تحفظاتى على الدستور

التالى هو تحفظى على قراءتى الاولى للمسودة النهائيه للدستور....عشان محدش يقول اننا بنتقد من غير ما نقرا...الترتيب تصاعدى...يبدأ بالاستغراب و التعجب و يتسلسل الى المواد المرفوضه قطعا

ههههههه لا حلوه...انتوا معرفتوش تظبطوها فتقريبا سبتوه فاضى...اسفه على اللفظ بس ايه ده؟؟

مش فاهمه حاجه؟!!...يعنى يفرق ايه عن الاثار و الثقافه...و ايه توثيق الثورة ده بقى؟؟؟...حد قرا روايه 1984؟؟ من يملك الماضى يملك الحاضر

الجملة ماشية كويس ...بس مش فاهمه سبب اقحام جمله "وذلك على النحو المبين فى الدستور." دى !!!

مش تريقه المره دى بس سؤال: السنة و عرفناها -مع ان عندنا مشكله مع الاحاديث الصحيحة او المغلوطة- ....بس يعنى ايه الجماعه؟؟

تانى؟؟..اسفه بس ليه الاحزاب تنزل فى اماكن المستقلين تانى؟؟ عايزه افهم ليه؟؟...مضطره انى بدى سوء النيه على حسنه فى الماده دى بس الماده دى -للاسف- متفصله على قد الاخوان

الماده "الوحيدة" المحترمة اللى قريتها لحد دلوقتى...بس مفهاش ذكر لقانون الطوارئ...هل الطوارئ اتلغت ؟؟ ولا سقط ذكرها؟

الماده دى بقى فيها خازوق ما بس مش قادره احددها...اسره ايه و اخلاق ايه؟؟ انا عمرى ما شفت ماده فى دستور كده...طب و السطر الاول ده عايز ايه يعنى؟ و ايه الطابع الاصيل للاسر المصريه ده؟

؟!...ماده غريبة كلها كده...و الدوله تراعى "الاداب" ازاى؟؟ و ايه "النظام العام" ده؟ و "القيم الدينيه" يعنى ايه؟؟ يعنى لو واحد ملحد الدوله تقنعه مثلا؟؟ واحد قليل الادب الدوله تربيه؟....حاسه انشاء

***********************************
ملاحظات عامة:

باب الحقوق خلص و فعلا مفيش ولا ماده ضد التمييز عن اساس الجنس ...و الكلام عن المواطنه "مطاط" مش محدد

وجود مجلس شورى فى الاصل مرفوض بالنسبه لى...كما ان عدم تحديد ملامح لنائب الرئيس و وظائفه مرفوض...و كنت افضل ان يتم تعديل طريقة الانتخاب زى امريكا و يتم انتخاب الرئيس و نائبه معا 


 لو الدستور كان اتعمل اثناء حكم العسكر مكنش هيطلع كده...وضع الجيش مميز بمبالغه اوفر لا مناقشه ميزانيه محترمه ولا اى حاجه

مهتمين بتحصين الدستور اكتر من اهتمامهم بخلق شئ يستحق التحصين فى الاصل

و تذكر ان رفضك لمادة واحده تعنى رفضك للدستور كله
**********************************
كل اللى فات ده حماده و اللى جاى حماده تانى....انا بتحفظ على كل دول...و بسبب المادتى 198 و 202 سأصوت بلا تردد ب لا...من الاول كده..و من الاخر برضه....نفسى اكتب فى ورقه الاستفتاء "عبو ده دستور" بس بلاش عشان الصوت ميبقاش باطل فكفايه "لا"

الماده 202 دى مصيبه لوحدها..اسميها بالماده البرتقاليه نظرا لخطورتها لكن يحد من لونها وجود مجلس الشورى و ان كان وضعه يشبه "المحلل" مش اكتر جو موافقين موافقه و خلاص..احنا اتقطع نفسنا ان الاجهزه الرقابيه تكون مستقله و فى فصل تام عن الرئيس....ازاى اعين اللى هيحاسبنى على مال الدوله و يراقب "فسادى" و فساد عائلتى؟!...مش بقول مرسى فاسد بس لاحظ ان ده دستور هيقعد سنين... الموضوع برضه ينطبق على تعيين النائب العام و خلافه....الانتخاب هو الاحل الافضل دائما فى المناصب الحساسه

و اخيرا المادة الكارثيه  الماده 198 هى ماده "القطيعه" بينى و بين الدستور ده...مش هانزل اوافق على دستور فيه محاكمه عسكرية للمدنيين تحت اى بند...فى القضاء العادى الكفايه..الماده الحمراء..الماده 198 قتلت الدستور بالنسبه خلاص...مات الكلام

عن البصر و الادراك

مقارنة بين مانشيت جريدة الاخوان و صورة التح

لما بفتح قناه الاخوان و الاقيهم كاتبين فى شريط الاخبار ان اللى فى التحرير فلول و اعضاء الحزب الوطنى و شايلين صور مبارك و شفيق....و ان كل اشتباكات محمد محمود و سيمون بوليفار ناتجه عن "تحرشات جنسية" ..راجع قناع بانديتا و خلافه..الاول بستغرب و بعد كده بفهم

لما "الرئيس" مرسى يقول لوزراء العدل العرب ان المعترضين على الاعلان الدستور 5 الالف واحد...الاول بستغرب و بعد كده بفهم

لما جرنال الاخوان يقول فى عنوان رئيسى : ثوار و فلول و باعه جائليين فى التحرير...الاول بستغرب و بعد كده بفهم

هما مش كدابين....الكداب اللى شايف الشئ و بينكره و يعدل فيه لنية سيئه

هما شايفين كده فعلا....لما بيبصوا للميدان و هو مليان امبارح مش شايفين مليون واحد (او مئات الالف) هما بيشوفوا فعلا 5 الالف واحد...و لو واحد "عبيط بس حر" انه يشيل صوره مبارك كل اللى بيترجم فى مخهم ان كل دول "اللى هما 5 الالف واحد" نازلين شايلين الصور دى

وائل غنيم و البرادعى و جورج اسحاق بقوا فلول؟؟...اوماااال و ماله؟؟....صدقينى مش بيكدبوا هما شايفين كده

فى فرق ان تكون "شايف" الشئ و ان تكون "مدرك" له....العين بتقول لك مثلا دى دائره حمرا قطرها كذا...كونك انك تعرف ان الدايره دى عباره عن "زر" لما تدوس عليه يقفل التليفزيون ده ادراك مش بصر...العين كاميرا بتنقل بامانه...انما المخ ده حاجه تانيه خااالص

عشان كده لما تشوف صاحبك "متحمس" قوى لفكرة انت شايف انها "عته" متستغربش...يا اما اداركه هو اللى غلط او انت اللى ادراكك مشوه برضه....يمكن هما 5 الالف واحد و انا اللى عميا....يمكن و ماله؟؟ رأيى صواب يحتمل الخطأ و رأى غيرى خطأ يحتمل الصواب

هو الاهم....اذا كان الفلول "جامدين" قوى كده...ليه مظاهراتهم دايما كانت فاضيه و مسخره؟؟!!

خد يا ابنى كلمتين الامام البوصيرى دول حطهم حلقه فى ودنك

قد تنكر العين ضوء الشمس من رمد *** وينكر الفم طعم الماء من سقم

الحرافيش نجيب محفوظ

بعد ما خلصت امتحاناتى ...كتبت بوست بوكية ورد اصفر فى ازرق...و كتبت طريقة اقتنائى لحرافيش نجيب محفوظ
http://suchasmallaffairs.blogspot.com /2012/11/blog-post_8.html

النهاردة و اخيرا انتهيت منها...و ده رأيى فيها مفصل:

ريفيو القراءه الاولى مطلع سنه 2002: من اعمال نجيب محفوظ اللى محبتهاش ...كثيره الاحداث و الشخصيات و التشابكات و لكنى لم اجد فيها بغيتى...تقييم 3 نجوم
****************************
و بعد عشر سنوات
****************************
ريفيو القراءة الثانيه نوفمبر 2012: تركتنى الرواية تلك المرة مبهورة..هل كنت عمياء؟؟ كيف لم ار فى الحرافيش قبلا سوى مجموعة من الحمقى يهتفون "اسم الله عليه" مع كل منتصر...لقد نظرتهم تماما كنظره جلال ابن زهيره بائسين غير جديرى بالاهتمام او الولاء...انتظرت -قبل عشر سنوات- معنى اكبر و رسالة اعظم وراء كل قصة و لم ادر انى تماما ك"سينتايجو" الخيميائى وجدت الكنز فى الرحلة ذاتها لكن بعد عشر سنوات...تتضح لك الرؤيا و لو قليلا...يقدم لك نجيب محفوظ جرعة كبيره من الدراما و تطورها بشكل يدرس كمثال على الابهار و الامتاع
****************
يبدأ معك الرحله مع عاشور نفسة...كيف نسج حوله الغموض حتى فى نشأته و لعلى وجدت وجها للتشابه مع ادم...بلا اب او أم ...لا شئ سوى اختيار الشر او الخير مفردا بلا ناصح...حتى شخصية درويش شعرت بها ابليس اللعين الغيور دائما الداعى الى الفساد....شئ فشئ يتحول الى نوح جديد...وحيدا بلا اهل مره اخرى فى طوفان لا يراه غيره...لعلى مسرفة فى خيالاتى و لعل التشابه ليس موجود فى الاصل لكنها انطباعاتى اود تدوينها لعل قراءة ثالثه بعد عشر سنوات اخرى تكمل الصورة ....ليتحول نوح الجديد الى الناجى...عاشور نفسه حامل للخطئيه ربما اكثر من مرة ...من زواج عجيب الى سرقة واضحه...و تظل نهايتة اجمل ما كتب نجيب محفوظ بلا تقييد بمنطق او قيود
***************
شمس الدين: عشقته...شاب جميل الطلعة,مهذب,شريف مغوار...قريب الزمن بعاشور ...سار على الدرب..له ايضا عثراته كغيره...لكنه صافى...بلمحة بصر -و دون ان تشعر- تراه شيخا يحارب الزمن 
-ربما لم يصل لدرجه حفيده جلال-
يصارع الشيخوخه...يجعلك تلمس وجهك باحثا عن تجاعيد مخفيه...مرور الزمن فى هذا الجزء خاطف..يشعرك بالخوف منه ليس منسابا كباقى اجزاء الحرافيش
***************
و دون ان تشعر تجد ان زمن شمس الدين انتهى...تأسف على ضاحك السن لكنك تقرر ان "الحى ابقى من الميت" و تسير فى ركب سليمان....سليمان شخصية مفصليه فى العمل فهو نقطة التحول الاولى فى حياه عائله الناجى...نصف و نصف...نصف حياه عاديه كابيه و جده و نصف حياه الترف و اكل التفاحة المحرمة
**************
هابيل و قابيل الجدد..ربما بلا دماء "كثيره" لكن الصراع قائم عن خضر و بكر اتحدث...منعمين بعيدا عن الفتونه...يدور بك محفوظ فى قصور عربية,زجاج ملون,ارابيسك,و كثير من النميمه و الاحداث...تتسأل دائما عن الوريث
*************
لتصل الى "سماحة" الابن الاقل حظا على الاطلاق....سماحة بتعاسته الدائمه بعد امل و شباب...من عاشق و راغب فى القوه الى قاتل مدان...ثم تحول سريع الى أب لابناء...ظللت اعد الايام مع سماحة انتظر العشرون عام ان تنقضىاه يا سماحة كم ارهقتنى!!...ظللت احلم طيله اسبوع كوابيس من امثال سماحة...ماذا لو حدث -لى- حدث عارض ما اضاع عمرى؟!...حدث ما جعلنى امضى ادون الايام يوما بعد يوم و كل طموحى ان يضيع من عمرى عشرين عام...لا اعلم لما اخذت قصة سماحة بتلك الشخصية و كأنها موجها لى..ففى النهاية يستمر العرض بشخصيات جديده...و عمر الشخصية مجرد صفحات لكن يظل سماحة غصه فى حلقى ..و كأن نجيب محفوظ يأبى ان يصير سماحة مأساه فتنقلب الى ملهاه بنهايه مضحكة باكية يضيع معها باقى عمره

جدير بالذكر بان قصه سماحة"المطارد" قد تحولت الى فيلم سينمائى





بطولة نور الشريف...اعجبت بالفيلم قبل قراءه الرواية لكن تغير رأيى الان ...لم يستطع صانع الفيلم ان يقدم قصة سماحة كل كأبتها للمشاهد فعدل و اكثر التعديل فافسد جوهرها
***************
لا يترك لك محفوظ وقت طويل للتحسر على "سماحة" فها انت ترى قرة و وحيد و رمانة فاما وحيد فلا يخجل من شذوذه الواضح...لكن بطشه هو من يحميه دائما كما حمى غيره..ترى الحرافيش فى تلك المرحلة فى زاوية لا يخرجون منها...يتحولون الى مهنئ للفائز,شامتين علنا فى الخاسر...حاقدين سرا على الجميع و تعاد كما يعاد كل شئ...قصه قابيل و هابيل بين رمانه و قرة...قرة شاب يافع لطيف المعشر لا تستطيع سوى ان يذكرك بشمس الدين ,يدخل قلبك فورا بلا استئذان..ربما كان ضعيف قليلا لكنه دائما طيب القلب متحمل للعواقب و ان لم تكن مسؤوليته,و كعادة الطيبين يأتى العقاب قاسيا

يختفى قرة الى الابد
************
عزيز...شاب جميل ينشأ بين طيات الغل و القهر و الكراهية,عجيب كيف لم يتحول الى شخصية عدائية على الرغم من ظروف نشأته...ربما تحول لشخصية سلبية قليلابالطبع تظن بى انى جننت فانا اتحدث عن شخصيات درامية و كأنها حيوات من لحم و دم..لكن اعذرنى قليلا...تلك الشخصيات مع طول الروايه تحولت الى اصدقاء و عشره عمرو 
ثانية دون ان تشعر يصبح الشاب عزيز , كهل اب و اطفال و شعرات بيضاء غزيره لتظهر شخصية اخرى رئيسيه و يذهب عزيز الى زاوية النسيان
************
زهيرة...البطله الوحيده فى العمل..الوحيدة ذات شخصيه رئيسية...فهى ليست مجرد اخت او زوجة او ذاك النموذج لفتاة ساحرة تمشى فى الحارة لتجذب البطل لتصير "مجرد" زوجة عملها الوحيد انجاب مزيد من الشخصيات ليختار احدها كفتوه الحارة الجديد

زهيرة هى الحماس القاتل,الحلم,التطلع القاتل الى المجد...عاده بنتقد وصم البطلة بالسوء لمجرد التطلع لكن تذكر بان "معظم" شخصيات الروايه شخصيات سلبية فى الاصل...فجعل زهيرة ملاك كان ليكون ثقب فى ثوب فاخر

لعن الله "نادية الجندى" لاخدها هذا الجزء "شهد الملكة" فى فيلم مستقل





لم استطع اخراجها من عقلى طيله الجزء..فلمسات نادية الجندى على الفيلم واضحة اكثر بمراحل من لمسات نجيب محفوظ ذاته...فكأنها و زهيره متطابقين...لم استطع الفصل للاسف
*****************
مع نهاية اخرى "حزينه" لزهيرة..ظل التساؤل قائم...هل الوارث من نسل عزيز ام زهيره ام لعله الطفل المشترك و يقع اختيار نجيب محفوظ على "جلال" ابن عبد ربه لاكمال الملحمة,من طفل فى الكتاب,لعاشق كالمعتاد,الى نقطة تحول رئيسية...الموت شخصية اخرى مثيرة جدا للاهتمام: جلال ابن زهيرة...هل يمكن لشخص ان يتحدى الموت؟؟ ليس على طريقة شمس الدين بمجرد الانكار,هل هذا الذى علينا حق لا مهرب منه؟؟ و لتستمتع بقصه جلال فى محاولته لتحديه ,جلال شخصية معقده جدا و ممتعه لكاتبها و قارئها,وصولا الى المئذنه الملعونه و السجن الاختيارى يصل الجنون الى منتهاه
*****************
لتصل الى قمة المأساه و الملهاه
فصل الاشباح:فى طريقة مشابه لروايه "مئه عام من العزلة" تكرر الاسماء و الاحداث و نمط الشخصيات: جلال اخر,شمس الدين اخر سماحة اخر...يصل مرور الزمن فى هذا الفصل الى اكثر سرعه دونت له...فانت لا تكاد ترى شخصية حتى تبتلى بشعر ابيض و شاب اخر جديد
****************
لتصل الى فتح الباب بل لنصل الى الجوع و كأن من يخبرك بان الحياه ليست فقط دورة الحياة و الموت..ليست فقط الوليد فالشاب فالكهل و الموت...الجوع يتربص دائما يبطئ من حركة الزمن ..الجوع فيلم سينمائى اخر




لعله اكثر جوده"بمراحل" من شهد الملكة...و يظل عبد العزيز مخيون فى فتح الباب فى مخيلتى بلا منازع و العبقرى محمود عبد العزيز فى دور سماحة الثانى و كعاده اى امل او صحوة تقتل المئذنة المعلونةاو لنقل ضعف الحرافيش فتح الباب بلا ادنى اهميه
*****************
يخرج من نسل سماحة...ربيع...و بربيع و حليمة يبدأ الفصل التالى من ملحمة الحرافيش التوت و النبوت فيلم سينمائى اخر




التزم بالنص الى حد كبير لولا بعض من "التوابل"السينمائيه لم تؤثر كثيرا و لم تفرق الفيلم عن اصل الروايةفائز و ضياء و عاشور...هم على الترتيب سمير صبرى,محمود الجندى و العلايلى

رجوع جديد للحرافيش و العدل
******************
و كما لم تبدأ النهاية لا تنتهى...ففوز الحرافيش الاخير يشعرك دائما بانه مؤقت كغيره...لكن من اخبرك 

ان فى الحياه بدايات و نهايات قاطعة...بل مجرد دوائر لا تتنهى

*****************
ملاحظات عامه

حيرنى كثيرا اختيار الاسم...لما اسماها "الحرافيش"؟ فالحرافيش فى كل الاحوال مجرد "كورال" فى الخلفية..لا احد يهتم به حتى القارئ...عاشور الناجى و عائلته هم الاصل او هكذا يوحى اليك طيله العمل...لكنك ما ان تغلق الكتاب ترى الاسم شامخا فى تحدى "الحرافيش" ليس الناجى او عاشور او سيرة فلان...فقط الحرافيش...و كأنه يخبرك بانهم المشكلة و الحل
___________
البطل الحقيقى بلا مواربه فى الروايه او الملحمة ان قبلت التسمية هو بلا نزاع: الزمن, تراه بطيئا حينا كحالنا مع عاشور فلا تكاد تشعر به...مستمر بلا انقطاع او راحه لكن شعورك بوجوده هو الاصل, ما ان 
ترى شاب يافع حتى تراه بعد صفحات قليله الى كهل اب او عم لشاب اخر
___________
لا يضايقك محفوظ كثيرا بموت احدهم الا اذا ذهب شابا ك"قرة" و "زهيره" و "جلال" ليكون عنصر المفأجاه هو الاصل...لكن فى معظم الحالات مرورا بعشرات الزوجات و الاخوه و الحموات يموتون من الشيخوخه بشكل عابر و عادة وسط ذروه احداث القصة التاليه فلا تشعر بغيابهم اصلا
___________
دائما شيخ الجامع...و صاحب الخمارة...الفتوة...تتغير الاسماء و تبقى الصفه الى الابد بلا انقطاع,تماما 

مثل صوت التكية ليس مفهوم ولا غائب...متواجد دائما
___________
ترى بام عينك ما تحكى به الجدات دائما...كل فرد من العائله -على الرغم من تفرده- ما هو الا نسخه لفرد سابق لم يلتقيا قط...لمنها يسلكان نفس المسلك و ربما يتشاركا نفس الاسم او البنيان...نموذجين واضحين فى البنيه نموذج عاشور بجسم ممتلئ عريض...و نموذج شمس الدين شاب اميل الى النحالة سريع و بهى الطلعة...تراهم يتبالادن بلا هوادة طيله صفحات الحرافيش
___________
يقدم لك نجيب محفوظ الانسان فى عدة لقطات محددة...الولادة...لمحة من الطفولة عاده الشارع او الكتاب...الشباب و القوه...الحب الاول لمحات شاب لفتاة فى السوق تلهب قلب اخضر برئ...الزواج...و 
عاده الكارثه الجديدة التى تفسد حياه البطل ما تتواجد فى تلك المرحلة...و دون ان يشعر لا هو و لا انت يصير كهلا...و تجد ذاتك منغمس بالكامل فى حياه طفل جديد...فيموت الاول فى هدوء بينما تتابع بشغف 
التالى من القصة
___________
هل نحن البشر بتلك البساطة؟؟..هل بالفعل يمكن تلخيص الالف التفاصيل فى عدد مشاهد محدد...فكرة تدفع الى الاكتئاب.....الى قراءة ثالثة بعد عشر سنوات من الان ان بقى فى العمر بقية

الكتاب متوفر ورق فى مكتبة مصر ب7 جنية لكن عموما لينك تحميل

http://www.goodreads.com/ebooks/download/7709594

علاء و حكايته

by  my colleague Mohamed Gamal

يا كلية تييت...يعنى انتوا عميان القلب و الودان كمان؟؟!!...فى حد فى مصر ميعرفش علاء و حكايته؟!!...يا لهوى عليا ...اذا كان موظفين الكليه مش عارفين الشاب اللى صورته فى كل حته...عايزين الناس العاديه تعمل ايه؟؟؟...نفسى اعرف الموظف اللى ايده تتشك و كتب الاعلان مخدش باله ان فى حاجه غلط؟

الحكاية من اولها....اللى انت شايفه ده لوكر "دولاب" فى الكلية بيتأجر بالسنه...لما تأخر الدفع لزقوا ورقة على الدولاب يطالبون منه الدفع....انما مين علاء عبد الهادى نفسه؟؟ دى قصه تانيه بقى

اقرأ ايضا :
علاء مات !

علاء كمان و كمان

بس يا سيدى و روحنا وزارة الدفاع

مقاطعون فليحترقون

بس يا سيدى و روحنا مجلس الشعب

ازاى لما تتكلم الناس تصقف؟

تخيل معايا رد فعلك لو حسنى مبارك كان خطب قدام جمهوره الحبيب فى "مصطفى محمود"....او ان طنطاوى يخطب قدام جمهوره المفضل فى "العباسية" ....تخيل..تتتخيل..ت ت ت تخيل

مش فارقه كتير اظن عن حركه الاتحاديه و الاستاد....على فكرة انت عارف قصر الاتحادية اسمه اتحاديه ليه؟؟؟....ده طبعا قصر قديم و اتأمم...بس اتسمى بالاسم ده ايام اتحاد مصر و سوريا...يا مؤمن رايح تخطب من هناك و احنا اصلا منقسمين ...ده احنا بقينا زى سوريا بتاعه اليومين دول

مره ريس مقتنع بقرارته نزل لناس مقتنعه بقرارته عشان يقنعهم بقرارته

الفكرة واحدة...ازاى تضمن انك لما تتكلم ان الناس تصقف؟؟...الحل الاول :الناس الطبيعية بيتضمن كده بانها تتكلم كويس بكلام مرتب منظم محترم  للى قدامك ,عندنا مصر اخترعنا طريقة جديدة نوفى...و هى الحل الثانى: ببساطة خلى الجمهور تبعك...هاتهم باتوبيسات مكيفة و روحهم فى معاد محدد...خليهم يمسكوا فى ايد بعض عشان محدش يتوه..وزع عليهم صورك و يا سلام كمان لو شويه تمرين على الهتاف

الحل الاول ده زى خطابات اوباما التحفة...خطابات محفزه منظمة مش خارجه عن السياق ولا فيها قله فكر

امريكا كويسة اصلا مش محتاجة اوباما..و احنا زفت اصلا مش ناقصة مرسى...انا بقول نتبادل و ندفع الفرق...قارن بين خطابات اوباما المنظمة الحماسية مفهاش كلمة بره السياق...و بين خطابات مرسى بين اهله و عشيرته ...تعرف ليه هى امريكا و احنا عالم تالت

رد عليا صديق بان محدش فى مصر عنده الملكه دى اصلا...و بصراحة عنده حق...بس هى موصلتش للدرجة دى يعنى ؟...مش عشان انا خايف اتشتم او يترد على كلامى انى اتكلم قدام حبايبى مع ان الحل سهل جدااا

اتكلم فى التليفزيون او الراديو زى الناس فى البلاد "المحترمة" بتعمل...بلاش الفيس تو فيس ده اذا كانت ظروف البلد صعبه و التحزب و الاستقطاب على اخره....انما انك تخطب قدام حبايبك عشان تسمع كلمتين حلوين و كام هتاف....شغل قديم قوووووى

الدستور و باكدج المحمل

الاخوان ماسكين فى موضوع النائب العام و عايشين جو الثوار...مع انه ميهمش حد يعنى انشالله يولعوا فيه...كل ده شوشره على الدستور مش اكتر....كل ده شوشرة على تحصين التأسيسية...و ده كل الهدف من طريقه البكدج

عبو النائب العام-التعيين اصلا مرفوض...الطبيعى الانتخاب زى البلاد المحترمة-...التأسيسية يا خلق الله...ممكن نرضى بجزء اعاده المحاكمات و النائب العام ...حل التأسيسيه هو الغاية الان فى رأيى..مصر من حقها تأسيسيه "انضف" من كده

حل التأسيسية و الا كل اللى عكيناه ده اونطة...انا مش هاشحت حقى من الاخوان...لا اثق فى الناس دى على مستقبلى بصراحة..ما اضمنش الاخوان على دستورى...هيبقى مليان خوازيق لا ترى بالعين المجرده و هنلبس فيها بعدين...من الاخر

الفكرة لا النائب العام ولا المحاكمات ولا نيله.....الفكرة التأسيسية....ركزوا فى الدستور اللى بيتسلق بدل ما نرجع نحاول نقول "لا" فى الاستفتاء و يقولوا علينا بنعطل مسيرة الديموقراطية

هيخلطوا الاوراق للصبح...هيقولوا لك ترضى تبقى مع الزند و عبد المجيد؟؟...قول لهم جو الباكدج ده عند المحمل مش فى السياسه...ارفض و اقبل كأجزاء

بيعجبونى قوى ان الاخون بيجيبوا النتيجة من الكنترول....راحوا الاتحادية عشان يسمعوا الخطاب اللى محدش كان عارف انه هيتقال....و نزلوا قبل القرارات اصلا ب3 ساعات...ارحموا عقلى بليز

و ابتدينا نسمع كلام زى "الديكتاتور العادل" و "الديكتورية المؤقتة" و ده ان دل على شئ يدل ان اننا محتاجين علاج نفسى شديد "جروب ثيربى كده" ...نروح كلنا عند دكتور احمد عكاشة او يحيى الرخاوي يعالجنا مليون مليون كده و فى 70 جلسة نخلص و ننتهى

و تذكر

التحرير و مصطفي محمود 

التحرير وروكسي 

التحرير والعباسيه - 

التحرير والمنصه

التحرير وقصر الاتحاديه 

الحق ثابت والباطل متغير !!

قرارات مرسى

تعليقى على قرارت 22 نوفمبر 2012...المدعوة "قرارات مرسى"


المرة دى مش هانتقد بشكل مطلق او هاوفق بشكل مطلق

شيل النائب العام (على الرغم من سخافة الطريقة) مقبول

اعاده المحاكمات قرار منقوص لانه لا يتضتمن اى شئ باحداث ما بعد الثوره و مازال طنطاوى و عنان يحملوا وسام الجمهورية و قلادة النيل و سلم لى على البامية

تلزيق التأسيسية بالعافية كده قرار "مقزز" و "اخوانى" بحت و حاجه تقرف

زياده المعاشات و فلوس التعويضات قرار حلو

تحصين نفسه من القضاء و وقف قرارته قرار يدل اننا عايشين فعلا فى "جمهوريات الموز" اللى كان البرادعى بيقول عليها

من الاخر هو حاطط القرارات الثورية وسط القرارات الاخوان و اهو تلبيس عشان لو اعترضت تبقى فلول


نصيحة اخت:
اوعى توقع نفسك فى فخ الموافقه او الرفض على القرارات كحزمة واحدة.....

اوعى توافق عشان تثبت لنفسك انك ثورى و عايز اعاده محاكمات و زيادة تعويضات...لانك بموافقتك وافقت ضمنيا على ان "مرسى هو اله اعلى " لا يؤخذ و لا يرد عليه...و تتدبس فى التآسيسية غصب عنك

ولا ترفض عشان ما توصمش نفسك "اونطه" انك فلول و واقع فى غرام عبد المجيد محمود

انت حر...ترفض اللى فى مزاجك و توافق على اللى فى مزاجك...مش عافية هيا


بس خلاص

قل أمنت بمحمد مرسى

حصل موقف مع اختى النهارده سخيف...و عايزه اعرف رأيك فيه و هل من حقى الشكوى او لا

القصة كاملة: اختى و هى فى السنتر فى حصة الميكانيكا ....خرج المدرس عن موضوع الحصة و كان بيتكلم عن انجازات مرسى و قد ايه اللى بينتقدوه دول ظالمين و عايزين يخربوا البلد

اختى ردت بانها مش مقتنعه بيه ....ناقشها بعصبية بمزيد عن الحوار بانجازات الرئيس و انه "حافظ للقرأن" و بيصلى الفرض بفرضه و انكر اى مسؤوليه ليه عن الحوادث او المشاكل اللى حصلت فى الفترة اللى فاتت و شتم حمدين صباحى ...تطور النقاش فوصفت اختى مرسى بانه رئيس "فاشل" ملوش انجازات محددة فى الفترة اللى فاتت...اتعصب و نادى على المشرف بتاعه و قال بصوت عالى : هات لى الخرزانة....حاولت اختى تهديه و تناقشة ان مش حقة يضربها لموقف سياسى ...اتعصب اكتر و ضربها على ايدها و على جسمها اكتر من مره

بعد كده قعدت و اشتغل طول الحصة فضل يسألها هى بس .....

بعد ما اختى روحت حكت اللى حصل ..اتصلنا بيه انا و بابا و ما انكرش و سألناه اذا كانت اختى غلطت فيه بشكل شخصى قال لا....و لما سألته اذا كان اخوان انكر ...

لما سألناه عن سبب فعله: برر ان الرئيس "رأس الدوله" و "لا يجب اهانته" ....مذيلا كل جمله ب"ربنا يهديكى يا دكتوره"

السؤال بقى: هل انتقاد محمد مرسى ذنب يجب الهدايه منه؟؟ هل عمرو اديب لما وصف مرسى انه "فاشل" حد ضربة؟؟ و هل انا بدفع 100 جنية فى الشهر دروس خصوصية عشان اختى تسمع كلام سياسه و تتعاقب لما تعترض؟؟

جون الصفاقسى و دريم بارك !

و انا قدام قطر الموت امبارح فى دريم و ببحلق فى الناس اللى بتتقلب و تصرخ و بسأل نفسى طب اركب ليه و ابهدل نفسى لا و ادفع فلوس فى كده كمان؟؟؟

افتكرت جون ابو تريكه فى الصفاقسى....يومها  و لانى اهلاويه حتى النخاع و بما ان الاهلى فرصته فى الفوز كان رقم يقرب من الصفر...اصابنى توتر شديد طول اليوم و دقات قلب و عرق و حالتى كانت حاله خوف من هزيمه الاهلى...فقررت انى اخد منوم و اعدى الماتش و اصحى بعده و الاهلى خسران و خلاص....فعلا خدت المنوم و نمت و صحيت على ماما و هى بتقول "جوووووووووون" شفت ان الجون جه تقريبا فى الدقيقه الاخيره...شفت الجون فى الاعاده و شفت الماتش كله فى الاعاده بس عمرى ما حسيت احساس اللى شافه على الهوا...و على طريقه "ياريتى كنت معاهم"....

بقى جون ابو تريكه ده رمز لكل الحاجه كنت المفروض اعملها و خفت...كل الفرص اللى فوتها بسبب التأجيل او القلق....و عشان كده ركبت قطر الموت....لمجرد اثبات انى عايشه و ممكن اعمل الحاجه اللى بحبها حتى لو كنت خايفه

ملحوظه: القطر "مبالغ فى تقديره" و فشل حتى فى انتزاع صرخه واحده ...كل الموضوع انى طول اللعبه و "الشقلبه" بعدل فى النضاره

قل فلسطين ولا تقل غزة

هيطلع عندنا جيل جديد ميعرفش يعنى ايه فلسطين....هيعرفوا غزه فين؟؟...اجزاء الضفه ايه؟؟ ايه الفروق الادارية بين القطاعين...بين الدويلاتين....انما فلسطين هتتحول لذكرى فى كتب غسان كنفاني و محمود درويش 

ربما تتحول "القدس" الى تلك المدينة التى تتحدث عنها تلك ال"فيروز" فى اغنيتها معلنه ان باب مدينتهم لن تغلق فهى ذاهبه لتصلى 

عن فلسطين اتحدث....قل فلسطين ولا تقل "غزه" ان سمحت....كالعاده بيشغلونا باحداث فى غزه...لننسى الاصل...القدس
***************
ارفض تحريك -او توريط- الجيش بتاعنا فى حركه "غبية" و مش متحضر لها 

ارفض برضه السكوت المخزى ده و الاجراءات الخالية من الطعم
**********
عايزه ايه؟؟؟

مش عارفة بس ادينى "فعل ما" فى الاول و بعدين نفكر....كما ان تلك الدائرة اللانهائيه من تغييرصور البروفيلات عالفيس و "تشيير" اغانى فيروز و كلمات درويش اصبح للاسف مثيرللاحباط ان لم يكن الغثيان...كما ان النزول امام سفارة اسرائيل لحرق بعض الاعلام و شويه "خيبر خيبر يا يهود" صار مثير للشقفه
*********
هتقولى بنتقدى ليه؟؟

هاقولك الناس انتخبتك انت مش انا...اتصرف هو يعنى يا حرب يا نحط الجزمه فى بقنا اكيد فى حل تالت دى شغله حضرتك بقى
*********
هتقولى معندكيش حل اسكتى

هاقولك ما انا ساكته اهو شايفنى نزلت مظاهرات؟!!

بلا مالنسوان تحيّك

من كام يوم حضرت فرح...بغض النظر ان ماما "اجبرتنى" على لبس فستان قهرا لا و اتمت المأساه بجزمه كعب 12 سم....لكنى تمسك بنضارتى الطبيه الضخمه و رفضت كل الضغوط اللى عايزانى البس نضاره النظر الصغيره لاكمال الاناقه

كان الفرح فى رأيى اوفر شويه و اتفقعت من تحويل العروسه من مفهوم ال"برايد" الى النوع المصرى الا و هو عروسه حلاوه مكياج تقيل و حجاب على رأسها و رقص للصبح من كل العيله المحجبات برضه...ده غير ان الجوازه نفسها مجرد ولد خايف يكبر قرر يتجوز بنت بيضا مربربه و خلاص ...و اهو فرحه و انجاز فى السريع

خرجت من الفرح بتهادى بفستانى البمبى و انا بدندن اغنيه زياد الرحبانى بلا و لا شى...دندنه خفيفه فى محاولة للرجوع من حاله "الماديه الجشعه" و "الرأسماليه المتوحشه" الى جنه "الحب اليسارى" و فى وسط الدندنه الحلوه دى حصل موقف سخيف

و مشيت جنبى صاحبه ماما و انا بدندن " بلا مالنسوان تحيّك "...كل اللى سمعته الست كان لفظ "نسوان" ...لقيت على وشها حته تعبير !!!!... الدكتوره -اللى مفروض انها انا- بتقول الفاظ بذيئه 

حاول بقى تشرح للصبح مين زياد و خلفيات الاغنيه...شوف مين يسمع؟؟

The Joy of Simple Living by Jeff Davidson

فكره الكتاب تحفه و فعلا بيضم نصايح منها كتير قابل للتنفيذ...لكن اخراج الكتاب سئ النصايح مكتوبه على هيئه فقرات تتعب النظر ..و مش مرقمهاسم الكتاب: The Joy of Simple Living: Over 1,500 Simple Ways to Make Your Life Easy and Content-- At Home and At Work اسم الكاتب:Jeff Davidson لينك تحميل: http://www.goodreads.com/ebooks/download/37316 .The_Joy_of_Simple_Living مكتوب زى كتب الدراسه مش زى النوع المحبب ده من الكتب...لو انه استعان بالارقام و الالوان و اكثر من الجداول كان بقى كتاب عبقرى ...لو كان مكتوب على طريقه ستيكى نوت كان بقى مثير للاهتمام و لعله حصل على ال5 نجوم نصايح مفيده من فصل المطبخ حددى اماكن الاشياء طبعا للاستخدام...مثلا حطى المغرفه جنب الفرن و هكذا ************* ارحمى ضهرك..لو كان عندك مشكله فى وجع الضهر استعينى بالاماكن المتوسطه و العاليه فى التخزين ************* لو انتى قصيره بلاش تستخدمى الاماكن العاليه مش بس عشان صعب الوصول ليها..لكن لانها خطر و ممكن تحصل حوادث بسببها ************* نظمى سكاكينك لانها ممكن تبقى خطر و حوادثها جمه...استخدمى قاعده ال3 سكاكين ,اختارى 3 بس باحجام متنوعه و اى سكاكين تانيه شليهم فى مكان اخر لانك غالبا مش هتحتاجى ليهم ************* Use it or move it ************* استخدمى المعلبات اللى تاريخ صلاحيتها هيخلص اقرب ************* Clean up the kitchen as soon as you finish eating each meal, while you still have the energy, Once you begin digesting the food, you may be too sluggish ************* خلى كل رف فى التلاجه لهدف محدد...بلاش الخلط...و راعى الروايح و اختلاطها ************* اعملى لائحه بالمشتروات...راجعيها مرتين..متشريش حاجه مش محتاجها عشان ارخص ************* بلاش تسوق-بذات الاكل- و انتى جعانه ...لانك لا شعوريا هتشترى اكتر ما تحتاجى نصايح جيده من فصل الحمام استخدام الكلور و الفنيك احسن و ارخص من الديتول و خلافه...حذار من تأثيرهم على القماش و الايدين *************** تلميع الاجزاء المعدن و الزجاج بيخلى المكان اجمل بكتير و بمجهود قليل *************** استخدام الشمع على الحنفيات و الدوش بيعمل نتايج رائعه *************** قواعد شراء الصابون اولا:اكتفى بصابونه واحده ...توفير مساحه و فلوس ثانيا:لو بشرتك حساسه استخدم الصابون اللى معاه اضافات ترطيب  ثالثا:استخدم الصابون المضاد للبكتريا الا اذا كنت صاحب بشره جافه او حساسه رابعا:تخلى عن الصابون السائل لانه اغلى و بيخلص بسرعه  ************** حط لمستك الشخصيه على حمامك: استخدم النور حط مرايات كتير لانه بيدى شكل نضيف و احساس بالوسع حط ورد و زرع على الاقل صناعى زجاجات الصابون و الشامبو مهما كانت متنوعه وشكلها حلو مش زينه حاول تقلل وجود كتب او مجالات فى الحمام لان صحيا الدكاتره بينصحوا بتقليل وقت التواجد فى الحمام نصائح مفيده فى فصل التسوق قواعد شراء الملابس التسوق لملابس الصيف فى موسم الشتا و العكس بالعكس يخليك تشترى ارخص و تنوع تجنب شراء ملابس كثير و مكلفه للاطفال لانهم بيكبروا بسرعه و الاستفاده محدوده مش عيب انك تشترى ملابس ارخص لان فيها عيوب تصنيع بسيطه ممكن تتصلح مش عيب انك تشترى حاجه مستعمله من مزاد او كده ************* قواعد الشراء من السوبر ماركت خليها مره فى الاسبوع..كرحله كبيره قبل ما تروح قرر هتصرف كام بالظبط و متخدش معاك فلوس زياده كتير زود السلع فى لائحه الشراء بمجرد ما تخلص  قرر هتطبخ ايه قبل الشراء و اشترى الاحتياجات بس اشترى و انت شبعان بص لفوق و لتحت..لان عاده المنتجات اللى فى مستوى نظرك هى الاغلى بلاش تركيز على اسم الماركة..مش معنى ان الغلاف شكله غالى ان الجوده افضل لا تقع فى فخ الاوكازيون اشترى قبل المواسم بفتره مع فصول تانيه ممتعه عن الكتب و البنوك و الفواتير و تنظيم البيئه المحيطه بيك

عن الحرية ل جون ستيورات ميل

عن الحرية  John Stuart Mill 

عن الحريه هو اروع ما قرأت من فتره طويله...كتاب صغير مزدحم بالافكار...يعطى لك كقارئ مساحه للتفكير و الرأى...لا يفرض عليك رأى ابدا...لكاتب يدرك دائما ان رأيه ليس صحيحا مئه فى المئه بل هو مجرد رأى لك ان ترفضه او تقبله او تناقش به..رأى صواب يحتمل الخطأ و ربما رأى خطأ يحتمل الصواب...يحفزك على ان تكون رأيك و لا تكتفى بأراء المؤلف...

لم استطع ان امنع نفسى من امكانيه انتحار المؤلف ان عاش فى مجتمعنا 3 ايام...اتصور انه لن يستطيع تحمل ما نراه فى وطننا العربى...فهو يعتبر كثير من الاشياء من المسلمات بينما تلك الاشياء بالنسبه لنا امل بعيد المنال ...منها مثلا : تخيل موقف كاتبنا ان عاش ازمه مجلس الشورى حين عزل رئيس تحرير ...تخيل رأى كاتب كتب تلك الكلمات عن الصحافه

الفصل الثانى فى حريه النقاش و المحاوره-لاحظ ان الفصل الاول كان مقدمه طويله- :

يضيف الكاتب ما يثير الانتباه عن هؤلاء ممن يحرمون النقاش و المجادل فى اى شئ..يروجون الى ان النقاش غير مفيد لانهم ببساطه على حق...و هنا يستنكر الكاتب كيف علمتهم بانكم من على حق؟؟..هل انتم متأكدون 100 فى المئه..و ان كنتم هل حصلتهم على توكيل عن كل بنى البشر بالتحدث باسمهم و اقرار الصواب من الخطأ

فلفترض ان اتنين بيتناقشوا يمشوا شمال او يمين ...فاذا كنت مقتنع ان اليمين هو الصح قلقان ليه من المناقشه؟..اذا كنت على صواب زادك النقاش اقتناع و زالت شكوكك من اتجاهك..و ان كنت على خطأ لماذا لا تعطى نفسك فرصه للمراجعه و التفكير

ذكر نفسك دائما بانك قد لا تكون على صواب كما تتخيل..فمن قتل سقراط قتله من باب عقابه على"افساد الشباب" قتلوه بدافع اخلاقى و اثبت التاريخ خطأ هؤلاء..هؤلاء من ظنوا ان الارض مركز العالم وان الشمس من تدور كانوا على قناعه غير قابله للحركه بانهم هم الاصواب بلا نقاش..من صلبوا المسيح -على الروايه المسيحيه- قتلوه من باب الدفاع عن اليهوديه و لعقابه على "كفره" بينما دخلوا التاريخ من اوسع ابواب الكفر و الظلم..من مثل بجثه الحسين تخيل انه بيدافع عن الدين و توحد الامه بينما وصم طيله الدهر بسبب الفرقه و ضياع الشهامه ,دخل التاريخ كقاتل حفيد النبى مجرد سفاح...سيب لنفسك فرصه للتراجع ,نقطه رجوع

يرى الكاتب-و انا معه- ان هذا النوع من خنق النقاش يقتل الابداع و يوقف نمو الانسانية فربما يكون فى النهايه السير يمينا او يسارا خاطئ ربما كان طريق ثالث لن تكتشفه دون ان تناقش و تستمع و تفكر ليس من باب اقناع الطرف الاخر فقط ربما لاقناع ذاتك فى النهايه...فالاضطهاد لم يمنع فكره قط من الانتشار بل قد يمنع البوح علانيه بتلك الافكار..فسقراط تجرع السم و حفظ العالم كلماته...عذب المسيحين و القوا للاسود-و مثلهم المسلمين- و لم يمنع ذلك من انتشار المسيحيه او الاسلام على السواء...الحقيقه تكتسب الكثير حتى من خلال الاخطاء التى ادت اليها

ينطبق المثال على حكومه تقرر اتجاه اشتراكى ام رأسمالى مثلا...و يجيب هؤلاء ممن يخافون من النقاش عموما بان هناك استثاء للتلك القاعده الا و هى نقاشات الدين و الاخلاق...و ارى انا و المؤلف بانه لا يوجد فرق على الاطلاق فالمناقشه اذا كانت على هذا المنوال بلا صراخ او تخوين او تكفير دائما مفيده و يضيف الكاتب بان حتى و ان كان طريقه الحوار عصبيه او شكوى او حتى اتهامات متضاده فائدتها اكتر من مضارها و يشرح ذلك فى استفاضه يضيق بها حيز الريفيو للاسف وردت فى الصفحه 65 بالتفاصيل

يقارن الكاتب بين المؤمنين الاوائل فى الاديان ...هؤلاء من تحلقوا حول الرسل و بين هؤلاء المؤمنين الجدد ممن يرثون الايمان مع ملابس الوالد...مقارنه بين هؤلاء ممن اقتنعوا بعقولهم قبل قلوبهم و بين هؤلاء المترددين ممن يرهبون حتى من النقاش خوفا على ايمانهم الهش..هؤلاء من تحميهم القوانين من كتاب الكفار خوفا على عقولهم الفارغه فى الاصل

##################
الفصل الثالث :الفردية

فى هذا الفصل يتناول المؤلف "الفرديه" كاساس لمجتمع سوى...و يضرب مثل بالتعليم: فمعنى الفرديه لا يعنى حرمان الشخص من تجارب الاخريين والا لبدأ كل شخص من الصفر و نكون قد اعاقنا التطور البشرى فى غايه على شأن الفرديه...بل ان الطريق الاقوم هو توفير تلك الخبرات الى الطالب -او اى كان الشخص الطالب للمعرفه- و تركه لفرديته تزيد او تنقص , تعدل و تطور فياخد ما يتوافق معه و يترك ما لم يقتنع به و يضيف ان القدره العقليه كالقوه البدنيه لا تأتى الا بالتدريب و الاستخدام الواعى

خلق نسخ اضافيه من البشر غير مفيد -هكذا يرى المؤلف و انا معه- و تخليق نماذج مشابهه لما نملكه بالفعل لا يجعل منا بشر انما ندخل فى تصنيف القرده او حتى الروبوت ...فالطبيعه البشريه ليست اله يمن بناؤها على غرار نموذج معين بل شجره تحتاج الى النمو و التطور

صرنا لا نسأل انفسنا ماذا نحب؟؟..ماذا نريد او نحتاج ان نفعل؟...تحول السؤال الى ما هو الفعل الذى يناسب منصبى؟؟..ماذا يفعل من هم فى مكانتى؟؟ و الاسوء-من وجه نظر الكاتب-ماذا يفعل من هم اعلى منى مكانه اذا وضعوا فى هذا الموقف؟...عشقنا القولبه..استملحنا ان نصنف فى تصنيفات مجتمعيه نفعل ما يريده المجتمع ..صنعنا من انفسنا نسخ اخرى

و تذكر عن هؤلاء من خرجوا من الركب هم من تعرف اسماؤهم الان...من اخترع و من ابتكر و من امتلك الناصيه لم يكن جزء من الركب...غرد وحيدا ...لذا تذكرته الانسانيه التى تنسى سريعا..كما يعبر الكاتب: لا يستطيع العبقرى ان يتنفس الا فى جو حر

يميل المجتمع دائما الى اخضاع افراده الى المعيار المتوسط..يحتقر من يحيدون فى اى اتجاه...من يرتفع يجاهدون لانزاله اكثر مما يجاهدون لترقيه من انخفض..ان شرف الشخص المتوسط و حلمه هو الحفاظ على مكانه طيله عمره لا اكثر...ربما  فى سبيل ذلك يكبت اى ما يراه "شذوذ" عن المجتمع ليبقى فى مكانه الدافئ فى المنتصف بالضبط..ان تصير جزء
 من الركب..قطعه من القطيع...بلا اصوات اعلى بلا شذوذ عن اللحن العام

لا ترفض "الفعل" غير التقليدى...فربما صار هو التقاليد فى زمن ما...فلا لزوم ان يصير المجتمع كله على وتيره هؤلاء المتوسطين
####################
الفصل الرابع: حدود سلطه المجتمع على الفرد

فى هذا الفصل -الرائع- يذكر واجب الحدود بين حريه الفرد و واجبات المجتمع و فى هذا الفصل توضع القاعده التاريخيه الشهيره بالليبراليه: انت حر ما لم تضر

بمعنى -و هذا هو المثال الذى فضله الكاتب للتدليل- اذا بدد شخص امواله و اسرف اسراف مبالغ...لا يحق للمجتمع او القانون ان يعاقبه الا اذا طال هذا التصرف من حقوق الاخريين كأن يفشل فى تسديد ديون او ان يعرض عائلته للفقر و العوز...فالعقاب المجتمعى و القانونى لا ينبع قط من تصرف الشخص لكن عقاب على تبعات هذا التصرف على الاخريين

قتل شخص لشخص لسرقته و اعطاء الاموال لعاهره لا يختلف عن سرقه شخص لتوسيع التجاره...فالقتل هو من اضر المجتمع و ليس تصرفات الشخص الخاصه

يرى المؤلف ان شرب الخمر فى البيت لا يعاقب عليه القانون...لكن شرب الخمر لشرطى وقت العمل جريمه..و يضيف ان العمل الاول يندرج تحت باب الاخلاق العامه و ليس القانون

المجتمع يملك فترات الطفوله و المراهقه ليعلم هذا الشخص الصواب و الخطأ فى التعليم و التربيه و لكنه لا يملك التسلط عليه بعد تلك الفتره...فالمجتمع الذى لا يقوم بشقه الايجابى فى التربيه و التهذيب خلال فترات المجتمع الاولى لا يستحق ان يصير جلاد لمن افسدهم هو

ترى من خلال تلك الامثله فجون ستيورات يرى المجتمع كجزء مشارك فى عمليه بناء الانسان...يرى به اكتر من دور الجلاد الذى يترصد لمواطنيه لعقابهم...يرى به معلم مسؤول عن اخطائه

يرى ايضا ان الافعال تنقسم ل3 اقسام و انواع: الاول هو من يؤذى نفسه فقط و هو ما يرى المؤلف عدم احقيه المجتمع ان يعاقبه عليها بعد انتهاء فترتى التوجيه و التربيه المجتمعيه قبل سن الرشد

و النوع الثانى هو الافعال التى تؤذى الاخريين مباشره و هو النوع الذى يرى ان المجتمع يجب ان يعاقب هذا الشئ قانونيا حتى تتسق حدود الحريه

و النوع الثالث: هو ما بين النوعين الاولين..حيث يؤثر الفعل "نفسيا" على الاخريين...يرى المؤلف ان يتغاضى المجتمع عن عقاب هذا النوع كضرب من التضحيه لاعلاء قواعد الحريه ...و يعلى المؤلف فى هذا النوع بذات دور المجتمع فى التربيه و التقويم ما قبل سن الرشد او النصح و الموعظه بدون التأثير على فرديته و حريتها

يجب الفصل بين الاخلاق و القانون..هكذا يرى المؤلف و اجدنى اتوافق مع معظم ما قاله...فليس كل ما هو غير اخلاقى يجب ان يكون غير قانونى...بل ان كثير مما هو اخلاقى يكون ايضا غير قانونى...لذا فالفصل بين عقوبات الاخلاق شئ و عقوبات القانون الجنائى شئ اخر
######################
اما عن الفصل الخامس: التطبيقات...فلا استطيع تلخيصه ابدا...و ادعوك لقراءته شخصيا لتستمتع بمحوارات ميل مع نفسه و مع قارئه دون فرض رأى معين تاركا مساحه ممتعه للنقاش و التفكير فهو ليبرالى تاركا سقف للحريه حتى فى كتابه

و اولا و اخيرا تذكر ان : On Liberty was published in 1859

للتحميل
http://www.goodreads.com/ebooks/download/16131687



SONG THEME
نص حاله -اصاله
نص ديمقراطيه...نص حريه...نص راحه
http://www.youtube.com/watch?v=jnxkXYsDcU8&feature=fvst

ام نضارات

فى الفيلم تتهادى البنت "المعقده" ام نضارات سميكه فوق عينيها مع الشاب الروش طحن...يبص لها قوى و يقول لها انتى لابسه النضاره دى ليه؟؟ انتى بتخفى جمالك..و يقوم -بكل رومانسيه- بنزع النضارات عن وجهها ...فتبتسم و تتحول فى المشهد التالى لمزه على حين غره كده

سؤالى بقى: انتى لابسه نضاره و سميكه كمان يعنى نظرك ضعيف ولا لابساها عياقه؟؟...ازاى لما شال النضاره عينكى نورت كده فجاه ؟؟...ايه كلهم جراحين عيون و عملوا لك لايزك و انتى واقفه؟؟...و لنفترض انك هتلبسى عدسات لحقتى عملتها فى نص ساعه!!!!!!!...عجبت لك يا زمن


 و ده حب ايه المنيل ده؟؟...هو يمشى و يجرها وراه زى العمى ....دى ممكن من وجع عينيها تمشى مع واحد تانى من غير ما تاخد بالها اصلا



الحركه دى حصلت فى افلام كتتتير عربى و انجليزى منهم فيلم ازااى تحب البنات تحبك و phat grilz

و تقولى سيما...سلامااات يا سيما

عايزين ايه؟؟ دستور؟؟..ليه ؟

لقيت ماما زعلانه بقالها يومين....بابا مكتئب بقاله اسبوع..فى البيوت "العادية" لما تشوف كده تقول مثلا فى ازمه ماديه, اتخانقوا, كده يعنى بتاع العائلات....السبب هنا كان الدستور...صدق او لا تصدق

ماما متابعه جيده لعمرو اديب اللى شغله الشاغل الدستور اليومين دول...بكل سلق الدستور و تحميره و يمكن يعملوه شيش كباب كمان

بابا متابع للكوره من زمان...مدحت شلبى و شوبير -و هما اكتر ناس لا احترمهم بالمره على الاقل لما بتكلموا فى السياسه- شاغلين عن الدستور برضه...عن قد ايه الرياضه مش مذكوره فيه....عن قد ايه الاخوان مش عايزين رياضه ولا دورى...
*******************************
توقع الجميع رد منى فكان "انفجارا" و ليس رأى: 

عايزين ايه؟؟...دستور محترم؟؟...ليه هو انتوا بلد محترمه ولا حاجه من ورايا؟..انتوا فاكرين نفسكوا انجلترا و فرنسا و امريكا فى بعض؟...انتوا عالم تالت يا جدعان, العالم التالت كده ...الدستور ورقه مرميه و الرئيس اله يعبد من دون الله , الحزب الحاكم هو بابا و ماما و انور وجدى...و المعارضه دول -وياالدهشه- يمحلقون فى جزء الفارغ من الكوب..لا يروا ربع الكوب الملئ بالماء الاسن..لا يقبلون يد من سرقهم..هكذا هم فى كل العصور مكرهون من السلطه..تاره استملاء بالمال او الذهب...تاره بالعصا,بالكرباج,السجن,و ربما المشنقه...خارجون عن النظام...مثيرى الشغب

عايزين ايه؟؟ دستور؟؟..ليه ؟...هو انتوا عمركوا كان عندكوا دستور محترم اصلا ...دستور ايه يا ابو دستور؟...دستور ثوره 19 اللى اتلغى بعدها من غير ياخدوا رأى حد...دستور 30 اللى اتحط على مزاجهم...دستور 54 اللى كان مدى كل سلطات اى حاجه للسيد الرئيس المنزه عن الاخطاء...دستور 71 اللى مش هتكلم عنه عشان الرقابه ما تحذفش المدونه من النت اصلا

الدستور اترقع كام مره كنتوا عملتوا ايه؟؟...حسنى و قبليه السادات لعبوا فيه لما شبع...حد اعترض؟؟ كلتوا و شربتوا و نمتوا ولا كأن فيه حاجه و أولهم الاخوان بتوعكوا دول

انتوا دوله متسحتقش دستور محترم...اوبس اعتذر....انتوا لفظ دوله عليكوا اسراف
*****************************

بعد الكلمتين دول بطلوا يكتأبوا قدامى تانى...حل عبقرى فعلا

العنف والسخرية ألبير قصيري

العنف والسخرية ل  ألبير قصيري

كهذا هم فى كل العصور..متمردون لوجه الله..لا يسكنون , لا يهدؤن,لا يتمرغون فى وحل الراحه,لا يروا ربع الكوب الملئ بالماء الاسن

فهم -وياالدهشه- يمحلقون فى جزء الفارغ من الكوب..لا يقبلون يد من سرقهم..لا يشركون الصدقه التى انتزعت من اموالهم..هكذا هم فى كل العصور مكرهون من السلطه..تاره استملاء بالمال او الذهب...تاره بالعصا,بالكرباج,السجن,و ربما المشنقه...خارجون عن النظام...مثيرى الشغب

جربوا "زحزحه" رأس الفساد بالقوه..و لكن اى قوه ..فالقوت نفسه غير متوفر..ربما اخراج قليل من الشحنه بالسباب لكنهم -الملاعين قليلى الادب والحياء- لا يجدون للكلمات منفذ بين طيات جلد السلطان الثخين

ربما كانت : السخريه هى الحل

انفخ فى البلونه..انفخ اكثر..امدح اكثر..اسخر اكثر...ربما تنفجر بلونه السلطان يوما مخلصا ايانا من سحنه جنابه
**************
للتحميل
http://www.4shared.com/office/WWx-jYtH/____.html
**************
روايه رائعه فى الفكره و التركيب..و يا العجب كانت شخصيتى المفضله هى ام عرفى المجنونه العاقله

نظرية الحسنات المجانية

نظرية الحسنات المجانيه...الناس بتفكر تاخد حسنات ازاى من غير ما تعمل حاجه؟؟..فينتهى الامر بابليكشن عالفيس بيطلع ادعيه!!!

ما انت مش فاهم...لما بتحط ابلكيشن بيحط احاديث و ادعيه اتوماتك مش بقراها لان مش انت اللى كاتبها...فلا انا ولا انت بناخد ثواب

 قالوا لى انه ثواب و ان الدال على الخير كفاعله...طب ما هو كده لا فى دال ولا فاعل...محدش -على الاقل من اللى اعرفهم- بيقرا اصلا...يبقى فين الخير و فين فاعله؟؟

قالوا لى انه نشر للسنن...بس الموضوع مش فكره "كم" لا الكاتب بيكتب ...و لا القارئ بيقرا...يبقى العمليه ملهاش داعى غير الشكل...مظاهر ....او مجرد انه يكون عند صاحبك و عجبتك الفكره و يلا بتهيص فى الهيصه

هى المشكله لما ادخل عالفيس الساعه 5 الصبح و الاقى انا و الليل و الابليكشن بس...اداه منزوعه الحياه بتتكلم تحت صوره صحابك

عادى لو واحد من صحابك او حتى 5 مشتركين فى الابليشن الاسلامى...مشكله لو 500 واحد بيتنشر تحت اسمهم نفس الادعيه فى الهوم بتاعك

استمرار لنظريه الحسنات المجانيه: فكره العداد الاليكترونى فى التسبيح...الفكره حلوه بس للصين اللى صنعت المنتح و تبيعه...بينما تستمتع انت بالنظر فيه يتزايد رقميا و انت بتضرب كل رقم فى دول فى 10 لان الحسنه بعشره امثالها...مجرد ارقام...التسبيح حلو بس فى حاجه فى العمليه سحبت الروحانيه فى الاخر

و احد تبعات نظريه "الحسنات المجانيه" انتخاب القوى الاسلاميه فى الانتخابات برضه...و نعم للدستور...صكوك غفران مقنعه بشكل ما...اهو بجره قلم تخش الجنه حتى لو مش مقتنع قوى بس اهو تجرب مش يمكن تنفع

الناس بتعشق الحسنات اللى ببلاش...زى ما بتحب تخس من غير مجهود...و التثبت فى الشغل من غير شغل...حسنات من غير صدقات تكلفك فلوس...من غير صله رحم يكلفك مشوار تقيل على قلبك....ببلاش 

عندى احساس ان الابليكشن ده جزء جديد من نظريه "عدم الاضافه للمحتوى" مجرد تداول عقيم زى فكره الشير و اللايك و كل الحاجات اللى مش بتكتبها بنفسك...

جرب تكتب حاجه بايدك ,من قلبك, من تجربه شخصيه هتلاقى الجذب اكتر و الاهتمام اكبر...شعر اهبل من تأليفك احلى من انك تشير شعر نزار و معاه صوره بنت بيضا وسط زرع ....الصورة اللى هتصورها للترعه اللى قدام بيتكوا بموبايل كحيان احلى من انك تشير رسمه ثرى دى رسمها فنان برازيلى...الحديث اللى هتدور عليه و تكتبه تبعا لاحساسك النهارده , حالتك النفسيه الساعه دى,موقف حصلك...احلى بكتتير من ابليكشن بيتكلم باسمك

أفكار ضد الرصاص ل محمود عوض

عن كتاب أفكار ضد الرصاص ل محمود عوض اتحدث...الكتاب 198 صفحه...بيضم مناقشه 4 كتب ذائعه الصيت ثار حولها المناقشه و البطش بمؤليفها...قاسم أمين وتحرير المرأة، الكواكبي وطبائع الإستبداد، على عبد الرازق وكتابه الإسلام وأصول الحكم، وأخيرًا كتاب طه حسين في الشعر الجاهلي

الافكار لها اجنحه..ما حدش يقدر يمنعها توصل للناس ..يوسف شاهين

هكذا هى طبيعه كتب و كتاب الحرية ...يطوى التاريخ ظالميهم و كتب الرد و الصفاقه و السخافه فى النقاش و الرد...ينسى الطرد و التشريد و بل و القتل ذاته و لا يحيا بين طيات كتاب التاريخ سوى كاتب كتب رأى حر.. 

مات الكاتب و بقى الكتاب حيا لا يموت امتلك ضغينه مع الكتب التى تتحدث عن الكتب..لكن اعجبت بفكره و تنفيذ هذا الكتاب لم استفد الكثير من الكتاب...

ربما لانى قرأت 3 من ال4 كتب.. لكنى بالتاكيد اتخذت قرار بقراءه الرابع اعجبت بفكره الحديث عما حدث -حول- الكتاب لان اصل الكتب نفسها متوفر للقارئ العادى ...فكانت اضافه محمود عوض هى ما حدث قبل و بعد و اثناء كتابه الكتاب مما قد يطويه التاريخ و ربما ينسى ما قساه المؤلف

 “ربما ننفق كل العمر كي نثقب ثغرة..ليمر النور للأجيال مرة” أمل دنقل
 مقطفات من الكتاب 


للتحميل_اضغط

بوكيه ورد اصفر و ازرق

بمجرد ما خرجت من الامتحان...محستش اى حاجه خالص...لا فرحه اجازه و لا اى فرق لحد فضل 14 شهر يذاكر و يمتحن

بعدها بنص ساعه ابتديت احس بالدغدغه...كنت وقتها فى الشارع فى طريقى للبيت...فجأه و على حين غره...الالوان بقت ازهى...مزاجى راق...و قررت انى هاكون سعيده

قررت انى مش هاروح بالطريقه العادية فى ميكروباص ضيق و اروح فى 40 دقيقه...تؤ تؤ انا النهارده غير شكل....قررت انى هاركب الاتوبيس الفاضى الاحمر الحلو ده بحيث يفسحنى فى القاهره العامره شويه قبل ما اروح فى رحله تستغرق ساعه و نص

و مدام الرحله طويله متحلوش غير بكتاب...فتحت شنطتى ملقتش اى كتب غير طبية...فى البدايه صعقت انا دايما معايا كتاب حلو؟!!....و تذكرت انى اقلعت عن معظم عاداتى فى زحمه الامتحانات...لذا قررت انى اشترى كتاب مخصوص اقراه فى الاتوبيس

عديت الشارع و قلبت فى كتب كتير من على الرصيف لحد ما لقيت ملحمة الحرافيش ب7 جنيه...دعيت بالرحمه لنجيب محفوظ الاول و بعدين اشتريت الكتاب

و انا فى طريقى للاتوبيس وقفت قدام محل ورد....انا بعشق الورد الازرق و الاصفر اللى محدش بيحبه خالص و ملصقه فيه تهم زى انه ورد للغل و الغيرة....لكن ليذهب الجميع للجحيم انا خلصت امتحانات...نفسى اجيب لروحى ورد...بعد تردد دخلت المحل و اشتريت لنفسى بوكية كبير من ورد ازرق و اصفر...دفعت تمنه و خرجت

و اشتريت اندومى كبيره و مصاصات و شاى ليبتون اللى محدش بيحبه فى البيت غيرى

ههههههه تخيل معايا ...بنت ماشيه مبتسمه و فى ايدها بوكيه ورد و مش قادره تمنع روحها انها تغنى بصوت مسموع 
Yes, it's a good day for singin' a song,
And it's a good day for movin' along;
Yes, it's a good day, how could anything go wrong,
A good day from mornin' till night

الناس كلها تخيلت انى جاية من معاد غرامى بس و ماله؟

لاول مره من سنين حسيت انى سعيده انى بشترى-لنفسى- حاجات عشان نفسى تستحق شويه دلع و لو حتى كان بوكية ورد اصفر و اندومى