الجمعة، 21 يناير 2011

نيكولاس كيدج و كيس المخده!!!!!



عارف لما تحط مخده فى كيس واسع!! شكلها بيقى ايه؟؟ ايوه زى اللى ما قلت كده "شكلها مبهوق" او فى قول اخر مبعكك...عزيزى القارئ لا تتخيل انى اصبت بجنون غريب الكلمات بس اصلى دمى محروق 3 او 4 شويات....من دقائق معدودات - للى يعد- اتفرجت على فيلم نيكولاس كيدج الجديد "موسم الساحرات" كنت سمعت عنه سمع خير و انه متصدر البوكس اوفيس و بما انى اثق فى ذوق اشقائنا الامريكان اللى عاده بيغرموا نفسهم فلووووس  كتييير فى انتاج الافلام و كون فيلم يحقق الايرادات دى كلها و كمان بطوله نيكولاس كيدج - على الرغم من ان افلامه الاخيره مش عجبانى- لكن برضه ان دبلت الورده ريحتها فيها....

اللى شدنى فى اعلان الفيلم انه بيبن ان احداثه بتدور بعد رجوع الحملات الصلبيبه من بلاد العرب و منكرش انى عجبتنى فكره الرؤيه من خلال الطرف الاخر مره كده من نفسنا نشوف الطرف التانى بيفكر ازاى ...نشوف النسخه الصلبيبه من "صلاح الدين الايوبى" يعنى عشان نعرف وجهه النظر الاخرى ...هتقول طب انتى زعلانه ليه؟؟ هو الفيلم مش فعلا احداثه فى الزمن ده؟؟ هاقول للاسف اه لكن على  الطريقه الامريكانى فى "تسخيف الامور" فبعد الحلم السياسى الجميل اللى فى دماغى ضاع العمر يا ولدى و الحلم الجميل على رأى هانى شاكر كله راح كله اتكسر ...لاقيت الفيلم عن الطاعون و الساحرات و الشيطان و التعاويذ والمياه المقدسه!!!!! ..لم اسطع كبت جملتى الامريكيه القريبه من قلبى فى وصف تلك الافلام

YOU MUST BE KIDDING!!!!!


انا اقضى من عمرى 84 دقيقه فى مشاهده فيلم عن السحر و الطاعون و المياه المقدسه!!! انا اضيع من عمرى 84 دقيقه فى فيلم من الدرجه ال 10!!!انا يتحرق دمى 84 دقيقه!!ده عندى احساس انى نسبه ذكائى نزلت 2% فى الشويه دول
 ملحوظه هامه : بصراحه بكل صراحه ملقتش فى حبك راحه ولا انا وانت بعيد بطمن ولا وانا وياك مرتاحه...ايه اللى انا بغنيه ده سورى اقصد بصراحه بكل صراحه انا مقضتش 84 دقيقه ولا حاجه مع انى شفت الفيلم كله!! اهه السؤال بيتنطط فى عينيك ازاااى؟؟  اقولك انا....

انا بستخدم فى مشاهده الافلام برنامج ال جى او ام بلاير اللى فيه ميزات لطيفه افضلهم بالنسبه لى انه بيتحكم فى سرعه الفيديو بضغطه زار يعنى ادوس على ال سى السرعه تزيد و ادوس على ال اكس السرعه تقل و هكذا...انا اعترف انى شهدت الفيلم ده كله على سرعه 1.8 الى سرعه 2 و بالتالى فانا شفت الفيلم فى غضون ساعه الا ربع بس!! عاده  بستخدم الطريقه دى فى الافلام الممله فقط او ذات مشاهد الاكشن الطويله اللى مش بحبذها فبدل ما انطها بتفرج عليها بسرعه فى السخان و فى قول اخر فى الكليتش و فى قول اخر فى الانجاز لكن عاده السرعه بيقبى واحد و نص مثلا لكن مع الفيلم ده ضربت رقمى القياسى فى التسريع
شيطان و تعاويذ و مياه مقدسه؟؟ يفرق ايه ده عن فيلم "الانس و الجن"الفاشل او فيلم "التعويذه" الاكثر فشلا؟؟؟؟ نفس الحبكه الدراميه اللى بنتهى بيأس المؤلف من ايجاد نهايه او قفله للموضوع فترسى مركب الدراما على ان البطله "اللى هى عاده يسرا" تقرا قرأن فى حاله الفيلم العربى او البطل "اللى عاده بيبقى كاهن" يقرا من الانجيل مع الصليب فى حاله الفيلم الاجنبى فيتلاشى الشيطان و لا كأن حاجه حصلت و تجد نفسك تتساءل: هما مبيعملوش كده من الاول ليه؟؟؟؟

د/دودى
مدونه رفايع...مجرد رفايع
    

9 التعليقات:

ماشي بنور الله يقول...

د/دودي
اولا :حمد الله علي السلامة
بصراحة اليومين دول كتاباتك بقيت بتتميز بنوع من السخرية اللي افتقدناها من زمان
واللي بتجبر اي واحد "يحضر" قصدي يقرأ الموضوع بالكامل
مش يخلي السرعة((1.8/2))
لكن اللي مخليني مندهش اليومين دول انك بتحضري افلام
سيئة
طيب فين الافلام الحلوة؟؟؟

medo0o0 يقول...

ده تانى فيلم تقفلينى منه :D

بس مقدرش أثق فى توصية أى شخص بعدم مشاهدة نيكولاس ..ببساطة لأنى من متابعينه المخلصين :D

هو بعض أفلامه لأخيرة كانت مش فى المستوى بس يظل نيكولاس كيدج :)

د/دودى يقول...

ماشى بنور الله : الله يسلمك و الله اتحدت قوى الطبيعه اليومين اللى فاتوا من انقطاع النت و بين امتحانات بس الحمد لله الامتحانات خلصت و فضيت شويه..

الافلام الحلوه موجوده بس بصراحه الافلام الوحشه بتستفذنى اكتر للكتابه...و الله اليومين دول التدوين وحشنى جدااااا

د/دودى يقول...

ميدو : اوعى انك متفرجش عالفيلم لا طبعا ده مش حقى اتفرج عليه و لو ليك راى تانى قولى ...بس انا شايفه ان مستوى افلام نيكولاس بتنزل قوى من فيلم لفيلم...

اغانى الشتاء يقول...

هو انا مبحبلوش غير ذا روك و فيس اوف بس
غير كدة مبحبوش
و فيس اوف بتفرج عليه عشان ترافولتا

د/دودى يقول...

اغانى الشتا : اهو انت كده جبت من الاخر فعلا ...

غير معرف يقول...

اكره نيكولاس كيج

د/دودى يقول...

مش كل افلامه بايخه بس فى الاوخر خرف شويه

وجع البنفسج يقول...

انا زيك كنت باحب افلام نيكولاس كيدج القديمة ، اما بعد ما كبر ، باين عليه انه خرف شوية لا مش شوية شويتين .. عموما الحمدلله اقلعت عن عادة مشاهدة الافلام .. إلا فيما ندر ..

دمت بخير .

إرسال تعليق

حلو؟؟ وحش؟؟ طب ساكت ليه ما تقول....