الجمعة، 7 يناير 2011

The Tourist

The Tourist




فيلم حاز على توقعات رائعه + بطلين من العيار الثقيل + حماس و انتظار المشاهدين + ميزانيه ضخمه .....اما نتيجه المعادله دى فللاسف مكنتش جيده ازاى معرفش "على طريقه فؤاد المهندس فى سيدتى الجميله" ... اول مره سمعت عن الفيلم ده لما كنت فى سيتى ستارز اواخر شهر 11 و هناك شفت اعلان فيلم فيه بطلى المفضل المتلون اللى فى كل فيلم بيظهر كممثل جديد جونى ديب بالاضافه لبطله اثبتت نفسها كممثله جيده بعيدا عن جمالها و هى انجلينا جولى و كمان اسم الفيلم شكله جامد و فى الافيش شكل مدن اروبيه كتير مما يدل على فلوس اتصرفت للصبح...روحت البيت علنى القيه عالنت فاكتشفت ان الفيلم لسه منزلش السينما اساسا ..فاذا بى انتظر باقى شهر 11 + شهر 12 كله + جزء من شهر 1 عشان اتحصل على النسخه المترجمه من الفيلم المنتظر ... و بلا انتظار شغلت الفيلم  عالطول و دعيت ماما لمشاهده فيلم معروض فى السينما مش بره لكن فى البيت عالاب توب تحت اللحاف فى الدفء فخوره باستطاعتى على الحصول على فيلم رائع جديد ببلاش تحت اللحاف ...اشوف الفيلم فاذا بى افاجأ بمستوى متدنى فى السيناريو و احداث اصفها بالممله و نهايه استخفاف بالعقل و بقول ماما هو ده الفيلم اللى انتى وجع دماغنا بيه بقالك شهرين؟؟؟!!!....اقول ايه بس القميص ب 6 زراير و كرافته مربوطه و صديرى و جاكته مقفوله و كل ده و الفيلم يطلع باااااااايخ....




16 التعليقات:

غير معرف يقول...

هههههههه
معلهش تتعوض في فيلم تاني يا دكتوره
انا بصراحة مش من هواة الافلام فتجدني نادراً ما انجذب لفيلم عربي كان او اجنبي
وان كنت احيانا تجذبني قصة معينة"اياً كان نوعها "اهخم حاجة تكون مكتوبة صح
مش بتضحك علي عقل المشاهد

تحية وتفدير

د/دودى يقول...

حصل خير ...اه شربت مقلب لكن خيرها فى غيرها

رحاب صالح يقول...

صدمتيني يا دينا
دا انا كنت بتمني اشوفه
اصلا بحب انجيلينا جدا وجوني ديب
بس هي كدة السينما
بس اقولك اكيد الفيلم مش وحش كله اكيد فيه حاجة حلوة
صح والا اية؟

Kem يقول...

مشفتوش
انا بصراحة مبحبش انزل افلام خصوصا الافلام العربى
بحسه حرام انى اسرق تعب و جهد و فلوس حد
حتى لو كان بيكسب تلاتيل متلتلة :)
الفيلم مكنش عاجبنى من الاول بس اعلانه كان لطيف
مبشوفش انجلينا جولى حلوة معرفش ازاى

بس صورها هنا حلوة اوى

د/دودى يقول...

رحاب : اسم الله عليكى من الصدمه...هى السينما كده بس طبعا فى حاجات حلوه فى الفيلم كفايه المناظر الحلوه الاماكن و انجلينا برضه...

د/دودى يقول...

اغانى الشتا : هى حكايه الحلال و الحرام فى "سرقه الافلام" دى معروفه و هنا باستعين بكلمه قلها مره سكندرى فى مدونته عن نفس الموضوع "اقدر استحمل انى اكون حرامى عن انى اكون جاهل" و اظن ان وانا كمان مقدرش افصل نفسى عن السينما العالميه...

Kem يقول...

اكيد ان مينفعش نفصل نفسنا عن السينما العالمية
بس اكيد انه الاحسن اننا ندخلها فى السينما
و انا كنت اقصد السينما المصرية بالتحديد لانها بجد بتنهار

قوليلى يعنى اتفرج على الفيلم ولا ميستاهلش ؟؟؟؟

د/دودى يقول...

بالنسبه للسينما العالميه فدى بتجى مصر متاخر جداا ده ان جه اصلا...اما الافلام العربى فمتستهلش الواحد ينزل من بيته اساسا ده فى افلام انا شفتها عالكمبيوتر يعنى مدفعتش فيها فلوس و طلعت ندمانه على وقتى اللى ضاع اونطه بلا فن امال لو كنت دخلتها كنت عملت ايه؟؟

medo0o0 يقول...

طب كويس أنك نورتينا .. نضيع الوقت فى حاجة حلوة أحسن :D
أنجى بقالها فترة بتعمل أفلام مخيبة للأمال!!
وكمان جونى ديب بيصور الجزء الرابع من قراصنة الكاريبى,يعنى نشوفه فيه أحسن

د/دودى يقول...

medo0o0 : هو بصراحه مستوى الفيلم مش على مستوى ابطاله للاسف ...خلى براد بيت ينفعها بقى

medo0o0 يقول...

لما براد مش هينفعها مين اللى هينفعها ؟ :D

د/دودى يقول...

هو براد ينفع اى حد بينى و بينك...

Casper يقول...

يا خسارة ده انا لسه منزل الفيلم امبارح عشان اتفرج عليه ^_^

انا طبعا قلت برضه نجمين من العيار الثقيل زي انجلينا وجوني يبقى الفيلم تحفة لكن كعادتي مش بحمل اي فيلم غير لما اشوف تقييمه على imdb وكانت الصدمة ان الفيلم واخد اعتقد 5.6 حاجة زي كده فتوقعت انه مش بالقدر اللى انا متخيله بعكس افلام تانية نازلة في نفس التوقيت تقريبا وعملت نجاح رهيب

__________

يا خسارة اروح امسح الفيلم بقى D:

خالص تحياتي

د/دودى يقول...

كاسبر : انت برضه خدت المقلب ده؟؟ هههههههه

غير معرف يقول...

انا شايقه فلم عادى جدا

Emtiaz Zourob يقول...

هههههه ، عارفة سمعت كثير عن الفيلم وتحليلات وانه فيلم غير شكل ورائع وحطم الارقام وفكرته وووووووو
وقررت وتنازلت وحملت الفيلم .. وتفاجأت فيه انه ممل للغاية وما استمتعتش فيه خالص ، وزعلت على وقتي اللي ضيعته معاه .. يلا اهي غلطة ومش ح تعوووووود .

دمت بخير .. معلش قاعدة باعمل جولة في المدونة بعد اذنك ..

إرسال تعليق

حلو؟؟ وحش؟؟ طب ساكت ليه ما تقول....