طبعا لما تشوف العنوان و ان كنت قارئ دائم ليا هتكون متوقع رد فعل انى استشيط غضبا او على الاقل انى اعترض كعادتى المضاده للتيار المتأسلم فى مصر و اعذرنى فى هذه التسميه اللى هاكون مصره عليها نظرا لان كلنا مسلمين و لانى لما اقول التيار الاسلامى عمل كذا يبقى انا مش مسلمه !!.....اعترف بانى اتصدمت فى الاول لعجب الفكره بل و اعترف انى منطقها عصبنى لانها بتعتمد على نظريه الشكل اللى ياما نادينا انها نظريه فاشله و بدليل ارتفاع نسبه المحجبات و ارتفاع نسبه التحرش و ارتفاع نسبه الملتحين و ارتفاع نسبه السرقه عادى جدا ...
لكن انا كواحده بدعى الليبراليه بقول هما احرار ايوه احرار دعوه عاديه جدا صحيح فكرتها سحطيه و التزام بسنه مؤكده مع تجاهل مشاكل اخطر بل لا تتناسب مع فقه الاولويات فى الايام السودا دى لكن مش من حق حد يمنعهم او يتريق عليهم لان ببساطه واحد سايب دقنه التانى زعلان ليه ؟؟ و مدام الفكره قانونيه و ممكن تكون كمان مع التحلى بالاخلاق فاوكى...
س/ هل انا ك دينا نبيل بحب السلفيين او الاخوان؟؟
ج/ لا ...طبعا
س/ هل انا علمانيه ؟
ج/ على الرغم من ان العلمانيه مش شتيمه لكن لا
س/ هل وجود اللحيه من عدمها يجعلنى احترم شخص اكتر ؟؟
ج/ برضه لا
س/ هل تمانعى فى ان يكون هناك اغلبيه ملتحيه من الرجال؟
ج/ و انا مالى ؟؟...المهم يكون فى حد فاضل غير كده لانى ما اظنش هينفع ارتبطت بحد منهم..
اخطر ما فى الموضوع هو ان الحوار مع حباينا الحلوين مفهوش كاسب و خاسر لانك ببساطه لو اعترضت على حمله زى دى مثلا لاى سبب تراه فاما عدم مؤامه الوقت او عدم اقتناعك بنظريه الشكل او خوفك من اختلاط الدين بالسياسه الذى يفسد الاتنين انك بتضع رقبتك دون ان تدرى تحت المقصله الفكريه و تتدخل بقدميك عش الدبابير مليان مصايب و تقدم نفسك كمتهم فى محاكم تفتيش الاندلس ...
تقدر تقولى هتعبر ازاى عن رفضك لحمله اذا ارتبطت بالدين ؟...هتخش تتكلم عن عدم ضروريه وجود التزام اخلاقى مع الالتزام الشكلى و دون ان تشعر ستجد نفسك فى الباب الرابع لكتاب ما لابن تيميه!! ...
ايوه طب جرب و شوف و بدل ما كنت بتتكلم عن المجتمع هتلاقى روحك ادبست فى الفرق بين السنه و الفرض ...عارف ليه ؟ لان بتقارن الذى لا يخطئ و هو الدين بفكر البشر اللى غالبا غلط ....
فما سيكون الموقف من حمله المليون نقاب ؟؟ ساعتها برضه هنسكت و هاحط الجزمه فى بقى و مقدرش اتكلم لانى ساعتها هكون دخلت نفسى فى عش الدبابير و ينتهى بيا الامر فى الفصل الخامس لكتاب ما للالبانى بيوضح فيه فضل النقاب مع انى بتكلم عن المجتمع بل و خوفى من انتشار النقاب غصبا و على غير اراده السيدات و كما حدث مع الحجاب حيث اصبح نوع من الضغط المجتمعى اكتر منه التزام دينى...
اعترف بانحيازى الدائم لرأى الازهر فى اى شئ ...مش عارفه ليه بس احساس بالثقه فى ان "الازهر هو الحل " .. زى احساسى لما بكون عيانه و بروح للدكتور فى حاله الازهر او احساسى و انا عيانه و بستشير العطار مع حباينا الحلوين ...
اعترف انى فكرت انى ابطل كلام عن السلفيين خالص نظرا لما عنيته من المناقشات موجعه لكن فكره انى ابقى جبانه اعطنى القوه الكافيه لانى اكمل فيما ظننته صحيح و فى مصلحه تلك البلد التى لا استطيع التخلى عنها لانى ببساطه معنديش غيرها .......
فاذا شككت فى كلامى جرب و شوف و ليك فى تعليقات البوستات التاليه عظه و موغطه :
ماذا لو لو خربوها ؟؟
عيد تحرير مسجد النور !
اه يا ليبرالى يا ابن ال....
الفصل بين طلبه الجامعه..ماذا بعد؟
فى مدونه الاستاذ محمد الجرايحى "كلمه و نص" هناك الموقف المضاد لما كتبته ...و لكن دعنى ارد على نقطه واحده فيما كتب :
http://7ikayat2020.blogspot.com/2011/06/blog-post_11.html
آخر السطر:
من الأشياء التى لفتت انتباهى وأدهشتنى الحملة التى اطلقها التيار السلفى تحت شعار مليون لحية
ورد الشيخ محمد حسان : بل نريدها 80 مليون لحية فاشطاط التيار العلمانى .غيظاً .....
* نقول تانى انا مش علمانيه و ده الاول فممكن تبقى -عزيزى القارئ- تشتمنى شتيمه مختلفه لما تجى ترد...عزيزى الشيخ محمد حسان مصر مفهاش 80 مليون راجل بالغ ...و بالمناسبه انا مش عايزه يبقى عندى دقن....
47 التعليقات:
مالقيصر لقيصر ومالله لله
طبعا مش زعلان لسبب واحد بس
اني مقتنع ان كل واحد يعمل اللي عايزة بشرط الايؤذي الاخرين
ههههه مينفعش اصلا يبقي 80 مليون لحية
لان ده معناه ان الستات كمان هتربي دقنها
فتعداد الرجال النصف تقريبا
سواح فى ملك الله : دائما سباق فى الردود و ان شاء الله سباق فى الخير كمان ...
معاك ميه فى الميه و عموما المبدأ ده فى اساس الليبراليه و لذلك لا استطيع الاعتراض اصلا فواحد مربى دقنه انا هازعل ليه ؟...
د/دودى
انا عايز ساندوتش كبده اسكندرانى
الدين ليس شكل
الدين خلق
الدين معاملة
الدين حرية ( لكم دينكم ولي دين )
جميلة كلماتك
و انا اشاركك فى هذا و برضة بقول عليهم المتأسلميين...دول وهابيين فضلوا يحرفوا الدين لغاية ما عملوا لهم اسلام عجيب خلانا فزاعه للغرب
همه لو ناس يعرفوا ربنا فعلا بدل ما كانوا يدوروا على مليون لحية و مليون نقاب و مظاهر كانوا قالوا مساعدة مليون محتاج و لا تعليم مليون أمى بس نقول ايه اذا كان المليونير محمد حسان نفسه معاه شهادة متوسطة
Tears
طيب انتى بتريطى النقاب بالتحرش ليه؟
وبتربطى اللحية بالسرقة ليه؟
يعنى مثلا ينفع نقول لضابط الشرطة متلبس الزى الرسمى عشان فيه ناس بتستغل الزى دا وبتعمل سرقات؟!
اذن لانستطيع هكذا اللحية والنقاب..
يعنى الصراحة مش عارف انتى متضايقة ليه..وناس عايزة تربى دقنها ولا تلبس اللى هيا عايزاه..!!
وبعدين الشيخ لما قال 80 مليون لم يقصد ان الستات هتربى دقنها وانما كان يقصد كل الشباب المسلم كناية..
فيها حاجة دى
ويعنى ايه تيار متأسلم؟
وبعدين لما واحد يقول ليبرالى ويهاجم حرية غيره يبقى يكيل بمكيالين..
وبعدين لما الليبرالية تنادى بحاجات هيا موجودة اصلا فى الاسلام بالاضافة لبعض الأشياء التى تعارض المنهج الاسلامى يبقى نروح لليبرالية ليه؟!! شىء غريب قوى..
اللى يبقى ليبرالى يبقى فيه حاجات مش عجباه فى الاسلام
طيب ينفع؟؟
اعرفى الاسلام الاول قبل ما تعرفى الليبرالية..
هتلاقى غلطانة
وبعدين متهاجميش حد وانتى متعرفيش عنهم حاجة
والا دا يبقى كلام عن عدم علم ..ودا غلط
سواح في ملك الله
ما لقيصر لقيصر وما لله لله
دا هناك فى المسيحية
انما الدين الاسلامى متكامل عنى بجميع الجوانب السياسية والاقتصادية والاجتماعية..
وقبل فصل الدين عن السياسة عمليا كانت الدولة الاسلامية قائدة العالم نحو النور والتقدم..
Tears
وحضرتك بقى اللى التزمت بالدين 100% بدون تحريف
انت لاتعرف شيئا عن بن عبد الوهاب
فلا تتكلم
الشيخ محمد حسان لديه شهادة متوسطة طيب
الرسول صلى الله عليه وسلم أشرف الخلق كان معاه شهادات؟
وانت لاتعلم المساعدات والجمعيات الخيرية والمشاريع التى يقيمها اصحاب الخير ممن ينتمون للتيار الاسلامى..
خلوكوا انتوا فى الحجرات المكيفة تهاجموا وخلاص
وياريت لما تعرفوا الاول هاجموا
لقد سمعت عن الحملة واستغربت كثيرا منها لكن كل واحد هو حر في نفسه والفكرة لا بأس بها المهم أن يكون الشخص صادق من الداخل قبل الخارج
تحياتي الصادقة
د/ دودي :
هقولك حاجة بسيطة بما إني أحد المعانين من الموضوع دا
ويمكن دايما لساني مبيتلمش واتناقش معاهم
//
ربنا يكون في عون كل واحد يناقشهم
وشكرا ليكِ ع البوست واعلان البوست بتاعي عندك .
//
تقبلي تحياتي ومروري
و مرة تانية،ما حد بيقدر يغصب الناس عفكرة أو مبدأ سواء كان منيح أو عاطل
مش عارفة ليش بيعملوا هيك،ليش بيعطوا الناس فرصة يقللوا من قيمة الاسلام زي هيك..
طبعا هما حرين لكن ما يضايقنى هو اختصار الاسلام فى شكل معين و موضة معينة
ساعات الزى الايرانى يغلب
و ساعاتالزى الباكستانى ابو بنطلون و بدلة او قميص الى الركبة
و ساعات الافغانى
اما الجلابية المصرية الجميلة فلعبوا فيها و قصروها بحيث تكاد تصل الى الركبة
هما حرين يحسبوا المراة و الاقباط و يقولوا 80 مليون هما حرين
بس ليا سؤالين واحد صعب و واحد سهل
هل يحسبوا قاتل الشيخ السلفى و زوجته و مغتصبها اللى مربى لحيته مثلهم منهم اى من ال 80 مليون
السؤال الصعب
يعنى ايه علمانى
تحياتى
لو الشيخ محمد حسان قال كده فعلا
يبقى لا تعليق
وكما نقول دائما عليه العوض ومنه العوض
__________
السلام عليكم ورحمة الله وبركاته
الأخت الفاضلة: د/دودى
أشكر لك التنويه عن ماطرحته فى مدونتى بغض النظر عن الاتفاق أو الاختلاف...
وطبعاًالاختلاف فى الرأى لا بفسد للود قضية ، نحن جميعاً مسلمين وهدفنا إعلاء كلمة الحق.
لاأحب أحب التصنيف هذا كذا وهذا كذا رغم ان هناك من يحلو له ذلك.
وكما قلت نحن جميعاً مسلمين .
- أنت تقولين أنك ليبرالية ، لماذا لاتقولين مسلمة أهناك من يعطى حرية للإنسان أكثر من الإسلام ؟ لاأعتقد..فلماذا إذا أعتنق مذاهب الآخرين وأفخر بها ودينى منحنى الأفضل؟
- بالنسبة لموضوع حملة المليون لحية وكما قلت فى مدونتى أصابتنى بالدهشة ..ولكن أكيد هم لايقصدون الشكل دونما المضمون ولاأستطيع أن أوجه لهم التهم بأنهم يهتمون بالشكل دون المضمون لأن هذه كلمات سوف تسجل على وأحاسب عليها أمام الله تعالى.
وأخيراً أدعو الله تعالى أن يبصرنا جميعاً سبل الهداية والرشاد
اللهم آمين
وتقبل تقديرى واحترامى
بارك الله فيك وأعزك
معلش يا دينا هارد على د ابراهيم
اخى الفاضل
استفزنى لهجة استعلاء فى ردك على سواح بكلمة ده هناك فى المسيحية
لا يؤمن احدكم حتى يؤمن بالله و ملائكته و كتبه و رسله
اليس هذا قول مؤكد لسيدنا عيسى عليه السلام لماذا لا نعمل به اليس عيس هو من تكلم بالمهد
كما ان رسول الله صلى الله عليه و سلم يقول
من حسن اسلام المرء تركه ما لا يعنيه
صدق رسول الله صلى الله عليه و سلم
نعم معك ان الدولة الاسلامية كانت قائدة للعالم برجال الدولة و ليس برجال الدين لم نسمع ان اى من الائمة الاربعة تدخل فى شئون الدولة
فى ردك على تيرز اصحح لسيادتك معلومة ان تيرز سيدة و ليست رجل
لماذا الهجوم عليها و اتهامها بأنها غير ملتزمة بدينها هل شققت عن قلبها
تتهمها بالجهل دون ان تعرفها و تقول لها انها لا تعرف شيئا عن بن عبد الوهاب
ما نعرفه عن بن عبد الوهاب عن تحالفه مع محمد بن سعود و قاموا بشن حروب على كل من خالفهم و سموها غزوات و استباحوا اموالهم و كانوا يسمونها غنائم كما انهم نصبوا انفسهم اصحاب العقيدة الصحيحة فقط و من يخالفهم اطلقوا عليهم لقب الخوارج و الكفار
تاريخ الوهابية كبير و لو يوجد خطا فيما قلت ارجوك صحح لى
قال تعالى
و لو كنت فظا غليظ القلب لانفضوا من حولك
صدق الله تعالى
لا مقارنة بين سيد الخلق و اى شخص كما ان الشيخ محمد حسان حاصل على بكالوريس اعلام و هذا ليس موضوعنا و لكن لرد الحق لاصحابه
لكن الشيخ محمد حسان هو من تضرع و ناشد فى كل القنوات و الصحف مبارك لكى يعيد بث قناته قناة الرحمة مرة اخرى
هو صاحب قناة الاعلانات التى تكسب باسم الدين
هو الشيخ الحصرى الذى يركب افخم السيارات الفارهة
المأخذ عليه كثيرة لكن هذا ليس وقتها
المساعدات التى يقدمها التيار الاسلامى تسعدنى كمسلم بلا شك و لكنى كنت ارجو ان تقول يقدمها مواطنون مصريون او حتى تقول مسلمون و ليس التيار الاسلامى
تعود مرة اخرى لاتهام من يخالفك بالجهل و عدم المعرفة كما انك تتهمهم بأتهم يجلسون بحجرات مكيفة دون التأكد مع انى على حد علمى المتواضع ان الجلوس فى حجرات مكيفة لا يوجد به مخالفة شرعية لكن الشىء المؤكد ان من يجلس فى حجرات مكيفة هو الشيخ محمد حسان كما انه يركب ايضا سيارات مكيفة و فارهة
خالص تحياتى
مساء العطر سيدتي
بالعل لا يجب أن نتصف بشكل معين حتى نوصف
بأننا إرهابيين أو إسلاميين أو حتى علمانيين
فهذا تفكير سطحي لا يمت للواقع بصلة وفي النهاية
الدين الحنيف كفل للجميع الحرية حتى في الدين
فلا إكراه في الدين فقد تبين الرشد من الغي ..
أما أن يظهر 80 مليون لحية في مصر فهذا دمارها
لأن مش حيكون فيه ستات ياباشا ...
همسة لك سيدتي :: مواضيعك ذات إثراء وتمس العالم
العربي كله وليست مصر فقط لذلك لا تستغربي من
جل المناقشات التي ستطرح والأراء التي ستناقش
فهذا يحسب لك لأنك حركت المياه الراكدة ثم لا تغضبي
فدائماً كان يقال لنا بأن الشجر المثمر فقط هو ما
يحذف بالحجارة وكم كانت كلمتهم صادقة ..
دام عليك علمك وإبداعك
تحياتي
شايفة الحوار على اشده يا دودى
وربنا يقويكى
مش هعلق طبعا لان كل انسان حر
وكمان ماليش التعليق
بس انا عن نفسى لما قريت الخبر جه فى بالى فكرة جميلة
نعمل مليونات احنا كمان مثلا مليونة زرع شجرة فى قدام كل بيت
مليونة تنضيف الشورع
مليونية طلاء اعمدة الانوار مثلا
فى حاجات كتير ممكن تتعمل وتبقى جميلة
برضه مفيش فايده ...قلت لكم العبوا مع بعض , عموما هارد كلا على حده /
ENG./ELSAYED,PMP : و معاك 3 ساندوشات كبده و كتر الطحينه و صلحه...
Magician : معاك حق ميه فى الميه و مش هنسمح لحد يشد مننا حريتنا اللى دفعنا تمنها كتير قوى...اهلا بيك فى رفايع للمره الاولى
تيرز : الاول انا شخصيا بتأسف ليكى على اى كلام ممكن يكون ضايقك فى كلام دكتور ابراهيم انا مش هاسمح لحد يهينك فى مدونتى و تانى انا اسفه ...
كلنا عارفين ان حبايبنا الحلوين مليانين فلوس و مع ذلك مفيش مشاركه اجتماعيه منهم الا اذا كانت الدعايه متوفره ...انا قلت الدين و السياسه يفسدوا بعض..
Dr Ibrahim : لو سمحت توجه كلامك ليا انا و متهجمش حد تانى بليز لانى مش هاسمح لحد يتهاجم فى مدونتى ...
ببساطه انتوا قلتوا ان التحرش زاد من قله ادب البنات و تلا ذلك موجه ضغط مجتمعى للحجاب و مع اغلبيه محجبه حاليا مازالت التحرشات مستمره و ابتدينا فى المرحله التانيه بعدم حمايه الفتاه كفايه بالحجاب و انا خايفه من ضغط مجتمعى جديد للنقاب ...مش بقول دينيا ده صح و لا غلط لكن بقول "مجتمعيا"
قولتوا الرشوه و السرقه زياده عشان الناس مش ملتزمه و فى العشر سنين اللى فاتوا زاد الالتزام "الشكلى"" و الحال مااتعدلش و ابتديت المرحله التانيه بان الالتزام مش كفايه و اللى مش اخوان او سلفى هيولع فى الجحيم و ان الاخوان المفروض يتجوز اخوانيه ...
انا مش عارفه ايه الرعب اللى عندكم من الحريات ليه مش فاهمه ؟؟
كريمة سندي : نفسنا تبقى من بره و جوه لكن محدش يعرف القلوب و بالتالى انا خايفه ان يتم التقسيم مجتمعيا على ان ابو دقن حلو و ابو من غير دقن نولع فيه...
IMSA : انا بحاول ما ادخلش فى نقاش بس اديك شايف الحال ..
Rain : و الله عندك حق انا بيصعب عليا لما ندخل مناقشات من النوع ده ...
ابراهيم رزق : انت الفارس بترد زى ما انا عايزه اقول بس احسن ...
اه بمناسبه هو كلمه علمانى هنا واقعه فى معنى "ملحد"...هو الحاج اردوغان كافر؟؟
Casper : مكتوب فى كل حته تقريبا هى طلعت منه غلطه او ككنايه...
محمد الجرايحى : زى ما قلنا الاخلاف فى الراى لا يفسد للود قضيه ...انا مسلمه و ليبراليه و مش شايفه وجه للتعارض كبير و مش شايفاها حاجه عيب انى اوافق بما يرضى قلبى و روجى و اللى اقتنع بيه عقلى ...
لا مقارنة بين سيد الخلق و اى شخص كما ان الشيخ محمد حسان حاصل على بكالوريس اعلام
عجبتنى الجمله دى...
ريبال بيهس : انا مع ان التصنيف الشكلى مضر اكتر منه مفيد ...ناقشات المقالات اللى من النوع ده دائما كده بس انا شبه اتعودت
Ms Venus: هما بيقولوا ان مفيش تعارض ....و على رأيك هما احرار و ان كنت من غير المتحمسين للفكره
يا سيدى الفاضل
ابراهيم رزق
هل دخلت قلبى لكى تقول انه استعلاء منى
ليس استعلاء اطلاقا بل أقر واقعا
الم يذكر فى الانجيل هذه الجملة ؟!!
ولم أقل "دا هناك فى المسيحية"
استعلاءا
بل انت الذى وصفته استعلاء
وليس معنى أنى أؤمن بالله وملائكته وكتبه ورسله
ان اطبق ما فى الانجيل
او اداهن
فعقيدتى الإسلامية غير العقيدة المسيحية
كيف اكون مسلم ولدى القرآن
واطبق مفى عقيدة غيرى؟!!
---------------------
ثانيا
تقريبا حضرتك لا تعلم التاريخ الاسلامى كاملا او لم تقرأ فيه بحيث تستطيع ان تعرف ان الخلفاء الراشدين ومن تبعهم من الخلفاء
الذين قادوا الدولة الإسلامية كانوا رجال دين ودولة بحيث تجتمع السياسة والدين فى شخص واحد
انا لن اقول ان يحكمنا رجل دين
بل أريد ان يحكمنا سياسى متدين كما كانت قيادات الدولة الاسلامية
رجل يعرف السياسة كما يعرف العلوم الشرعية التى يستطيع ان يحكم بها بين الناس ويعلم الحلال والحرام
---------------------
ثالثا
لا يهمنى اذا كانت تيرز ذكرا ام انثى فانا اكلم شخص ما لا اعرف هويته
فبالتالى ذكرته بالمذكر
ولكن مرة اخرى تحاول ان تتهمنى بأنى شككت بفى التزامها على الرغم ان هذا لم يحدث وكان الاجدى بك ان توجه هذا الكلام
لها والتى شككت فى ان التيار الاسلامى قاموا بتحريف الدين وعملوا ليهم اسلام عجيب ودول وهابيين
انا استعجب منك ومن الدكتورة دودى
واتهمتونى بانى اهاجمها
ولكنى سألتها هل هى التزمت بالدين بدون تحريف لكى تتهم غيرها بتحريف الدين وجعل اسلام عجيب يكون فزاعة للغرب؟!!!
راجعوا انفسكم
وليس من العيب الا نعرف بعض المعلومات
فان كنا لانعرف فيجب الا ننطق حتى لانتهم بالجهل
وبالنسبة لبن عبد الوهاب:-
طيب حضرتك جب معلومة وان كان نصفها خاطىء عن بن عبد الوهاب لان ايامه انتشر الشرك في البلاد الإسلامية، حتى أصبح
الناس مشركين كمشركي الجاهلية،وبعدوا كل البعد عن تعاليم الدين والإسلام وتردوا في هاوية سحيقة من الشرك والضلال فعادوا إلى
ما كان عليه مشركو الجاهلية الأولى قبل البعثة من التعلق على غير الله من الأولياء والصالحين وغيرهم من الأوثان والأصنام..
طيب بن عبد الوهاب جاب دين جديد لا طبعا بل عقيدته هى العقيدة الاسلامية من قرآن وسنة بفهم سلف الامة..
وبالنسبة للشيخ محمد حسان...
لو حضرتك فاتح قناة فضائية مثلا واتقفلت لسبب ما وقد يكون السبب امن الدولة هتكلم مين وهتناشد مين؟!!!
تكسب باسم الدين انت لاتعلم النوايا ولم تدخل فى نفوسهم لكى تعلم انهم يكسبوا باسم الدين ام لا...
يركب السيارات الفارهة اليس انسانا يريد ان يركب السيارات الديك وثائق تثبت ان فلوسه حرام؟!!
وان كان يجلس فى حجرات مكيفة فهو لايهاجم فيها احد بدون وجه حق أو بدون علم او يعمل على توضيح مبادىء الاسلام لعوام
المسلمين...وهذا ليس كمن يجلس ويهاجم الناس ويتهمهم فى نواياهم وفى اخلاقهم وفى دينهم..
وبالنسبة ل دودى
---------
اقرأى تعليقى على الاستاذ ابراهيم بالنسبة لمهاجمة تيرز
مفيش رعب من الحريات..
الاسلام كفل الحرية مالم تصطدم بشرع الله الذى وضعه فى قرآنه ووضحه الرسول صلى الله عليه وسلم فى سنته..
ومن قال لحضرتك... على حد قولك-ان الدعاة يدعون الناس للاهتمام بالشكل فقط..
هذا انما دليل على عدم سماعك لكلامهم من خطب او قراءة كتب لهم...
فالمبادىء والاخلاق الاسلامية شاملة لكل شىء وانما هنا الخطىء فى الانسان الذى لايطبق هذه المبادىء وليس الخطا فى المنهج..
الخطا فى الانسان الذى يطبق جزء من المنهج وليس المنهج كاملا...
على فكرة المفتى د.على جمعة قال لايجوز لمسلم أن يكون علمانى..:)
دا ردا على كلمة "كلمه علمانى هنا واقعه فى معنى "ملحد""
دكتور ابراهيم : here we go again
تانى و من الاول عشان الحبايب ...نفسى بس اعرف هو حضرتك مش بترد عندى خالص ليه غير لما يكون الموضوع ليه علاقه بالسلفيين؟؟ هل المواضيع التانيه لا تستحق الرد ام ان حضرتك مش بتقراها اصلا ؟؟ مجرد سؤال يمكن يغير من سياسه المدونه...
طب ارد على ايه ولا ايه؟؟ حاجه حاجه :
1 : بالنسبه ل اولا ايوه حضرتك هاجمت المدونين الاخريين اما بالاستعلاء او بالهجوم غير المبرر و بالمناسبه لما حد يستعلى على الاخر ده بيجى من الكلام مش بالنيه انا مالى نيتك ايه هو انا هادخل فيها..ده رأيى و ده اللى مقتنعه بيه
2: فى جمل كتيره فى الانجيل مقنعه و معنى انى مسلمه مش معناه انى انبذ الجميع فمثلا انا ليا جمل المفضله جمل مفضله فى الانجيل و جمل للسيد المسيح مفهاش حاجه يعنى و مش معنى كده انى مش مسلمه "ولا رأى حضرتك ايه؟؟"
و عموما "طوبى لمن شغلته عيوبه عن عيوب الناس" ...او نفس المعنى بكلمات كونفوسيوس "ان تجد عيب واحد فى نفسك خير من ان تجد الف عيب فى الاخريين"..
3 : رد حضرتك باننا مقرناش تاريخ ..ايوه محدش قارئ للتاريخ غير حضرتك ما هو ده اللى مكره الناس فيكوا و تقول مفيش استعلاء ....الدول الدينيه اثبتت فشلها و اللى كان كان ثم حضرتك ذكرت بس الخلفاء الراشدين بس و مذكرتش اللى حصل بعد كده يعنى واحد زى "يزيد بن معاويه" و بكل الدم اللى سال على ايده كان يعتبر خليفه المسلمين و اكتر واحد بيفهم فى الدين فى عصره؟؟!!
4 : مش هقرا كتب او خطابات ليهم طبعا و لا حتى من مبدا "اعرف عدوك" لانى لما بسمعهم بتعصب اكتر و اكتر و انا بحاول اطبق قول الله "ولا تجعل في قلوبنا غلا للذين آمنوا" ...
اه بمناسبه العلمانيه ...هو تركيا كلها هتحش النار و من ضمنهم اردوغان
اقتباس:
((إرسال تعليق
حلو؟؟ وحش؟؟ طب ساكت ليه ما تقول....))
مرحبا:
قادم من مدونة الاستاذ(محمد الجرايحي)المحترم بعد رؤية اعلانك هناك..
قرات الموضوع والتعليقات هنا..
لاول مرة ادخل هنا.
للتعريف بي مباشرة..(مسلم) متعلم هندسه باكثر من فرع..,حر بعقلي وديني..,لا استعبد من الغرب ولا من الشرق .., عبد لله فقط..
د.دودي:
ساقتبس آخر سطرين من آخر تعليقين لك على الدكتور المحترم(ابراهيم)..
****
((مش هقرا كتب او خطابات ليهم طبعا و لا حتى من مبدا "اعرف عدوك" لانى لما بسمعهم بتعصب اكتر و اكتر و انا بحاول اطبق قول الله "ولا تجعل في قلوبنا غلا للذين آمنوا" .))
دكتوره دودي:
الا تلاحظين انك وقعت في مطب خطير..أولا نعتي الطرف الآخر(او اقتبست كلمة ((عدو))في معرض الحديث عنهم..وهذا واضح من نفورك منهم..هل هذه ليبراليه وعلمانيه..!!في البداية تقولين كل انسان حر وأنا مالي..!!!!ثم تصرحين بانهم بمقام العدو الى نفسك..
ومن ثم تقعين في المطب الاكبر..
عندما تصرحين بانهم مؤمنون ..وتخافين ان يصيبهم (غلك)..
بوضوح اكبر:
انت اعتبرتيهم مؤمنين..
ومن ثم صرحت بمعاداتهم..!!!
ثم تقولين انك مسلمه وتفتخرين بذلك!!!
((أنت مسلمه,,واقررت لهم بالايمان,,فكيف دخل قلبك المسلم العداء لاخيك المؤمن!!!!))
اليس هذا عجيب من دكتوره تتعلم الطب, يعني مستوى ذكائها وانسانيتها عالي؟؟؟؟
يا سيدة دودي..
كان الاجدر بدكتوره مثلك ان تكون اكثر دقه ..وأن تكون اكثر هدوءا في ردودها على الخصوم حتى لا تقع في مثل هذه المطبات..
بالمناسبه:
نسيت ان اقول أنني من مهاجمي منطق الالحاد الاعوج بشده( وهذا هو سبب ايجاد مدونتي (اقول هذا لا لشيء انما فقط لاعرفك بنفسي تماما )...انا اعرف ان امثالي غير مرحب بهم في مثل هذه الاجواء..
لكن لم اتمالك نفسي عن كشف النقطتين السابقتين..
بالتوفيق:
ونصيحه انسانيه..
ان نبحث عن طريق جنة ربنا في الآخره وان لا تعمينا مباهج الدنيا عن ذلك (هذا اذا فعلا كان هناك قليل من المباهج)خير من ان نضيع حياتنا القصيره في الجدال مع ابو لحيه او ابو شورت قصير..
سلام
.....
اه بمناسبه العلمانيه ...هو تركيا كلها هتحش النار و من ضمنهم اردوغان....
هههههههه
مسكينه يا دكتوره..!!!
ومين قال ان اردوغان بيكره(بيعادي ) بتوع اللحى(المؤمنين) ؟؟
ده اصدق اصدقاؤه بتوع اللحى بغزه...والا ما بتشوفيش اخبار؟؟!!!
حتى هو الوحيد اللي بعث اساطيل اتراك لغزه واستشهدوا هناك بينما ولا زعيم عربي (جاهلي ) استجرا يفعل ذلك..
وبعدين انتي ما شفتي زوجته كيف قهرت العلمانيين الاتراك(بتوع كمال اتاتورك)بحجابها ياللي بتفتخر بيه وهي واقفه الى جانب زوجها....؟؟؟؟!!
سلام مرة اخرى
انا هتغاضى عن تعليقك
بس فيه سؤال واحد
هو حضرتك تعرفى الفرق بين الدولة الاسلامية والدولة الدينية؟!!او بتعتبريهم واحد؟
وبالنسبة لعدوك فقد قتلها بن الايمان بحثا فى تعليقه
دكتور ابراهيم : زى ما قلت لحضرتك مش عايزه اعرف
ابن الإيمان : حضرتك برضه لقيت المدونه بالصدفه من مدونه الجاريحى ؟؟ ..عموما
ليه كل هذا الكم من الهجوم و الترصد و المباغته و التفنيط ؟؟ نفسى افهم ايه ده كله؟؟
عموما كل الحوارات دى تثبت قطعه من البوست :
اخطر ما فى الموضوع هو ان الحوار مع حباينا الحلوين مفهوش كاسب و خاسر لانك ببساطه لو اعترضت على حمله زى دى مثلا لاى سبب تراه فاما عدم مؤامه الوقت او عدم اقتناعك بنظريه الشكل او خوفك من اختلاط الدين بالسياسه الذى يفسد الاتنين انك بتضع رقبتك دون ان تدرى تحت المقصله الفكريه و تتدخل بقدميك عش الدبابير مليان مصايب و تقدم نفسك كمتهم فى محاكم تفتيش الاندلس ...
تقدر تقولى هتعبر ازاى عن رفضك لحمله اذا ارتبطت بالدين ؟...هتخش تتكلم عن عدم ضروريه وجود التزام اخلاقى مع الالتزام الشكلى و دون ان تشعر ستجد نفسك فى الباب الرابع لكتاب ما لابن تيميه!! ...
ايوه طب جرب و شوف و بدل ما كنت بتتكلم عن المجتمع هتلاقى روحك ادبست فى الفرق بين السنه و الفرض ...عارف ليه ؟ لان بتقارن الذى لا يخطئ و هو الدين بفكر البشر اللى غالبا غلط ....
اعلان عام : انا مش هابيع الصدق بالاكاذيب و مش هاقول للحمل الوديع يا ديب و مش هاقول للديب يا اعز حبيب..
انا مش هيحصلى ارهاب او اخاف من علو الصوت و الاغراق بالتفاصيل و الهحوم غير المبرر ...مش هاخاف و هاكتب كل اللى شايفاه صح عايز تقول رأيك اتفضل ...لكن عمرى ما هاغير كلامى او اخاف اكتب بوسات جديده مهما كان
اه بالمناسبه لابن الايمان :
نسيت ان اقول أنني من مهاجمي منطق الالحاد الاعوج بشده( وهذا هو سبب ايجاد مدونتي (اقول هذا لا لشيء انما فقط لاعرفك بنفسي تماما )...انا اعرف ان امثالي غير مرحب بهم في مثل هذه الاجواء
يعنى حضرتك متخصص فى الرد على امثالى !!!....
د ابراهيم
اخى الفاضل
هو استعلاء عندما تقول ده فى المسيحية لانه من غير المقبول عندما تستشهد بقول لسيدنا موسى ان تطبق ما فى التوراه القران الكريم ملىء باقوال مأثورة كثيرة على لسان انبياء الله و رسله مثل سيدنا ابراهيم و سيدنا نوح و شعيب و هارون و غيرهم كثيرون فرق كبير بين قول مأثور و عقيدة
تقريبا حضرتى قرات فى التاريخ الاسلامى و اعتقد ان القراءة ليست حكرا على سيادتك فقط و مرة اخرى تتهمنى دون معرفتى
اعتقد ان طوال التاريخ الاسلامى لم يصل للحكم رجال دين و دولة و اتحداك ان تثبت من مما قرات ان تاتى بخليفة واحد كان رجل دين ثم اصبح رجل دولة بداية من التاريخ الاموى مرورا بالفاطمين و العباسين حتى نهاية التاريخ الاسلامى بالمماليك
معلوماتى عن بن عبد الوهاب ليست خاطئة هو نصب نفسه الوحيد الذى يحمى السنة و الدين اى هو القاضى و الجلاد
لو حضرتى فاتح قناة و عندى مبدء ساصر عليه و اتمسك به و لا استجدى اى بشر طالما انى اثق فى نفسى و فى الله
و المثل العربى يقول تجوع الحرة و لا تاكل و لمعلوماتك مبارك هو من قفل القناة اى هو تذلل له كما انه تقرب له اثناء الثورة
انا لم اقل ان فلوسه حرام انما قلت هو يتاجر بالدين والا فلتفسر لى لماذا هو حصرى هل علوم الدين حصرية لمن يشاهد اعلاناتهم
تحياتى
د/دودى يقول...
اه بالمناسبه لابن الايمان :
نسيت ان اقول أنني من مهاجمي منطق الالحاد الاعوج بشده( وهذا هو سبب ايجاد مدونتي (اقول هذا لا لشيء انما فقط لاعرفك بنفسي تماما )...انا اعرف ان امثالي غير مرحب بهم في مثل هذه الاجواء
يعنى حضرتك متخصص فى الرد على امثالى !!!..
========
د.دودي:
لم تعلني الحادك (على الاقل من خلال قرائتي لموضوعك هذا..
بالتالي استنتاجك الاخير في غير محله..
يعني لست من يعتبرك ملحده(وبالتالي عدوه كما فعلتي مع المشايخ...!!)
اقراي عبارتي جيدا..وستتراجعي عن استنتاجك.الآنف الذكر
قلت لك فيه( وهذا هو سبب ايجاد مدونتي (اقول هذا لا لشيء انما فقط لاعرفك بنفسي تماما )..
يعني لاطمئنك:
ان مدونتي (لو كتب لك يوما زيارتها ستجدين من اولى اهدافها(المعلنه)(محاربة الالحاد)..
وقد فعلت ذلك لسنين..
لم اصادفك يوما في صف الملاحده...
واتمنى ان لا تكوني يوما معهم..
بالتالي ما دمت تعلنين نفسك مسلمه كما انا فانت ونحن امة واحده نحب لك الخير في الدنيا والآخره..
اليك نصيحة أخ اكبر منك سنا واكثر منك تجربة:
حافظي على حريتك (التي يعطيها لك دينك..)
حكمي عقلك ضمن بيئتك المسلمه وضمن ما يقبله القرآن الكريم ..ولم يجبرك احد على ابن عثيمين وابن القيم ووووو
هذه العبارات التي يكررها العميانيون نسخ لصق ودون تدبر (واسأليني عنهم فانا بهم خبير)..
بدك الصراحه:
موضوعك مستفز(ليس لي) ولكن لمن هاجمتهم فيه..,
بالنسبة لي:
قرات الاشنع(للملاحده واعوانهم من مهاجمي الاسلام) ورددت عليه بالمنطق والحجة والبرهان..
د.دودي:
منطقك غريب اذ تصفي تعليقي بالهجوم وتكتفي بنسخ ولصق ودمغ محاوريك باوصاف معلبه جاهزه ضمنتيها موضوعك..
كان الاجدر بك التراجع عن وصف ابناء دينك وشعبك بالاعداء رغم اعترافك بايمانهم..!!!
لكن هذا ما تعودناه ..
معشر العميانيين عموا ابصارهم وضيقوا رؤاهم حول ذواتهم وفقط لا غير...
د. دودي:
وسيظل تعليقي شاهد على تهربكم من الاعتراف بالاخطاء وتعززكم عن التراجع عنها...
اردوغان سيبقى الحاكم المسلم وليس الاتاتوركي العلماني , ولن يفيدك الهروب من التعقيب على نقاطي الثلاثه ...التي هي محور موضوعك وخلاصته..
بالمناسبه:
هل الحجاب على راسك(( ضغط مجتمعي عليك ..وهذا تعبير اقتبسه من موضوعك اياه ولم آت به من نفسي..)), ام قناعه منك كمسلمه انه لباس اسلامي واجب ..؟؟؟
إذن قلنا:
اردوغان للمسلمين واتاتورك للعميانيين.., بالتالي الخلط بينهما مكشوف ..
ثانيا:
معاداة المؤمنين لا يتحملها المسلم ولا تصدر عنه..
فكوني على حذر من المطبات القادمه ايتها الدكتوره المحترمه..أختنا التي نحبها ونحب الخير لها(دينا نبيل)..
بكل اخلاص أتمنى ان تفهميني جيدا وبشكل ايجابي..
بالمناسبه:
أقدر لك خوفك على حريتك كلنا نحب الحريه..لكن ما يخيفني هو حدودها ..هل هي مفتوحه كما يريد الغرب الشهواني الاباحي..ام هي في حدود أوامر قرآننا الكريم..؟؟
شكرا لسعة صدرك معنا..
ملاحظه:
رغم التعاكس الآن بيننا , لكن لا تتفاجئي يوما لو وجدتني اؤيد بعض آرائك يوما ما(إن رايتها صائبه )اكيد لن اتردد فهذا هو منهجي ..اتباع الحق ايا كان ومن اي كان..
شكرا لسعة صدرك مرة أخرى
ابن الإيمان : الاول اكرر دعائى الى الله "ولا تجعل في قلوبنا غلا للذين آمنوا"" اكرره بينى و بين نفسى كتير اليومين دول لان امثال حضراتكم فعلا بيثيروا فى الناس الكتير بدليل انك لو لاحظت ان كلام حضرتك و الدكتور ابراهيم المستفز جاء بردود افعال معاديه و مستنكره من اللى بيردوا غيرى ...و مدام ناويين تدخلوا الدين فى السياسه "وهو ده قلب اعتراضى على الجماعات دى" يبقى الطريقه اللى بتستخدموها هى الافشل على الاطلاق فى الحصول على السلطه السياسيه , التكبر و وضع نفسك فى منصب لتحكم على ايمان او الحاد الاخريين و الهجوم غير المبرر و اهتمام كل الاخريين بالجهل او الالحاد ليس بالتاكيد الحل ..ملحوظه : حرام عليكوا انتوا بتشوهوا شكل المتدينين للناس ...
نفسى ما اردش على نقاطاك لان كل رد يتحمل "رغى" جديد و حوارات جديده لا ابغيها و ليس عندى الوقت الكافى للرد عليها -اليومين دول امتحانات - و اخشى ان استعجالى فى الرد او قله خبرتى يعطى انطباع خاطئ للقارئ بضعف موقفى و قوه بلاغه حضرتك ...لكن هاحاول و عموما الاختلاف فى الرأى لا يفسد للود قضيه :
اولا: وصف حبايبنا الحلوين بالعدو وصف لن اتراجع عنه ببساطه لاننا بنتكلم كسياسه و ليس كدين فهما دخلوا اللعبه السياسيه بارجلهم و بما انى من انصار الطرف السياسى الاخر يبقوا"خصم" على الاقل من الناحيه السياسيه...
ثانيا : حضرتك قولت "لم اصادفك يوما في صف الملاحده...
واتمنى ان لا تكوني يوما معهم..
بالتالي ما دمت تعلنين نفسك مسلمه كما انا فانت ونحن امة واحده نحب لك الخير في الدنيا والآخره.."
طب الحمد لله اننا عجبناك و حظينا برضالك , ارد عليك بكيف تجرؤ ؟؟ كيف تجرؤ ؟؟ ...انك تحط نفسك فى مصف الحكم على دينى ؟؟ و زعلانين انى باصفكم "بمحاكم التفتيش"؟
ثالثا: هنجى لكارت العواطف..كارت "الحجاب" اللى هو اداه سياسيه قبل اى حاجه تانيه قطعا اداه تلعب بالمشاعر و طريقه ترضى اختك تمشى من غير حجاب مع انه محسنش التحرش خالص و لا حسن الاخلاق اصلا ده كعموما نجى لشخصيتى انا - و لو ان ده مش من حقك - :
انا لبسته و انا عندى 9 سنين يعنى اظن ان سنى مكانش يسمح بالتفكير فى الخطوه ولا كان عندى العقل اصلا للتميز و استمريت عليه لحد الان 21 سنه يمكن مع الزمن بقى فى حد ذاته جزء من شخصيتى و اقتنعت بيه كجزء من دينى لكن متنكرش انه ابتدى كجزء من الضغط المجتمعى لطفله عندها 9 سنين ...و لتصوير معنى الضغط المجتمعى لنفترض انى قررت اخلعه تخيل رد فعل المجتمع ؟؟مع انها حاجه شخصيه جداااا....
رابعا: كنا بنتكلم عن تركيا لو تفتكر لما كنت بكلم دكتور ابراهيم عن العلمانيه -اللى مش شايفاها مناسبه اصلا لمصر- و قصدت انى اذكر له اسم اردوغان بذات لانى عارفه انكوا بتحبوه بس دائما بقول تركيا دوله علمانيه و اردوغان مسلم متدين ومدام هو حلو قوى مقدرش يغير نظام بلده او حتى يقنع الشعب التركى بنظام اسلامى...
ملاحظه : على الرغم من التناقض بينا لكن لا تتفاجئ اذا وافقت يوم على كلامك -لو عجبنى-....
كفايه كده ايدى وجعتنى جدا
يا استاذ ابراهيم
حضرتك فهمت انه استعلاء افهمه كما تشاء
يا سيدى الفاضل
الكلام فى هذه القطعة موجه لك ولسواح فى ملك الله ول د.دودى التى تقول ستقول مايرضى عقلها
لو كان الكلام او القول المأثور او أى شىء يرضى العقل يتعارض مع الشريعة الإسلامية
من قرآن وسنة
لايصح ان نستشهد به او نقوله او نفكر فيه أصلا
فكيف يكون ما لقيصر لقيصر وما لله لله
وقد أمرنا الله بتحكيم شرع الله فى كل شئون حياتنا
وهناك الكثير من الايات القرآنية تدل على ذلك
انا لن أتيك بقول شيخ او عالم دينى بل هو القرآن الكريم حتى لايتحجج احد
"إِنِ الْحُكْمُ إِلَّا لِلَّهِ أَمَرَ أَلَّا تَعْبُدُوا إِلَّا إِيَّاهُ ذَلِكَ الدِّينُ الْقَيِّمُ وَلَكِنَّ أَكْثَرَ النَّاسِ لَا يَعْلَمُونَ " يوسف 40
"فَلَا وَرَبِّكَ لَا يُؤْمِنُونَ حَتَّى يُحَكِّمُوكَ فِيمَا شَجَرَ بَيْنَهُمْ ثُمَّ لَا يَجِدُوا فِي أَنْفُسِهِمْ حَرَجًا مِمَّا قَضَيْتَ وَيُسَلِّمُوا تَسْلِيمًا "65 النساء
" يَا أَيُّهَا الَّذِينَ آَمَنُوا أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ فَإِنْ تَنَازَعْتُمْ فِي شَيْءٍ فَرُدُّوهُ إِلَى اللَّهِ وَالرَّسُولِ إِنْ كُنْتُمْ تُؤْمِنُونَ بِاللَّهِ وَالْيَوْمِ الْآَخِرِ ذَلِكَ خَيْرٌ
وَأَحْسَنُ تَأْوِيلًا " النساء 59
" وَأَنْزَلْنَا إِلَيْكَ الْكِتَابَ بِالْحَقِّ مُصَدِّقًا لِمَا بَيْنَ يَدَيْهِ مِنَ الْكِتَابِ وَمُهَيْمِنًا عَلَيْهِ فَاحْكُمْ بَيْنَهُمْ بِمَا أَنْزَلَ اللَّهُ وَلَا تَتَّبِعْ أَهْوَاءَهُمْ عَمَّا جَاءَكَ مِنَ الْحَقِّ لِكُلٍّ جَعَلْنَا مِنْكُمْ شِرْعَةً
وَمِنْهَاجًا وَلَوْ شَاءَ اللَّهُ لَجَعَلَكُمْ أُمَّةً وَاحِدَةً وَلَكِنْ لِيَبْلُوَكُمْ فِي مَا آَتَاكُمْ فَاسْتَبِقُوا الْخَيْرَاتِ إِلَى اللَّهِ مَرْجِعُكُمْ جَمِيعًا فَيُنَبِّئُكُمْ بِمَا كُنْتُمْ فِيهِ تَخْتَلِفُونَ وَأَنِ احْكُمْ بَيْنَهُمْ بِمَا أَنْزَلَ اللَّهُ
وَلَا تَتَّبِعْ أَهْوَاءَهُمْ وَاحْذَرْهُمْ أَنْ يَفْتِنُوكَ عَنْ بَعْضِ مَا أَنْزَلَ اللَّهُ إِلَيْكَ فَإِنْ تَوَلَّوْا فَاعْلَمْ أَنَّمَا يُرِيدُ اللَّهُ أَنْ يُصِيبَهُمْ بِبَعْضِ ذُنُوبِهِمْ وَإِنَّ كَثِيرًا مِنَ النَّاسِ لَفَاسِقُونَ أَفَحُكْمَ الْجَاهِلِيَّةِ
يَبْغُونَ وَمَنْ أَحْسَنُ مِنَ اللَّهِ حُكْمًا لِقَوْمٍ يُوقِنُونَ المائدة 48-50
مثال عندما ذكر خالد منتصر "مادخل الله فى السياسة؟" صدرت فتوى من دار الافتاء (لانقول من شيخ او عالم معين حتى لايكون هناك حجة) هذه الفتوى تقول انه لو كان يقصد الشريعة الاسلامية فقد كفر.
استاذ ابراهيم
ثانيا
انا لم اقل ان القراءة حكر على وحدى فاقرا ما شئت..
وبالنسبة للخلفاء سأتيك بأمثلة كثيرة وان كانت أمثلة حتى لا اطيل عليك حتى اكسر هذا التحدى فمثلا دون حصر شامل:
فى العصر الاموى
1-معاوية بن أبي سفيان كان عالما فى الدين وملكًا قويًا جيد السياسة
2-ويزيد بن معاوية فقد تربى تربية دينية إسلامية وكان رجلا سياسيا على الرغم من التاريخ والتدليس والتشويه من المؤرخين لحياة يزيد
3-مروان بن الحكم كان قارئًا لكتاب الله، فقيهًا في دين الله، شديدًا في حدود الله ورجل سياسى بارع
4-الوليد بن عبد الملك بن مروان كان متدينا وسياسيا بارعا جمع بين الدين والسياسة
5-عمر بن عبد العزيز وقد اجتمع علماء الأمة على أنه مجدد القرن الأول الهجري ، بل جعلوه من جملة الخلفاء الراشدين الذين ملئوا الأرض عدلاً وقسطًا.
6-يزيد بن عبد الملك قد تلقى تربيته على علماء أهل الدين والفضل وقد بلغ درجة رفيعة من العلم، وبخاصة حفظ الحديث وروايته مما جعل بعضهم يعده من المحدثين وعلى الرغم من ذلك صورت كتب التاريخ يزيد بن عبد الملك بصورة الخليفة اللاهي عن مصالح دولته لاهثًا خلف جارية ولكن في أسانيد هذه الروايات مجهولين.
كفاية كده انا قولت اكثر من واحد كسبت التحدى :)
الجاى هذكر أمثلة فقط
فى الخلافة العباسية مثلا لا حصرا :هارون الرشيد
الدولة الأيوبية مثلا لا حصرا: صلاح الدين الايوبى
الدولة العثمانية مثلا لا حصرا: محمد الفاتح والسلطان سليمان القانونى فالأتراك ابدوا احتراما للشريعة الإسلامية
أقول كمان :)
بالنسبة لبن عبد الوهاب
بالتأكيد اخى الكريم انا لو فى منطقة وانا الوحيد ومجموعتى على نهج القرآن والسنة
وبقية الناس ابتعدوا للبدع والضلالات وتمسكوا بالجاهلية وخالفوا شرع الله من التعلق على غير الله من الأولياء والصالحين وغيرهم من الأوثان والأصنام..
من المؤكد سأقول أنى أتبع القرآن والسنة والباقى خالفوا الدين الامور واضحة.
وبالنسبة للشيخ محمد حسان
هذه القنوات تؤدى رسالة ..
والدين ليس حصرى على احد ولا يوجد احد على بوابات الدين فتعلم الدين باى وسيلة على ان يكون هذا الدين موافقا للقرآن والسنة
هذه الاعلانات التى تذكرها هى التى تصرف علىا لقناة من أموال الاقمار الصناعية والتى هى بالملايين وتأجير الاستوديهات واجور الموظفين والعاملين..من يصرف على هذا؟!!
هل هذه الاعلانات فيها شىء حرام او عيب...
ما لايوجد شىء يخالف الشرع فهو حلال..
د.إبراهيم سماحة
د/دودى
اردوغان يمكنه ان يغير النظام التركى رسميا الى الاسلامى
ولكن الجيش التركى العلمانى كما فعل مع نجم الدين اربيكان لن يسمح
نجم الدين اربيكان الذى تم حل حزبه بقرار قضائي من محكمة أمن الدولة العليا، بعد إنذار من قائد الجيش محسن باتور، ليصدر الحكم بالحل في دعوى حكومية ضد الحزب، مع قرار بمصادرة أمواله وممتلكاته، بدعوى انتهاكه الدستور العلماني، والعمل على إلغاء العلمانية، وإقامة حكومة إسلامية في تركيا، والعمل ضد مبادئ أتاتورك.
ومرة اخرى بعد ذلك بسنوات
حدث انقلاب عسكري بزعامة الجنرال كنعان إيفرين، بدعوى وقف المد الإسلامي، و"روح التعصب الإسلامي الذي ظهر في مظاهرة قونية"، واقتاد جنرالات الانقلاب أربكان وعددًا من رجاله إلى السجن بتهم متعددة؛ من بينها العمل على استبدال مبادئ تقوم على أساس الإسلام بقوانين الدولة العلمانية، وهو ما كان كافيًا لأن يحكم عليه بالسجن لمدة أربع سنوات أخرجته من الحلبة السياسية التي أصبح العسكر يمسكون بها مباشرة.
مرة اخرى اسس حزب أخر وتم حله ووفق أعضاءه وكانت التهمة بأنهم يعادون العلمانية
وحزب أخر وتم حله
الى أن اسس العدالة والتنمية تلميذه رجب طيب أردوغان
الجيش التركى يحمى مبادىء العلمانية للأسف وسيطيح بأى شخص يحاول أن يلغى تلك المبادىء
للأسف هذه هى وجوه العلمانية التى تتدعى الديمقراطية والحرية
د إبراهيم سماحة
بالحق بالنسبة ليزيد بن معاوية
وكلامك عن الدم الذى سال على يده
هأتى لكى بقطعة صغيرة من التاريخ
قد كتب يزيد بن معاوية إلى ابن زياد قائلاً: "قد بلغني أن الحسين قد توجه إلى نحو العراق، فضع المناظر والمسالح واحترس، واحبس على الظِّنة، وخذ على التهمة، غير أن لا تقتل إلا من قاتلك، واكتب إليَّ في كل ما يحدث من خير، والسلام".
وهذاالكلام واضح وظاهر في أن لا يقتل عبيد الله الحسين وأصحابه إلا إذا قاتلوه.
اين الدم الذى سال على يده؟
الذى قتله هو بن زياد وليس يزيد بن معاوية
وبعض المؤرخين يلقون المسئولين على الخليفة يزيد بن معاوية، وحُجتهم في ذلك أنه ولي الأمر، ولا يمكن أن يقوم بمثل ذلك العمل الخطير دون إذنه، أو بغير علمه وإرادته..
ولكن زياد خالف امر يزيد بن معاوية الذى ذكرته سابقا ويرجع بعض المؤرخين ان الرسالة لم تصل زياد لطول المسافة ووصول الحسين الى العراق بل ان تصل زياد الرسالة...
د.إبراهيم سماحة
السلام عليكم
ممكن اتناقش معاكم بكل هدوء وتهذيب واحترام
في حاجات كتير أنا أتمنى أعلق عليها لكن مش هعلق عليها لأن واضح أن كل طرف مصر على رأيه اذا لا فائدة من إعادة الكلام ... لكن : عندي ليكوا شوية أسئلة وأتمنى حد يرد عليها ...
أولا : اذا كانت الليبرالية بتكفل الحرية وخصوصا حرية الرأي فلماذا لا نعطي هذه الحرية للإسلاميين ؟؟ أم انهم استثناء ؟؟؟
ثانيا : ممكن أي حد يقوللي ايه اللي مش عاجبة في النظام الإسلامي ؟؟؟ عندنا في الإسلام كل أنظمة بناء الدولة : النظام الإقتصادي و النظام الإجتماعي والنظام السياسي ... إلى آخره . طيب فين المشكلة ؟؟؟
ثالثا : ممكن حد يقوللي ايه اللي هو شايفه في الإسلام بيتعارض مع مبادئ اليبرالية ( اللي بيشرحها الدكتور عمرو حمزاوي ) : مبدأ تكافؤ الفرص (موجود في الإسلام )
- مبدأ دولة القنون ( موجود في الإسلام ) - مبدأ الحرية المسقوفة بالحلال والحرام ( موجود في الإسلام ) يبقى مازال السؤال قائم فين المشكلة مع الحكم الإسلامي ؟؟
هل حضرتك مش معايا في اننا بحاجة الى مفهوم أشمل وأعم من مفهوم الديموقراطية ألا وهو مفهوم ( الــعــدل ) ؟؟
أتنمى أي حد وخصوصا الدكتورة دودي ( لو عندها وقت ) يرد على الأسئلة دي وأنا أتناقش معاه بكل احترام وتهذيب علشان بس نثبت لكم أن احنا ( حبايبنا الحلوين زي ما هي بتقول ) مش بتحاور بطريقة غير علمية او أي حد يتكلم معانا يبقى خاسر لأنه هيبقى في كتب ابن تيمية والألباني ...
وأنا مش هرد على كل الإتهامات اللي اتعرضت في الموضوع وفي التعليقات لأن الإتهامات دي احنا اتعودنا عليها ( متشددين - متطرفين - متأخرين - رجعيين - لا يعيشون عصور التقدم - بيحترموا رأيهم بس - ارهابيين ... إلى آخره ...) الإتهامات دي بتوجه لينا من زمان وللأسف أحسن أعدئنا تشويه صورتنا أمام العالم بل وتشويه صورة المسلمين امام المسلمين أنفسهم ولا حول ولا قوة الا بالله . لكن احنا المفروض نقتدي بنبينا صلى الله عليه وسلم فقد قالوا عنه ساحر وكاهن وشاعر بل واتهموه في عرضه بأبي هو امي . لكن عيب أوي لما نبقى احنا المسلمين بنوجه لبعض الإتهامت اللي أعدائنا بيوجهوها لينا .
وأشكركم جميعا أخوكم حسام .
إرسال تعليق
حلو؟؟ وحش؟؟ طب ساكت ليه ما تقول....