الجمعة، 26 أغسطس 2011

لحد ما تتأكد ان الست مش زى الجزمه !!!





"انت عامل زى الراجل اللى اشترى جزمه و عجبته  و بعد كده اكتشف ان فى حد قلّب فيها قبله فكرهها و سابها , و لحد تتاكد ان الست مش زى الجزمه ابقى فكر فى كلامى " ...الجمله دى قالها عمرو الحريرى ليحيى شاهين فى فيلم "هذا هو الحب" لما طلق مراته لانه اكتشف انها عرفت واحد قبل الجواز ...بالمناسبه الفيلم ده رائع و فيه معانى كبيره و مبادئ محترمه لكننا طبعا اختذلناه لمشهد مارى منيب و هى بتعاين العروسه و تشد شعرها ...

ايه علاقه المقدمه السينمائيه دى كلها بموضوعى النهارده..تقريبا ولا حاجه الا شئ واحد : جمله " لحد ما تتأكد ان الست مش زى الجزمه" ...كل يوم و التانى يطلع كاركتير يهد الدنيا و يعصب الناس المره اللى فاتت فى بوست  العبوا مع بعض!!   كانت الخناقه عالفيس و قطعوا بعض "افتراضيا طبعا" عالفيس  بين الليبرالين و السلفيين ...


المره دى الخناقه كانت عالتويتر  ..و لو لفظ خناقه ده لفظ خاطئ لانه كان هجوم من طرف واحد اللى هو التويتيه "لذيذ اللفظ ده" ضد جريده الشروق ..و بما انى جديده عالتويتر ففضلت ربع ساعه احاول افتح اللينك  لان تويتات الناس كان كلها  هجوم ضد الكاركتير و تصفه بالتحريض ضد المرأه ...و لان حب الاستطلاع   قتلنى و بعد صعوبه و معاناه قدرت افتحه و كان هذا هو ما رأيته :




فى البدايه قريت و ضحكت و قلت عادى يعنى مش خطير ...لكن بعد لحظات تيقنت الامر و ظهر جليا فى ذهنى زى ما بيقولوا ...صغائر الاشياء هى فعلا اللى بتأثر و تولع المصايب ...

بقى احنا بنحارب  بقالنا سنين و سنين عشان نمحى فكره استباحه  التحرش و نلغى الصوره المقرفه عن ان البنات هما اللى عايزين كده و يجى رسام عايز  "يستظرف" يدمر اللى بيناه كل السنين دى .....دا احنا كمان مش بنبدأ التحرش الجنسى لا كمان بنشحته !!!

.باى داعى نبحث عن اعذار للمتحرش ؟؟ ليه بندور بأبره على اعذار تمسح لهم بانتهاك حرمه الناس ؟؟.. سيبك من المعاكسات انا بتكلم على التحرشات و ما ادراك و انا بكلمك بصراحه ان 98% من نساء مصر تعرضوا لتحرش جسدى على الاقل مره قد ينكر البعض لكن تتضح النسبه فى الغرف المغلقه...

انا بطالب بحريه انى امشى بحريه فى الشارع على الاقل اعرف امشى فى الشارع ..مش بطالب بمشاريع قوميه ولا حتى عايزه شغل و لا تنميه اقتصاديه ...مشمعنى احنا اللى منعرفش نمشى فى الشارع ؟؟ اظنها ابسط حقوق الانسان الا ينتهك احد حرمتك ..

طبقها بروح القانون ...او بروح غض البصر الشرعى..اى طريقه تمشينا فى الشارع من غير ما اتلفت ورايا..

حتى هؤلاء المتحررات  انا بدافع عنهم لان ببساطه مش من حق حد ينتهك حريه و كرامه امرأه اى كان.. اسفه على التطويل بس حضرتك تعرف ان القانون المصرى و الدولى بينص على تجريم "اغتصاب العاهره او المجنونه رغم ارادتها" ...و صدقنى نفسيا هى هى


البنات مش عايزين كرامتهم تتهان , مش عايزين يتلمسوا غصب عنهم , مش عايزين يتبص لهم زى الحيوانات من حيوانات , البنات مش بيدورا على متع رخيصه من فعل رخيص , البنات مش عواهر دول بنات ناس محترمه اتربوا و اتعلموا و اهلهم صرفوا عليهم دم قلبهم عشان يبقوا حاجه ترفع الراس ....و الاكيد و الاهم من ده كله ان البنات مش جزم ....و لحد ما تتأكد ان الست مش زى الجزمه فكر فى كلامى ده :(.....


26 التعليقات:

فافى يقول...

د/دودى:
اولااعتقد ان عبد المنعم ابراهيم هو اللى قال الجمله دى مش عمر الحريرى :)
ثانيا :طبعا الست مش زى الجزمه وقطع لسان اللى يقول غير كده لكن الرجاله عشان مغرورين بيتخيلوا كده وعشان احنا واثقين من نفسنا فا هانسيبهم باعتقادهم ومش هانجادل لكن عانثبت اننا مش جزم بالفعل مش بالقول والطرق كتيير اوى

د/دودى يقول...

فافى : لا هو عمر الحريرى لانى كنت بتفرج عالفيلم ساعه ما كتبت البوست عشان كده جاتلى الفكره...لكن عموما مش فارقه

اللى نفسى افهمه ايه اصرارانا على عدم مناقشتهم و افحامهم كمان و اظن ربنا مدينا لسان و حجه لكن على رأيك الفعل اهم من الكلام بكتير ...

AHMED SAMIR يقول...

طبعا دة كلام جميل و كلام معقول ماقدرش اقول حاجة عنه
بس هل كل البنات بيفكروا بالطريقة المحترمة دي..؟!!
لو كانوا كلهن بيفكروا كدة كاكناش لقينا الملابس اللي اقل ما يقال عنها انها مسخرة و قلة ادب
او التصرفات اللي عليها الف علامة استفهام اللي كتير قوي من البنات دلوقتي بيرتكبوها
للأسف في كثير قوي من البنات مقتنعات انهن (جزم) في فاترينة للعرض و على الرجل انه يقيس و ينقي
للأسف الشديد

د/دودى يقول...

بص يا استاذ احمد : انا مش بحب كده قولى ليه؟؟ اقولك يا سيدى ...هل لو سافر احد هؤلاء الكلاب الجائعه الى اى بلد اوروبى او امريكا و لقى واحده ماشيه بالمايوه حتى هيقدر يلمسها ؟؟ هيقدر يقولها كلمه تخدش حيائها ؟؟ هل يجرؤ على ذلك اى حد سافر بره هيقولك لا ببساطه لان فى اختراع زمان عملوه بره اسمه "احترام القانون" قبل و بعد و فى نص اى حاجه...

هل لمجرد ان بنت متحرره تبقى مباحه ؟؟ هل لمجرد ان نفرض الحجاب و الحشمه الاجبارى لان رجلنا عندهم حاله صرع و عته مزمن ؟؟...اسفه يا استاذ احمد لكن موقفك مشابه لموقف رسام الكاركتير و لهاذا ارفضه..

و عموما الخلاف فى الرأى لا يفسد للود قضيه :)

احمد يقول...

اتفق مع كلامك لكن بردوه حضرتك بتتكلمي عن شريحة معينة من البنات ...... لكن في بنات تانية ممكن ما تبقاش عايزة حد يتحرض بيها (ومافيش واحدة عاقلة عايزة كدا ) لكن على الاقل بتحب تتعاكس ويبقى في اهتمام بيها زايد ... المشكلة في دول بقى

د/دودى يقول...

استاذ احمد : برضه حضرتك مصر على تبنى وجهه نظر انا معارضها على طول الخط ...باى داعى نبحث عن اعذار للمتحرش ؟؟ ليه بندور بابره على اعذار تمسح لهم بانتهاك حرمه الناس ؟؟..يا استاذ احمد سيبك من المعاكسات انا بتكلم على التحرشات و ما ادراك و انا بكلمك بصراحه ان 98% من نساء مصر تعرضوا لتحرش جسدى على الاقل مره قد ينكر البعض لكن تتضح النسبه فى الغرف المغلقه...

انا بطالب بحريه انى امشى بحريه فى الشارع على الاقل اعرف امشى فى الشارع ..مش بطالب بمشاريع قوميه ولا حتى عايزه شغل و لا تنميه اقتصاديه ...مشمعنى احنا اللى منعرفش نمشى فى الشارع ؟؟ اظنها ابسط حقوق الانسان الا ينتهك احد حرمتك ..

طبقها بروح القانون ...او بروح غض البصر الشرعى..اى طريقه تمشينا فى الشارع من غير ما اتلفت ورايا..

حتى هؤلاء اللى بتكلم عنهم انا بدافع عنهم لان ببساطه مش من حق حد ينتهك حريه و كرامه امرأه اى كان..

اسفه على التطويل بس حضرتك تعرف ان القانون المصرى و الدولى بينص على تجريم "اغتصاب العاهره او المجنونه رغم ارادتها" ...و صدقنى نفسيا هى هى

جعفر حجير يقول...

مرحبا دكتورة.. وصلت لمدونتك هنا بالصدفة من تعليقك على مدونة "وحل"

الصراحة للأسف في عالمنا العربي بأكمله.. يجهل العاملون في قطاع الإعلام و كل من لف لفيفهم من ممثلين و مذيعين و مؤلفين.. أن أفكارهم تشكل المجتمع.. و أن المقالة التي ينشرها أو رسم الكاريكاتير الذي يبتكره لا يعبر عنه شخصيا.. بل هو يعبر عن وجهة نظر شعب

آخرها بتهووووووووووووون
تحياتي

ابراهيم رزق يقول...

صلى على النبى كمان زيدى النبى صلاه

اولا رحم الله جاهين و ناجى و صاروخان و كل من على شاكلتهم كان الكاركتير مقالة
اولا الكاركتير تافه و بالتالى تعود التفاهة على من رسمه انظرى الى طريقة رسم الكاركتير و صورة المراة فى الرسم التى يجب الاعتراض عليها قبل الكتابة و تركيزه على اى وجوه
الانفلات الامنى لا يبيح السرقة و من سرق شىء حتى لو كان بدون حراسة فهو لص
ربنا يرحمنا من امثال هؤلاء

تحياتى

غير معرف يقول...

صباحك ورد د/دودي

بصراحة كاريكاتير بغاية السخف فالفعل الحيواني من

تحرش لفظي أو فعلي هو غالباً فعل ذكري وصعب أقول

رجولي لأن ليس كل ذكر رجل ولكن كل رجل ذكر وقد

تستحليها بعض النساء وليس جميعهم فهذه طبيعة النفس

البشرية ولكن أن تلصق بهذه الطريقة الغريبة كفعل

أنثوي محض فهذا خطأ كبير برغم أن الأنثى قد تتحرش

أيضاً ونأتي هنا لمطالبتك بحق السير دون أن ينظر

أحد لك نظرة حيوانية أو حتى يتسبب لك بمضايقات

كبيرة فالرجل عينه زايغة وهذا معروف أن ما يمليها

غير التراب كونه شهواني جداً وعذراً على هذا اللفظ

ولكنها الحقيقة وصدقيني لا يهم ما تلبس المرأة

فحتى لو كانت منقبة ستجدين العيون تلاحقها لظنهم

أنها تخفي الأجمل لذلك يجب سن عقوبات شديدة جداً

من الداخلية أو جهاز الشرطة ضد المتحرش تصل للسجن

والتشهير وعندها سيسود الأدب الشوارع والطرقات و

ستسير أي امرأة بأمان وكرامة وصدقيني من أمن

العقوبة أساء الأدب ...

تحياتي وإحترامي

غير معرف يقول...

اسمحي لي أن أعترض
لماذا تنظرين للأمور من وجهة نظر الفتاة فقط؟

علي فكرة انا عندي 30 سنة والي الآن أخجل من النظر الي أي فتاة حتي اذا كانت تتكلم معي أجد نفسي تلقائيا أنظر في الأرض، ولو كانت بيني وبينها صلة قرابة.

والله هذا حقيقي..
واذا بالصدفة نظرت بدون قصد أشمئز من الملابس الفاضحة التي ترتديها البنات.
كيف تطلبين من الشاب أن يكون ملاك
في وقت ترقص الشياطين من حوله في كل الاتجاهات وهو يعاني اصلاً من مشكلة تأخر الزواج ومن مشكلة الاعلام الفاضح والافلام وبلاش أكمل..

اعرف ستقولين أن الفتيات المحجبات والمنتقبات أيضا يتم التحرش بهن.
وهذا ايضا أراه طبيعي في هذا الوضع المقلوب..
ربما لا تعرفين أن الأشياء التي يراها الشباب في الشارع او في التلفزيون أو علي الانترنت .

تتراكم في عقولهم لسنوات
والكبت يادكتورة يولد الانفجار

اقسم بالله أنا لا أدافع عن هؤلاء ولا عن صاحب الكاريكاتير المستفز الذي عرضتيه في تدوينتك
ولكني أقول:
لا تستطيعي أن تقولي لإنسان في أشد درجات العطش
الماء أمامك ولكن لا تشرب وإلا..
الموضوع له جوانب كثيرة يجب أن ننظر اليها عندما نحاول حل هذه المشكلة العويصة.

أرجو أن لا أكون اثقلت عليكم
تحية وتقدير

Ms Venus يقول...

سبحان الله بجد على الناس اللى بتقول البنات بتلبس والبنات بتعمل و البنات بتسوى
وكأن الرجل الشرقى واسفة للتعبير بقى معاق ذهنيا ولا يستطيع التحكم فى تصرفاته وفى نفسه وفى غرائزه ولازم حد يغمى عينه علشان يمشى بالادب !!!!


نفس رأيك يا دينا فى ان لو واحد فيهم سافر برة او بلاش

لو واحد فيهم اشتغل فى القرى السياحية وبيشوف الاجانب بالمايوهات على حمامات السباحة

لا يجروء حتى مش انه يقولها صباح الخير

لا يجروء انه يبص من بعيييد حتى


منطق متناقض وشخصيات ضعيفة ومهزوزة

امال فين الدين بقى ؟؟؟


فين انك تضبط نفسك وتضبط عينك وتضبط شهواتك وغرائزك ؟؟؟

كلام وبس

وتدين خارجى وبس


سامحينى انى طولت لكن الموضوع ده بجد بينرفزنى جدا

واللى بيشوف ان الست جزمة يبقى هو ايه ؟؟؟؟

Elsayed Azab يقول...

أولا كل سنة ومدونتك طيبة :)

ثانيا بجد بوست جميل وحلوة قووى المقدمة ..

أنا من وجهة نظرى المشكلة أساسا أخلاقية .. يعنى تقدرى تقولى أزمة أخلاق بنعيشها فمصر مش بس فى قضية التحرش لأ فى كل حاجة تقريبا ..

وده للأسف هيزيد أكتر وطبيعى جدا لما رجال الدين يسبو دورهم ويلعبو سياسة خلاص مينهيلعب دورهم !!

أشكرك على البوست فكرة وصياغة ومضمون ..

تحياتى

سكندري يقول...

طبعا الست مش جزمة ، ده لا جدال عليه
المرأو مخلوق راقي جدا جدا ، بس المهم يلاقي اللي يفهمه

بالنسبة للتحرش فدي اخطاء في التربية أساسا
في تربية الولد و البنت

لما الاب ما يعلمش الابن يعني اي بنت و ازاي يحافظ علي اخته و امه في غيابه
و لما الام برضه ما تعلمش بنتها اد ايه هي عزيزة اوي و لها كرامة

اكيد لما الابن يتربي كده يخاف علي بنات الاسرة( الام و الاخت و غيرهن) مش هيتحرش بزميلته او واحدة في الاتوبيس و لا المترو)

ولو البنت حافظت علي نفسها و فضلت محتشمة ما فيش حد هيهوب ناحيتها

علي فكرة قبل ما تقول محجبة و منقبة و الكلام ده انا اقصد محتمشة يعني في مشيتهاو كلامها و اسلوب مناقشتها مع الناس محترمة لاني شفت بعيني بنات محجبة ووقفتها مع زمايلها و ضحكتها ... بلاش اتكلم

بالمناسبة الكاريكتير سخيف اوي و شفت فكرته قبل كده

Sara يقول...

انتي عارفة يا دكتورة إني ما التفتش للكاريكاتير دا كتير و حسيت إنه أي خناقة و خلاص الناس عايزة تشغللها؟
بس كلامك بصراحة غيّر لي وجهة نظري دي
فعلاً إحنا عايزين نمشي في الشارع بحرية مش عايزين حد يبص لنا بصة وحشة أو يقول كلمة سخيفة !
يا ريت الناس تحترم آدمية البنات مش لمجرد إنها مش محجبة أو لأنها حلوة أو لأنها ماشية بطريقة مثيرة تتعاكس و يتم التحرش بيها !!
اسمحي لي أسأل اللي بيقولك (في أي حته تقعدي فيها لازم تسمعي الكلمتين دول) أنا عايز مصلحتها
و انت مالك ؟!
ركز في مصلحتك انت الأول و احترم نفسك و هي هتلاقي إن مشيتها دي أو طريقة كلامها أو غيره مش بتجذب إنتباه الناس هتقوم تعدل من نفسها !

بوست جميل يا دندن بالمناسبة :)

ALLELIO- موطنـــــــــــــــــــــــــــى(ma patrie) يقول...

مش هلقى اللوم لا على البنت وحدها ولا على الولد وحدة كل خطا بيشترك فية الاثنين بنسب وعلى فكرة فى بنات كتير محترمين جدا لكن يبقى ان اللى مش كويسين يظبطوا نفسهم شوية ويمشوا باعتدال على الاقل

iguiwaman يقول...

موضوع جميل ومميز - مدونة جميلة ومرتبة بشكل رائع٠٠٠ كل عام وانت بالف خير

عماد هلال يقول...

والله مرار طافح..انت مش عايزه غير تمشى بحرية فى الشارع ، وهذا مطلب عادل ، ومصبيتنا ان المطالب العادلة لا تلاقى العدل ،ولكنها تلاقى العقول المغلقة والثقافة الشعبية التى صورت المرأة انهالا تستحق الابيتها ، سمعت ده من أحد مرشحى الرئاسة، هذا المطلب لو حققته الثقافة الشعبية يبقى وصلنا لأعلى سقف من التحضر وغادرنا دولة البصاصين والمتحرشين

Heba Salem Youssef يقول...

جميل جدا طرحك

ولكن حقا اذا خاف كل من النوعين الله حقا

لم لتكن تحدث تلك المشكلة

هناك مشكلة قائمة

وصاحبها خيارين

يلقى كل نوع اللوم على الاخر ومن هذا المنطلق لن تحل

كلا الطرفين مخطئ

والحل هو تقوى الله

بارك الله فيكى

sabry abo-omar يقول...

اتفق معك فى كلامك جدا وشايف كمان أغلب المجتمع الحمد لله بيتعامل مع المرأة بشكل متحضر وبإحترام رغم كل اللى فى الشارع عارف لكن برضو فى الأخر دول قلة من المجتمع.. تقبلى مرورى وكل عام وإنتى طيبة وبخير

Carmen يقول...

كل سنة وانت بالف خير عيد سعيد عليك يارب :)

ابراهيم رزق يقول...

بصى يا ستى

صلى على النبى زيدى النبى صلاه

سيبك من كل الكلام اللى فوق

كل سنة و انتى طيبة
عيد سعيد عليكى

Unknown يقول...

http://isismylove.blogspot.com/

IMSA يقول...

د/ دودي :
اكثر مدونة تستفزني دائما للتعليق ..
بخصوص الموضوع هغيظك واقولك 3 جمل بالعدد :D
اولا : على المرأة أن تجبر الرجل أن يعاملها ككائن وليس مجرد حيوان وهي أن تتحرر مما غرس فيها بأن الرجل هو محور الحياة - اكثر من نصف نساء مصر تعاني من هذا الامر - .
ثانيا : قانون قوي لمعاقبة المتحرش .
ثالثا : غرس القيم والمبادئ والمساواة بين الرجل والمرأة وممارسة الحياة بحرية بدلا من الكبت من الجسين فتظهر تلك الرغبة الجامحة .
//
تحياتي لك وتقبلي ردي ومروري :D

غير معرف يقول...

كل سنة و انتى طيبة و جميلة

عيد سعيد :)

Tears

aya mohamed يقول...

الكاركتير طبعا مستفز
حاولت اقرا اغلب الردود لقيتها بتتكلم الى حد ما صح
بصى يا دينا اه هما البنات طبعا مش عايزين تحرش
وطبعا لا جدال على ان جريمة بشعه ربنا يحمينا منها
بس ده مش مانع ان البنات بقوا مستفزين جدا
حتى كونى بنت بضايق من طريق لبس كتير من البنات
هتقوليلى اوربا وامريكا ولو الشباب سافروا هناك
هقولك " يا ايها البنى قل لازواجك وبناتك ونساء المؤمنين يدنين عليهن من جلابيبيهن ذلك ادنى ان يعرفن
فلا يؤذين وكان الله غفورا رحيما "
ده بالنسبه للاسلام طيب والمسيحيه
نبص كدا على الراهبات على صورة السيدة مريم
هنلاقى الاجابه واجماع الاديان على الاحتشام
طبعا مش كل العيب على البنات لا التحرش اسبابه اجتماعية بالدرجة الاولى
بس مش معنى كدا نقول للبنات حلو اللى بتعملوه ده
ده حتى ربنا قال " ولا ترموا بانفسكم الى التهلكة "
مبقاش عارفة الغلط وانى ممكن اتاذى واقول لا هما اللى غلطانين لوحدهم
موضوع مهم جدا وخطير جدا وليه ابعاد كتير

rona ali يقول...

دكتورتنا الجميله:)

لديكى كل الحق فيما قلتى
بعض الاشياء والكاركتيرات ناخذها باستظراف
في حين انها تمحى جزء مما تم بنائه او اكثر كمان

التحرش اجارك الله منه بيجد فعلا من حقي ابط حقوقي محدش ينتهك حرمتى في الشارع
ومحدش يقلي حصل فيكى كدة علشان لابسه ضيق والكلام دة
زى ايه اللى نزلك التحرير اديكى اضربتى واتعريتى
ولان كمان مبدأ المعاكسه والتحرش بقي للي لابسه واللى مش لابسه يعنى هما نفسهم عرفونا انها مش فارقه
حاجه تقرف
ابسط الحقوق لاتجديها ثم يدعون انكى السبب في التمرد والاغلب يقول لانعلم السبب في ذلك ولماذا انتم ثائرين هكذا

دومتى مفكرة دائمآ

إرسال تعليق

حلو؟؟ وحش؟؟ طب ساكت ليه ما تقول....