الأحد، 11 يناير، 2015

الكشاف

حصيلة استعارة النهاردة من المكتبة العامة

قول بغض النظر عن شكلهم الضخم ، ان و انا فى الميكروباص كنت هاقع فالست اللى ورايا سندتنى و لمت لى الكتب و قالت لى ربنا نجحك يا بنتى ، و انهم فى المكتبة عندهم قناعه انا طالبة فى كلية الاداب و يوم ما رحت و على دراعى البالطو فضلوا يبصوا لى بشك ، ولا ان مصر كلها مشغولة بانها بتصدر كتب و نازلة المعرض و انا بس بحشر روحى فى سلاسل الكتب الطويلة اللى مبتخلصش

الكشاف عن حقائق غوامض التنزيل و عيون الاقاويل فى وجوه التأويل ل كاتبه و مؤلفه محمود بن عمر الزمخشرى ...المعروف اعلاميا ب كشاف الزمخشر ، كتاب مهم رغم كل حاجة اتقالت و لسه هتتقال و لو ربنا قوى عزيمتى و خلانى انفذ خطتى و اقراه كامل يبقى ضيفت حاجة -مهمة- لرصيدى

شوف بقى لما كتاب لمؤلف معتزلى و كمان فيه خلافات على سند الاحاديث يكون فى المرتبة دى و ينتزع الاعتراف من لسان الخصم او العدو حتى فى مرحلة من مراحل التاريخ ، و من فرط جماله تتحط الهوامش للرد على اجزاء النزعة المعتزلية و السجال بالهوامش لفوق الالف صعبة هيكون مرهق بس ثرى ...و يضاف له تخريج الاحاديث عشان ميتحرمش القارئ من الدرر دى

مش معقول كل ما اجى اقرا تفسير يكتبوا (و قال صاحب الكشاف) و على ايه؟ ادى الكشاف و ادى الزمخشرى نفسهم ......و الاسلوب مش معقد زى ما انت متخيل

و طبعا القراءة الموازية للقصة الحضارة مكمل فى حاله ، غير ان الزمخشرى ب١٣٠ جنية و المجلد ده من قصة الحضارة ب٩٦ جنية و اخدناهم ببلاش ربنا يخلى لنا المكتبات العامة

1 التعليقات:

موجة يقول...

الكشاف كتاب رائع ، بالتوفيق :)

إرسال تعليق

حلو؟؟ وحش؟؟ طب ساكت ليه ما تقول....