الاثنين، 12 نوفمبر، 2012

عايزين ايه؟؟ دستور؟؟..ليه ؟

لقيت ماما زعلانه بقالها يومين....بابا مكتئب بقاله اسبوع..فى البيوت "العادية" لما تشوف كده تقول مثلا فى ازمه ماديه, اتخانقوا, كده يعنى بتاع العائلات....السبب هنا كان الدستور...صدق او لا تصدق

ماما متابعه جيده لعمرو اديب اللى شغله الشاغل الدستور اليومين دول...بكل سلق الدستور و تحميره و يمكن يعملوه شيش كباب كمان

بابا متابع للكوره من زمان...مدحت شلبى و شوبير -و هما اكتر ناس لا احترمهم بالمره على الاقل لما بتكلموا فى السياسه- شاغلين عن الدستور برضه...عن قد ايه الرياضه مش مذكوره فيه....عن قد ايه الاخوان مش عايزين رياضه ولا دورى...
*******************************
توقع الجميع رد منى فكان "انفجارا" و ليس رأى: 


عايزين ايه؟؟...دستور محترم؟؟...ليه هو انتوا بلد محترمه ولا حاجه من ورايا؟..انتوا فاكرين نفسكوا انجلترا و فرنسا و امريكا فى بعض؟...انتوا عالم تالت يا جدعان, العالم التالت كده ...الدستور ورقه مرميه و الرئيس اله يعبد من دون الله , الحزب الحاكم هو بابا و ماما و انور وجدى...و المعارضه دول -وياالدهشه- يمحلقون فى جزء الفارغ من الكوب..لا يروا ربع الكوب الملئ بالماء الاسن..لا يقبلون يد من سرقهم..هكذا هم فى كل العصور مكرهون من السلطه..تاره استملاء بالمال او الذهب...تاره بالعصا,بالكرباج,السجن,و ربما المشنقه...خارجون عن النظام...مثيرى الشغب

عايزين ايه؟؟ دستور؟؟..ليه ؟...هو انتوا عمركوا كان عندكوا دستور محترم اصلا ...دستور ايه يا ابو دستور؟...دستور ثوره 19 اللى اتلغى بعدها من غير ياخدوا رأى حد...دستور 30 اللى اتحط على مزاجهم...دستور 54 اللى كان مدى كل سلطات اى حاجه للسيد الرئيس المنزه عن الاخطاء...دستور 71 اللى مش هتكلم عنه عشان الرقابه ما تحذفش المدونه من النت اصلا

الدستور اترقع كام مره كنتوا عملتوا ايه؟؟...حسنى و قبليه السادات لعبوا فيه لما شبع...حد اعترض؟؟ كلتوا و شربتوا و نمتوا ولا كأن فيه حاجه و أولهم الاخوان بتوعكوا دول

انتوا دوله متسحتقش دستور محترم...اوبس اعتذر....انتوا لفظ دوله عليكوا اسراف
*****************************

بعد الكلمتين دول بطلوا يكتأبوا قدامى تانى...حل عبقرى فعلا

2 التعليقات:

7ekaya يقول...

هههههههههه الله يجازيكي يا دودي ع لبوست ده خليتيني مش عارفة أضحك ولا أبكي ولا أندب على شعوبنا العربية اللي اتعودت خلاص على حالة الانهزامية اللي عايشة فيها

تسلم ايدك بجد بوست جميل جدا

تحياتي
حكاية

luxusumzug يقول...



اتمنى لكم المزيد من التمييز ... وعرض جديدكم :)

ماكينات طباعة
مقص ورق
مقص بولر-طوايه
ماكينه طباعه ريوبى

إرسال تعليق

حلو؟؟ وحش؟؟ طب ساكت ليه ما تقول....