الأربعاء، 24 أغسطس 2011

برامج رمضان "1" الخفه



لاحظت ان المدونات و المدونين - اعزهم الله و اكثر من عددهم- ابتدوا يعملوا تقييمات شامله لاعمال رمضان ...كما انى لاحظت ان الاهتمام منصب على الاعلانات و المسلسلات ...و بما انى فاضيه فى رمضان و النت كان قاطع فتره طويله فانا تقريبا بتفرج على معظم الحاجات ...

قال يعنى مش كفايه علينا المسلسلات و الاعلانات فاتانا الله و ابتلانا بالبرامج كمان ...المهم خلونى ابعبع اللى شاليه فى قلبى طول السنه :

اولا : برامج الخفه :

برنامج رامز قلب الاسد
اسوء برامج رمضان 2011 بكل تأكيد و يمكن كمان يكون اسوء برنامج فى اخر 5 سنين ....اسنخفاف و استظراف و بواخه ليس لها حدود...نفس المقلب اللى ابتدى سخيف ثم تحول الى ملل كل يوم بنفس التكنيك و بنفس الزيف ....عندى احساس اصيل لا شك فيه ان الممثلين بيكونوا عارفين بدليل ان فى بعضهم متخصص  برامج مقالب فقط يعنى عمره ما جه فى حوار حقيقى فلما بيكون خارج من بيتهم بيبقى عارف و بيبان انه بيمثل ....اللى يغيظ ان الناس معجبه اعجاب بلا حدود بالهطل ده....

 برنامج الأسانسير

نفس فكره البرنامج بتاع رامز بكم اعلى من النخلف و  السماجه بس بدل على مشاهير بيستعبط على خلق الله ...و لو انى برضه حستهم بيستهبلوا....

برنامج اوعى وشك
 
برضه على قناه الحياه اللى بمناسبه مستواها انحدر بشده  السنه دى ....مقالب فى الشارع على طريقه الكاميرا الخفيه نادرا تلاقى نفسك بتضحك لكن غالبا بتتأسف على البهدله اللى بيبهدولها لسئ الحظ...فاكرين الكاميرا الخفيه بتاعه زمان كان مسليه ازاى بدون اهانه ...اه ايام

برنامج ماتيجى أقولك
 ميستحقش كلام كتير...مجرد تكرار ممل لبرامج سابقه لحسين الامام و كانت البرامج السابقه فى حد ذاتها مش ناجحه للدرجه انها تتكرار كل هذا العدد من المرات خاصه انهم فى الاول و الاخر تقريبا نفس الممثلين....

برنامج  كاستينج وبس
بص انا عاده مبحبش برامج المقالب ...لكنى بعترف انى حبيت البرنامج ده ...ضحكت عليه لما شبعت بذات فى حلقات معينه ....الكل عايز يمثل و خلاص...

برامج الطياره الشقيه
  التليفزيون المصرى مصر على التفاهه و الخيابه ...حتى الاسم تافه ...ميستحقش التعليق خاصه مع التقليد المكرر للشخصيات...

 ارجوك متفتيش 2 
 +
 توك شو زى العسل

 + 
حبشتكنات 2 
=
ال3 برامج نفس الفكره و نفس المستوى تقريبا ....و كمان نفس الانتقاد : اهانه لبساطه المصريين و اختبار لطيبتهم و احيانا سذاجتهم ... 


 توك شو تكنو قراط
 بنفس كاست موجه كوميدى المعتاد اللى حبيته و نجح قبل كده على الرغم من انتقاد بعض الناس....اما المره دى فعلى الرغم من اختلاف الموضوع بعد الثوره الا ان للاسف جاء البرنامج اقل من مستواهم فهم "عادم" كأنه ناقص ملح ....

شويه عيال "احمد حلمى" 
و يرجع احمد حلمى ببدايته مره تانيه مع حوارته اللطيفه مع الاطفال , البرنامج اللى صعده و حبب الناس فيه , البرنامج اللى كان بيتذاع على الفضائيه التانيه (ايام ما كان فى فضائيه تانيه) مع اطفال لذيذه يكلمهم احمد بطريقته المميزه...و نجح جدا البرنامج و لما ظهر احمد حلمى كممثل و نجم رجع عمله تانى مع نسخه"من سيربح البونبون" ..و اكثر من نسخه تلا ذلك...و انتهى الامر بنسخه "شويه عيال" على السى بى سى ...اعترف انى تبعته بشغف و حبيته لكن فى حاجتين هما اللى ماضيقنى غير كده كان يبقى ممتاز : 
 اولا : ان خطوات البرنامج محفوظه بمعنى ان فيه فقرات تعاد كل يوم -ده بالاضافه لاعاده فكره البرنامج نفسها- و العيب ده مكنش موجود فى النسخ السابقه خاصه الاولى لما كان الحوار فرى بلا قيود و كان بيطلع منه حاجات تحفه
ثانيا : ان اعداد البرنامج مصر على نوعيه الاطفال الكلاس اولاد رجال الاعمال اللى بيرحوا مدارس فرنساوى و امريكانى و عنده البرتقاله اسمها"اورنج" و الشيكولا و ميعرفش عربى...كان نفسى اشوف طفل طبقه متوسطه شويه   

 المعجبين وعمايلهم 
 الى حدا ما يعتبر برنامج جيد..ايقاع خفيف و ممثلين متنوعين و مواقف بتضحك احيانا ...اعيب عليه انها هى هى نفس الفكره كل يوم كما اعيب عليه ان ممثلينه الى حدا ما ممثلين صف تانى....الغريبه ان المذيعه اخف بكتير من تمثيلها البارد اللى فى مسلسل "خاتم سليمان"...  

 حلمنتيشى تقديم عمرو قطامش
اهو عمر قطامش فى حد ذاته تمثيل لمدونه "اسئله اعتلاها التراب" فلنعترف ان مصر و اهلها بينسوا بسرعه ..فبعد ان تحمس الجميع لقطامش و امتلئ شعره الفيس و التويتر و اى حاجه اختفى و راح فى غياهب النسيان و لما رجع للاسف مرجعش بنفس القوه و ده فى رأيى لانه مصر على الاعتماد على نفسه زياده عن اللزوم فهو اللى بيألف و يمثل و ناقص بس انه ينضف البلاتوه بعد العرض ...جاء البرنامج مكرر لشئ لم يفعل اصلا و السبب انه متوقع زياده عن اللزوم مفهوش مفاجأت ....

برنامج حدوتة بعد النوم 
 نفس كلام اللى قلته على قطامش يمشى على ابو حفيظه الا ان فى حاله قطامش فالموضوع مكنش محروق و لكنه متوقع اكثر من الازم اما فى حاله سيد ابو حفيظه فهو حرق حقيقى جدا , 3 او 4 مواسم من نفس الشخصيه باسامى مختلفه و قنوات مختلفه ...حاول انه يجدد بمواضيع الثوره فزاد الطين بله....بجد كفايه يا سيد يا ابو حفيظه

 برنامج حكومه شو
البرنامج ده ميزته تكاد تكون الوحيده فكره انه اتعمل قبل الثوره و الا لفقد تسعه اعشار معناه...تقليد ممتع من عزب , استمتعت بيه عموما و عجبنى انه كان بيناقش قضايا كانت مثيره ساعتها و اتنست كالعاده زى مثلا موضوع القمح المسوس و التوك توك و الحاجات اللى كانت كوارث و انتهى الامر لتحولها لجزء طبيعى من حياتنا اليوميه....لطيف ظريف دمه خفيف

برنامج حمار سواقة 

عارفه انه ميعتبرش برنامج قوى كونه كارتون...لكن اعذرنى فانا حتى متردده فى وضعه فى لائحه الكوميدى من كتر ما دمه تقيل..برنامج لزج سمج لا طعم و لا لون ولا ريحه ولا فكره .... 

برنامج "برنامج اية"
 برنامج بيتكلم عن مرشحى الرئاسه "الخيالين" مع تقديم برامج انتخابيه "خياليه" من الاخر اعاده تقليد لشخصيات اتقلدت قبل كده...مجرد اهدار لموارد قناه النيل كوميدى و بالتالى مال الدوله...


كانت تلك مجموعه مما شاهدت فى برامج الخفه و طبعا فى برامج فى النوعيه دى تانيه لكنى مشفتهاش ....انتظرونا فى برامج البلوتيكا .... 

28 التعليقات:

سواح في ملك اللــــــــــــــــــه- يقول...

تعرفي انا مش متابع في البرامج والمسلسلات

غير مسلسلين فقط اداوم علي رؤيتهم

وهما الحسن والحسين وقصة افتنه الكبري

وشارع عبد العزيز

وفي البرامج معظمها ديني

وسياسي

تحيتي

Bent Men ElZman Da !! يقول...

اجمل حاجه انك اتكلمتى عن كل برنامج بالتفصيل وقولتى ايه الكويس وايه الوحش
فى حاجات كتير ماعرفهاش اول مره اسمع عنها منك
بس من كلامك
قولت الحمدالله انى مش شفتهم اصلا

تسلم ايدك

د/دودى يقول...

سواح في ملك الـلــه:- و الله كده احسن ميت مره و كل سنه اقول هاحدد عدد معين لكن لما بيجى رمضان فى الاجازه بتبقى فرصه لانتطلاق..

على فكره انا كمان بتفرج على شارع عبد العزيز و هابقى اكتب فيه رأيى بالتفاصيل المره بعد الجايه

د/دودى يقول...

Bent Men ElZaman Da : الله يسلمك ...بينى و بينك اللى قلت عليه حلو نادر قوى للاسف و عموما كله خد فرصته لفتره ثم فقدت الاهتمام بكثير منها فعلا لسخافتها...انا صدقت الجمله اللى بتقول ان تبكى الناس اسهل من ان تضحكهم

عمار مطاوع يقول...


مش عارف ليه مش بأبقي مقتنع بالبرامج بتاعت المقالب .. وباحس إنها بالاتفاق

ابراهيم رزق يقول...

صلى على النبى زيدى النبى صلاه

اجمل حاجة انك قدرتى تفرزى البرامج و صنفتيها الى قسمين

السىء ثم الاسوء ثم الذى تحتارى فى تصنيفه و تتسائلى هل الناس اللى عملت البرامج دى هبلة و لا احنا اللى هبل لكن توصلت الى المعلومة اننا اللى هبل لانهم يكسبون اموالا اما نحن فنخسر وقتنا و اعصابنا و صيامنا بالاضافة الى العدوى من الهبل
تحياتى

... سعد الحربي ... يقول...

صراحة أنا ما أتابع هـ البرامج

يعني الحمد لله مرتاح كثير منها

لكن يا مرحباً ويا هلا بـأي برنامج جميل وهادف يفيد المشاهد.

موفقة أختي.

غير معرف يقول...

البرنامج الوحيد الذي اتابعه من كل هذه البرامج
هو برنامج حكومة شو
ولا اتابعه علي التلفزيون بل اقوم بتحميله من الانترنت ومشاهدته علي جهاز الكمبيوتر
البرنامج يصور الجرح العميق الذي اصاب قلوب كل المصريين .
واجمل ما فيه اني اتذكر جيدا اعلاناته التي اذيعت من سنتين تقريبا علي التلفزيون قبل ان يمنع عرضه
ولولا اني رأيتها بنفسي لظننت ان قصة اناتجه قبل الثورةمجرد خدعة لدعم البرنامج
ولكني أظن أن هناك بعض التعديلات تمت في البرنامج بعد الثورة

شكرا د/دودي

عبد الرحمن سالم يقول...

أنا تابعت حلقة واحدة بس من كل البرامج دي .. ما عدا برنامجي "الأسانسير" اللي أنا مبطيقوش بس بيجي في وقت مناسب.. وطبعا برنامج "البرنامج"، اللي على ما أعتقد ميصنفش فعلاً من برامج "الخفة" :)

بس متفق معاكي في أغلبية النقاط تقريباً :)

richardCatheart يقول...

بوست هااااااااااااااايل اتفق معاكى فى كتير من النقط


بس احب اضيف ان رامز مش خساره فى لطفه وخفته وظرفه رصاصه فى دماغه

تحاتى

عليم يقول...

السلام عليكم د: دنيا
كل سنة وحضرتك طيبة

اولا شكرا ع المقال الجامد ده وده تقريبا نفس الرأي الخاص بى خصوصا فى البرنامج اللي بيتخف بالناس " رامز قلب الأسد " انا حاسس انهم متفقين مش حاسس لا متاكد ووواضح جدا وبعدين ايه هو دور رامز فى البرنامج انا لما بشوفه بعمل بنصيحة د: ابراهيم الفقي بيقول لو شفت برنامج او مسلسل مش عاجبك حول عنه لان استمرارك يعنى زيادة عدد المشاهدين ومكسب له




اما احمد حلمى فنفس الكلام العيال اللي جايبها شكلها من عالم تانى خالص " مش عارف أحمد عايز يقول أنه خلاص بقى منهم ولا إيه ؟؟, "

انتى كمان نسيتى أرخم مسلسل كرتون فى الدنيا 6 سلندر يا ساتر

وبرنامج " البرنامج ايه " اكتر برنامج ممل فى العالم

Unknown يقول...

العزيزة دودي
قلتي اللي في نفسي عن البعض القليل الذي يسمح وقتي بالفرجة عليه،أما ما لا أعرفه من هذه البرامج فلن أحاول حتي معه بعد نقدك في البوست ده. تحياتي وتقديري

غير معرف يقول...

عمرو قطامش مش عارفه ليه برنامجة طلع اقل من المتوقع اوى مع انه موهوب بس اعتقد ان الجرعه زيادة و كمان وزنه بقى كتير جدا و بدأ يعوق الاداء فلازم ينتبه

عجبتنى اغانى ابو حفيظة و حطيتها على الموبايل بالذات فرموه و ابيع الغاز

نفسى رامز يعمل المقلب فى مرتضى منصور و عمر مصطفى و مش لازم يربط الاسد

المسلسلات مش قوية زى زمان بس يكفى ان مافيش يسرا و الهام و ليلي و الفخراني و السعدنى

آدم قصة مسلية و بتكشف مرضى جهاز امن الدولة بس اعتقد اختيار تامر لم يكن موفق لان الدور محتاج تمثيل اقوى

خاتم سليمان كان بطىء اوى و فجاه الاحداث بقت سريعه جدا و بيحاول يتطرق لكل القضايا فجأه كأن تصوير النص التانى كان بعد الثورة فماصدقوا

شارع عبد العزيز...مسلى لكن قائم على فكرة صعود كهربائى ما تهمش اى حد

دوران شبرا اجتماعى بيمثل الشريحة الاكبر فى مصر بمشاكلها و طوائفها

الكبير اوى كوميدى فى بعض الحلقات فقط لكن اجمالا يصلح كمسلسل اطفال اما مبروك ابو العلمين فكان افضل يبقة عشر حلقات كان ح يضحك جدا بعيد عن المط و التطويل

الريان اجمل ما فيه تعريته للمتاجرين بالدين و انه بيخاطب ربات البيوت الاقل تعليما و ثقافه


Tears

Radwa Ashraf يقول...

الصراحة مكدبش عليكى مشفتش من دول و لا حاجة .. معظمه شفت منه حلقة حلقتين و الباقى مجرد سمعت عنه و فيه مشوفتوش خالص !
رامز قلب الاسد .. شفت حلقة و فعلا سخيف و رخم أوى !
أرجو ماتفتيش .. كنت شفته زمان , موسم قبل ده , مكنش سئ , بس فى اهانة لطيبة الناس فعلا
شوية عيال .. شفت كام فيديو و لاحظت فعلا , أن كلهم أطفال مستواهم عالى , مكنش فيه أطفال طبقة متوسطة من العادية دى ! استغربتها فعلا
حكومة شو .. برضة شفته قبل الثورة و مش كامل بس عجبنى الصراحة
حمار سواقة .. شفت منه كام حلقة , مش سئ بس برضة مش قد كده
دول اللى الصرحة شفت منهم حاجة .. بس البوست حلو أووى
تسلم إيدك :)

د/دودى يقول...

عمار مطاوع : انا كمان مقتنعه بكده ...بدليل ان نفس الممثل اتعمل لافيه مقالب اكتر من 6 او سبع مرات ...ايه محدش فيهم بيشك حتى ؟؟

د/دودى يقول...

ابراهيم رزق : عليه الصلاه و السلام و كمان عليه الصلاه و الف السلام ....البرامج دى بترفع الدم فعلا و اقترح ان يتم استخدامها كدواء مساعد لاصحاب الضغط المنخفض...مع اضافه تحذير على العلبه ان له اثار جانبيه منها زياده نسبه العبط فى الدم

د/دودى يقول...

... سعد الحربي . : طب الحمد لله انك مشفتش البرامج دى لان للاسف البرامج الهادفه او حتى المسليه بقت نادره كبيض الرخ

د/دودى يقول...

ماشي بنور الله : انا كمان مقتنعه بان تم تعديل فيه بعض الثوره مش عارفه ليه بس احساس...

د/دودى يقول...

ع.سالم / انا كمان مش متابعه ده كله يوميا بس شفت منه كفايه لتكوين فكره راسخه مهما اتفرجت عليه تانى الفكره مش بتتغير

د/دودى يقول...

richardCatheart : انا بقى شايفه ان حتى الرصاصه خساره فيه ...ده عايز حد يضربه على دماغه و يفوقه من الهطل ده...

د/دودى يقول...

عليم : رامز بيمتحن صبرنا فى البرنامج ده ....و للاسف مقدرش اشوف "وش سلندر" بعدد كافى من الحلقات عشان اكون عنه فكره ثابته....

انا بفكر اى برنامج ميعجبنيش هاعمل حاجتين الاول هاقاطعه و ثانيا هافضحه هنا ...

د/دودى يقول...

العصفورية : الحمد لله براءه البوست ده....صدقنى البرامج اللى مشفتهاش وفرت منها راحه بال و حرقه دم...

د/دودى يقول...

تيرز : ايه الجمال ده كله؟؟ اللى كاتبته دى يتعمل بوست لوحده...ابقى اكتبى غنك فى المدونه عايزه اعرف رأيك بالتفصيل ...

انا موافقكى فى كل النقط بذات خاتم سليمان بقى مباشر قوى و حكايه الحزب الوطنى دى اوفر قوى و مقحمه...

د/دودى يقول...

Radwa Ashraf : انا كمان مشفتش كل البرامج يوميا بس شفت كفايه لتكوين رأى خاصه ان فى برامج مقدرتش اشوفها يوميا و الا لمنكش اقدر اكلمك دلوقتى كان زماتى مت من زمان...

كله كوم و شويه عيال كوم بقى عيال "نضاف" زى عن اللزوم و كانه فجاه بقى ابن ناس..

اختلف معاكى فى "حمار سواقه" بصراحه مفهمتش الكتاب عايز ايه؟

ويكا يقول...

طيب يعنى هيبقوا سخيفين كده ....... كمان تضيعى وقت كل ده يا بنتى في تناولهم بالنقض ......



مش للنشر

ويكا يقول...

ايه ده ، هو انتى مش عامله اشراف ؟؟

انا كنت قررت خلاص انى لا انش تعليفت ولا يتنشرلى

بس مش مشكله افوتها المره دى :))

د/دودى يقول...

ويكا :ههههههه انت وقعت فيها ...هو ايه حكايه المدونين مش عايزين تعلقوا او قفلين التعليقات ماتتكلموا هو الكلام بفلوس

سكندري يقول...

لا بجد كده كتير (:
انا في حاجات كتير اول مرة اسمع عنها !!!
بس انا ليا سؤال ؟
هو برامج التريقة علي خلق الله و السخرية من بساطتهم او سذاجتهم زي برنامج "بحث ميداني زي العسل" و "كاستنج" و "اشباه الكاميرا الخفية" ما جاش الوقت اللي تخلص بقي و يفكروا يعملوا حاجاة جديدة ؟

انا بشوف الكاميرا الخفية الاجنبي و بضحك فعلا من قلبي من غير ما حد بيتهزأ و لا يحصل المسخرة دي
طيب هو ليه الناس بتوافق انها تذيع الحاجات دي ؟
يعني هو عايز يطلع في الشاشة و خلاص ؟

اما بالنسبة للممثلين فأنا متهيألي أنهم بيبعتوا لكل واحد Schedule فيه مواعيد البرامج اللي هيجي فيها و بيقولوا هيمثل ازاي
يعني البرنامج ده محتاج تعمل نفسك عبيط و البرنامج ده لازم تقول تصريحات مستفزة و البرنامج ده لازم تقول انتي بتحب تأكل ايه و بتحب ألوان ايه؟ استفدت ايه انا بقي من الهبل ده ؟

و بعد كده تطلع علي الاستديو اللي جنبنا و تمثل كام مشهد في السريع علشان نلحق الموسم

يعني كل سنة نفس الشخصيات بنفس الكلام اللي بيتغير بس اللبس و الديكور و اسم البرنامج ؟

بجد يا دكتورة هي دي غلطة المشاهدين و لا غلطة صانعي البرامج دي ؟

بالمناسبة انتي مش بتشوفي برنامج "البرنامج " بتاع باسم يوسف ؟

عجبني جدا علي فكرة

إرسال تعليق

حلو؟؟ وحش؟؟ طب ساكت ليه ما تقول....