الاثنين، 10 يناير، 2011

و اللى يتوه يشوف اكتر!!!



اقر انا المذكور اعلاه , الساكن فى العنوان الياه , انى فيا عاده شديده السوء جالبه ليا المتاعب و ملاعيب دوخينى يا لمونه دوخينى...اما بعد فالعاده المذكوره هى : انى لما بتوه عمرى ما اسأل حد و بقرر اعتمد على ذاتى البائسه وده بيؤدى لنواتج مأساويه  و ده TOP 5 من اجمل توهانى....



 تنويه : حضر كل معلوماتك الجغرافيه فى دهاليز و شعاب القاهره لاننا سويا هنتوه للصبح :





* كانت المره الاولى فى اول يوم من ايام الكليه فى سنه اولى يعنى سنه اولى توهان...



 
الطريق المفترض : ركوب ميكروباص من قدام بيتنا بالظبط  لحد محطه مترو شبرا الخيمه و من هناك انزل محطه حسنى مبارك "رمسيس" ثم تحويل الاتجاه لخط حلوان- المرج و النزول محطه الدمرداش ومن هناك السكه سهله و معروفه لحد مستشفى الدمرداش التى تكتنف كليتنا المصونه....(سكه سهله مش كده)
اما اللى حصل : انى بالفعل ركبت لغايه محطه مترو شبرا الخيمه و هناك كانت المأساه باختصار لقيت نفسى فى محطه الاوبرا!!!!! لعلك تساءل ايه اللى جابنى الناحيه دى اقولك و حياتك ما اعرف اهى ظروف اصل المترو زحمه و هيصه و هنا تظهر العاده السيئه فى اكتشاف السكه بنفسى ...و لما حبيبت انى ارجع لاقيت نفسى بره المحطه اواجهه برج القاهره و طلعت المحطه تانى و قطعت تذكره صفراء من ام جنيه  تانى...و من هناك ركبت المترو فاذا بى محطه جمال عبد الناصر "26 يوليو" يا لهووووى انا ايه اللى جابنى هنا؟؟؟ صرخت فى داخلى ...صدق او لا تصدق انى اشتريت 3 تذاكر و فى الهيصه دى كلها استطعت بالجهود الذاتيه انى اوصل الكليه دون سؤال احد و متأخره 12 دقيقه بس عن المحاضره.......





* اما دوخينا يا لمونه رقم 2 فكانت سنه اولى برضه بس لاحقا :


الطريق المفترض : نفس السكه السابقه ده المفروض...
اما اللى حصل : فانا واقفه عالمحطه لاقيت اتوبيس اخضر من ابو جنيه و نص مكتوب عليه الدمرداش فقلت حلو هاختصر سكه طويله طويله و طبعا من غير ما اسأل ركبت وش على طول....لاقيت نفسى ماشيه فى اماكن غير معهوده بالنسبه لى فى الوقت ده اطلع من منطقه لمنطقه لكنها غير قريبه اساسا من سكه الدمرداش و طبعا انا مش بسأل حد حفاظا لماء الوجهه..فاذا بى فى مدينه نصر!!! اوعى تقولى ايه اللى جابك هنا....اتارى الاتوبيس كان خارج من الجراج و واخد نص سكته الطبيعيه بس و بالتالى مش هيعدى اساسا على الدمرداش...و لما السواق لقى الناس كلها نزلت الا انا خلانى احكى الحكايه كلها فدفعنى تذكره تااااانى من ام جنيه و نص و خدنى فى سكته و هو راجع  هو اللى عصبنى انه كان بيعملنى معامله الاطفال و كأنى عيله تايهه على بلاج راس البر و نزلنى قدام الكليه هى المشكله الوحيده انى رحت الكليه الساعه 9 و تلت بدلا من معادى المعتاد و هو الساعه ال 8 تماما !!!



* و التالته مش تابته فى سنه تانيه المره دى :


 
الطريق المفترض : نفس السكه السابقه ده الطبيعى بتاع البشر اما انا فلا....
اما اللى حصل : لاقيت اتوبيس بينزل قدام محطه مترو اخرى قلت كده احلى و اسرع فركبت هى المشكله الوحيده انى فى اليوم ده كنت عيانه او مرهقه حاجه كده مما ادى لانى تقريبا نمت فى السكه...لما صحيت لاقيت الاتوبيس ماشى و انا فى حته عجيبه كده قلت ما انزلش و استنى لما الاتوبيس يوصل لاخره و ارجع معاه ...و كانت المفاجاه لما الاتوبيس ركن فاذا بى فى صحراء جرداء لا زرع فيها ولا حاجه خااااالص...سألت انا فين؟؟؟ قالوا لى انتى فى العاشر من رمضان!!!!!!....و بمنتهى الهدوء نزلت من الاتوبيس عادى جداا و كأنى قصده انى اجى هذا المكان العجيب و قعدت شويه عالمحطه لغايه من الاتوبيس لف و ابتدى يملا تانى فى رحله العوده فطلعت تانى و رجعت و كأن شئ لم يكن و براءه الاطفال فى عينيى....


* الراااااابعه كانت فى سنه راااابعه برضه :


الطريق المفترض : من المفترض الذهاب الى النزهه الجديده من المطريه عبر التاكسى بما انى مش درسه المنطقه وفقا لتعليمات بابا...
اما اللى حصل : فانى ركبت فعلا الى المطريه و كان المفروض انى من هناك اخد تاكسى لكن لعدم دراستى للمنطقه خفت التاكسى ياخد شئ و شويات فبعد ما رحت هناك لاقيت اتوبيس اخضر من ابو جنيه و نص (تخصص توهان) مكتوب عليه النزهه الجديده و هنا و كنوع من الاستفاده من الغباءات السابقه سألت الاول هو الاتوبيس هيعدى على النزهه قال السواق اه اتفضلى يا انسه (مع انى افضل اتفضلى يا دكتوره نظرا لان كان معايا البالطو اللى نادرا ما بشيله لكن ما علينا الاتى اهم) و مشى الاتوبيس بلاد تشيله و بلاد تحطه و نعدى على مصر الجديده و سفير و اماكن مألوفه بالنسبه لى و انا سعيده بتدبيرى اللى وفر عليا تمن اجره التاكسى اللى كانت هتكون باهظه لطوووول المسافه ....و على حين غره (موسيقى رعب) ابتديت الامكان تتغير و دخلنا فى نطاق اماكن معرفهاش لانى مرحتش هناك قبل كده و طبعا عرق الالطه نقح و قررت انى مسألش حد كعادتى اللى هتودينى فى 60 داهيه و اعرف بنفسى نظرا لان ال landmark اللى هنزل عندها معروف اللى هو السندباد و نظرا لانى لاقيت كل اللى ركبين الاتوبيس شكلهم قليط و فاهمين قوى و متشيكين زياده بصراحه اتكسفت اسأل...و على حين فجأه(موسيقى رعب اقوى شويه) لاقيت الاتوبيس دخل فى الصحراء الجرداء التى لا زرع فيها ولا حاجه خالص برضه و شويه شويه دخلنا مطار القاهره الدولى!!!!!! بقاعات الانتظار اللى عايز يسافر كينيا من هنا و لامريكا من هناك و فضل الاتوبيس ماشى ماشى بتاع 5 دقايق جوه المطار لحد ما وقف فى محطه جوه المطار!!!...اااااه عشان كده كل الناس كانت شيك عشان بيشتغلوا فى المطاااار....طب و انا؟؟؟؟ طبعا نزلت و فضلت امشى لحد ما حد خد باله انى شكلى تايهه و قلت له انى عايزه اروح السندباد فدلونى على اتوبيس اركبه المره دى اخدت احتياطى و سألت + وصيت حد لما تجى محطتى يقولى و الحمد لله وصلت بالسلامه....



خامسه فى وش العدو :


الطريق  المفترض: نفس مشوار النزهه الجديده و الزمن بعد المشوار السابق باسبوع تماما...
اللى حصل : لعلك تتهمنى بالغباء الان لانى هتوه فى سكه already تهت فيها قبلها باسبوع واحد اقولك اللى حصل يعنى هاعمل ايه ده نصيب....دائما ما  تسير الامور بشكل جيد حتى المطريه و بالفعل ركبت نفس الاتوبيس بتاع المره اللى فاتت و قررت بما انى حفظت السكه انى برضه مسألش حد....و دخلت الصحراء مره اخرى  و هنا سألت : هو السندباد عدى؟؟؟ و جائت الاجابه المخيبه للامال : اه من شويه.. و هنا جريت عالسواق اقف انا كنت عايزه انزل السندباد مع تجاهل عبارات : مدام تايهن بتركبوا موصلات ليه؟؟ و ركزوا بقى قرفتونا و كده يعنى ..فضلت عباره "ان تأتى متأخرا خيرا من الا تأتى ابدا" على انى اوصفها بانى جبت too late و  بالفعل نزلت فى اول سكه المطار و بدأت رحله العذاب و الضنى فى المشى عكس سكه المطار بمحاذاه سور الكليه الحربيه اللى طوووويل بشكل ينافس طول سور الصين العظيم ... افضل ماشيه 15 دقيقه انى الاقى بنى ادم اسأله السكه منين!!! و فى الاخر خدت تاكسى رجع بيا اللى مشيته على طريقه عبد الحليم "اللى مشيته رجعت امشيه, و اللى قسيته رجعت اقسيه, فوق الشوك" فشربت تعب المشوار رايح و  مصاريف المشوار جاى و خد 5 جنيه كامله يعنى اللى وفرنا صرفناه....

و فى النهايه عزيزى القارئ صحيح انا تهت كتير لكن اتفسحت برضه و استفدت كتييير و حفظت سكك نفعتنى بعد كده و ابتعدت عن توهان اللى بتسأله و الجمله الشهيره "شمال فى تانى يمين"...اللى يعيش ياما يشوف و اللى يتوه يشوف اكتر...

د/دودى
مدونه رفايع..مجرد رفايع


12 التعليقات:

هبة فاروق يقول...

عسولة والله عارفة انا كنت زيك مبحبش اسأل حد وافضل اتوة احسن وخصوصا لما تسالى عسكرى المرور تبقى مصيبة بجلاجل يعنى يبقى طريقك شمال يقولك بسلامتة يمين ويتوهك ومعظم المصريين ينكسفو يقولولك منعرفش ويفضلو يتوهوكى احسن شىء غريب طيب ما تقول معرفش وخلاص لازم تعمل فيها فتك وتوهنى
مشكورة حبيبتى موضوعك اضحكنى

عصفور السطح يقول...

حلو ومش وحش

ماشي بنور الله يقول...

ايه يا دكتورة دودي!!
انت من القاهرة ولا من اسيوط
هههههه
دا ان اللي من اسيوط لما درست في القاهرة محصليش نص اللي حصل معاكي
عموما
"تعيشي وتوهي غيرها"

اشكرك علي "الاصطباحة" الجميلة دي قبل خروجي للعمل

re7ab.sale7 يقول...

هههههههههههه
يا بنتي ده انت من القاهرة قولي الكلام ده للي زي حالاتي من المحافظات
بس انا بقي برغم كسوفي الشديد
الا اني بسأل برقه كدة وعن الاماكن
والحمد لله مبقتش اتوه زي الاول....
بقيت احفظ
وبعدين انا بطبعي مغامرة
يعني بغامر وبتوه وبارجع تاني للمكان اللي انا كنت عايزة اروحه
ويمكن الاقي مكان تاني احسن....هههه

د/دودى يقول...

هبه فاروق : اديكى انتى قولتى فعلا السؤال فى القاهره يتوه اكتر من المتوقع وحدك ده طبعا غير الفكاكه و الفهلوه....و ده يثبت ان اهل القاهره معندهموش فكره عن شعابها

د/دودى يقول...

عصفور السطح: منور رفايع...

د/دودى يقول...

ماشى بنور الله : و الله من القاهره ابا عن جد لكن المشكله ان الثانويه العامه قعدتنى فى البيت كتير فخلت خبرتى فى السكك و الطرق تكتسب فى ايام الكليه يعنى متاخر قوى...حلوه الاصطباحه دى مش كده؟

د/دودى يقول...

رحاب : انا بقى غيه عندى اتوه وارجع من غير مساعده بحس كده انى حققت حاجه احلى...انا برضه ابتديت احفظ و التوهان ساعدنى فى التعرف على سكك جديده نفعت بعد كده...تسلم ضحكتك

medo0o0 يقول...

هههههههههه
على فكرة التوهان شئ جميل خصوصا لما توصل بس كونك تتوهى فى نفس السكة أكتر من مرة !! :D

IMSA يقول...

هههههههههه
بصراحة رحلة حلوة
توهان توهان
وبما إنك تهتي فأحسن حاجة تتقالك :
" امشي كدا على طول على طول لحد ما تلاقي عمارة ..
ودي وصفة سهلة ، ودي واصفة هايلة "
بس مش هقولك مع السلامة يا ...
توهان توهان المهم تكوني اتعلمتي من التوهان دا يا دكتورة ..
تحياتي وتمنياتي بعدم التوهان مرة اخرى ..

د/دودى يقول...

medo0o0 : هو التوهان اه لطيف لكن حكايه التوهان فى نفس الطريق دى مش حاجه بفتخر بيها...

د/دودى يقول...

IMSA : عرفت بقى انا مش بساءل ليه لان معظم الوصفات بتكون على طريقه الليله الكبيره...

إرسال تعليق

حلو؟؟ وحش؟؟ طب ساكت ليه ما تقول....