السبت، 24 نوفمبر، 2012

الدستور و باكدج المحمل


الاخوان ماسكين فى موضوع النائب العام و عايشين جو الثوار...مع انه ميهمش حد يعنى انشالله يولعوا فيه...كل ده شوشره على الدستور مش اكتر....كل ده شوشرة على تحصين التأسيسية...و ده كل الهدف من طريقه البكدج

عبو النائب العام-التعيين اصلا مرفوض...الطبيعى الانتخاب زى البلاد المحترمة-...التأسيسية يا خلق الله...ممكن نرضى بجزء اعاده المحاكمات و النائب العام ...حل التأسيسيه هو الغاية الان فى رأيى..مصر من حقها تأسيسيه "انضف" من كده

حل التأسيسية و الا كل اللى عكيناه ده اونطة...انا مش هاشحت حقى من الاخوان...لا اثق فى الناس دى على مستقبلى بصراحة..ما اضمنش الاخوان على دستورى...هيبقى مليان خوازيق لا ترى بالعين المجرده و هنلبس فيها بعدين...من الاخر

الفكرة لا النائب العام ولا المحاكمات ولا نيله.....الفكرة التأسيسية....ركزوا فى الدستور اللى بيتسلق بدل ما نرجع نحاول نقول "لا" فى الاستفتاء و يقولوا علينا بنعطل مسيرة الديموقراطية

هيخلطوا الاوراق للصبح...هيقولوا لك ترضى تبقى مع الزند و عبد المجيد؟؟...قول لهم جو الباكدج ده عند المحمل مش فى السياسه...ارفض و اقبل كأجزاء

بيعجبونى قوى ان الاخون بيجيبوا النتيجة من الكنترول....راحوا الاتحادية عشان يسمعوا الخطاب اللى محدش كان عارف انه هيتقال....و نزلوا قبل القرارات اصلا ب3 ساعات...ارحموا عقلى بليز

و ابتدينا نسمع كلام زى "الديكتاتور العادل" و "الديكتورية المؤقتة" و ده ان دل على شئ يدل ان اننا محتاجين علاج نفسى شديد "جروب ثيربى كده" ...نروح كلنا عند دكتور احمد عكاشة او يحيى الرخاوي يعالجنا مليون مليون كده و فى 70 جلسة نخلص و ننتهى

و تذكر

التحرير و مصطفي محمود 

التحرير وروكسي 

التحرير والعباسيه - 

التحرير والمنصه

التحرير وقصر الاتحاديه 

الحق ثابت والباطل متغير !!

1 التعليقات:

Tarek Sherif يقول...

المرادي السلفيين ضد الدستور .. بمعني اننا لو قولنا لا للدستور هنخش الجنة D:

لالالالالا لدستور الإخوان

إرسال تعليق

حلو؟؟ وحش؟؟ طب ساكت ليه ما تقول....