الخميس، 25 أغسطس 2011

برامج رمضان "2" سياسه و اشياء اخرى




المره اللى فاتت اتكلمت عن برامج الخفه المره دى برامج السياسه مع برامج التوك شو و منوعات اخرى مما شاهدت : 

كش ملك "هبه الاباصيرى"
برنامج كش ملك مع المتألقه هبه الاباصيرى ...هههههه ضحكت عليك و تخيلت و لو للحظه ان برنامج بالسخافه دى ممكن يدخل فى ذمتى بشلن ...ها هى هبه الاباصيرى تقعد و لا تحترك عضلات وجهه خوفا مع انزال ميكاجها الاوفر و بتطرح اسئله معاده مكرره تكاد تتوقع الاجابه...و بالمناسبه هما هما الضيوف اللى فى برنامج رامز واضح ان قناه الحياه بتتعاقد معاهم جمله بدل القطاعى...نفسى اعرف اصرارها على ان تفاجئنى بجمله كش ملك و كأنها بتخضك .... 

برنامج العصابه

برنامج تافه و مزيف..فكرته مش جديده و كل اللى معتمدين عليه هو الديكور و طريقه التصوير و الفكره الفكسانه اخر تلت اربع حاجات...اما حلقه عمرو مصطفى ففرجه لوحدها...المذيعه دمها يلطش   

بنى ادم شو تركيا 
 بصوا بقى ...انا متغاظه من قناه الحياه السنه دى فهى كعاده الناجحين لما يعرفوا انهم كويسين فيكسلوا و يفشلوا او زى الزمالك لما يكون كسبان اتنين صفر فيكسل و ينتهى الماتش مغلوب 3-2 ....بنى ادم شو تركيا هو اعاده لمواسم سابقه لاحمد ادم ...و بما ان احمد ادم زار تركيا و عجبته فقرر ان يشاهد المشاهد معه 30 حلقه تركيا دون ان يحق لك ابداء مللك...احمد ادم منبهر باى حاجه و كل حاجه : لو لاقى الشارع نضيف منبهر , لو لاقى فى تكنولوجيا ينبهر , لو لاقى موائد رحمن ينبهر ....هى صحيح تركيا حلوه بس كل بلاد العالم المحترمه كده ...عادى يعنى

اه ملحوظه كمان : احمد ادم  بيعمل دعايه غير مباشره للسياحه فى تركيا من مصر اللى هى اصلا كتير ...ارحمنا يا احمد احنا عايزين نجيب مش نودى

برنامج الشعب يريد "طونى خليفه" 
 طونى خليفه مستفز .. هو ده المبدأ اللى بيبنى عليه طونى شغله كل سنه بدايه من برنامج "ساعه بقرب الحبيب" ثم برنامج "لمن يجرؤ فقط" على ال بى سى ثم برنامج "من غير ميعاد" ثم برنامج "تايكت او ليف ات" على كان بيجى على قناه دبى ثم برنامج "للنشر" على قناه الجديد ثم السنه اللى فاتت برنامج  "لماذا" على الحياه و الناس و اخيرا برنامج "الشعب يريد"    .....نستمتع لما بنشوف طونى بيعصب الناس و ينرفزهم اونطه على فكره هتلاقيهم هما هما كل سنه باختلاف طفيف يعنى مثلا ايناس الدغيدى بتجى كل سنه بكافه الاشكال .....مكرر بشكل مستفز 

كل رجال الرئيس "عادل حموده" 
 ها هو عادل حموده يرتدى زى الثوره و الثوريين يلا يعنى هو ملوش نفس , اسم البرنامج نفسه اسم لفيلم مشهور جدا طبعا لروبرت ريدفورد و داستن هوفمن اللى بوستره فوق و كتاب اشهر اكيد.. 

بغض النظر عن الاسم اصلا ...البرنامج عباره عن ان عادل حموده "بيقطع" فى مبارك و اللى حواليه بداعى و بدون داعى ...باثبات و من غير اثبات ...مش بقول انهم كانوا ملائكه بس عندى احساس ان عادل حموده بيتكلم ب "غل" و كأن فى ثأر شخصى ...مش عارفه ليه بس ده احساسى اللى جالى , حسيته وهو بيتكلم كانه بياخد حقه الشخصى ...بدليل انه ما اتكلمش عن "حد من الجيش" مع انهم كانوا حوالين الريس برضه و ده اسمه "كل رجال الرئيس" مش "شويه من رجال الرئيس" او "كل رجال الرئيس ما عدا المجلس العسكرى" و  ربنا يجعل كلامى خفيف عليهم لان البورش و السجن حر اليومين دول و انا عندى مصيف و معنديش نفس اتسجن السنه دى ...

نصف الحقيقه "لميس الحديدى" 
تانى تانى تانى هنعود للحيره تانى و النار و العذاب من تانى ...ده شعار برامج رمضان السنه دى فنفس الفكره تعود مره وراء مره باسماء مختلفه و قنوات جديده ..قدمت لميس قبل كده برامج مشابهه :برنامج "إتكلم" على القناة الأولى ثم برنامج "مانع وممنوع" في رمضان 2007، وبرنامج الاختيار الصعب في رمضان 2008، و في رمضان (2009) برنامج فيش وتشبيه. و تفاجنا فى 2011 مع ان مفيش حاجه تفاجئ فى كده بنفس الفكره باسم اخر على cbcو هو "1/2 الحقيقه" بضيوف مكررين و اسئله مكرره تحصل منها فعلا على 1/2 الحقيقه...اسم على مسمى...

برنامج من انتم؟ "بسمه" 
تعود بسمه كمذيعه مره اخرى ...لكن المره دى ببرنامج سياسى و ها هى تتحدث باسم الثوره يلا يعنى هى ملهاش نفس ....من انتم برنامج بيجيب اتنين رأيهم غير بعض يخبطوا فى بعض و دخول فى مناقشات عقيمه لا فائده منها لان لا ده و لا ده هيغير رأيه ببساطه....مع العلم بان المناقشه لا تكون واحد- لواحد زى ما انت متخيل لاااا يا راجل يا طيب ..فالمناقشه تكون دائما 2-1 نظرا لان بسمه دائما ما تتحيز لجانب من الجانبين ...فاذا كان ثورى امام فل من فلول او هكذا سموهم فانحازت بسمه للاول , و اذا كان اسلامى امام ليبرالى انحازت للثانى ...بص انا عاده موقفى بيبقى متطابق مع رأى الشخص اللى بتتحيز له بسمه لكن فكره عدم الحياديه و الانحياز اللى متنفعش لمذيعه و لو حتى لكسب ارض عند الجمهور ...

ملحوظه : الحلقه اللى كان فيها عمرو حمزاوى ...قلت لماما : و الله شكلهم لايق على بعض ..و الغريبه ان طلع فى حاجه فعلا ...على فكره انا معجبه بال couple ده قوى ربنا يوفقهم

ثوره على النفس "معتز مسعود" 

 البرنامج الدينى تقريبا الوحيد اللى بشوفه للدعاه الجدد نظرا لانى بميل اكتر للقدام و كبار السن مش عارفه ليه ...فكره البرنامج-بغض النظر انه المحتوى الدينى طبعا-  حلوه جدا بمعنى فكره انك تستعرض مشاكل حقيقيه واقعيه بتحصل لنا و محاوله ايجاد حلول منطقيه لها بعيدا عن الانشاء او التأنيب و الرعب ...اللى مش عاجبنى فى البرنامج هو الحاجه اللى الناس كلها معجبه بيه وهو طريقه التصوير السينمائيه , فعلى الرغم من انه مفترض انها تكون ميزه الا انى اراها فذلكه غير مناسبه لبرنامج دينى...

ملحوظه : مش فاهمه العسيلى ايه دوره فى البرنامج بالظبط فلا اراه ذا معنى او دور للداعيه على ما اظن...

حلاوه شمسنا "ماجد الكدوانى"
من اكتر البرامج اللى عجبتنى السنه دى :) ...فكره لطيفه ممتعه حقيقيه بيستضيف فيها ماجد الكدوانى ناس طبيعيه زينا و زى اللى بنشوفهم كل يوم , ناس طيبه تحبهم مع الكلام و تعجب ببساطهم ...هو المقابل و العكس لاولاد احمد حلمى الشيك بتوع المدارس الاجنبى....اجمل حاجه ان ماجد الكدوانى "المسيحى" بيعتبر رمضان مناسبه مميزه مختلفه عن باقى السنه فعلا هى دى مصر اللى بحبها ...برنامج مصرى لمذيع مصرى بضيوف مصريين..

شكرا "شريف منير" 
 بغض النظر عن كونه برنامج اعلانى فى المقام الاول الا انه برنامج جميل , يديك طاقه ايجابيه و الناس اللى بيجبهم هما اللى قال عليهم ربنا "" للفقراء الذين أحصروا في سبيل الله لا يستطيعون ضرباً في الأرض يحسبهم الجاهل أغنياء من التعفف تعرفهم بسيماهم لا يسألون الناس إلحافاً وما تنفقوا من خير فإن الله به عليم " [ البقرة ] ...ناس غلبانه لكن شقيانه لا تطلب الحسنه ولا العون و لا محترفين شحاته و  لا بطلجيه بيسرقوا بدافع الفقر...ربنا يكثر منهم , شريف منير شكله عجوز شويه بس انا سعيده بكده لانه مش مزيف ولا بيحول يصغر نفسه...


 

24 التعليقات:

سواح في ملك اللــــــــــــــــــه- يقول...

اخوكي بقي مريح دماغه

بتفرج عل برنامج الديكتاتور بتاع ابراهيم عيسي

ويطمئن قلبي (ديني ) علي قناة التحرير

حمدى جعوان يقول...

والله تحليل جميل ومفيد حتى عرفت برامج مسمعتش عنها اصلا :)
عو شعار البرامج فى رمضان عموما هو الخفه ( اللى تخنق )
والافكار المستهلكه ... يمكن الوجوه هى اللى جديده ..
الحاجه الوحيده اللى تابعتها فى رمضان ومن الحلقه 15 هى مسلسل خاتم سليمان . وبعض الحلقات من برنامج ليطمئن قلبى ....... كل سنه وانتى طيبه

Unknown يقول...

العزيزة دودي
شكراً علي النقد المختصر المفيد. يبدو لي أن الشعار التسويقي لبرامج رمضان الحوارية مستمد من عنوان مقالة للراحل يوسف إدريس نشرت في الأهرام من زمن كان اسمها " فقر الفكر وفكر الفقر". كبيرة أنت يا دودي. مع تحياتي وتقديري.

غير معرف يقول...

مساء الورد د/دودي

نقد جميل ورائع للبرامج وكأنك ناقدة متمرسة

وجميع ما ذكرتي لا أتابعها لأنها بالفعل فقيرة

فكرياً مثلما أشار زميلنا فنادراً ما نجد برنامج

ثقافي أو حواري أياً كان نوعه حتى نتابعه فكله

مستنسخ من بعض وكلها تعبر عن فكر ضحل ومكرر وما

نجده ناجح نوعاً ما نجده للأسف نتاج تعريب برنامج

غير عربي وفي النهاية قد يكون هناك شيء جميل

يتسرب من هنا وهناك يستحق أن نتابعه ..

تحياتي وإحترامي

عبد الرحمن سالم يقول...

متفق بنسبة 100% المرادي ... بس ليه محتطيش "الديكتاتور" و"لأ" ولا إنتي مقاطعة قناة التحرير ؟ :D

ابراهيم رزق يقول...

صلى على النبى زيى النبى صلاه

يا سلام على بنات حواء دايما ينفسنوا على بعض مالهم بقى هبة الاباصيرى و داليا ابو عمر ماهم حلوين و مية مية و مكياج فول ميكب ما هى دى كل مؤهلاتهم و هما فى الناحية دى لم يقصروا يبقى ننفسن عليهم ليه شيلى الحتة السوده دى من قلبك شيلى

نأتى لبقية البرامج هذه البرامج ينطبق عليها افلاس فكرى و تفليس من اول طونى الى لميس

نأتى بقى للبنوتة بسمة واضح انك هتسيبى الطب و تخشى على الاعلام و بنتكلم فى المهنية و الحيادية
بص يا دعاء يوجد مدرستين فى هذا الخصوص
مدرسة مهنية ترعى ان المذيع يجب ان يكون على الحياد و يحتفظ بوجهة نظره لنفسه
و مدرسة ترعى ان يعبر المذيع عن وجهة نظره بشرط ان يعطى الطرف الاخر حقه كاملا فى شرح وجهة نظره و هذه المدرسة اميل اليها
تحياتى و تقديرى و تمنياتى بعدم النفسنة

سكندري يقول...

ايه يا دكتورة
دا انتي فاضية بقي D:
بصراحة انا مش بشوف ولا برنامج من البرامج اللي انتي قلتي عليها بس عاجبني اوي طريقة النقد
انت بهدلتي الناس معاكي هههههههه
بالنسبة للبرنامج بتاع بسمة شفت كام حلقة علي السحور و حسيته برنامج فكسان اخر 17 حاجة

الاحلام يقول...

جميل انى اخد فكره على البرامج الموجوده على الساحه الان لانى لست متابعا للبرامج
جميل ومع الشكر تحياتى الاحلام

r يقول...

الحقيقه يا دودى ما سمعتش اى برنامج فيهم فأنا مقاطعه التليفزيون الا من مسلسل الحسن والحسين وساعات بطنشه وعمرو خالد(يجى على قناه سى بى سى 2 الساعه 6 ونصف وقت الفطار ) لا غير ثوره على النفس سمعت حلقات منه على الفيس ممتاز جدا جدا
وكل سنه وانتى طيبه

غير معرف يقول...

نسيتى اهم حاجة...برنامج البرنامج مع باسم يوسف

صراحة محترم و حلقات توفيق عكاشة و عمرو مصطفى وثورة اسرائيل كانوا رائعيين

غير معرف يقول...

نسيتى اهم حاجة...برنامج البرنامج مع باسم يوسف

صراحة محترم و حلقات توفيق عكاشة و عمرو مصطفى وثورة اسرائيل كانوا رائعيين

Tears

Elsayed Azab يقول...

السلام عليكم ..

تقريبا نفس الشعور بجد منتهى السخافة .. أنا شخصيا مش متابع سوى:

ثورة على النفس ..
قصص الحيوان فى القرآن..
البرنامج مع باسم يوسف ..
أحيانا شوية عيال لأحمد حلمى :)

كل عام وأنتى بخير .. ودائما تحليلاتك قيمة وصادقة ..

تحياتى

د/دودى يقول...

سواح في ملك اللــه: يا بختك مريح دماغك ...للاسف انا مش بتفرج على قناه التحرير لانها بتجى مشوشه عندى و لان جدولى اتملى ما اهتمتش اظبطها

د/دودى يقول...

حمدى جعوان : و كمان مش كفايه ان الافكار و الخفه بل ان الوجه كمان بقى مستهلك ...المشكله انى بحس ان كل البرامج مذيع بس من غير اعداد

د/دودى يقول...

العصفورية : فكرتنى بالاقلام المحترمه صحيح ما كنتش فى زمانهم لكنهم شكلوا جزء من تفكيرى ...الله يرحمه لو كان عايش كان زمانه مات بالسكته من اللى بنشوفه

د/دودى يقول...

ريبال بيهس : تصدق عندك حق بقى فى ازمه فى الافكار الاوريجنال زى ما بيقولوا و كأن الله رزقنا ب 5 افكار فقط فاما ان نكررها او نسرق افكار الاخريين

د/دودى يقول...

ع.سالم : زى ما قلت للاسف انا مش متابعه قناه التحرير اصلا لانها بتجى مشوشه عندى و كسلت اصلحها لانشغال الجدول زى ما انت شايف ...بس بصراحه اسم القناه نفسها عصبنى فيه شويه استغلال كده على طريقه "الشعب يريد طعم البرتقال"

د/دودى يقول...

ابراهيم رزق : عليه الصلاه و السلام و كمان الف صلاه و سلام عليك يا نبى ...

هى هبه عامله اللى عليها و زياده الحقيقه فعلا انا اللى بقيت منفسنه ربنا يشفينى ههههههه....

بالنسبه لموضوع بسمه فانا اصلا مش عجبنى فكره البرنامج المكرره و المعاده و كل يوم لكن كمان التحيز كل يوم خلانى قفشت من البرنامج و بعدت عنه ...و تفتكر هى لو بتعمل مناقشه عن اى موضوع و الرأى اللى هتتحيز له مش رأى الجمهور و العامه لكسب ارض كانت هتتحيز...اظن لا

د/دودى يقول...

سكندري : حمد لله عالسلامه يا راجل وحشتنا ...و حياتك هو شهر واحد اللى بفضى فيه فى السنه و النهار طويل اهو بنسلى صيامنا :) ...اعترف انى فى بدايات رمضان كنت بتفرج كتير بس سوء المستوى و عوده النت الضال قلل اللى بشوفه..

انا كمان حاسه انى بهدلتهم معايا بس انا كنت معبيه قوى بقالى شهر و لازم ابعبع هههههه

انا كمان برنامج بسمه مش داخل دماغى

د/دودى يقول...

الاحلام : انتوا ابتديتو تحسسونى انى فاضيه فعلا :)

د/دودى يقول...

بسنت : انا عالفطار مشغوله بتفرج على بسنت و دياسطى و مستمتعه بيهم السنه دى جدا ...و للاسف مشفتش ولا حلقه من الحسن و الحسين لانى مقاطعاه لانى ضد فكره التشبيه

د/دودى يقول...

تيرز : انا شفته فعلا بس مش من الاول لحقت كده كام حلقه و بصراحه مسخره ضحكت من قلبى على الرغم من انى مبحبش فكره تقطيع الاشخاص عشان مواقفهم لكن حلقه عمرو مصطفى انتزعت منى ضحكتى ...

د/دودى يقول...

elsayed azab : مشفتش غير 3 حلقات من قصص الحيوان بصراحه تكنيك رسم الكارتون معجبنيش على الرغم من جوده المحتوى ...

زهرة البنفسج يقول...

دكتور دودي كل عام وانتي بالف خير
من تجاربي السابقه الاليمه مع برامج التليفزيون وكتبت عنها بس مافيش فايده . اخدت موقف منها وهو ان رمضان شهر عباده وبس .. انا مش بشوف اي حاجه الا الدالي وكمان السنه دي مش زي السنين اللي فاتت . يمكن بس بشوفها لاني شفت الجزء الاول والتاني غير كده مش بشوف اي حاجه ولو ان في كتير شكروا في مسلسلات بس دي نشوفها بعد رمضان هما طول السنه بيحصرونا بيها لغايه رمضان الجاي وعليكي خير
شكرا لمرورك الكريم وتعليقك الاجمل
لكي كل الود واوعي تقلبي الصفحه ابقي معي

إرسال تعليق

حلو؟؟ وحش؟؟ طب ساكت ليه ما تقول....