راضى...و يرد زى كل سنه عمو ملاك انه مش عايز مينا يعمل كدا فى جسمه و يلمح: مش لازم كل اللى فى الاتوبيس لما تكبر يعرفوا انك مسيحى يعنى

و اطنطط لماما انى عايزة اروح المولد فتشترط انى اخد بنت عمى "الرخمة" معايا و بعد شوية برطمه اخدها و نروح مع اختى...نشم ريحة الفسيخ اللى الطوابير عليه كأنه يوم الحشر..و نتفرج على الصور خاصه صور مريم و نقارن صورها و اختلاف كل منهم كأنها صور لعشرات الشخصيات كأنهم مجموعه بنات غير بعض لكن كلهم بيض و حلوين و طيبين

نتكعبل فى الناس النايمة و نقول اسفين و يجى الرد: ولا يهمك...و نتكعبل تانى و نقول اسفين و يجى الرد: ما تبصى تحت رجلك...و نتكعبل تالت و نقول اسفين فيجى الرد: كل سنه و انتوا طيبين

و نعدى على صورة للمسيح...و نروح اخر الشارع و نرجع نلاقى عين الصورة مفتوحة...نلف نجيب ايس كريم و نرجع نلاقى الصورة عينها مقفوله...نخاف و نتخض و نكدب عيننا...و بعد ما تكرار الدورة نفسها 3 مرات نقرر اننا نقف قدام الصورة و نراقبها...و بعد دقيقة تفتح العين و بعد دقيقة تتقفل و نكتشف ان فيها موتور صغير بيعمل الحركة دى عشان كده الصورة دى تمنها 4 اضعاف اى صورة للمسيح تانية
************************
و نعزل و نمشى من مسطرد...و اكبر و البس حجاب يخلينى ما اقدرش اتحرك بحريتى من غير عيون تبص...و اكبر و يبقى عيب انى انزل موالد..و اكبر و اتصدم لما اعرف ان كل الموالد كده مش مولد العدرا بس و انى لو رحت مولد السيد البدوى مش هتلاقى وجه للاختلاف غير استبدال الصليب و صور مريم بمنتجات من نوع تانى

و اطلب من بابا لما ينزل مسطرد انه يجيب لى حمص و هو جاى...يجيب لى حمص مكيس و معلب , ازعل , اقول له ما ده بيتباع فى اى مقاله...انا عايزة العادى اللى بتوزن بالكيلو و بيتحط فى ورق مقوى شكلة وحش

و يجيب لى بابا الحمص المطلوب اكل و اضحك و اسأل بابا على مينا و عمو ملاك...و افكر اختى بحكاية الصورة اللى بتفتح و تغمض

اقدم لجوز اختى الحمص فيرفض و يقول لى مش بحب اكل المسحيين ريحته غريبه...فابص له بغضب و احاول اجمع فى دماغى كلام كتير...و ارجع اقول هو اللى يعيش زى اللى يسمع , هى الذكريات و القيمة العاطفية ممكن تتفهم او تتوزن بالعقل...و اخطف من ايده كيس الحمص و اكله بغيظ مكتوم.......و اسكت

حوليات70: البنت اللى بتفكر

النهاردة كنت عالفيس عادى بقلب فى لوحات قديمة...و فى نص كل ده طلعت لى اللوحة دى

هي ليه أثرت فيا قوى كده؟ انا بقالى نص ساعه بحملق فى تعبير وشها...و بعدين ارجع ابص على تفاصيل الورد..و ضل السلسلة على رقبتها...و فى ملمس القماش على جسما

سمعت انها اتباعت ب 85 الف دولار...و النعمه تستاهل....انا من فرط اعجابى باللوحة بفكر اطبعها و اعلقها فى اوضتى

مشمعنى الصورة دى؟؟ مع انى شفت صور كتتتتتتير قوى النهاردة...مش عارفة

فى حاجه "ما" فى الصورة دى ساحرة...شدتنى و خلتنى اتمنى اكتب كتاب فى يوم من الايام يكون ده غلافها 

******************
اللوحة اسمها "فكر" من رسم فنان البلجيكي جون فرانسوا بورتال
1818 - 1895

حوليات69: أرض و رماد

أرض ورماد ل عتيق رحمى...87 صفحة...اصدارات دار الادب

ايه هى الحرب؟ و ازاى تعرف مين كسبان فيها و مين انهزم؟...و هل لو جيش بلدك انتصر و ابنك مات تبقى كسبان؟

الحرب لا تحتاج لطائرة هلوكوبتر تعرف من فوق مين تقدم و مين تقهقر...الحرب محتاج نظرة لعين أب ابنه راح من غير سبب او مبرر ...الحرب هى انك توصل لابنك خبر ان العيلة كلها ماتت...الحرب انك تقول لطفل راح سمعه من صوت الانفجار ان الدبابات خدت صوت الناس

بعشق الكتاب اللى بتناقش الحروب من زوايا ضيقة محدودة انسانية حتى النخاع...و لسبب ما بيفكرنى برواية "الجلد" للكاتب الايطالى كورزيو مالابارته...عشرات السنين تفصل بين الروايات و الالف الكيلومترات بين افغانستان و ايطاليا...و سنين ضوئية...و تظل الحرب هى الحرب مهما حاولنا تغيير الحقيقة و اختراع الاسباب
http://www.goodreads.com/review/show/573049886
********************
قصة انسانية...فى ايام مفهاش انسانية

للتحميل
http://www.4shared.com/office/NqJnMcDI/__-__.html

حوليات68:سيف بن ذي يزن

خلاصة القول اننا عندنا فى تراثنا تحف فنية اجمل و اكثر ثراء من اى ثقافة تانية

انا بستغرب انا كنت منبهرة ازاى ب
the lord of the rings
مثلا؟

دعنى اخبرك اذن انك اذا وضعت سيد الخواتم فى كفة و فصل واحد من "سيف بن ذى يزن" فكعادته سينتصر الملك سيف بضربه واحدة بمساعدة برنوخ الساحر و سابك الثلاث و عيروض المارد و لن يستطيع سحر جاندالف سواء الرمادى او الابيض على رد جيوش جان بن ذى يزن....و لن يستطيع أراغورن مهما على ان يرد حسام الملك قان شاه البطار
*********************************
ستجد فى رحلتك مع الملك سيف المتعه و المغامرة و الخيال بلا حدود و ستنقطع انفاسك من سرعة الاحداث و التنقل بين اخبار البلاد و العباد و السابقين و اللاحقين فى بين بلاد الواق الواق و حمراء اليمن و جزيرة البنات

فى تراثنا العربى بديل رائع و مثير للعقل و العاطفة عن اى استيراد اجنبى و كل معارك بطلنا المغوار لا هدف لها سوى اعلاء كلمة الله و شهادة ان "لا اله الا الله , ابراهيم الخليل رسول الله" قبل مجئ الذى مبلغ العلم فيه انه بشر و انه سيد الخلق كلهم

و كل قصص ديزنى الشيقة عن اعلاء الحق المتقتبسة من حكايا الجن الدينماركى الذى جمعها هانز كريستيان أندرسون من الريف و من السنه العجائز حول نار الحطب...لا تساوى شئ بالمقارنة بتلك المتعه و ابواب الخيال التى يفتحه لك الراوى حين تقبع فى وسط معركة الخير و الشر , بين الفروسية و السحر , بين ازهار تغرد سبحان الخلاق فى بلاد الواق الواق

من عينة الف ليلة و ليلة لكنه اكتر تركيزا و هدف موحد يضاعف المتعة...و بيصعب عليا لما نسيب كتب بالجمال ده مركون يعتليها التراب
**********************************
طلبت من اختى الاصغر انها تستعير لى كتاب من المكتبة باسمها ...سألتنى عن اسم الكتاب او على الاقل الكاتب فطلبت منها ان تفاجئنى و تستعير لى كتاب على ذوقها كمفاجأة سارة

و بعد انتظار طويل اهدتنى كتاب ملون الغلاف بطباعه دار الشروق عن سيرة شعبية...امممم لعلها المرة الاولى لى فى القصص الشعبيه بعد سماع ابو زيد الهلالى زماان

لكن شئ ما ممتع فى قراءة قصص العصور السحيقة و جو ممتع من السحر و الشجاعه و المبالغات المفرحة

و على الرغم من "ابو سعده" لم يكن قط جزء من "قصة سيف بن ذى يزن" الا انى احملق فى "شنب" الفارس على الحصان على الغلاف ولا يزال صوت زكريا احمد يردد فى اذنى ملحا

يا مداحين هاااا
قالوا على ابو سعده
فارس معدود، على صيته، باين محسود
ومن صوته، شاب المولود،
على شنابه، يقفوا صقرين،
على دراعه، يقفوا سبعين
على كتافه، يبنوا قصرين.
يا صلاة الزين على ابو سعدة يا صلاة الزين
*******************************
سيبك انت اجمل حاجة انك تكتشف كتاب بكل هذا الامتاع بالصدفة البحتة...الكتاب حوالى 400 صفحة و حسيت انه اقصر من اللازم و الله لو طال حتى ال1000 لاكملته

للتحميل
 http://www.4shared.com/office/Tf6SPPcz/_____-__.html

حوليات67:لطالب الطب المستجد

 بص يا ابنى: انت طالب طب جديد و انا طالبة طب قديمة...و المثل بيقول اسأل مجرب ولا تسأل طبيب و انا لحظك اعتبر الاتنين مع بعض ...خد من عبد الله و اتكل عالله :

-الحق نفسك و حول اسنان, ربنا غفور رحيم يا ابنى...و جحيم 5 سنين ارحم من حجيم 7 سنين

-هتلف تلف و ترجع تسمع حصص المراجعه على طول و معاها الملخصات...اسمعهم من اول السنه و ريح دماغك

- متشتريش كتب بعد اول محاضرة ابداااااااااااااا...و اياك و ذلك القاموس العربى هتفطس من الضحك على روحك لما تكبر عليه

- متسألش طالب 6 على خبرته فى اولى هو غالبا مش فاكر حاجه و لو فاكر معلوماته قديمة...طالب تانيه افضل لك كتير

- بص على مرتب النايب و اوعى تتخيل انه هيتغير عقبال ما تتخرج

- هتوصل امتياز و لما هيجى لك برد ماما هى اللى هتجيب لك الدوا 

- اول ما هتدخل هتلاقى عيال بتقول لك متصليش فى الجامع ده و صلى فى ده...ده اخوان بس متقولش لحد
اقرا كتاب الدعوة الفردية ل مصطفى مشهور انت تفهم ال7 خطوات اللى هتمشى فيهم

-ده هتاكل فشار لما تشبع :D

- كل محاولاتك مع الدكاتره لتسهيل الامتحان هتنتهى بتلبيس الدفعه اكتر و اكتر

-مش هتبقى هاوس...انسى ..غالبا هينتهى بيك الامر للدكتور ربيع بتاع مسلسل الكبير قوى

 -ارمى يا حبيتى الجزمة الكعب العالى دى...اشترى لك كوتشى زى بتاع ابو تريكة افيد لك

- مفيش اى تعارض بين ان حد يكون "طبيب" و انه يكون "ابن كلب"...ابسلتوتلى

- نتكلم جد شوية...خد تطعيم التهاب كبدى وبائى ب بدرى بدرى و ريح دماغك لانك لو اشتغلت فى المستشفى من غيره تبقى فى خطر ..و لو اتصابت يا ابنى محدش هينفعك

- هيوصل بيك اليوم اللى تقعد تقرر ليله الامتحان هتذاكر انهى كتب و تفكس لايه...و صدقينى هتدخل من غير كتب كامله و هتنجح برضه

- ليه تمتحن مرة واحدة بفلوس مدام تقدر تمتحن مرتين ببلاش؟!...نصيحة حطها حلقه فى ودنك لما الشيطان يقول لك أجل

 -هيجى ناس غريبه كده هتقول لك احنا لجنة الجودة...لو شفتهم فى الكليه احدفهم بالطوب دول سبب لبسك انت و دفعتك يا رفيق

- متخافش هتعوض فى ال ECG
 هتفقهم الافيه ده لما توصل سنه 5

-للامتحانات الشفوى اصول و قواعد ادرسها كويس و هى فى حد ذاتها اهم من مذاكرتك...منها اوعى تألف فى وش الدكتور...كلمة "ما اعرفش" بتريح...اوعى تتكلم فى موضوع معلوماتك فيه قليلة...و فى دكاتره ماركة "و ايه كمان" دول اهرب منهم على قد ما تقدر

-انت كطالب عسول دلوقتى هتقول على الطب مهنه سامية....بعد ما تقبض هتكتشف ان سامية ماتت من زمان

-اوعى تلبسى شيك قوى فى الشفوى لو داخله لدكتورة ست...صاحبتنا كانت لابسة طقم شيك و اتمرمط بيها البلاط قدام الحيزبونه

-انت لسه هنا؟؟ و محولتش اسنان؟؟؟ يبقى مع نفسك بقى تستاهل يا برنس..برئ انا من دم هذا الطاهر

-و اسمع يا ابنى الشعر ده من كتابه حد شااف كتير كان اسمه نجيب سرور

 سبع سنين يابنى يا نارى من المنفي
سبع سواقى بتنعى لم طافولى نار
وجيت يا بنى وقالوا كان فى مستشفي
ونارى ماتنطفى الا بأخد التار

قالوا انتهى .. قالوا يعنى خلاص بقى مجنون
يا شهدى مجنون بمصر و *** أُم الطب
الطب من عهد كاس سقراط بقى ملعون
الطب هو الجنون .. بس الجنون مش طب
***********************************
و لمزيد من النصائح فى هاتشتاج عالفيس بوك كان نشيط جدا امبارح اسمه #نصائح_لدفعة_طب_الجديدة
هتلاقى عليه خلاصه السنييين للدفعات الاكبر منك :)