امتياز18: بابا

بابا: بتعملى ايه يا دينا؟

دينا: "ممسكة فى الكتاب" هو مش باين بقمع بامية طبعا 

بابا: ارحمى روحك من القلش , ايوه بتقرى ايه؟ كتاب طب؟

دينا: طب؟! هو مش كفاية علينا طب؟ انا قريت بتاع 20 صفحة فى كتاب اكسفورد الاوفر بتاع الطوارئ و الحوادث و قشطة عليهم كده انا بقرا حاجات تانيه عشان دماغى متصديش

بابا: كويس 20 صفحة طب و الكتاب ده انتى قريتى فيه قد ايه؟

دينا: 420 بس 

بابا: يا بنتى اتقى الله و اقرى فى شغلك , طب بتقرى فى ايه؟

دينا: بسيطة ده كتاب عن تاريخ الفقه و الفصل الحالى عن اشكالية الحلال و الحرام فى فكر ابن حزم و هل الحلال حلال عشان منافعه و لا حلال لان ربنا حلله و هل الحرام حرام لمضاره و لا بس لان ربنا حرمه و ما يلى ذلك من اشكالية هل اذا كان الحلال مضر تحول لحرام و هل لو كان الحرام مفيد بقى حلال؟ بمعنى اخر هل الحرام و الحلال مستمد من التشريع ام من الفعل بذاته الخ الخ "و تستمر فى الكلام 3 دقائق" ..... بابا هو انت نمت ولا ايه؟

بابا: انا غلطان انى سألتك اصلا

امتياز17: السعادة

16 مارس
قررت انى مش هاحرج انى اقول انى سعيدة او مرتاحة زى مش بلاقى احراج انى اقول انى تعيسة او مكتئبة , الناس بتخفى انها سعيدة احيانا خوفا من الحسد او قلق من ان الاحوال تتغير -السعادة عموما قشرة جليد رفيع تحته ميه ساقعة و الكل بيخاف من هشاشتها- لكن زى ما بشارك الناس كآبة لازم اشارك سعادة

صحابى معظمهم امتيازهم صعب و مليان مرمطة بينما انا امتيازى -على الاقل لحد دلوقتى- متعب لكن جميل , بتعامل كدكتورة صغيرة مش كتمريض ولا ساعى بيجيب ورق 

صحابى معظمهم بينزلوا بالليل و انا كل اللى معايا شباب اخدوا النبطشيات السهر و قالوا لى تنزلى بالنهار عشان نطمئن عليكى , ربنا رزقنى بصحبة كويسة

معنديش سعادة طاغية , لكن سعادة هادئة و بكون متحمسه و انا بصحى من النوم لانى بعمل شئ مفيد و لو قليل و بتعلم كل يوم حاجه و لو صغيرة ...... فى الاول و فى الاخر و فى الصبح الحمد لله

امتياز16: بعيد عنك

بعد الشغل رحت المقلة اشترى لب و حمص , لقيت صاحب المقلة نفسه كان مريض عندى و طبعا بعد ما قعد يشكرنى و انا اطمنت ان الدوا شغال و ان محصلش اثار جانبيه و قعدت اتحايل عليه عشان ياخد الفلوس , القصه مش هنا بقى

القصه ان الراجل كان مشغل "بعيد عنك" و انا الاغنيه دى عندى حاجه كده وضع خاص تتحط فى فترينه و تتعرض فى متحف الفن , و صحت فيا الست الاغنية دى يااه يا ست , يا سلام على الست و هى قويه لما تنزل و تفتح قلبها و تبين اللى عاده مستخبى و هى بتقول:

"عيون كانت بتحسدني على حبي .. ودلوقتي بتبكي عليا من غلبي"

و بعد ما اخدت اللب استغليت جزء فاضى من الشارع و قعدت ادندن , وقفت فى نص السكه انهج , الاغنية صعبه قوى و انا مش بنظم نفسى مع المشى بسرعه , امال الست بتغنيها كانها حاجه بسيطة 

امتياز15: اعرف صاحبك

26 مارس
نقدر نقول ان ملخص النهاردةفى المستشفى "اعرف صاحبك و علم عليه" , انا غلطانة انى بتقى ربنا فى شغلى لان اللى بيشتغل بيشيل لما يطفحه 

لما يكون فى النبطشية 4 نواب و دكتور كبير و واحدة بس امتياز "اللى هى انا" و يجوا كلهم متاخرين ساعة و يمشوا بدرى ساعتين و فى لحظة اكتشف انى واقفة لوحدى تماما و ان كلهم بيفطروا او فى الاقسام فوق حتى من غير ما حد يستأذن , انا طول الوقت شغاله عظام عشان نايب العظام مكسل ينزل و شغالة اطفال عشان نايبه الاطفال مشغوله فى القسم ده غير الباطنه و المسالك و حط فوق كل ده انا اللى بعمل الخياطة و مش بنده حد جراحة و اخرتها اقف انا كمان اعمل غيار على الخياطة بدل التمريض !

و معادى من 8 ل3 فيجى الساعه 2 و نص يندوهلى فى حاله هتتحول الدمرداش و تعبانه ولازم دكتور فى الاسعاف و انا زى العبيطة اقبل انى اروح و احط ثقتى فى دكتور كبير اقول ده زى والدى و بيعلمنى مش مشكلة لما اعمل معاه مساعدة و اهو ثواب مع العيان عشان لوحده , و يطلع فى الاخر مش الدمرداش كمان دى مستشفى فى اخر العباسية و اطلع اطلب الاشعه و التحليل و التشخيص يقولوا لى لا لازم يتحفظ خدى الجواب بس 

و ساعتين رايح عشان الزحمه و انا مخنوقه فى الاسعاف لا فى هوا و لا انا فطرت ولا حتى شربت ميه و انا و العيان اللى متبهدل و متركب له انابيت و لو جرى له حاجه مش هاعرف اتصرف من اصله و لا بعمل شق جنجرى ولا خلافه , و بعد ما اوصل محدش يرضى يستقبل منى الحالة لان ببساطة مش معاه تشخيص -و العيب هنا علينا مش على المستشفى المحول ليها- و نضطر نرجع بالحاله فى ساعتين كمان !

انا معنديش مشكله اتمرمط فى سبيل انى اتعلم او اخدم حد تعبان انما انا فى ال4 ساعات دى لا اتعلمت و لا كنت مفيدة , استهلكنا قدرات الاسعاف و صحه العيان و حد امتياز كان يمكن يكون مفيد فى مكان تانى

فى شرع مين اشتغل طول النهار زى التور فى الساقيه و كمان اروح متأخر 4 ساعات عن معادى؟! بيدونى كام عشان يتعمل فيا ده كله؟ال238 جنيه دول ياخدوا ضعفهم منى و يسبونى فى حالى

"اعرف صاحبك و علم عليه"

امتياز14: يا لالالى

فى لحظة خاطفة من الزمن لقيت نفسى فاضية فى الشغل , الطوارئ كده لحظة تبقى زحمة جدا و كله فوق بعضه و لحظة تبقى فاضيه و تقعد تدندن و تغنى لدنيا مسعود و تقدر تسمع روحك مش صوت عيال بتعيط او ستات بتتوجع , و لوهله تستخدم القلم فى انك تكتب اللى الاغنيه مش انك تكتب Rx و بعدها ادويه و انت بتدعى ان الدوا يشتغل و يقلل من مشاكل العيان مش يزودها باثار جانبية , و تستخدم منديلك فى انك تعمل عليه علامات موسيقيه مش انك تنضف بيه حاجات اسوء

جميل انك فى -اللحظة الخاطفه- دى تستخدم دماغك و ادواتك فى شئ رايق و الاجمل انك تسجل اللحظة بصورة يمكن تقعد معاك اكتر كل ما تبص لها , صحيح اللحظة راحت و ضاعت مع اول شخص دخل عليا الباب صباعه مفتوح و عايز خياطة و انا بطبق منديل الاغانى و اكتم الاغنية فى دماغى عشان اتقمص دور جاد , بس لو خدوا منك اللحظة ياخدوا ازاى الاغنيه من دماغك او الصورة من جهازك؟

امتياز13:و بكره تشوفوا وزارة الصحة

ممرضة: بتعملى ايه يا دكتورة؟

-دينا: بلاش دكتورة دى و النبى لاحسن بتجيب لى حموضه , انا اسمى دينا و طول عمر ماما بتقول لى روحى يا دينا تعالى يا دينا و العيانين مش موجودين يعنى براحتنا

-ممرضة: لا طبعا انتى دكتورة 

-دينا: هو انتى لازم تفكيرنى يعنى؟ , عموما كنت بتسألى انا بقرا كتاب يا حبى على التابلت مش بلعب كاندى كراش يعنى

-ممرضة: ايوه كتاب ايه؟

-دينا: كتاب اسمه "المقدس و العادى" لمؤلف اجنبى اسمه مرسيا الياد

-ممرضة: ايوه بيتكلم عن ايه يعنى؟

-دينا: اممم اقولك "و تسلمها التابلت" اقرى بنفسك من اول الصفحة

-ممرضة: "تقرأ بصوت عالى" لنقل على الفور ان تجربه عدم تجانس المكان الدينية هى تجربه اولية و هى اشبه بعمليه تأسيس العالم و ليس الامر تأمل و بحث نظرى بل هو امر تجربة دينية اصلية تسبق كل تفكير حول العالم , ان الانفصام الذى يصيب المكان هو الذى يتيح تشكيل العالم , و عندما يظهر المقدس لا يوجد انفصام فى تجانس المكان فقط بل يوجد كذلك فى كشف عن واقع مطلق يعارض فى لا-واقعيته الامتداد الرحب المحيط , ان ظهور المقدس هو الاساس الانتولوجى للعالم

دينا: كفايه, ها فهمتى بقى الكتاب عن ايه؟

-ممرضه: "فى حزن" لا طبعا

دينا: عادى يا حبى هو ده كلام يتفهم من اول مره , انا قريت شويه اكتر فيه و اقدر اوضح لك الكتاب بيتكلم عن المقدس و الغير مقدس و المغزى الايدلوجى لتحديد المقدس من غيره سواء فى الاماكن او التصرفات او حتى الجماد

-ممرضه: .......

دينا: لا بلاش النظرة التعيسة دى , هاوضحهالك .. مثلا لو جبنا واحد ملحد او ملوش دين او طول عمره ميعرفش فكره الاديان و جبناه فى الكعبه و قلنا له ايه رأيك فى الحته دى او جبناه جنب زمزم هيقول ايه؟ بسيطه هيقول ده مكان عادى زى اى مكان ... بينما لو جبنا مسلم هيدرك المعنى الروحى حوالين المكان ده , لو جيبنا راجل مسيحى و قاعدنا فى معبد بوذى هيقول ده مكان زى اى مكان, , اضافه تصنيف المقدس هنا مش عائد على الشئ نفسه دايما يمكن بيضيفه صاحب العقيدة

ممرضه: امممم اظن فهمت

دينا: نوضح اكتر , يعنى مثلا الفرق بين الست المسيحيه اللى بتولع شمع لما النور يقطع و بين نفس الست دى و هى بتولع يمكن نفس الشمعه فى الكنيسة , او الراجل المسلم اللى بيدبح فرخه للعشاء و نفس الراجل و هو بيدبح خروف فى العيد الكبير , الفعل واحد لكن البعد القدسى النفسى اللى بتضفيه هو الفرق

ممرضة: ايوه زى ما فى عصر نوح لما عملوا تماثيل للناس الصالحين و بعد كده خلوها اصنام و خلوا الحجر كأنه اله مع انه حجر عادى

دينا: "فى ابتهاج" ايوه بالظبط كده يا حبى , شفتى بقى اهو بقيتى بتتكلمى فى الفلسفة و مقارنة الاديان , صباح الفل فعلا 

#بركاتك_يا_عم_ميرسيا
#دينا_تتحدى_الملل
#و_حياتك_لافضل_اغير_فيكى
#و_بكره_تشوفوا_وزارة_الصحة

امتياز12: 238

مش بحب اتكلم فى الفلوس و بحرج فى الكلام عنها اساسا , لكن اللى فى دماغى مش قادرة استبعد فكره ان مرتبى 8 جنيه فى اليوم!! كل ما حد يطلب منى طلب او عيان يجى لى يأفور فى شكوته او يزعق فيا بدون وجه حق او يجيب معاه 11 واحد من الاسره يصرخوا فى وش الدكاترة مع ان حالته مش خطر , كل ما دكتور يتأمر عليك او يخليك تشتغل شغله , يبقى نفسى اوقفهم طابور و اصرخ فى وشهم انا يومى ب8 جنيه يا ولاد الكلب دول كنت بفطر فيهم فى الكلية , مرتبى 238 جنيه يا ولاد ستين اى حاجه وحشه دا انا اشتريت فستان سهره ب400 جنيه الاسبوع اللى فات !!

المفهوم اللى فى دماغى انى الدوله بتستغلنى و بتشغلنى اقل من العبيد و السخرة , ده لو عبد هيدوه فلوس ياكل على الاقل 

الاسم بشتغل و بصحى بدرى عشان استلم الساعه 8 صباحا و برجع ميته الساعه 12 بالليل و اخر المتمه برضه باخد مصروف من ابويا اول الشهر 

امتياز11:جيب اهلى

مريض1: "يدخل و بصحبته 3 اصدقاء" اااه رجلى , انتى دكتوره عظام؟

-انا: هو انا مش عظام بس اى خدمه , حصل ايه لرجلك؟

-مريض1:عربية خبطتنى فى رجلى

-انا: وقعت على دماغك؟ فقدت الوعى او رجعت؟ فيك اى جروح من الحادثة؟

-رفيق المريض1: لا مفهوش حاجه بنقولك رجله

-انا: اسفه انا بسأله هو , هو ادرى بروحه...حصل حاجه من اللى سألتهم؟

-مريض1: "بلهجة غريبة" لا هى رجلى بس

-انا: "تمارس عملها" فين اكتر حته بتوجعك فى رجلك؟ حرك رجلك كده و كده , امشى عليها 3 خطوات 

-مريض1: يلا يا ابله

-انا: ابله؟!  اطمئن هى غالبا كدمة ما اظنش ان فى كسر ولا شرخ حتى ... و عموما دكتور العظام نازل خلال دقيقتين و هو يبص عليك و نطمئن اكتر...انا اهم حاجه عندى اطمئن انه كله سليم و مفيش ارتجاج ولا حاجه , موضوع رجله مع العظام 

"يدخل فجأة حجرة الكشف 14 من عائلة المريض"

-العائلة: "فى صوت واحد" يا لهوووووووووووى , مالك يا اخويا

-انا: ابنكوا سليم مفهوش حاجه ان شاء الله, احنا فى انتظار دكتور العظام يطمئن على رجله هو فى الاشعه و جاى , لو سمحتوا واحد او اتنين بس مع الحالة و الباقى ينتظروا بره دى اوضه كشف و فى عيانين تانيين

-رفيقة المريض2: مالك بتتنكى كده ليه؟ ما تعملى له اشعة

-انا: بتنك؟! الاشعه مع دكتور العظام ..و لو سمحتى انتظرى انتى و العيلة بره

-رفيقة المريض2: انتى بتعالجيه من جيب اهلك؟

-انا: نعم؟!  اهل مين؟! اطلعى بره لو سمحتى 

-رفيقة المريض2: بقى انتى دكتورة ولا تفهمى حاجه فى الطب "و تدخل فى وصله شتائم"

-انا:   -_-   :o

"يدخل دكتور العظام و بعد الكشف يلعن ان مفيش كسر ولا شرح و لا انه حتى محتاج اشعة

امتياز10: يا بنى

اعلم يا بنى ان قياس الضغط هو اعلى درجات التمريض و اقل درجات الطب , و ان الممرضات مش بيرضوا يقيسوا الضغط عن جهل ولا حاجه -دول غالبا معلوماتهم فى الطب اكتر منك- لكن كسلا و عشان كائن الميزو يحس انه بيعمل شئ 

و احرص على توفر حقن الكيتوفان و الزانتاك فهى ذخرا لك لمواجهه طوفان "طيب اصرف لنا اى حاجه أضكتور بطنى بتوجعنى"

و ان الباطنة هى القلب النابض للطوارئ , و ان 90 فى المية من شغل الطوارئ مش طوارئ ولا نيلة

و لتحتفظ بجهاز الضغط داخل الدرج و مش على المكتب لانك لو حطيته جنبك هتلاقى ناس بتمثل انها دايخة مخصوص عشان تقيسه ما هى مستشفى حكومه و ابو بلاش كتر منه 

اوصيك يا بنى بتقوى الله و "فيتله" العيانين

امتياز9: سنه اولى ولادة

امبارح كانت اول مره ليا احضر ولادة طبيعى و اهو نعمل توثيق للحدث التاريخى ده, بالمره بقى و بما اننا عالفيس و ده مبقاش كتير زى الاول ,

طبعا مكنتش قايلة للدكاترة انها المره الاول عشان محدش يتريق على دكتورة الامتياز اللى تأخرت فى الخطوة دى للدرجة دى , و دخلت قلقانه و متوترة من جوه و من بره وش هادئ كأنى بحضر ولادة كل يوم اربع عادى يعنى

كانت صدمة فظيعة ليا لا صدمه فعلا , الصدمة ببساطة انى ما اصدمتش !! محستش باى حاجه غريبة ولا رهبة ولا اعجاب ولا حاجه كأنه شئ عادى و منطقى للغاية

تخيلت ان تجربتى الاولى هتكون درامية عن كده و مثيرة للاهتمام و افضل افتكرها لكن منظر الدم ومنظر الولادة و منظر الطفل بالنسبه كان عادى مع انى مشفتش حاجة زى كده , امممم يمكن اكون حضرت نفسى زيادة عن اللزوم؟!

اول ما الولادة خلصت سبت الام مع الدكاترة و رحت مع النونو مع دكاترة المبتسرين اتفرج عليهم و اخليهم يشرحوا لى بيعملوا ايه و الادوية و نظام المتابعه فى ال24 ساعه الاولى

نسا: مبتسرين
0 : 1

امتياز8: عريس يا امااى

"يدخل شاب ثلاثينى و برفقته والدته الكبيرة فى السن"

-الشاب: والدتى يا دكتورة ضغطها عالى 

-دينا: "تلبس سماعتها" و عرفتى ازاى يا ماما ان ضغطك عالى؟

-الشاب: انا بقيس لها الضغط كل يوم و النهاردة لقيته 180/110

-دينا: طيب ما تقلقيش يا حاجه انا هاقيسه ليكى دلوقتى و لو طلع عالى هاظبطه ليكى و ان شاء الله مش هتمشى من المستشفى غير لما يتظبط , انا حبيت حضرتك لانك شبه ماما و انا معاكى متاخفيش

-الحاجة: ربنا يخليكى يا بنتى و يوقف لك ولاد الحلال

-انا: "تخلع السماعه" بصى يا حاجه هو انتى ضغط حاليا 170/110 هتاخدى الحقنة دى و تقعدى بره شويه و بعد ما تدخلى الحمام تجى نقيس الضغط تانى 

"بعدها بنصف ساعه"

-دينا: الحمد لله يا امى ضغطك اتظبط , امشى بس على الدوا بتاعك و لو حصل الموضوع ده تانى تروحى للدكتور اللى متابعه معاه او دكاتره العياده عندنا عشان يكتبوا لك دوا اقوى او حاجه مع الدوا بتاعك لو مش مسيطر لوحده , و عموما انتى حظك حلو ولادك مهتمين بيكى ربنا يخليكى ليهم

-الشاب: "ينظر نظرة عميقة و يخرج"

-الحاجه: هو انتى مخطوبه يا بنتى؟

-دينا: ها ؟ لا الحمد لله

-الحاجة: ابنى لاحظ انك مش لابسه دبلة و كلمنى يعنى عشان اكلمك هو خريج سياحه و فنادق و عنده شقه فى 6 اكتوبر

-دينا: "تكتم ضحك هستيرى" لا شكرا يا حاجه ماليش فى الحاجات دى شكرا ربنا يرزقه ببنت الحلال

-الحاجه: مالكيش فى حاجات ايه

-دينا: ماليش فى مواويل الجواز دى , بفكر ادخل الدير و اترهبن

امتياز7: خمسة جنيه!!

"تدخل سيدة فى العقد الثالث و بصحبتها ابنها 6 سنين بجرح قطعى بالذقن"

-سيدة1: الحقينى يا دكتورة الولد اتعور فى وشه 

-دينا: "تفحص الجرح" اممم مش هيقفل من غير خياطة 

-سيدة1: لا خياطة لا هتسيب علامه 

-دينا: متخافيش يا ماما انا هاعملها له بطريقه تجميل و هاديكى مراهم و شويه اجراءات فى سبيل انه يسيب اصغر اثر ممكن 

-سيدة1: يعنى حضرتك هتعمليها له تجميل؟

-دينا: اه يا ماما متخافيش , "تكتب" اشترى لى بس الخيط ده و انا اعملها لك على عينى

"بعد مرور نصف ساعه"

-دينا: اهو اتعمل باحسن صورة ممكنه و الابره و الخيط ارفع حاجه باذن الله تسيب خط رفيع و مع الحاجات الى هاكتبها لك يبقى فى افضل حال ان شاء الله

-سيدة1: "تدس شئ فى جيب بالطو دينا" متشكرين يا دكتوره

-دينا: "تنتفض و تبحث بعصبيه داخل الجيب لتجد 5 جنية" ايه ده؟

-صوت داخلى لدينا: يا لهووووى يا مرراررى يا فضحتى بقى انا دينا نبيل على سن و رمح يتحط فى جيبى فلوس؟! و 5 جنيه بس كمان؟! يا لهوى يا لهوى

-سيدة1: معلش دى حاجه بسيطة , الدكاتره ظروفهم صعبه

-صوت داخلى لدينا: يا وزارة بنت 60 %$%**& فضحتونا للرايح و الجاى و للى يسوى و اللى مسوااااش , يا ضياع نظرك فى المذاكره يا دينا, يا ضياع عمرك فى امتحانات الفارما و الباثولوجى و البكتيريا و الباطنه و النساااااا

-دينا: "بهدوء خارجى" عيب كده يا ماما مش الدكاتره اللى يتحط فى جيبهم فلوس , عايزه تدى فلوس يبقى للعمال او للتمريض انما عيب للدكتور , "تعطى النقود فى يد الطفل" ابقى اشترى له بيهم حاجه حلوه

-صوت داخلى لدينا: 5 جنيه بس؟!!!

امتياز6:هبوط

"تدخل سيدة فى الاربعينات تسندها مجموعه من الاصدقاء و الاقارب"

صوت داخلى لدينا: استصبحنا و اصتبح الملك لله استر يا كريم على مرارتى

دينا: مالك يا حبى؟ خير؟

سيدة1: مهبطة خالص بقالى 3 ايتشام

دينا: "تقيس الضغط" جالك الدور ده قبل كده يا ماما؟

سيدة1: لا بس من ساعه من خد مضاد حيوى 1000 من غير ما افطر

صوت داخلى لدينا: اهو قربت اهى و هنحل اللغز الاسطورى للهبطان , يا فرحه امك بيكى يا دينا بقى هو ده البديل عن الغاز House MD?!

دينا: اخدتى المضاد الحيوى 1000 ليه يا ماما؟ كان عندك ايه وقتها؟

سيدة1: لا مكنش عندى حاجه

صوت داخلى لدينا:  واضح ان دعوه المرارة دى مش هتستجاب

دينا: حضرتك اخدتى مضاد حيوى 1000 يبقى اكيد فى سبب, كنتى مريضة بحاجة وقتها صح؟

سيدة1: لا مكنتش عيانه

دينا: امال اخدتى المضاد ليه؟

سيدة1: اخدته و خلاص

دينا: كان عندك حاجه فى النسا مثلا او حاجه مكسوفه تتكلمى عنها ؟ بلاش احراج انا الدكتور بتاعك متخافيش

سيدة1: لا مكنش فى حاجة و الله

دينا: ركزى معايا يا ماما, حضرتك فكيتى الشريط و طلعتى قرص و بلعتيه و اخدتى وراه ميه كل ده بقى كان هدفه ايه؟

سيدة1: اللى حصل بقى.. هو انا عندى ايه يا دكتورة؟

صوت داخلى لدينا: يا مصبر الوحش عالجحش, كل المرمطة دى يا دينا كانت ليه؟ ما كنتى بكرامتك فى بلاد المنطق يا بنت نبيل ايه اللى رماكى الرميه دى و لا دى دعوه ماما فى لحظة غضب؟!

دينا: لا يا ماما ضغطك واطى شويه و هاظبطه ليكى , اه و القرص زعلان منك عشان كده تعبك

امتياز5: بدمها

"تدخل شابه فى العشرينات بدماء واضحة على ملابسها و برفقاتها رجل ثلاثينى غاضب"

-دينا: "تلمح دبلة فى اصبعها" ادخلى يا مدام اوضة الغيار و انا هاجيب الدكتور الجراح و اجى فى ثوانى

"تنادى دينا دكتور الجراحة فى سرعة و تتوجه معه الى المريضة"

-الجراح: "يفحص الجرح" اول حاجه تعمليها يا دينا انك تعرفى عمق الجرح و هل فى اى شرايين مقطوعه او لا و هل فى جسم غريب جوه الحرج او لا .... امممم لا دى حاجه سطحية , الجلد بس اللى مقطوع ... هتتخيط بغرز عادية

-دينا: طيب ممكن اعملها انا يا دكتور و حضرتك ممكن تطلع القسم فوق عشان عايزينك

"يخرج الجراح"

-دينا: "تجهز ادوات الجراحة" اتعورتى ازاى يا مدام؟

-مدام: "تبكى" غزنى برقبة ازازه

-دينا: "تحاول تلطيف الجو" لا من غير عياط متخافيش دى حاجه بسيطة الحمد لله انها جت على قد كده دى حاجة سطحية , بس من حقك طبعا انك تعورى اللى عورك ههههههه

-الجميع: "صمت"

-صوت داخلى : هما الجماعه دول رخميين ليه؟ مش بيضحكوا ليه

-مدام: "تشير للشاب المرافق" جوزى اللى ضربنى يا دكتورة و غزنى

-صوت داخلى 1: المفروض نطلع الحيوان ده بره من الاوضة بقى يعورها و له عين يقف جنبها كمان و هى بتتعالج!! اللى اختشوا ماتوا صحيح , ما احنا لو بره كنت جبت لها دعم نفسى و جبت له البوليس

-صوت داخلى 2: انتى مالك؟ هتخربى على البت ليه يا دينا , المفروض تصالحى بينهم يعنى تتطلق و تقعد فى البيت عشان لحظة عصبية فارغة اهو جوزها اتعلم

"خناقة بين الصوت الداخلى 1 و 2 لمده دقائق الا ان تحسم دينا رأيها"

-دينا: معاكى حد يا مدام غير الاستاذ؟

-مدام: اه ماما واقفة برة

-دينا: طيب لو سمحت يا استاذنا تستنى بره و تخلى والدتها هى اللى تقف معاها عشان مش هاعرف اشتغل كده

امتياز4:حاجات امه

"الساعة 10:55 am....يدخل شاب حوالى 16 سنة و يصحبه زمزة من الاصدقاء , الشاب يقطر دما اينما سار و على وجهه ابتسامة ثقة غريبة"

-دينا: "تشير الى غرفة الخياطة و تلبس القفاز المطاطى" اتفضل فى الاوضه و حد يقول لى ايه اللى حصل

-صديق الشاب: صوابعه اتعورت و عماله تجيب دم

-دينا: ما انا عارفه انها صوابعه و شايفه الدم , اقصد الاداه اتعور بايه؟

-الشاب: "فى هدوء" الدكة اللى فى المدرسة فيها حته معدن عورتنى

-صوت داخلى لدينا: هو انا مولودة اول امبارح؟ ده مش شكل اصابه حاجه معدن ابدا

-دينا: لو حد معورك قول لى , الظابط موجود بره و ممكن تعمل له محضر

-صديق الشاب: و النبى يا ابلة بسرعة لاحسن الامتحان الساعة 11

-دينا: "تبدأ فى الخياطة" اولا انا مش ابلة , ثانيا انا بكلمه هو , ثالثا دى صباع الابهام فى ايده اليمين و الجرح كبير يعنى لازم يتعمل مظبوط معنديش استعداد يقعد باقى عمره يبص لايده و يقول الدكتورة بوظت شكلى, "موجه كلامها للشاب" لسه مصر انها الدكه ولا هانده الظابط و نكتب تقرير؟

-الشاب: و لو حد معورنى انا مش بعمل محاضر , حاولى يا دكتورة بسرعة عشان الامتحان قرب

-دينا: انا هاحاول عشان مستقبلك بس فعلا اصابه زى دى محتاجه تركيز عشان ده مكان مهم... "توجه كلامها للصديق" طب روح انت امتحانك يا ابنى

-الشاب: "خافضا صوته موجه الكلام لصديقه" ادى المطواه ل "فلان" و كلم "علان" عشان بعد ما نخلص الامتحان نستناه بره و نطلع *** امه مع بعض , ابن ال**** ده , و حياة ** امه لافرجه

-دينا:   احم طيب انا هاطلب منك طلب واحد بعد ما تطلع حاجات امه ده , ابقى ودوه مستشفى تانية عشان مفيش حد غيرى النهاردة بيخيط و انا ضهرى وجعنى

امتياز3:الكارنية

متلبسش الكارنية , اوعى تلبس الكارنية فى الاستقبال ..هيجى الدكتور الكبير يأنبك على عدم لبسه هز دماغك و قول له ماشى و فوت من الناحية التانية , يجى لك المدير, الوزير , عدلى منصور يقولوا لك البس الكارنية كمل هز دماغك و حطه فى الشنطة
ليييه؟
لانك هتفشخر قوى و تلبسه و تبدأ تتعامل مع العيان فى خياطه جرح بسيط مثلا , يقوم العيان يبص للكارنية كده و يقولك امم انت امتياز؟ فترد اه يا حاج, يعنى اتخرجت بقالك كام سنه؟ و هنا قدامك يا رفيق حلين و اجابتين كلاهما حقيقة و صدق فاما تقول انك متخرج السنه دى او تقول انك لسه مش متخرج اصلا , و فى كل الحالات هتلاقى الراجل يقولك طب انا عايز دكتور جراح ...اه بالمناسبه ده موقف حقيقى حصل ليا

لما حد يسألك انت ايه بلاش ام ضكتور امتياز دى قول له ممارس عام و خلاص و سلك نفسك خاااااصه لو حظك الالوان خلااك واقف لوحدك فى استقبال وزارة الصحة و ان يكون الكل خلع 

يبقى الكارنية مكانه فيييين؟ ايوه شاطر فى الشنطة

#قواعد_الامتياز_اللى_مش_لازم_يكونوا_اربعين

امتياز 2: فوازير

-رفيق مريض1: الحقينا يا ضكتوره الراجل مش عارف ياخد نفسه

-دينا: "تلبس سماعتها" عنده امراض ايه بيتعالج منها؟

-رفيق مريض1: انا عايزك تكشفى لنا عليه كله

-دينا: ايوه ماشى بس انا عايزه اعرف تاريخه المرضى و بياخد ادويه ايه الاول

-رفيق مريض1: مش انتى دكتوره اعرفى بقى

-دينا:هو حضرتك متعرفش هو عنده ايه ولا تعرف و مش هتقول؟

-رفيق مريض1: يعنى , الراجل قدامك واعرفى بقى

-دينا: اااااه لا اصل يوم الاربع ماليش فى الفوازير , انا هابعت لكم دكتور تانى بقى

"بمجرد ظهور الدكتور الكبير تظهر الاشعه و التحليل و ورق حجزه فى مستشفى الصدر"

بعدها ب10 دقائق

-رفيق مريضة1:صدرها بيوجعها و مدروخه من الصبح

-دينا: "تكشف" طيب انا هاعمل لها رسم قلب دلوقتى بس قول لى هى عندها سكر او ضغط؟

-رفيق مريضة1: هى بتاخد اقراص كتير

-دينا: طيب الضغط و هنعرفه بانى اقيسه و بالنسبه للسكر هاعرفه ازاى؟ يا استاذ بتاخد انسولين او اقراص للسكر؟

-رفيق مريضة1:اهى قدامك

-دينا: و انا هاعرف عندها سكر ازاى هادوقها و تطلع مسكره؟!

الناسخ و المنسوخ

بوست تقيل شويه للى فيه مزاج:

حاجة زى مفهوم "الناسخ و المنسوخ" تلاقى الفقهاء "الجدد" بينكروه و الناس العامه متعرفش عنه حاجه و يستغربوا اللى يكلمهم عنه , بينما الفقهاء القدماء اللى المفروض انهم اقرب عهدا بالرساله متعرفين بيه باريحيه و بساطه بل و بيشوفوا انه اساس من اسس الدين و ان الجاهل بيه يضر بنفسه و يضر بالناس

و الناسخ و المنسوخ للى ميعرفش هو ببساطة 3 انواع و هى مبنية على ايه "{ مَا نَنسَخْ مِنْ آيَةٍ أَوْ نُنسِهَا نَأْتِ بِخَيْرٍ مِّنْهَا أَوْ مِثْلِهَا} , الاول هو ما نسخ تلاوته و فعله يعنى قرآن نزل على النبى ثم لم يعد يقرأ ولا مدون فى المصحف العثمانى زى بعض الروايات المتداوله عن احاديث للسيدة عائشة عن ايات ضائعة و زى روايات انس ابن مالك فى الموطأ عن سور كاملة كانت متداوله و اختفت و انتفى حكمها , و نوع تانى عن ما بقى تلاوته و اختلف حكمه بالايات الاحدث نزولا يعنى ايه نزلت بحكم ما و بعدين تنزل آيه بعدها تلغى حكم الاولى -و تبقى التلاوه- زى فكره تحريم الخمر التدريجى مينفعش وقتها تاخد الحكم الاول المخفف و نغض البصر عن الاية الاحدث لانها هى اللى فيها الحكم النهائى ,و نوع تالت "اختلف فيه الفقهاء شوية" اللى هو بقاء التلاوه و الغاء الحكم بالسنة يعنى حديث او فعل عن النبى يلى نزول الايه فيلغى تأثيرها و حكمها و يطبق حكم جديد زى فكره الرجم اللى مش مذكور فى القرآن لكن مذكور فى السنه و افعال النبى المتدولة.... اه و فى نوع رابع معتمد على فكره الايات الضائعة ان حكم الايات دى باق على الرغم من نسخ اللفظ "و يقال ان ده سبب فكره الرجم"

ناس كتير و فقهاء كتير من القدماء اتكلموا فى الموضوع ده يمكن اهمهم بالنسبه لى هو ابن حزم الاندلسى لانى قريت فيها اكتر من غيره , و له كتاب جامع فى المجال ده اسمه "الناسخ و المنسوخ فى القران الكريم" و فى نسخة متداولة منه من طباعه دار الكتب العلمية بتحقيق دكتور عبد الغفار سلمان البندارى

نتكلم اكتر بقى عن كتاب ابن حزم اللى هو كان الهدف الاصلى من البوست قبل التوضيح السابق , قرر ابن حزم ان يكتب كتاب مفصل فى الايات المنسوخه آيه آيه و يكتب معها الناسخات ليها اللى هيبقى فيها تأثيرها و حكمها و تلغى حكم المنسوخات

من اشهر الناسخات هى ايه السيف اللى نصها "فَاقْتُلُواْ الْمُشْرِكِينَ حَيْثُ وَجَدتُّمُوهُمْ" و "وَقَاتِلُوا المُشْرِكِينَ كَافَّةً كَمَا يُقَاتِلُونَكُمْ كَافَّةً" و بيقول ابن حزم ان الايه دى لوحدها نسخت كم هائل من الايات موجوده فى 47 سورة قرر ابن حزم نسخها جميعا فابقى على تلاوتها و لغى حكمها , نقراها و نعيط معاها لما نصلى لكن مننفذش من حكمها سئ , فبجرة قلم نسخ ايات موزعة على 47 سورة ....و اعتقد انك عرفت الايات المنسوخة 

فى راى ابن حزم -و غيره كتير من القدماء و المحدثين- ان كل ايات الرحمة و الاختيار و التمهل و ان النبى مش مسيطر و انه مش جبار على حد و كل ايات الصبر على المشركين و خلافه قد تم نسخه و الغاءه بما ان المسلمين مبقوش مستضعفين فى الارض , 

يعنى مثلا تانى فى نظر ابن حزم ان كلام ربنا اللى زى "فذرهم يخوضون و يلعبون.." , "فاصبر كما صبر اولو العزم من الرسل..." , "فاصفح عنهم و قل سلام..." , "ما انت عليهم بوكيل.." و غيرها و غيرها قد نسخت و الغيب ب "فَاقْتُلُواْ الْمُشْرِكِينَ"
*********************
بقالى كتير ما اتكلمتش معاكم عن الكتب ففرصة انى ارجع ارغى براحتى من تانى ربنا يخلى لينا ابن ام مارك و منه لله اللى ميتسماش بتاع الجودريدز , يلا منه لله اللى كان السبب

امتياز1: الحاج

"يدخل مريض فى الستين او يزيد, جلباب بلدى و شعر ابيض"
مريض: الحقينى يا دكتورة 

دينا: اتفضل يا حاج , مالك؟

مريض: الميه متحاشه فيا و مش عارفه ادخل الحمام

دينا: اممم طيب من امتى يا حاج؟

مريض: من الساعه 12 بالليل

دينا: "تنظر فى الساعه" اممم يعنى بقالك 8 ساعات , جالك الدور ده قبل كده يا حاج؟

مريض: لا محصلش

دينا: طيب بص يا حاج القسطره شئ مؤلم فانا هاحاول نجرب حاجات تانيه اشرب ميه و حاول تدخل الحمام حتى لو نقط يكون احسن لك برضه من بهدله القساطر

"بعد مرور 10 دقائق"

مريض: انا خلاص زهقت

دينا: انت لحقت يا حاج , انت شربت قد ايه؟

مريض: انا شربت نص ازازه

دينا: طيب نص ازارة ده قليل يا حاج , اسمع كلامى انا بحاول اجنبك شئ مؤلم

مريض: انا كل ما بيجى لك الدور ده بحط قسطره و بستريح

دينا:  دور ايه؟ مش انا سألتك و قلت محصلش قبل كده؟

مريض: انا مفييش دماغ للكلام

"دينا تبحث 20 دقيقه عن كل دكاتره المسالك فى المستشفى و تفشل فى ايجاد احدهم"

دينا: بص يا حاج للاسف النهاردة اجازه انت عارف شم النسيم و مش لاقيه حد للاسف , انا بعرف اركب قسطرة بس لزم تحت اشراف و انا محبش اعمل معاك شئ غلط , نصيحتى ليك تروح المركز الطبى اللى جنبا فيه دكاتره, و عموما كمحاولة اخيره خد الحقنه دى و انا هادخل اعمل حاله خياطه و راجعه

"دينا تسمع خناقات بالخارج بين الممرضه و المريض , يدخل ظابط المستشفى"

-ظابط: صباح الخير يا دكتورة 

-دينا: صباح النور فيك حاجه يا استاذى تعبان ولا حاجه؟

-ظابط: لا اصل الاستاذ عايز يعمل ليكوا محضر

-دينا: نعم؟! ليه يعنى؟

-ظابط: بيقول انك كنتى هتعالجيه بس لما عرفتى انه مسيحى قررتى انك مش هتعالجيه و قولتى له يمشى

-دينا:   اييييه؟! انا اول مره اعرف اصلا ان الحاج مسيحى و انا هاعرف ازاى من اصله محدش بيبقى ماشى مكتوب فيه خانة الديانة!!