امتياز45: دبحونى يا حكومة

"تسمع دينا جلبة بالخارج صراخ ممتزج ببكاء حار , ثم يدخل رجل يقطر دما "

-المريض: الحقونى يا حكومة , يا دكاترة , يا ناس, قتلونى ولاد الويسخة , دبحونى يا حكومة

-نائب الجراحة: الوضع ايه يا دينا

-دينا: "تفحص" 6 جروح قطعية غائرة فى فروة الرأس اصغرهم 3 سم و الاكبر 7 , امممم و 3 جروح سطحية , و جرح قطعى فى الذراع الشمال

-المريض: "يبكى" انا عايزة اعمل محضر , انا عايز تقرير..انا لو ما اخدتش حقى بالقانون هاخده بايدى

-زوجة المريض: "تنوح" عملوا فيك ايه يا صلاااح؟! قتلوك يا نور عينى؟ سيحوا دمك يا حبيبى؟

-جمع من المرضى خارج الغرفة: مسم شوف ولاد الحرام عملوا ايه فى الراجل؟ البلد سابت خلاص يا ناس

-نائب الجراحة: هتعرفى تتصرفى ولا عايزة مساعدة؟

-دينا: لا , سهلة باذن الله هى كتير بس بسيطة .. حضرتك اكتب التقرير عقبال انا ما اخيط عشان ننجز

-نائب الجراحة: طيب "يخرج"

-دينا: اقفلى يا عم الباب لو سمحتى عشان نشتغل

"ما ان تغلق الزوجة الباب , يتوقف البكاء منها و من الزوج تماما و تحل ابتسامة خفيفة"

-المريض: هاعملك فى ابن خالتك ده محضر عشان اربيه ولا يهمك

-زوجة المريض: "بدلال" ما بلاش محضر يا صيلاااح

-دينا: "تخرج الخيط من العبوة" سبيه يا مدام ياخد حقه

-زوجة المريض: حقه ايه؟ ما هو اللى معور روحه

-صوت داخلى 1: يا ابن الكااااااااااااااالب

امتياز44: هو يقولك

"يدخل شاب عصبى بصحبته والده على الترولى"

-الابن: الحقينا يا دكتورة , دخلنا عليه لقيناه مغمى عليه

-دينا: "تخطف جهاز الضغط و السماعه و تنهض" حد يجهز لى جهاز السكر بسرعه 

-صوت داخلى 3: العيان ده فيه حاجه غريبة 

-صوت داخلى 1: شوفى النبض الاول

-دينا: "بصوت منخفض" اممم مش حاساه , يمكن ضعيف و انا مش واخده بالى , "بصوت عالى" اندهو على نايب الباطنة يا جماعه و جهز يجهز المنتور

-صوت داخلى 1: طيب شوفى الضغط

-دينا: "ترتفع الزئبق الى الاعلى و تبدأ فى الهبوط" اممم الله حى

-صوت داخلى 3: العيان ده فيه حاجة غريبة

-صوت داخلى 1: حطى السماعه على صدره

-دينا: "بصوت منخفض" الله

-صوت داخلى 1: طلعى الكشاف بقى و حطيه فى عينه كده

-دينا: mmmm fixed 

-الابن: بابا ماله يا دكتوره؟

-دينا: احم دكتور الباطنه اهو هو هيقولك

امتياز 43: بلاوى الناس

-دينا: "تبلع كبسولة و تشرب قليل من الماء"

-ماما: بتاخدى ايه؟

-دينا: هيكون ايه؟ مخدرات طبعا 

-ماما: بطلى قلش , كبسولة ايه دى؟

-دينا: مكملات غذائية يا ماما , دوا فيه حديد و كاليسوم و زنك

-ماما: انتى لسه صغيرة على الحاجات دى

-دينا: صغيرة ايه يا ماما؟ يلا حسن الختام , الزنك مهم عشان المناعة و الكاليسوم عشان الهشاشة و الحديد يحمينى من الانيميا ... انا قررت انى من دلوقتى انى لما يكون فى المستقبل عندى شيخوخة كويسة 

-ماما: انتى مالك ركبتى روحك المرض كده ليه؟ ما انتى سليمة

-دينا: اللى يشوف بلاوى الناس يحافظ على روحه و يفضل يدعى لربنا انه ميحدفش على "مشتشفيات" الحكومة

مقدمة بن خلدون

انا ك دينا مبسوطة , اتبسطت لما ابتديت اقرا فى مقدمة ابن خلدون و لقيت الفصل الاول فى المقدمة هو نقد التاريخ و المؤرخين 

شوف بقى لما تبقى مثقف مبتدئ -زى حالاتى- و على قدك و حاسس ب"العار" من كتب التراث بتاعتنا , و كل ما تقرا كتاب منهم تقول هى الناس دى بتقول اى كلام ازاى كده؟! تفتح الطبرى يقولك اصل حوا سقت ادم خمره عشان ياكل من الشجرة , تفتح المسعودى يقولك اصل الملك تبع ملك اليمن كان محتل المغرب , تفتح كتب ابن اسحاق تلاقى العجب العجيب ... تتكسف ترد و تتحرج من النقد و تقول انا صغير ما اقدرش اتكلم عن الناس دى خاصة انك حتى لو جت لك الشجاعة و انتقدت صحابك هيقولوا عليك ملحد

بص بقى مولانا ابن خلدون لما ينتقد بشياكة و يوصف الناس دى انها "فحول المؤرخين فى الاسلام" لكن كل ده لا ينفى عنهم ان تحقيقهم قليل و" ان التنقيح فى الغالب كليل" و ان "مرعى الجهل بين الانام وبيل"

بيناقش و بيحلل و بيعمل شئ شحيح فى تاريخنا العربى انه -لا مؤاخدة يعنى- بيشغل مخه و بيعدى الكلام على فلتر الذهن و يبطل حجج النقل بقليل من تشغيل العقل 

و خد بقى وصية قالها فى وسط الكلام "صفحة 20 من المقدمة التى تعادل الصفحة ال51 من المجلد الاول لطباعه الدار البيضاء"

"لا تثقن بما يلقى اليك من ذلك و تـأمل الاخبار و اعرضها على القوانين الصحيحة يقع لك تمحيصها باحسن وجه و الله الهادى الى الصواب"

#ابن_خلدون_بيسلم_عليكوا_و_بيقولكوا_شغلوا_الدماغ
#انتقاد_ابن_خلدون_نفسه_مش_عيب
#التراث_فيه_حاجات_نضيفة
#شكله_عيد_عنب_باذن_الله
#مصر_اللى_عملت_المخ_ساندوشات

اذا خاصم

خد من امة الله و برضه اتكل على الله:

السيوطى و ابن خلدون , الاتنين من اهل السنة و الاتنين شايفين ان الدولة الفاطمية بنت ستين فى سبعين و ان حكام الفاطمين وحشين و رافضة و شتموا الصحابة فى الدين و ظلموا العباد فى الحكم فى الدنيا لكن فارق التصرف بين الاتنين يستحق الدراسة 

السيوطى و هو بيكتب "تاريخ الخلفاء" رفض يأرخ و يدون تاريخ خلفاء "الفاطميين" اللى مكنش ابدا بيصرح باسمهم لانه كان شايف انهم "العبيدين" نسبة ل"عبيد الله" اللى السيوطى طول الوقت بيحاول يثبت ان اصله مجوسى و يهودى -فى نفس ذات ام الوقت- و ان فقط "الدهماء" هما اللى يقولوا عليهم فاطمين و انهم لا من نسل النبي و لا حاجة , و عشان كده هو هيدون تاريخ خلفاء الاسلام بس اللى هما العباسيين حتى لو كانوا قراطيس لب و مناظر مش اكتر فى عهد الفاطمين اللى اكيد كانوا الحكام فى الواقع ..طبعا هو هيأرخ لهم غصب عن عينه لانهم كانوا عايشين لكن بيحطها فى الكتاب بشكل جانبى و مع كثير من صب اللعنات

بن خلدون بقى رأيه ان كون الفاطميين وحشيين ده لا ينفى عنهم النسب -خاصة اننا معندناش دليل ينفى- و ابن نوح حق عليه العذاب لما اخطئ و زوجة لوط اتخسف بيها الارض مدام غلطت و كونهم ليهم نسب لا ينفى عندهم الخطأ و وجود خطأ لا ينفى عنهم النسب

باختصار صعب قوى انك تذكر محاسن حد بتكرهه , سهل تكون السيوطى و صعب تكون ابن خلدون ..... اه نسيت اقولك ان محدش من كتاب اهل السنه و الجماعة اعترف بنسب "الفاطميين" الا ابن خلدون و تلميذه المقريزى فالسيوطى هنا مجرد مثال لا للحصر

الحافظ جلال الدين السيوطي (849-911): 0

عبد الرحمن بن محمد ابن خلدون (732-808 هجري) : 1

#ابن_خلدون_بيسلم_عليكوا_و_بيقولكوا_شغلوا_الدماغ
#التراث_فيه_حاجات_نضيفة_و_حاجات_لا
#اذا_خاصم_فجر

بورنامج جديد

انتوا عارفين انا لو معد برنامج رامز جلال السنه اللى جايه اعمل ايه؟ انا اخليه مخصص لرجال الدين (و حبا فى الوحدة الوطنية نخليها شيوخ و قساوسة) 

احنا ناخد الزبون من دول نقول له ده بورنامج جديد و الاجر مليون دولار بس تعالى اشرب شاى مع صاحب القناة و نحط له بنج فى الشاى -او نطلق عليه غاز منوم نتفق فيها دى مع دكتور تخدير بقى-

يصحى الزبون نفهمه انه مات و ادفن و اننا يوم الحساب , قوم ايه؟ يلاقيها حساب فرعونى يا معلم ... ناس لابسه فرعونى و معاهم واحدة لابسة ريشة ده الالهة ماعت و هتحكم فيك يا برنس

و خد بقى اسئلة من نوع: هل لوثت ماء النهر؟ هل تسببت فى البؤس لانسان؟ هل اخدت من بلادك اكثر من حصتك فى المواد الغذائية؟ هل اذيت حيوان مقدس؟ هل تسببت فى ذرف دموع جارك؟ هل استخدمت كلمات الحماس لتثير صراع؟

"واخد بالك من الاخيرة دى؟"

و نفضل نزن على دماغهم و تلقط اللقطة على وشهم لو حسوا للحظة ان عمرهم ضاع اونطة 

و يا سلام لو تتقل لحد ما مولانا يروح يقول للحاج اوزوريس عليا الطلاق ما لوثت ماء النهر 
*****************
فى الخطة دى 7 فوايد نذكر منها : ان البرنامج هيعتبر ازدراء اديان فمش هنشوف وش رامز تانى فى رمضان ولا حتى شوال , ده غير ان المشاهد دى هتعمل واجب مع اصدقائنا وعاظ السلاطين

#انا_شريرة_وش
#just_4_fun
#بلاش_مبالغات_فى_رد_الفعل

و هو وحده شويه؟

و كخطوة منى لتقليل معدلات الطلاق انا بقترح ان العريس و العروسة و هما بيكتبوا الكتاب و بيقدموا الورق التقليدى بتاع شهادة الميلاد و شهادة الخلو من الامراض يكون معاها شهادة ان العروسين -بذات العريس لا مؤاخدة يعنى- انه سمع و وعى اغنية "ليلى و نهارى" بصوت الست ام كلثوم 

و ممكن عشان نتأكد من انها مش شهادة منظر و انها حاجة من عينة i agree terms of service اللى بنوافق عليها من غير ما نبص يبقى ليها امتحان صغير , حاجة من نوعية اسئلة:

س1: الحب هو...؟ اكمل مما حفظت و وضح فى ظل فهمك للاغنية

س2: "من اللي قال عزك فى ذل خضوعي؟" ... وضح نوع الاسلوب البلاغى و الغرض الفنى منه مع بيان رأيك

س3:"الهجر اهون من عذابي في قربك" اذكر وسائل تقليل معدلات الطلاق فى ظل فهمك للاغنية
******************
هو صحيح الاغنية هينزل لها مذكرات ليلة الامتحان و س و ج و مش بعيد دروس خصوصية تلم الاغنية بسرعه بس اهو يمكن حد يغلط و يسمعها و يفهمها , و اللى يفهم الاغنية دى و "تخيش" فى دماغه عمره ما يبقى زوج حيوان

#و_هو_وحده_شوية؟!

السته البيض

لو طلع ابراهيم عيسى و قال ان صيام ال6 ايام من شوال -المعروفة اعلاميا بالسته البيض- مكروه كان اتقتل , اتقتل رسمى يعنى مش شتيمة و كلام عالحنين زى حوار التعبان الاقرع

و لو قلت لك انا -مثلا يعنى او اى حد عالفيس- ان صيام ال6 ايام دول محدش من الصحابة ولا التابعين صامها و ان فيها اشتباه بدعة, مكنتش هتكتفى بانك تعمل لى او للشخص ده بلوك و كنت هتجسد فيا الشيطان و تقعد ترجم لما تشبع و لما تخلص كل مخزون الغضب اللى جواك من اول ما مدير المدرسة كان بيطول عليك فى طابور صباح ابتدائى لحد زحمة السينما اللى دخلتها امبارح

لكن لما تقرا نفس الكتاب فى "الموطأ ل الامام مالك فقيه المدينة المنورة" يبقى عادى جدا 

(وصوم ستة أيام من شوال لم أر أحداً من أهل العلم والفقه يصومها، ولم يبلغه ذلك عن أحد من السلف، وأن أهل العلم ،،، كانوا يكرهون ذلك ويخافون بدعته، وأن يُلحِق برمضان أهل الجفاء والجهالة ما ليس منه، لو رأوا في ذلك رخصة عند أهل العلم ورأوهم يعملون ذلك)
****************
صحيح ان المالكية المتأخرة بتقول ان اجتهاد مالك يعتبر سقط على اساس ان العامة اصبحوا اكثر وعي , لكن مش بقول ان الامام مالك صح فى اجتهاده او غلط , انما بقولك فتح دماغك ربنا يكرمك 

#الامام_مالك_بيسلم_عليكوا_وبيقول_لكوا_فكروا

كان يا مكان: اخناتون

كان ياما كان كان فى ولد مصرى اسمه "أمنمحتب الرابع" ابوه سماه كده , يا دوبك وصل 12 سنه قالوا له اتفضل احكم و ابقى الفرعون ,قعد 4 سنين و هو مصرى زى المصريين بيعبد امون و مريح دماغه.... لما وصل 16 سنه طقت فى دماغه يعمل دين جديد و يدعو ل اتون الاله الموحد الاول فى حضارات الشرق المدونة

لحد كده القصة تقليدية و سمعنا عنها كتير , الفرعون الصغير هيهد المعابد العادية و يسرح الرهبان و -و يوصل بيه الامر انه يشيل رسوم امون من على جدران قبر ابوه- و "يدعو" او "يجبر" الناس على الدين الجديد اختار التعبير اللى يريحك

اعتقد انه كان ممكن ينجو بيها لولا التصرفات "السياسية" اللى هيعملها بناء على دينه الجديد ... لان اتون اله سلام و محبه ولانه اله عام مش اله مصرى محلى زى العادة بياخد عم اخناتون قرارات مختلفة اهمها التالى:

بلاد الشام بيحكمها ناس مواليه لمصر و حواليهم دويلات تانية معادية , فلما يطلبوا معونة عسكريه منا يرفض الفرعون الصغير و يقول فيما معناه ان خسارة جزء من الامبراطورية المصريه اهون عنده من انه يدخل حرب "ظالمة" يزعل بيه اتون

اتفقوا قادة الجيش مع الرهبان و خلعوا عم اخناتون و بوظوا مدينته اللى ذل انفاس الناس بيها -ذكر ان حيطان بيوت العمال اللى بنوا لاخناتون مدينته اللى بيحلم بيها تعبدات لامون- الجميل انه المفروض -على الاقل رسميا- لم يقتل بل انتقل لبيت صيفى معزز مكرم ده لا يمنع انه هيموت من الغم فى فترة بسيطة

طريقة الانتقام منه كانت جديرة بالدراسة , لانه زى ما قلت لم يقتل و لان جثمانه مدفون بطريقة لائقة و محنط فى وادى الملوك , الانتقام انه اتنزع من على التابوت بتاعه اسمه لان حسب عقيدة امون نزع اسم المتوفى يخلى روحه هائمة فى الاخره و ميعرفش يرجع للخلود

نتعلم من حياة الحاج أمنمحتب شوية حاجات : الدين مش بالعافية و عمره ما اتفرض على الناس من فوق , تدين زى ما تحب بس ابعد عن الحدود المصرية , بالحب وحده انت ملك عليا

كان يا مكان: مانى

كان ياما كان , كان فى شاب اسمه "مانى" ابوه -اللى كان متدين بطائفة روحية اسمهم المغتسلة- سماه كده , فضل مانى "يغتسل" مع ابوه و العائلة الكريمة لحد ما بقى عنده 12 سنه لحد ما قال انه نزل عليه وحى بس قال له متقولش لحد , و جه "الوحى" ده تانى لما بقى عنده 24 بس وقتها قال له روح بشر بالمانوية بقى

مانى اعترف بكل الاديان اللى قبله بس قال انها ناقصة و انه هو اخر نبى فى الوجود و قعد يكتب انجيله الخاص بيه , المانوية كانت مكس جريل من الزرادشية على المسيحية على اليهودية على الغنوصية على البوذية حاجة اوستيك يعنى

ابتدى التبشير يبقى على ودنه و وصلت المانوية الهند و ايران و فلسطين و مصر و اليونان و اسبانيا و الصين نفسها و "بلاد العرب" , و الملك الايرانى اقتنع بيها و بقى يدعمها و يفكر الامبراطور قسطنطين ,و يبدأ اتباع مانى يشتموا كل اصحاب الاديان التانية لانهم على باطل , بس لاجل الحظ الوحش -بالنسبة لمانى- ان شابور الملك ده يموت و يجى خليفه له يتخنق منه و يقتله و قسطنطين يغير رأيه و يقرر انه يبقى مسيحى و يدعو للمسيحية و تبقى الدين الرسمى

جدير بالذكر ان المانوية استمرت كأقليات فترات طويلة جدا و ذكر ان بغداد نفسها كان فيها طائفة منهم , لكن هو الدين ايه من غير دعم سياسى؟!

تخيل معايا لو عوالم موازية و مكنش حظ مانى الفقر ده بوظ عليه خطته كان زمان المانوية فين دلوقتى؟!

#اقروا_عن_المانوية_فى_الفهرست_لابن_النديم
#حدائق_النور_رواية_حلوة_برضة

كان يا مكان: الايوبى

كان يا ما كان , كان فى قائد مغوار اسمه
"الملك الناصر أبو المظفر صلاح الدين والدنيا يوسف بن أيوب بن شاذي بن مروان بن يعقوب الدُويني التكريتي" المعروف اعلاميا ب صلاح الدين الايوبى

القائد المغوار عمل حاجات كتير , معظم الناس شايفه انها حلوة و ميه ميه و شوية ناس شايفها وحشة كلها و ناس تالته شايفين انه بشر يمشى فى الاسواق و بيعمل حاجات كويسه و حاجات لا 

المهم ما اطولش عليك سيبك من اللى عمله فى حياته كلها خليك فى اخر قرار اخده , الله يرحمه خاف على عياله من الخناق اللى ياما قطع ملوك و دول فقرر انه هو اللى "يقطعها" و يدى كل واحد حته فى ايده 

فقسم لابنه الأفضل نور الدين علي دمشق , العزيز عثمان ابنه التانى على مصر ، وإمارة حلب لابنه الظاهر غازي غياث الدين، و الكرك والشوبك وبلاد جعبر لأخوه العادل، وحماة لابن أخيه محمد بن تقي الدين عمر، وحمص والرحبة لحفيد عمه شيركوه ، واليمن ل ظهير الدين سيف الإسلام طغتكين بن أيوب أخي صلاح الدين.

طيب اهو قسمها...نفعت فى حاجة؟ طبعا لا , الاخوات مسكوا فى بعض و شبعوا فى بعض شتيمة و حرب و حاول العم انه يوفق بينهم و مره ينجح و مره يفشل و اللذيذ ان من ضمن خناقتهم خلاف ضخم على مين فيهم اللى يحكم بيت المقدس -اللى كان لسه متحرر جديد- , احم احم و حصلت حادثة تاريخية لاحقة "سخيفة" للغاية لما اتفقوا خلفاء صلاح الدين اللى فى الشام مع الصليبين نفسهم انهم يخلصوهم من اعدائهم -الاخوة و ابناء العمومة- مقابل مفاتيح القدس ذاته

نستخلص من الحدوته دى شوية حاجات منها ان يخلق من ضهر العالم تيت , و الاهم ان القائد الرائع مش اللى يقود بس لكن اللى يعلم اللى تحت ايده يمشوا من غيره

مقارنة الاديان: تابو

الاديان -السماوى منها و الغير- فيها نوعين من الممنوعات , النوع الاول الممنوعات الاخلاقية حاجة من عينة لا تقتل , لا تزنى , لا تكذب ... نوع من الممنوعات هدفه تحسين نوعية حياة البشر و تنظيمها , فى بعض الاديان فى تساهل مع النوع ده نسبيا زى اديان قبائل البدائية اللى مثلا اى خطيئة من دول تدبح للاله بتاعك بقرة ولا معزة و شكرا , او زى اليهودية اللى فيها طقوس كتير للتطهر 

و النوع التانى محرمات "تابو" حاجات حرام كده من غير ما تفهم لها سبب بعينه , زى تابو القبائل الافريقية مثلا ان الحائض لو لمست شئ -اى شئ- يبقى يتحرق و محدش يستخدمه , زى تابو اليهودية لما منع "الرب" اى حد يلمس تابوت العهد فلما اتلمس عشان يتعدل بعد ما كان هيقع فعوقب الشخص ده على الرغم من ان نيته خير يعنى , فى كوريا لحد القرن ال18 كان ممنوع ان الملك تلمسه اى حاجة جديد ...و لسبب ما كانت الاديان دى ملتزمة التزام -مروع- بالتابوهات و العقوبة فيها بتنزل على الرقبة على طول

و لكل قاعدة اسثناء , يعنى مثلا ديانات الاغريق -بتاعه عمو زيوس- كان فيها تابوهاات و مفهاش اخلاق , و ديانات الصين كان فيها اخلاق و مفهاش تابوهات.. و النسب بتختلف لكن الصراحة فى سلم التطور -لو ينفع نطبق قواعد دارون على الاديان يعنى- يبقى فى قمة الهرم المسيحية و الاسلام اللى الجانب الاخلاقى اعلى بكتير من التابوهات اللى برضه موجوده لكن بنسبه اقل

#فرويد_بيسلم_عليكوا_وبيقول_لكوا_قلبوا_فى_كتبى

كان يا مكان: بيبرس

كان يا ما كان كان فى واحد اسمه "الملك الظاهر ركن الدين بيبرس العلائي البُنْدُقْدارِي الصالحي النجمي" المعروف اعلاميا بالظاهر بيبرس 

هى كتب التاريخ بتقول انه كان اشقر و عينيه زرقا و حاجة شيك قوى لكن لسبب -ما- لما اتعمل مسلسل فى مصر خلوا اللى يلعب دوره "جمال عبد الناصر" مش عارفه ليه حسام الدين مصطفى عمل الجريييمة دى 

الظاهر عمل حاجات كتير رائعة كسياسة , له دور فى عين جالوت , اعاد الخلافه العباسية -كقراطيس لب- بعد ما كانوا اندثروا , فتح النوبة اللى كانت عصية جدا على الفتح الاسلامى , عمل نهضة معمارية من اللى بجد مش اللى ليها جناحات و منقار , قول سيبك منه انه قتل قطز دى طرطشة دم واجبه لما اى حد يبنى دولة او على الاقل التاريخ بيقول كده

المشكلة مش فى اللى عمله الظاهر فعليا , المشكلة ان المصريين حبوه و قرروا يخلدوا الذكرى دى فى ملحمة الظاهر بيبرس فى سيرة شعبية طويلة على غرار السيرة الهلالية 

السيرة دى يتضرب بيها المثل فى العنصرية و الطائفية بذات ضد المسيحين اللى واضح ان مؤلفها مكنش يعرف عنها غير الصلبان و ان كل المسيحين اسمهم عبد الصليب -بيفكرنى المؤلف ده بجماعه صحابنا- الصق بيهم كل تهم الكون فى حاجة تشبه عداء شكسبير لليهود البندقية

لو اعتبرنا ان الادب مرايا للواقع او على الاقل مرايا للنفس فنقدر نقول ان مفهوم المواطنة شئ جديد على الفكر المصرى و اننا مش مسامحين زى ما تخيلنا 

المؤلف كان مطلع بيبرس حاجه كده اقرب للولى من اولياء الله الصالحين اكتر منه ملك , طول الوقت و ايات ربنا و معجزات و علامات بتحصل فى سكته عشان يوصل للحكم و مطلع شجرة الدر بنت خليفة العباسيين!!

بس الصراحة السيرة ممتعة جدا و فيها عنصر مفاجات و اثارة و شعر و خطوط درامية متوازية و تشعب يخليها مش مملة ابدااا ...بس هى تنفع مصدر للتاريخ عن بيبرس زى ما سرايا عابدين تنفع ككتاب يدرس عن حياة الخديوى اسماعيل بالظبط

#النفاق_لا_دين_له
#يا_لهوى_لما_المصريين_يحبوا_حد_او_يكرهوا

مقارنة اديان 1: الشر

فى معظم الاديان-السماوية منها و الغير- فى محاولة لقوى الشر المعروف اعلاميا بالشيطان لاجهاض الدين الوليد بدرى بدرى خاصة لما بتكون الفكرة مبنية على مبشر بشرى واحد

الحكاية بتحكى عن الامير سدهارتا اللى قعد تحت شجرة و حلف يمين طلاق ما يقوم الا لما يوصل للمعرفة , بتاخد قوى الشر بالها فتهز الارض تحته 6 مرات و حط قدامه كل مغريات الدنيا الا ان قلب العابد -حسب التعبير الاسطورى- "بقى ساكنا كبرعم اللوتس فوق مياة بحيرة صافية" و تجى القوى تتطلع عليه عفاريت و تنانين فيفضل متأمل زى ما كان و فى الاخر يوصل لمرحلة النور فتحول الشجرة العادية لشجرة الاستنارة , و يتحول سدهارتا ل "المستنير" بوذا

و فى الانجيل حدوته طويلة يعرفها اصدقائى المسيحين او اى عارف بالانجيل عموما فى اخرها الجملة الشهيرة على لسان المسيح و هو بيقول للشيطان "ليس بالخبز وحده يحيا الإنسان، بل بكل ما يخرج من فم الرب يحيا الإنسان" و فى جزء اخر "اذهب يا شيطان! لأنه مكتوب: للرب إلهك تسجد وإياه وحده تعبد"

و فى التراث الاسلامى قصة واردة فى كتب التراث -و هى قصة مغضوب عليها نسبيا مع ابن تيمية مش بيشوف انها عيب فى حاجة- قصة سميت اصطلاحا ب"قصة الغرانيق" , قول سيبك منها لان عليها خلاف شوية .. فى قصص تانية بيطلعوا فيها ابليس مجسد و بتأمر على النبى مش عن طريق الوسوسة بس

في سيرة زرادشت نبى ديانة الزرادشتية المزعوم برضه نص عن قصة مشابهة "وعندما شب على الطوق جاء الشيطان لكي يجربه ووضع في يده سلطان الأرض كلِّها مقابل تخلِّيه عن مهمته القادمة، ولكن زرادشت نهره وأبعده عنه"

امتياز 42: المروحة

-صوت داخلى 1: ياااه شفتى يا دينا لما سمعتى كلامى و بطلتى تتدخلى فى حياة العيانين بقيتى فل ازاى؟ المتعور نعالجه من غير رغى و المجروح يتخيط من غير صداع

"يدخل رجل طويل مجروح بجرج قطعى فى اليد بينما تتأمل دينا فى صوتها الداخلى"

-دينا: "تجهز ادوات الخياطة فى رتابة" هممم اتعورت بايه؟

-المريض: المروحة هى اللى عورتنى , بس العيب مش على المروحة العيب على اللى بتجى لى كل مره بقميص النوم

-صوت داخلى 1: اللهم ما اخزيك يا شوشو , قاومى يا دينا رغبتك الدفينة فى الرغى و خلصى

-دينا: احم يعنى المروحة خبطت ايدك , طيب هنبقى نخلى دكتور العظام يبص عليك عشان نطمئن على العضم بالمره

-المريض: اصل انا هاحكى لكى, اصل انا ليا جاره كل يوم تقعد تخبط عليا و هى مش لابسه كويس و انا باتكسف منها فلما بتخبط باكون انا لابس الشورت فكل مره اقوم بسرعه عشان البس الجلابية تقوم ايدى تخبط فى المروحة

-صوت داخلى 3: المهنية يا منى

-دينا: "تلقى بعدة الخياطة" ههههه لا انا كده مش هاعرف اشتغل غير لما تحكى لى التفاصيل بقى 

دهاليز الارق

امبارح و انا فى دهاليز الارق اليومى قررت انى ارجع لعادة كنت سبتها من فترة, مسكت كتاب صحيح مسلم اللى فى الدولاب و افتح على صفحة عشوائية 

وقع حظى على صفحة 197 من المجلد التانى على (باب منع الاستلقاء على الظهر و وضع احدى الرجلين على الاخرى) و الباب بيضم 3 روايات عن 3 احاديث بينهى فيهم النبى عليه الصلاة و السلام عن طريقة الاستلقاء دى منها احاديث مفرده له بس و احاديث بتجمعها مع النهى عن الاكل باليسرى و المشى فى خف واحد , و الحقيقة انا زعلت لانها من اوضاعى المفضلة سواء فى الفرجة على التليفزيون او حتى فى القرايه و قلت لروحى طيب نحاول نقلل منها بقى مدام طلع حرام او مكروه 

الحقيقة ان زعلى مطولش كتير لان فى صفحة 198 من نفس المجلد لنفس المؤلف (باب اباحة الاستلقاء و وضع احدى الرجلين على الاخرى) و فيها حديثين بشهادة ناس من الصحابة ان النبى "استلقى فى المسجد واضعا احدى رجليه على الاخرى) فانا فرحت بقى و قلت اهى طلعت سنه 

بس سخن على بارد يطقطق يا صديقى , طبعا مع مزيد من التصفح هتلاقى باب الامر بقضاء النذر و وراه النهى عن قضاء النذر و القائمة عموما تطول و ده مثال مصغر و مبسط جدا لاشهر ظواهر كتب التراث

بس نرجع لموضوع الاستلقاء , هو صحيح موضوع فرعى و مش مهم فى اى حاجة فى الدين ولا اساسه لكن صحيح مسلم -اللى هو كتاب ضخم معنويا عند المسلمين- يخصص له صفحتين؟! و هو لازم الاسلام كان يبقى له رأى مدحا او ذما فى الاستلقاء واضعا رجل على رجل من اصله؟! 

هو احنا غرقنا روحنا فى التفاصيل؟ ولا التفاصيل هى اللى غرقتنا؟!

امتياز 41: الضغط

مريض ١: فين الدكتور؟!

دينا: انا الدكتور يا حاج

مريض ١: انتى؟!

دينا : "ترسم ابتسامة مكرره" اه امرك لله بقى الجوده بالموجوده ، بتشتكى من ايه؟

مريض١: انا عندى سكر بقالى ١٥ سنه بس مش باخد ادوية و قلت اجى النهاردة بقى

دينا: طيب و يا حاج جاى الساعه ١١ بالليل فى الطوارئ عشان كده؟ العيادة الصبح ده شغلها و بيصرفوا علاج مجانى كمان

مريض ١: طيب قيسى لى الضغط بقى
*****************************
مريضة ٢: هو الضكتور الشنكحاوى فين يا بنتى؟

دينا: الشنكحاوى الزعبلاوى واخد اجارة مرضى يا ماما و هيكون موجود بكره زى دلوقتى

مريضة ٢: طيب و النبى قيسى لى الضغط
**********************
زوج مريضة ٣: يعنى كده مراتى بقت كويسة و هنروح؟

دينا: اه هى كده ظبطت لنا السكر و اتعمل لها رسم قلب و اطمنا عليه

زوج مريضة ٣ : ممكن تقيسى لى الضغط؟!
************************
دكتور ١: عاملة ايه يا دينا فى الباطنة ؟!

دينا: مش مبسوطة للاسف حاسه انى مش بتعلم كويس

دكتور ١: بكره ياما تتعلمى بلاش استعجال "يشمر عن ذراعيه" قيسى لى بقى الضغط

#say_قيسى_الضغط_one_more_time
#ارملة_و_جايه_فى_اى_مصلحة

امتياز40: المدير يتحدث

"يدخل مدير المستشفى مهرولا ، تجلس دينا مع اخصائى الاستقبال و الطوارئ و بصحبتهم ٣ من النواب"

المدير: "يشير لعامل" يلا يلا شيلوا المكتب بتاع الدكاترة من تحت المروحة و حطوه على جنب و عايزين نجيب سريرين نحطهم فى الاوضه هنا

"العامل يبدأ فى النقل ، الاطباء فى حاله ذهول صامت اذ يقطع صوت دينا الصمت ليوقف الحركة"

دينا: ليه؟!

المدير: هو ايه اللى ليه؟

دينا: ليه نحط سريرين فى اوضه الدكاترة مدام بره فى ٣ سراير للكشف غير حوالى ١٢ سرير فى اوض الملاحظة بيتم فيهم الكشف

المدير: "ينظر متفحصا" حضرتك مين؟

دينا: " تمسك الكارنية و تهزه قليلا" انا دينا نبيل دكتورة الامتياز يا دكتور

المدير: ما انتى عشان مش فاهمة السبب بتقولى كده

دينا: ياريت تعرف السبب

المدير: احنا هنكشف على الفيملز هنا و هنخلى الكشف للميلز بره

صوت داخلى ١: نعم؟! يعنى نكشف على الستات هنا فى الشارع و مين ساتر ولا حتى ستاره و نخلى الرجاله تكشف بره ورا الف ساتر و ملايات ، و بعدين مش بس دى اوضه الدكاترة مش اوضه كشف ده كمان الاوضة دى بتكون زحمة جداااا بالليل و متنفعش للغرض ده خالص

صوت داخلى ٢: طب ما هو اى اعمى هيعرف كده ، بلاش تتكلمى انتى ده انتى اصغر الجيل .... معاكى اخصائى و نواب كتير اهم خليهم هما يقولوا

"صوت صرصور الحقل يدوى فى المكان"

المدير:يلا يلا نكمل "يخرج"

دينا: ايه يا دكتور؟ ده حضرتك اكتر حد بيقعد فى الطوارئ ولازم يبقى ليك كلام و رأى ده المفروض حضرتك اللى تحط السيستم اصلا و المدير يوقع بس... عجبك النظام ده؟

الاخصائى: طبعا لا السراير متنفعش هنا من غير ساتر و كمان الاوضة بتبقى زحمه

دينا: "تصرخ" امال ساكتين ليييييه؟!

الكل: احنا مش ناقصين مشاكل

دينا: "بصوت منخفض" انا مالى؟ هى كانت مستشفى ابويا؟! "تخرج"

جيل تعيس

احنا جيل تعيس ، صحيح كل جيل بيقول على نفسه كده بس لو درسناها بالورقه و القلم هنعرف قد ايه احنا كده فعلا

من اول محمد فؤاد اللى شبعنا اغانيه من ايام "كبر الغرام" و "فكرك يا نسينى" و كان فى امريكا شيكابيكا الشاب الكيوت اللذيذ انه يتحول ل "فؤش فى المعسكر" انت يا ابنى متخيل الصدمة؟!

صحابنا اللى شبعنا معاهم مظاهرات و احلام و افكار و حماس و كلام كنت تحرج تقوله قدام ابوك و تقوله قدامه ، و بعدين نكتشف اننا منعرفش حاجه عن بعض و يبقى دمنا عند بعض حلال و الكل غلطان مع ان البادى اظلم

مؤلفين كانت ليهم هاله قدسية و كتب كنت ببص لها زمان بصتى للمصحف الازرق بتاع بابا طلعت نصها اسرائيليات و تأليف و حاجات لما نرجع لها نقول احنا كنا عبط ولا ايه

انت متخيل كم الصدمات؟! انت عارف ان عبد الحليم لو كان عايش دلوقتى كان زمانه بيغرق مع رامز جلال عشان يطلع يصرخ فى وشه انا بحب اصحابى؟!

#كفياكوا_مرازية_فيا

طفولة مشردة 2

الجيل الصغير مش مقدر انك يكون عندك شئ اسمه "ويكيبديا" يديك اى حاجة بتحلم بيها فى غمضة عين، اذكر و انا عندى ٨ سنين و بقرا كتاب ل محمد عبد الله عنان عن التاريخ الاسلامى فى مصر و اذ فجأة و فى وسط الكلام الاقى كلمة "السلاجقة" و انهم عملوا كذا و كذا و ان "القرامطة" عملوا كيت و كيت و لقيت روحى تنحت ، مين دول؟! طب و اسأل مين؟ 

جربت البحث بالطريقة القديمة رحت المكتبة قلت لهم عايزة كتاب عن "السلاجقة" لقيت امينة المكتبة بتبص لى ببلاهة مفرطة مصحوبه بكم هائل من الكسل و قالت الجملة الشهيرة: دورى انتى اهى المكتبة قدامك

اظن كمان ممكن تتخيل فتحه بق مدرسة الدراسات بتاعه ابتدائى و انا بقول لها : هو مين القرامطة دول يا ابله؟ قبل ولا بعد الدولة الطولونية يعنى؟

#كنت_طفلة_رخمة_جدا

#بوست_مش_عن_رابعة

#ولا_عن_الذكرى_الاولى_لاختفاء_البرادعى_زى_قرص_فوار_فيتامين_سى_فى_نص_كوباية_ميه

طفولة مشردة 1

يوم الاتنين عندى كان له قواعد و طقوس و انا عندى ١٠ سنين ، كنت لو ايام مدرسة اتأخر لحد الساعه ٨ و نص و لو ايام اجازة صيف افضل ازن على ماما عشان تصحينى الساعه ٨ و نص و اقوم جرى مع على السرير و افتح التليفزيون ... كل ده لان يوم الاتنين الساعة ٨ و نص المقدسة برنامج صباح الخير يا مصر بيستضيف المؤرخ جمال بدوى حوالى ربع ساعه يقعد يحكى تاريخ يدخلك فى عالم سحرى من الدولة الفاطمية و دهاليز قصور بنى العباس و حكاوى المماليك البحرية ، و كان رحمه الله -وانا معاه- نستحمل جهل و غباء مذيعات القناة الاولى اللى الواحدة منهم متعرفش الفرق بين قراقوش و بين الحاكم بامر الله..... بعد كده القناة الثقافية عملت له برنامج لوحده اسمه "ستائر النسيان"

بعد كده جت مرحلتى مع جمال الغيطانى ببرنامجه اللى بيلف فيه فى شوارع المحروسه يحكى و يشرح و يوضح اعتقد كان اسمه "تجيليات مصرية" على دريم

يجى بعدهم مرحلة "عصير الكتب" بلال فضل ، "الاولياء" يوسف زيدان و اخيرا -اتفقت او اختلفت معاه- ابراهيم عيسى

خلاصه القول الكتب عبقريه اه و يمكن احلى حاجه فى الدنيا بس احيانا الاستسلام قدام حد بيحكى لك بيكون هو المراد

امتياز 39: لما الندل

"دينا تقف فى غرفة الجراحة , تعمل فى سرعه و تمسح نقطة عرق تتدلى على رموشها"

-الممرضة: انتى هتفضلى واقفه فى اوضه الغرز طول النهار كده؟ ما تندهى نايب الجراحة خليه يعمل شغله ما هو قاعد

-دينا: "تقص الغرزة" يا ستى سبيه فى حاله كفايه اللى هما فيه و انا موجوده اهو نسد باذن الله , انا بحب الجراحة يا ستى و بتجيب لايكات عالفيس  و هو حظه حلو انه جه فى الحاجه اللى بحبها يمكن ربنا عمل كده عشان يستريح شوية و اهو لما بنعوزه بنلاقيه

-الممرضة: تلاقى ايه؟ دول 18 حالة جراحة انتى اشتغلتى 16 منهم و هو الحالتين اللى نزل لهم حولوهم مستشفيات تانية

-دينا: انتى قاعدة بتعدى كمان؟ هاتى القطن خلينا ننجز العيانين بره كتير ما شاء الله

"بعد ب5 ساعات , دينا تقف وحيدة و حولها يتزاحم المرضى و ندائها للنظام يضيع وسط جلبات الفوضى"

-دينا: "بصوت مبحوح" ما هو انا ما اقدرش اكلم كل الناس مع بعض لو سمحتوا الحالات الحرجة والطوارئ لها الاولوية

-الممرضة: "تتجه الى نايب الجراحة" ما تروح تشوف الغلبانة دى اللى بتشتغل شغلك من الصبح اقف معاها الشويه دول عقبال ما ننادى لها دكتور يقف معاها لحد ما الزحمه تخلص

-نائب الجراحة: "فى تأفف" انا ماليش دعوه انا معنديش استقبال عام النهاردة انا جراحة بس "يخرج"

-الممرضة: شايفه؟! عجبك كده؟ انت مالك ساكته

-دينا: "صمت"

-صوت داخلى 5: "يمسك بالربابة التخيلية و يغنى بصوت صعيدى" خشب المراكب يا بنى من السنط , فى البحر ياخد مهاجه, واجب عالحر يتبع الصمت, لما الندل ياخد مهاجه

-الممرضة: انتى بتبصى له كده ليه؟

-دينا: دى البصه الاخيره رضا لدليلة 

-الممرضة: ها؟

-دينا: اه مكنتيش بتتفرجى على سجن النسا , اصبرى عليا لما الزحمة دى تفك

"بعد ساعتين"

نائب الجراحة: "يتهاوى على الكرسى فى ارهاق" هو كل حاجه عرض جراحة عرض جراحة , العيانين بيطلعوا لى السكن و موظف الميكروفون بيده اسمى كل 5 دقايق , ده انا بنزل عشان ناس اتخدشت , هو فى ايه؟

-دينا: "تغنى فى صوت منخفض" . يا انا ينتا يا ابيض يا ملمع ..ابقى امشى تاني بقى تأمع.. وحياة غلاوتك لخربها .. وخلي بيتكوا يتشمع .. يتشمع , اه يتشمع