الأربعاء، 8 يونيو 2011

تنكيس علم مصر !!



ايه هيكون احساسك لو شفت علم مصر بيتنكس قدام عينيك ؟ ...شعور بالغضب , باليأس , بالحميه لرجوعه يرفرف تانى , بالحزن ممكن كمان ....ايوه بتكلم عن علم مصر اللى ماتوا فى التحرير و هما فى حضنهم , عن علم مصر اللى كنت بتشيله فى ماتشات المنتخب يوم ما غلبنا الجزائر 4-0 او يوم جون ابو تريكه بعد جهاد زيدان فيه , العلم بتاع المدرسه لو كنت بتحضر الطابور...ايوه العلم رمز "جمهوريه مصر العربيه"

طب سؤال كمان : تفتكر ايه الاسباب اللى ممكن علم مصر يتنكس بسببها : 
1: حاله من الحزن العام لموت حد عزيز - و ان كنت اعترض على الفكره دى-
2: نكون اتهزمنا فى حرب ولا حاجه
3: حاله كارثيه ..زلزال ولا موت الالالف فى مصيبه...
* المهم ان فى يكون مصيبه فى البلد تكسر القلب و الوجدان .......

طيب بعد التحضير النفسى ده خد بقى الخبر ده و قولى قولى ايه رأيك جرب و اوصفلى :  

المحامون المعتصمون يهددون بتنكيس علم مصر ورفع علم أسود على نقابتهم


الثلاثاء، 7 يونيو 2011 - 16:18
 أعلن المحامون المعتصمون بالنقابة العامة، أنهم سينكسون علم مصر على نقابة المحامين وسيرفعون العلم الأسود، حتى تتم إعادة النقابة إلى المشهد السياسى وتمثيلها فى الحوارات الوطنية، ومشاركتها فى الحوارات التى تجرى حول التعديلات التشريعية والقانونية.

وأكد المحامون أنهم سيمهلون المجلس العسكرى ورئيس محاكم استئناف القاهرة حتى يوم 21 يونيو الجارى للاستجابة لمطالبهم، بحل مجلس النقابة وقيام رئيس محكمة الاستئناف باستلام النقابة ودعوته لإجراء الانتخابات تنفيذا للحكم بعدم دستورية القانون 100 لسنة 1993.

فيما أعلن خالد أبو تريكة وكيل النقابة، أنه تقدم باستقالته من المجلس منذ 5 شهور بعد صدور الحكم بعدم دستورية القانون 100، والذى أدى إلى فقدان المجلس لشرعيته، مشددا على ضرورة حل المجلس فورا والدعوة لانتخابات حرة نزيهة، تأتى بمجلس نقابة قوى يراعى مصالح المحامين ويساهم فى عودة النقابة إلى ريادتها فى المجتمع وعدم تهميشها.



ايون ...المحامين عايزين ينكسوا العلم و يحطوا علم اسود!!..مفهمتش السبب بوضوح يمكن لان فكره تنكيس العلم نفسها عملتلى رعب و خضه ...اه بالمناسبه -حته تفاهه على جنب كده- خدت بالك ان وكيل النقابه اسمه "خالد ابو تريكه" اصل الاسم ده نادر و بالمناسبه لو حد يعرف معنى تريكه ايه يبقى يقولى ....

ملحوظه : اسفه بقوه و بشده لعدم انضباطى  بحمله التدوين اليوميه بصراحه لانها مرهقه جدا لايجاد افكار و خفت انى اكتب اى كلام بطحينه -ده على اساس انى بكتب كلام عدل اصلا - و كمان الامتحانات كبسه عليا بقوه فانا دلوقتى بكتب محاطه بالكتب و المذاكرات و امتحان بعد بكره لسه مقرتش فيه حاجه ...و بالتالى قررت اطبق نظريه مورفى "اذا فشلت فاخفى كل الادله انك حاولت"....



15 التعليقات:

ابراهيم رزق يقول...

بصى نصيحة قديمة من واحد مكانش بيذاكر قديم انا كنت اجلس فى البيت محلقش دقنى و شعرى منكوش و افضل اخمن و فى الغال تخمينى بيجيب نتيجة و التقدير الشعبى اللى هو مقبول جدا مع مرتبة الشرف
انتى اعملى زى ما كنت بعمل طبعا الدقن دى ليا انا انتى تبقى منعكشة كده ال يعنى جو توتر و ربنا يسهل
بالنسبة لنقابة المحامين النقابة دى من زمان قوى لم تفرز شخصية ؟؟؟؟ كل الشخصيات فسكانة انافقدت تقديرى لهذه النقابة من زمان و لمعظم المحامين بعضهم القليل شخصيات محترمة كلامهم كثير و افعالهم قليلة
كلمة تريكة فى قاموس المعانى عانس
خالص تحياتى و بالتوفيق فى الامتحانات

Carmen يقول...

مقال جميل حبيبتي تسلم ايدك

د/دودى يقول...

استاذ ابراهيم :

* مش محتاجه نكشه ولا حاجه انا متعوده على كده اصلنا بمتحن بتاع خمسين مره فى السنه و تأرجح دائم بين الجيد و الجيد جدا يلازمنى و اتمنها تحسم لتقديرى ج ج المفضل..

* تريكه يعنى عانس !! غريبه قوى كان شكل الكلمه يدى معنى احلى

* اتفق معاك انها نقابه فكسانه بس العيب مش عليهم العيب على اللى ساكت لهم و تطبيل الاعلام لكل واحد بيعتصم لاى سبب عارف لو مفيش متابعه اعلاميه مكنش حد عمل حاجه...

د/دودى يقول...

كارمن : مرور عطر كطبعك

Casper يقول...

طبعا حين أسمع خبر مثل ذلك فسأقوم مسرعا بالتخريف كعادتي وفي الغالب سأقول كلمات لن أحب سماعها أبدا

no comment

_________

خالص تقديري لفكرك وقلمك
وربنا يعينك في الامتحانات

بالتوفيق دائما
Casper

ابراهيم رزق يقول...

جيد ايه يا بنتى و جيد جدا احنا عندنا حد بيجيب التقديرات دى ههههههههههه ماله المقبول زى حالاتى

ربنا يوفقك و ينجحك

ENG./ELSAYED,PMP يقول...

موضوع الطحينة ده جوعنى بصراحة... هههههه

كريمة سندي يقول...

المذاكرة أهم وأما مسألة تنكيس العلم فهي لمن يجرؤ واعتقد أن المحامين أدرى بالقوانين التي تحميهم

د/دودى يقول...

كاسبر : انا برضه معرفتش اطلع كل اللى حسيت بيه ساعتها

د/دودى يقول...

استاذ ابراهيم : الحمد لله محصلتش ولا مره حتى الان لا المقبول ولا الامتياز

د/دودى يقول...

ENG./ELSAYED : اجيب لك شويه فى طبق وحتيتين كفته تبقى هناء...

د/دودى يقول...

كريمه : يا رب اذاكر بقى ...

غير معرف يقول...

بجد حاجه مؤسفه و لو عملوا كده هيفقدوا إحترام الناس ليهم.
ربنا معاكي يا جميل و تخلصي على خير
تحياتي ليكي

شيرين سامي

ريبال بيهس يقول...

صباح الورد د/دودي

للأسف أصبح سهل جداً تنكيس العلم لأجل مصالح

شخصية !!!

العلم هو رمز كبير للدولة والإنتماء لها لذلك

تجدينا نرفعه في كل محفل كتعبير عن قدسيته لنا

كمواطنين ولكن أن تأتي فئة ما ممثلة في نقابة

المحامين لتهدد بتنكيسه بهذه الطريقة كتعبير

عن غضبها فهو شيء مؤسف بكل أمانة لأنهم هم صفوة

البلد والممثلين للمواطنين البسطاء ولكن هذا هو

ما كنت أخشاه أن يستغل البعض الديموقراطية فيما

يسء للبلد ...

أتمنى أنلا يقدموا على هذه الخطوة فماذا بقي للعدو

إذا هم إمتهنوا رمز كبير للوطن ممثل في علمه .

تمنياتي لك بالتوفيق في الإمتحانات

تحياتي وإحترامي

علاء ترك يقول...

د دعاء
ازيك اسمحيلى اختلف شوية مع معاكى العلم ينكس عند المصائب الوطنية كهزيمة عسكرية مثلا ولكن اى مؤسسة افرزت فى عهد مبارك تستحق ان تلبس مصر السوتد حزنا وكمدا حتى بتم تعديل الوضع ولكن الامر الملفت ان السيد ابوكريشة وليس ابوتريكة (انتى اهلاوية ولا ايه) كان بيتكلم لغة عربية هباب وعمال يقول نقابة المحامون ويمصب الفاعل ويرفع المضتف اليه كامه معداش على اولى اعدادى
طبعا انا لو قاضى كش هكسبه اى قضية
صباح الفل

إرسال تعليق

حلو؟؟ وحش؟؟ طب ساكت ليه ما تقول....