الأحد، 14 أغسطس 2011

اسئله اعتلاها التراب!!



الذ حاجه فى بلدنا الحبيب مصر او عشان نكون منصفين هى موجوده فى  بلاد العالم اجمع لكنها فى مصر متوفره وفره السمك فى المحيط ....اما ايه هى الحاجه دى فهى ببساطه كوننا نتحمس للاشياء بقوه او نختلف و نتناقش عليها بقوه ثم ينتهى الموضوع بل و يقتل و يدفن فى مقبره النسيان ...و يظهر على السطح موضوع اخر و تتكرر المأساه بلا نهايه و لا متابعه ....و لذلك قررت ان انبش القبور و ازيل التراب عن قديم الاخبار ...اسفه ان كنت بوجع دماغك بمواضيع قديمه لكن لا تنخدع فمعنى انها قديمه لا يعنى انها غير هامه او انها انتهت بل هى ببساطه غير مهمه بعد الان...




- فاكر موضوع الجاسوس الاسرائيلى ؟؟؟....ايوه ايوه حكايه الجاسوس الاهبل الاسرائيلى اللى ضحكتنا عليه لما شبعنا و اشتغلنا عليه  تويتر و الفيس بوك و بلوجر و ياهو و هوت ميل و ماى سبيس و كل الاكونتات من كل الانواع ...من ضحك لتريقه او شتيمه لاسرائيل او مدح فى المجلس العسكرى او ذم فيه باعتباره مزور الموضوع كلا حسب اتجاهه و كلنا ادلينا بدلونا -حتى انا- اما جدا او هزلا ...لذا فالسؤال هو :


هى القضيه دى حصل فيها ايه؟؟؟...طلع براءه؟؟ طلع مدان؟؟...السفاره طلعتوه؟؟..باختصار هو ايه اللى حصل فى الموضوع ده؟؟؟....




- فاكر الحناقه الشهيره اللى كانت بين "طلعت السادات" و "مصطفى بكرى"...ايوه الخناقه  و الشتيمه و الاتهامات المتبادله بالرشوه و استغلال النفوذ و السرقه و الفساد ؟؟...اصر كلا الطرفين على الاستضافه وحيدا دون مواجهه بين الطرفين و كالعاده لفوا كعب داير على القنوات من بتاعه التوك شو "دريم - الحياه- اليوم مع عمرو اديب - المحور - و كله كله ...و كانت الاتهامات بشعه بصراحه و على الهواء و انتهى اخر ما سمعت فى هذا الموضوع بجمله طلعت السادات مع عمرو اديب بان "اللى هيجيلك المره الجايه و مش هيكون فى السجن هيكون هو الصادق" و الغريب هو ان عمرو استضاف الراجل ده مرتين بعد كده من غير ما يقولوا لنا هما عملوا ايه ...لو كانوا اتصلحوا يبقوا الطرفين غير محترمين لان الذمه الماليه كالثوب الابيض و اى دنس يؤثر فيه


ارجع افتكر على اليوتيوب
...لذا فالسؤال :


هو الموضوع اتقفل ولا اتقفل عليه؟؟؟




- فاكرين اختراع كده بين التنين و الديناصور و انثى الحمام كانوا طلعوا لنا بيه و كان يسمى "الحوار الوطنى" او كما سميته وقتها "الحمار الوطنى" و كتبنا  و غنينا و انتقدنا و راحوا اتناقشوا و اتخنقوا و ضربوا بعض يومها و رفضوا ناس و مشوا ناس و ناس انسحبت و ناس صوتت و مكنش ناقص يومها غير انهم يرفعوا على بعض سنج و مطاوى ...و كل ده ادى ايحاء بانه اهم و اقوى حاجه فى مصر و اللى مش هيدخل فيه هيخرج بره اللعبه السياسيه برمتها....و مر شهر اتنين ثلاثه و اكتشفنا انه عادى جداا انك تكون بره الحوار الوطنى و الوفاق القومى و اى حاجه على وزن الفلان الفلانى و مع ذلك تفضل موجود و متواجد يمكن بقوه اكبر و ما فى دليل اكبر من كون الاخوان المسلمين و حركه 6 ابريل بره الحوار الوطنى و اظنهم اقوى من ناس كتير جوه...و لذا فالسؤال الذى اعتلاه التراب :

هو الحوار الوطنى بقى مين اطرافه؟؟عملوا ايه؟؟ قدموا لنا ايه؟؟


- فاكرين الخناقه اللى كانت بين "اعاده توزيع السكان " و بين "ممر التنميه" او بمعنى ادق الاشتباكات اللفظيه و الكلاميه بين المهندس ممدوح حمزه و العالم فاروق الباز ؟؟...القصه كانت ان كلا منهم لديه مشروع مليارى ضخم لاعاده تشكيل مصر و بدل من التعاون المشترك بين كبار العلماء فى وطننا الحبيب انتهى الامر عند اتهم كلا منها للاخر بالجهل بل و تسخيف المشروع الاخر ووصفه بانه "غير قابل للتنفيذ"....و انتهى الامر باحاله الامر للجنه مختصه لتحديد اى المشروعين سيكون انجح و اكثر فاعليه لتكوين مستقبل مشرق لمصرنا الحبيبه مصر .لذا فالسؤال الذى اعتلاه التراب نظرا لان الناس نسيت كالعاده نظرا للمثل المصرى القديم "اذا اردت قتل موضوع , حيله الى لجنه" :

هو ممر التنميه هيتنفذ ؟؟ هل مشروع "اعاده توزيع السكان" هيتم؟؟ هل تم التصالح بين الناس المحترمه دى؟؟ هل الخلاف ده ادى لفشل المشروعين او على الاقل احدها؟؟؟



- فاكرين اعاده هيكله مشاريع العهد البائد بعد صرف ملايين المليارات فيها و صلاحيه اكثرها للانتاج و الافاده منها و بالتحديد توشكى و شرق العونيات و المفاعل النووى اللى فى الضبعه ؟؟....اهو الكلمتين دول كانوا عنوان رئيسى فى كل جرائد مصر على لسان حد مهم قوى فى حكوماتنا الموقره - وان كنت مش فاكره ده كان فى انهى تعديل وزارى - لا تم هيكله ولا تم النظر فى المشاريع دى اصلا و كأننا لاقيين الفلوس فى الشارع  او ان فلوسنا دى حرام و يجب حرقها...و بعدين هما مش قالوا هنسحب الارض من طلال و نديها لشباب او هنزرعها قمح كنوع من الامن الغذائى..لذا فالسؤال اللى اعتلاه التراب :

فين توشكى؟؟ فين الضبعه؟؟ فين شرق العونيات؟؟ 


- فاكرين الفلوس؟؟ اه الفلوس فاكرين ال 700 مليار بتوع حسنى و 50 مليار بتوع سوزان و 140 مليار بتوع عز و الارقام الاوفر اللى سمعناها على صفحات جرائد المفروض انها محترمه و قوميه ؟؟!!!...فاكرين الجمعيات اللى اقيمت لرد اموال مصر المنهوبه فى بنوك بره ..و الاخصائيين اللى جابوهم فى البرامج فى كيفيه كشف الارصده الخفيه و طريقه استردادها ...فاكرين الشنطه اللى حضرها كل صاحب اسره فى مصر للملمه فلوس المنحه اللى هتجى من السما ..و بنفس منهج المثل المصرى الشهير فاكرين "لجنة استرداد أموال مصر "؟؟..باختصار ازيل التراب عن احد احلى الاسئله :

فين الفلوس؟؟؟؟ ....

عندى من العينه دى كتير و كتير لكن على طريقه التحرير و طريقه تونى خليفه : "الشعب يريد ان تكشف التراب".....اه يا بلد 

20 التعليقات:

ابراهيم رزق يقول...

و فاكره موضوع مرتضى منصور و شوبير
و فاكره موضوع سيد بدوى و الدستور
و فاكره موضوع كنيسة القديسين
و فاكره موضوع كنيسة امبابة
و فاكرة موضوع ايمان الطوخى
و فاكرة موضوع زاهى حواس و سرقة الاثار
وفاكرة موضوع تجارة السلاح
و فاكرة موضوع حسين سالم
وفاكرة موضوع حوض النيل
و فاكرة موضوع الهانم سوزان و متحف المجوهرات الملكية
و فاكرة موضوع هشام طلعت و علاقته بالهانم و نجليها
و فاكرة موضوع مجدى راسخ حما علاء
و فاكرة موضوع خالد سعيد اول الحكاية التى لم تنتهى
حمد الله على السلامة و متغبيش علينا

غير معرف يقول...

مساء الورد د/دودي

أفتقدنا قلمك المسلط على الفساد حتى بات أقوى

من السيف فعوداً حميداً ...

هذه حال العرب كلهم بلا استثناء فكل قضية عندنا

تبدأ كبيرة لتتقلص حتى تتلاشى لنكتشف سخف معالجتنا

لكل القضايا ثم لا أعلم لما نحن أدمنا محاربة

الآخر وعدم إحترامه وماذا كل قضايانا مجرد بالونات

ننفخ فيها وفجأة عندما تنفجر كأن شيء لم يكن ....

لن تعود مليارات مبارك وعائلته فصديقيني هناك أمور

غريبة تحدث وأشد ما أخاف أن المتواجدين الآن ما هم

إلا إمتداد طبيعي للحكم السابق بدليل كل ما ذكرتي

من أمور لم يتم تنسيقها وحلها والإكتفاء فقط بطيها

حتى ننساها ..

كل عام وأنت بخير ورمضان كريم

Radwa Ashraf يقول...

انا كان نفسى أسأل كل الأسئلة دى
بس من كتر ما بسئل و مش بلاقى أجوبة .. جالى يأس!!
و لا الفلوس و لا مشاريع و لا تنمية سمعنا عنها ..
و لا جاسوس و لا "حمار وطنى" عرفنا أخرتهم إيه ..
فى مواضيع كتير بتتفتح كعنوان فى جرايد الأسبوع عشان تموت الأسبوع اللى بعده
و منعرفش ايه اللى حصل !!
بس تسلم إيدك على الموضوع ده =)

حَنيّـن نِضال يقول...

يارب يغير و يعدل الاحوال يارب

عبد الرحمن سالم يقول...

احنا كده دايماً...

بنتلهف لحاجة جديدة نتجادل أو نتكلم فيها وخلاص.. حلوة وحشة مش مهم .. مفيدة مضرة مش مهم أهي هوجة وخلينا معاها .. حاجة صعبة !

من غير الميزة دي زمان قنوات الأخبار مكنتش شغّالة !

، وشكراً على تقليب المواجع :)

Moalgredy يقول...

عَـذبُ الـكَـلام

Ms Venus يقول...

واكم من الاسئلة تحت التراب

اسئلة وقضايا يمكن فى وقتها كانت عاملة كوارث فى المجتمع

دلوقتى ....

حسام بدوي يقول...

احنا كده نبدأ الحاجة ومستحييييييييل ننهيها .
مصر على المحك .
في اسئلة كمان كتير تحت التراب لكن كما قال الزعيم مصطفى كامل " لا يأس مع الحياة ولاحياة لمن تنادي " فاكرين غرق العبارة .. فاكرين ..
ممكن نقعد ندي أسئلة طول النهار .
تعرفوا الشعب بيتكلم في ايه النهارده ؟ في أحداث سيناء .. اللي هنيجي بعد فترة نلاقي الدكتورة دينا بتسأل " فاكرين إحتلال سيناء للمرة الثانية ؟؟؟!!!.

د/دودى يقول...

ابراهيم رزق : ايه ده كله ؟؟!!.. دا انت متغاظ زى بالظبط , امال محدش بيعبرنا و يكمل لنا الحدوته اللى ملهاش نهايه ليه

د/دودى يقول...

ريبال بيهس : و الله عندك حق ما النظام اللى فات و اللى فات و اللى فات كان بيعملوا كده ...امال ايه اللى اتغير؟؟

د/دودى يقول...

Radwa Ashraf : الاول كده اهلا و مرحبتين فى رفايع...

كل اسبوع "يقرفونا بموضوع" ثم يذهب رأسا للمحرقه النسيان اللى بقى يضحك انى بقيت اتخيل اى موضوع حوى بما ينسوه و ينضم للقائمه

د/دودى يقول...

Haneen : اظن ربنا مش هيغيرنا طول ما احنا كده بنهد اللى بيناه و نبنى اللى هدمناه

د/دودى يقول...

ع.سالم : الفيس يشتغل و التوك شو و حتى المدونات و بعد شويه كله يروح و يبتخر ....العفو على تقليب المواجع

د/دودى يقول...

Just Me : للاسف الرابط غير صالح و الا فكنت ساقوم بالزياره

د/دودى يقول...

Ms Venus : عارفه يا فينوس نفسى يخصصوا صفحه فى اى جرنال جكومى لمتابعه تصريحات الحكومه بعد اصدارها و تكمله الاخبار اللى بتنرفزنا ثم تختفى

د/دودى يقول...

حسام بدوي / اهو انا افتكرت كلمتك دى النهارده و الله...قلت لهم كلها يومين و ننشغل بحاجه تانيه كعاده

قلم جاف يقول...

الأسئلة دي وغيرها بتفكرني بمنطق أغنية "وردة" الشهيرة : يوووووه..هوة فيه حد النهاردة..حد النهاااارررردة..النهاررردة بيفتكر!

د/دودى يقول...

قلم جاف : ههههههه هو حد النهارده بيفتكر...و بكره هابقى افكركم بموضوع سيناء ده لما ينضم لاخواته من المواضيع المنسيه

Kem يقول...

على فكرة انتى مقلبتيش المواجع قد ما انتى فعلا كشفتى عن حاجات كانت شبه اختفت ,,, هحاول ادور على موضوع اللجنة ده و اشوف و اقولك :)

د/دودى يقول...

اغانى الشتاء : واضح ان انا و انت قلبنا اسود

إرسال تعليق

حلو؟؟ وحش؟؟ طب ساكت ليه ما تقول....