الثلاثاء، 17 مايو 2011

الضبعه ..فاكرينها ؟؟




 
كان في  مشروع اسمه الضبعه 
و كمان كان فى رجل اعمال بشنبات
في معاد الشغل بامر سى اعمال
 الضبعه دخلت فى  متاهات ...هات 







كان يا مكان فى سالف العصر و الاوان كان من يجى عشرين سنه كده مشروع مصرى نووى اسمه الضبعه ..فضل يتأجل يتأجل و يتبى جزء و يرجعوا يشلوا و اللجنه س تروح و اللجنه ص تجى و نجيب اللجنه ع تفصل بين اللجنتين ...لغاااايه ما بقى فى الساحل الشمالى و احلوت الارض و متر الارض ابو شلن بقى بالالالف و احلوت الضبعه فى عين رجال الاعمال و كانوا عاوزين يشفوطها زى ما شفطوا كل حاجه فى البلد , و طبعا وقتها قامت جرائد الحكومه تصقف و ممتاز القط يمدح و اسامه سرايا يتكلم عن اهميه الاستثمار و ان خلاص الضبعه دى المفروض نرميها فى البحر ,, لغايه ما حسنى -الله يرحمه بقى- قال بلاش تبعوها و ابعتوا لجنه للمره الالف اظن ...و بعد ده كله قامت الثوره مشى حسنى و عياله و رجال الاعمال نفسهم اللى فى السجن و اللى  راح راح و فضلت الضبعه صحراء جرداء تنعى حظها التعس اللى وقعها فى بلد مش بتعمل حاجه غير الكلام و هدم  ما فعلته منذ يومين .....

ايه اللى فاكرنى بالموضوع ده  ؟؟...ببساطه الضبعه ما غبتش عن عينيا تقريبا خالص لانها حلم قديم كم تمنيت تحقيقه و بما انه ما اتحققش فى النظام القديم فحسبت امل فى ان الثوره تحلها و لكن هيهات !!! لازم كل امل عندى يضرب بالنووى و يتسوى بالارض زى هيروشيما اقولك اقرا الخبر ده و نرجع نتحدث فى الامر:

نظم المئات من أهالى الضبعة بمحافظة مرسى مطروح، وقفة احتجاجية بمقر مركز شباب مدينة الضبعة، لمطالبة الدكتور عصام شرف رئيس الوزراء، بعدم إقامة المشروع النووى ومشروع مطار العالمين على أراضيهم.

قال المحامى حسن عبد الله اللحامى، أحد المشاركين فى الوقفة، إنه ما يقرب من 4 آلاف من أهالى الضبعة محتشدون سلميا بمقر مركز الشباب، لرفض إقامة المشروع النووى ومطار العالمين.

وأضاف حسن أنه سيتم خلال الساعات القليلة القادمة عقد ندوة، يحضرها نقيب المحامين بمرسى مطروح ممدوح الدربلى، بالإضافة إلى عدد من قيادات المحافظة لبحث مطالب الأهالى. ورفع المتظاهرون اللافتات المنددة بالمشروع تحمل اسم "لا للطاقة النووية.. نعم للطاقة الشمسية".


بقى  بعد ما كنا بنقف ضد الظلم و رجال الاعمال اللى كانوا عايزين ينهبوها ,, نقف احنا نعطلها بايدنا ؟؟؟؟؟؟؟طب المحطه النووريه و ممكن الناس تكون خايفه منها اما يقفوا ضد قرار بناء مطار ليه؟......طب اقولك اقرا الخبر ده بقى و نرجع نحكى :

نقيب محامى مطروح: لجان شعبية لتحديد إقامة مفاعل الضبعة أو لا

السبت, 14 مايو 2011 18:57 كتب- أحمد أبواليزيد

قال ممدوح الدربالي نقيب المحامين بمطروح: إنه تم تشكيل لجان شعبية بشأن قيام مفاعل الضبعة من عدمه، والتحدث مع محافظ مطروح بهذا الشأن
وكانت مظاهرات احتجاجية قام بها أهالي الضبعة بالأمس بعد صلاة الجمعة،

تعارض قيام المشروع علي أرض الموقع المحدد بخليج الضبعة بينما قامت مظاهرات مؤيدة لقيامه من أهالي سيدي عبد الرحمن باعتباره مشروعا قوميا يهدف إلى مصلحة مصر كلها وبين الوقفتين تقرر تشكيل لجان استطلاع للرأي وعرض أهم ما يتوصلون إليه مع القيادة السياسية لمطروح وهو ماتم صباح اليوم كان أهالي الضبعة يحاولون الاستفادة من الأرض التي يقومون بزراعتها وخاصة في مواقعها المتميزة جدير بالذكر أن بعض فلول النظام السابق حاولوا استثمار الأرض، وتحويلها لمنتجعات سياحية وهذا ما رفضه الأهالي وثاروا ضده.


نعم؟؟؟؟؟؟؟؟؟؟؟؟ سلامات يا لجان !! ...بقى اهل مطروح هما اللى يحدووا الضبعه تتعمل او لا ؟؟ ليه ان شاء الله هو ده مش قرار سيادى برضه ولا مطروح انفصلت عن الجمهوريه و بقت جموريه مطروح البحريه المستقله .....يعنى اهل مطروح ثاروا زمان لاحسن تتباع و قرروا دلوقتى يزرعوها ؟؟ حتى حبكت ما الزراعه فى كل حته ..بقى المكان الوحيد المناسب لخلق مشروع اتمناه كل واحد فينا يتسرق زمان و يتسرق دلوقتى ...

طبعا مش هتكلم هنبينها مين فلوس ؟؟...كان عندنا 36 مليار احتياطى و حكومه شرف سحبت 8 فاضل 28 مليار و اخدوا قروض فوق ال 8 مليار استلفوا من البنك الدولى 12 مليار بفوائد ...طب نحافظ عليها لحد ما ربنا يكرمنا و نلاقى ليها فلوس ولا الضبعه كمان بقت تابعه للنظام القديم و بقت فلول يجب القضاء عليها ....

 
 


 


18 التعليقات:

سواح في ملك اللــــــــــــــــــه- يقول...

الضبعة
كانت مدينة ابراهيم كامل
فقد تم ايقاف المشروع عشان تتحول لقري سياحية
وطبعا اهالي المنطقة بيستفيدوا من القري السياحية

Dr Ibrahim يقول...

شاهدى ردى على المقال السابق

د/دودى يقول...

سواح فى ملك الله : بقى احنا زعلانين لاننا بنحول مشروع سياحى لمحطه نوويه بعد عشرين سنه من الجهاد و صرف الفلوس عليها..

د/دودى يقول...

Dr Ibrahim : شكرا للتذكير و اعلم مدى حبك للمناقشه و تبادل الاراء وان كنت ساسعد اكثر بسماع رأيك فى فقدان مصر لحلمها النووى و الذى اراه اكثر اهميه بمراااحل من الموضوع اللى قبليه...

سواح في ملك اللــــــــــــــــــه- يقول...

انا كمواطن
اتمني ان مصر يكون ليها مشروع
نووي يخدم كل المجالات السلمية
لكن تقولي ايه بقي للناس اللي مش فاهمة

د/دودى يقول...

سواح فى ملك الله : طبعا ده حلم و لن نقبل بانه يضيع فى الزحمه ..

ENG./ELSAYED,PMP يقول...

البلد دى ماشية شنكوتى

غير معرف يقول...

معنديش معلومات كفاية في موضوع الضبعة

بس قرأت جزء من مجموعة مقالات لـ د/ محمد المخزنجي وما استريحتش للموضوع بصراحة

غير معرف يقول...

مساء الورد د/دودي

بصراحة غريب أعتراض أهالي الضبعة على المشروع وإذا لم يثبت تضررهم فليس من حقهم المطالبة بإيقاف مثل هذا المشروع الضخم ...
للأسف تأخرت مصر في تنفيذه فمن يملك نخبة العلماء ماكان يجب عليه إيقاف المشروعات النووية تحت أي ظرف ...
أشد ما أخاف أن يستمر تجميد هذا المشروع طويلاً ..

تحياتي

Tears يقول...

نوووى ايه...هو احنا عارفين نمسك البلطجية و لا نشيل الزبالة و نخلى بالنا من القطارات

بعد ما شفت اليابان لو علموا نووى لازم اهاجر لانه كده كده ح يولع فينا...افردى طلعت اشاعه و لقيتى افواج و معاهم بلطجية جايين يقولوا اختى منال و لا حاجة و على ما يفهموا يكون تمت اباده الشرق الاوسط

IMSA يقول...

د/ دودي :
المشروع قوي ولكن دعيني اقول لكِ شيئا هل نملك الطريقة والمثل لكي نتعامل مع مصدر من مصادر الطاقة النووية ؟
هذا يقودنا إلى التفكير في مصير مصر في المستقبل انا مع اقامة مشروع نووي ولكن اخشى من هؤلاء المتخلفين الذي يقودون الدولة الى الضياع ، كيفية التعامل مع الطاقة النووية رائعة ولكن المشكلة في ان يخرج لنا امرا عن كيفية استعمال الطاقة النووية في امور اخرى غير حماية وبناء الدولة ..
//
بخصوص مرسى مطروح واقرار المواطنين في مشروع دولة وليس مشروع اهالي محافظة يقودنا الى حكومة شرف انا متأكد انها حكومة هدهدني او هشتكنا وبشتكنا ..
بمعنى انتم عايزين نخلة نبني نخلة عايزين فتنة نعمل فتنة عايزين مسجد نبني مسجد ، عايزين زراعة يبقى نديها زراعة ..
المفروض يكون فيه حزم وقوة اكبر من ذلك ولكن كالعادة للأسف الفهم الخاطئ لحرية الفرد ، والفهم الخاطئ في ترضية شعب ظل 30 عاما تحت نير الضياع الثقافي والمسح العقلي والفكري والطمس والارادة الواحدة يقودنا في النهاية الى القول :
ثورة ، إلى الأمام ، زنجة زنجة ..
//
تحياتي لكِ واستحملي الرغي الغير مفهوم اللي قلته ..

ميرام يقول...

احنا عندنا ازمة ثقافيه مهولة اصلا للاسف
فجأه كل الشعب افتكر ان الثورة حل المشكلات
وان خلاص بقى بكرة الدنيا هتزهزه وتحلو ... والاسود يبقى بمبي (: والبمبي يدي Pink
وقعدو بقو يقولو مش هنرتشي مش هكسر اشارة مش مش ...
بس ازاي تغيري عادات وموروثات وثقافات !
ناس كتير فرحت بالثورة مش عشان بتحب مصر
عشان بتحب نفسها وفكرت ان ده هيخلي الدنيا أحسن
وناس كتير قووي كرهت الثورة ... برضو عشان نفسها
عشان لقيت الدنيا بتنزل والمرتبات بتقل والفوضى بتزيد

ولحد الللحظة دي هتلاقي نفس الفكر ..
الي يقول لا لمشروع نووي عشان خاطر سياحة !

(:
الفكر الديموقراطي والتعبير عن الحرية بجدد بجد ماتلعمناهوش ... مش بالعافيه يعني !
ماقدرش امنعك طول عمرك تاخدي قرار مقدرش اقولك ماتلبسيش ماتخرجيش ماتعمليش ماتقوليش ماتسمعيش ماتشوفيش !
واجي كده اقولك كبرتي ياجميلة يلا اختاري عريسك :D
هتختاري غلط أساسي يعني
هتفرحي قوي بالفكرة بس طبييعي ان النتيجة هتبقى غلط

بس حقيقي لو الأهالي الي هتحدد تبقى هزلت قوي !
نقضيها بقى لجان شعبيه
ربنا يستر عالي جاي بجد
تحيتي

ابراهيم رزق يقول...

الشعب يريد ان يفهم
ليه و عشان ايه و مصلحة مين و فين و منين و هنروح لفين عشان ايه نفهم

نحياتى

كريمة سندي يقول...

هي المشاريع العربية كلها كدا ربنا يفكنا منها يارب

الله يعنيكم ويعيننا

Tamer Nabil Moussa يقول...

انا من راى

ان احنا ننسى النووى دة دلوقت

ونفكر فى كيفية الاستفادة من الطاقة الشمسية

موفر للطاقة ونظيف وغير مؤزى.

وانتى شوفتى اللى حصل فى اليابان رغم التقدم والخبرة الطويلة

عند\نا ممكن تحدث كوارث

فمن راى خلينا فى الطاقة الشمسية

مع خالص تحياتى

Carmen يقول...

لسه حاجات كتير عاوزة تتصلح بدري اوي ع الكلام ده ياحبيبتي ربنا ييسرلنا الحال يارب

غير معرف يقول...

لاحظنا تميز مدونتكم و لهذا ندعوكم للإشتراك فى مجموعة تدوينى البريدية و هى مجموعة أنشأتها حديثا تهدف لتبادل الأخبار و الخبرات بين المدونين، و تعريف المدونين بالإدراجات الجديدة بهدف زيادة عدد زوار المدونات و تحسين نوعية التدوين عموما
الشرط الوحيد هو عدم إرسال أى محتوى مخل بالآداب أو يحتوى على سب و قذف أو يسئ للمقدسات و الأديان

للإشتراك إدخل على موقع المجموعة http://groups.google.com/group/myblogging

حسن على

الاحلام يقول...

بتمنى ان مشروع مثل هذا يتحقق فى المستقبل القريب ليتم مواكبه العصر ومجاراه التقدم العلمى الموجود فى هذا المجال
تحياتى وتقديرى لقلمك الرائع تقبلى تحياتى الاحــلام

إرسال تعليق

حلو؟؟ وحش؟؟ طب ساكت ليه ما تقول....