الاثنين، 23 مايو، 2011

الخناق الوطنى...سلامات يا خناق!!





سكت دهرا و نطق كفرا ,  تمخط الجبل فأخرج فأرا.......يا فرحتك يا دينا بالحمار الوطنى او كما احب ان اسميه الخناق الوطنى .....


فاكرين من حوالى شهر كده كنت بكتب عن الحوار الوطنى اللى اتقفل بلا داعى سلامات يا حوار .. و يومها قعدت اغنى وارد على نفسى ازاى الحوار الوطنى يتلغى لمجرد عدم موافقه شباب الائتلافات على مشاركه شخصيات بعينهم و بالتالى و اظنه كنوع من ترييح الدماغ تم اغلاق الحوار بالضبه و المفتاح لحين اشعار اخر ....


و ياريت هذا الاشعار الاخر ده ما جه فعلا عسى ان يكروه شيئا و هو خيرا لكم .. ايه الفضيحه اللى حصلت النهارده دى ؟؟؟ زق و شتيمه و صراخ و  قله ادب و قيمه على مرأى و مسمع من الاعلام و كبار شخصيات البلد ....و انطلق الشباب "يسقط الحزب الوطني"، " مش هنمشي.. هموا يمشوا" .






ده منظر ؟؟؟؟......ايه الطريقه التيييت اللى بنتعامل فيها مع بعض دى ؟؟ و يفرق ايه ده عن خناقات مجلس الشعب اللى فات و رفع الجزم فى وش بعض ....اذا كان رب البيت بالدف ضارب فعايز الشعب يعمل ايه , لما يبقى كريمه المجتمع و عليه القوم بيشدوا شعر بعض فى قاعه المؤاتمرات عايز سواق الميكروباص يعمل معاك ايه لما يغلى الاجره من جنيه لجنيه و نص و انت مصر على ان جنيه و ربع كويس قوى ...


سبب ده كله ايه ؟؟...خناق كالعاده بين شباب الائتلافات -و انا مصره على التسميه دى- و بين اعضاء الحزب الوطنى المنحل ....فى الامر وجهتين نظر :
1/ مش من حق حد يقصى حد ...او على طريقه لو فلان من هنا مش هالعب ..الكل يبقى موجود و الديموقراطيه هتنضف نفسها بنفسها و العمله الجيده تقصى العمله الرديئه ....و انه مش هيبقى حوار لو كان من طرف واحد


2/ لا بقى ..احنا مش عاملين ثوره عشان نلاقى الناس دى فى وشنا تانى ...


اعترف انى اميل للرأى الاول و لكن سواء وافقت او لا الاكيد ان مش هى دى الطريقه اللى نتصرف بيها ....الاهم ان الحوار ده اتأجل لمده شهر و 3 ايام من اجل اختيار من يحضر و مين لا عشان نقلل الخلاف ثم افاجئ بالمنظر المرعب ده ...


النتيجه :
1/ انسحاب حركه 6 ابريل "يا فرحتى"
2/ أعلن الحزب القومي المصري انسحابه  بقياده  حسين شمردل " حزب ايه ده ؟؟؟اول مره اسمع عنه "
3/ فشل زريع للحوار الوطنى "و زغرتى يا ما انتش غرمانه" 
4/ ائتلاف شباب الثورة يعلق مشاركته في الحوار الوطني " يلا سينا زى سونيا" 

سؤال من سيربح المليون :
ما هو الاسم الجديد لجلسات الحوار الوطنى ؟؟
أ/ الحمار الوطنى
ب/ الخناق الوطنى 
ج/ الحزن الوطنى  





القائمة التي كان مطلوب انسحابهم من هذا المؤتمر  وتم وضع هؤلاء في قائمة لرفعها إلي اللجنة الاستشارية للمؤتمر لإبلاغهم بعدم حضور أي جلسة من الجلسات القادمة،  ضمت كلا من:


محسن النعماني وزير التنمية المحلية الحالي، 
" مش دى حكومه شرف اللى مفيش عالحجر غيرها ...ولا عشان شرف مش بيعمل اللى شباب الائتلافات عاوزاه اعلنوا عليه الحرب ؟؟؟؟" 



 مرتضي منصور : معاهم حق الى حدا ما من انهم متغاظين منه هو لسانه طويل ...بس ده مرشح نفسه فى الرئاسه "حتى لو بطريقه كارتونيه " فاظننا مجبرين على التحدث معه و بعد اذنكم فهو مصرى برضه للاسف..




 الدكتور أحمد درويش وزير التنمية الإدارية السابق : هو مشترك برضه؟؟ امممممم انا بكره الراجل ده عموما ...






 الدكتور أحمد كمال أبو المجد الأمين العام السابق للمجلس القومي
الحقوق الإنسان : علامه استفهام كبيره ؟؟؟......اظنه كان دائما راجل محترم ...




 الدكتور علي لطفي رئيس مجلس الوزراء الأسبق : مكنش على ايامى للاسف ....ممعرفش هو حلو ولا لا ...







حمدي خليفة نقيب المحامين الحالي : مدام حمدى خليفه لسه فى مركزه فاقصائه يعنى اقصاء صوت المحاميين نفسهم على الاقل على المعنى الرسمى



 الدكتور حمدي السيد نقيب الأطباء الحالي : طبعا نفس تعليق نقيب الاطباء باضافه شخصيه بحب شخصى انا ك دينا لحمدى السيد الرجل اللى استقبلنى فى اول يوم ليا فى الكليه ...و اللى دخلت كليه الطب من اعجابى بقوه شخصيته ...




الدكتورة ليلي عبد المجيد : معرفش عنها كتير غير انها من كليه الاعلام ...






مفيد فوزي : نعم ؟؟؟؟؟؟....بقى مفيد فوزى اللى اتربينا على شجاعته و جرأته بقى وحش دلوقتى ...ليه و لمصلحه مين؟؟






و سهير الأتربي : مكنتش بحب الست دى ..كانت غلسه 









احب انوه انى بطبعى ضد فكره القوائم السودا او الاقصاء ...او فكره مدام الراجل ده هنا يبقى انا مش هالعب ...و شكله كده سلامات يا حوار كلاكيت تانى مره 





16 التعليقات:

ENG./ELSAYED,PMP يقول...

ماهو المشكلة يا دكتورة ... ان سيكوانس الاحداث من الاول مش صح ... المفروض كان كل اللى ارتبط اسمه بالحزب الوطنى بشكل او بأخر يتم حرمانه من العمل السياسى لمدة لا تقل عن فترة برلمانية كاملة ... آمال ايه معنى ... الشعب يريد اسقاط النظام ؟

سواح في ملك الله- يقول...

لازلت عند رايي
الثائرون يثورون فقط
والسياسيون يعملون بالسياسة
انا بصراحةكده مش مستريح لفكرة ائتلاف شباب الثورة ده
مش عشان هما وحشن لا طبعا هما عظماء ومحترمين وثائرين
ولايصلحون للسياسة
فالسياسة لها ناسها
يعني مرتضي مهزوم ده ميصلحش سياسي ابدا

حمدى جعوان يقول...

حالة من القرف بقيت احس بيها كل ما اعرف او اشوف اخبار عن البلد

ابراهيم رزق يقول...

بسم الله الرحمن الرحيم
الاجابة العقيد متقاعد معمر القذافى
خدى اجابة ثانية الانحدار الوطنى
بصى كل الوجوه اللى موجودة دى وجوه بتعبير مؤدب وجوه غير مريحة باستثناء الدكتور احمد كمال ابو المجد بحكم انه شخصية محترمة و تعاطفا مع على لطفى بحكم انه كان استاذى فى الجامعة لكن بقية الشخصيات لا تخلعيها من .....؟؟؟
لكن بحكم انى ليبرالى او ادعى اليبرالية و بحكم انى ديمقراطى او ادعى الديمقراطية من حق الجميع التحدث و نسمع من هنا و نفوت من هنا هههههههههه
لكن لو مرتضى منصور هيقعد يتكلم و يجيب سيرة احمد و امير و اميرة و جوزها المستشار يمشى احسن
اه يا دماغى
تجياتى

شهرزاد المصرية يقول...

المشكلة إن إحنا مش متعودين على الديمقراطية
و لسة معظمنا بيفكر بطريقة من ليس معى فهو ضدى
و طبعا نظام الإنسحاب زى شوية عيال بيلعبوا و إتخانقوا راحوا مقموصين من بعض
حاجة تحزن
ساعات بأحس إن ما فيش فايدة

Tears يقول...

اساسا كل الحوارات مالهاش لازمه لان فى النهاية المجلس بيعمل زى مبارك...بيعمل اللى فى دماغه و كل الحوارات استشارية

كريمة سندي يقول...

والله كلهم غلسين بس المسابقة كبيرة دي مليون مش لعب خناق وطني صح أنا مش عارفة ليه يحبوا يوجعوا دماغهم

أم يقول...

لا إلا إلا الله محمد رسول الله نحن ما صدقنا نخلص منهم رجعوا تاني بمصطلحات ومجالس وخنقات الله المستعان

ذو النون المصري يقول...

المفروض ان لا يكون هناك فئة صاحبة بيت و فئة ضيوف حتي لا يعترض احد علي احد
الكل ضيوف في ضيافة مؤ سسة كالاهرام مثلا و من لا يعجبه الامر فليذهب وحده

محمد الجرايحى يقول...

رغم قسوة الحدث
إلا أن أسلوب تناولك المتميز خفف من حدة الألم
واضح إننا لم نعى معنى كلمة( ديمقراطية) أو نتعلم معنى ( الحوار) ....
تقبلى تقديرى واحترامى

Carmen يقول...

فيه حاجة غلط كل حاجة ماشية بالمقلوب مش عارفة مستنين ايه تاني عشان نبدأ الاصلاح

عماد هلال يقول...

يادكتورة هو فيه حوار من غير خناق
أنا كنت بقول يوم 25 يناير للواء اللى كان ماشى ورانا فى المظاهرة.. هو فيه مظاهرات من غير ضرب..هههه
يعنى حبة خنقات
حبة مضيقات مع شوية اقصاءات .. نا عارف انك بتجبى الافلام الأكشن
المهم فيه ثوره فى ليبيا.. اسف فى مصر ؟
ايوه فيه ثورة

الاحلام يقول...

والله دينا الوضع غير مستقر ولولا التفاؤل الذى نتحلى به كانت الطرق اصبحت مسدوده امامنا لوجود غموض غير مفهوم يحيط بنا كل شىء اختى اصبح صعب المعيشه اصبحت غايه فى الصعوبه لا يوجد الاستهلاك اليومى ولو وجد يكن قد ارتفع سعره للضعف نناشد كل من هو مسؤال ان ينظر الينا بنظره بعيده لاننا ندخل فى نفق مظلم وخطير
تقبلى تحياتى الاحــــــــــــــلام

ريبال بيهس يقول...

مساء الورد د/دودي

بصراحة بدأت أخاف على مصر من كل هذي الأحداث

المتوالية عليها ولا أعرف متى تنعدل وهل سيكون

إنتخاب رئيس جديد هو الحل الأسطوري لكل المشكلات

الباقية ؟

أتمنى ذلك كما أتمنى أن تعود المياه لمجاريها

تحياتي وإحترامي

الجوكر يقول...

اهلا د / دودى


انا ارى .. بدلا من الاهتمام بالانتخابات

نهتم بأمن الوطن أولاً

فنسبة السرقة اصبحت مرعبة

وتفشى الغلاء

تضاعفت الزيادة فى كل شىء ووصلت الضعف

فمتى تنتهى مظاهرات التحرير

متى نتفرغ للإنتاج

انا شايف ان الثورة أزاحت طاغية

وأتت بألف طاغية

اولهم التسيب والبلطجة

فما أكثر الطامعون


اللهم نسألك الامن والامان والسلامة لمصر


مودتى

غير معرف يقول...

ألمح عُمر سليمان وهو يبتسم من بعيد ويقول: قلتُ لكم أن هذا الشعب غير مُستعد للديمقراطية

:-(

يا مراكبي
http://yamarakby.blogspot.com

إرسال تعليق

حلو؟؟ وحش؟؟ طب ساكت ليه ما تقول....