الأحد، 8 مايو، 2011

الكائنات الفضائيه



احم احم سيداتى انساتى سادتى نأسف لقطع بث فيلمكم المفضل (رقصنى يا اللى مانتش غرمان) لفنانكم المحبوبه فيفى عبده و نذيع لكم نشره اهم الانباء من التليفزيون المصرى العصرى  ابو من غير وزاره الاعلام يقدمه لكم فلان الفلولى مذيع التليفزيون بقالى 40 سنه و اللى يقدر يشيلنى يورينى نفسه...


اعلنت جماعه ارهابيه من الكائنات الفضائيه مقرها الاساسى المريخ بمسئوليتها الكامله عن احداث امبابه اللى مرت بمصر ليله امس التى انتج عنها   مقتل 14 مصرى بين مسلم و مسيحى و اصابه اكتر من 300 منهم طفل فقد كلا عينيه و القبض عن 190 شخص و حرق الكنيسه و القاء زجاجات الملوتوف على رأس البشر و اطلاق الاعيره الناريه من سلاح ميرى اتضح انه اتسرق فى هيصه الاحداث ....

و قد اعلنت الكائنات الفضائيه ان استقلت مركبتها الفضائيه من المريخ الى الارض مع وجود ترانزيت على القمر من اجل التزويد بالوقود و العشاء و البسكويت  و المياه الغازيه و خلافه....
 و بررت الجماعه الفضائيه التى اطلقت على اسمها جماعه ( الجماعه المريخيه الماسونيه اليهوديه الفلوليه الحزب و طنيه القطريه الاشتراكيه العظمى ) اعمالها بانها ارادت النيل من استقرار و الامن الداخلى لمصر نظرا لخوفها من المشروع المصرى الفضائى الذى كان يهدف لاحتلال المريخ و جعله كمحافظه لمصر كحزء من خطه مصر المستقبليه فى التخليص على الارض ثم الاتجاه الى الفضاء لاقامه مشاريع اقتصاديه ضخمه ...

و تهيب السلطات المصريه باى شخص يتشكك فى وجود اى كائن خارج الكره الارضيه بابلاغ النجده اللى عاده مش هترد عليك ...انتهى البيان


و نعيد تشغيل الفيلم بعد سماع اغنيه  سلملي عليه لفيروز : 
أنا عم غني المذهب, لما بغني ردوا عليه,وبعده نفسه المذهب, ولولا قدرتوا زيدوا عليه, وعودوا تبقوا عيدوا الكوبليه


حلوه كده؟؟ انا قررت انى ما ازعلش حد تانى فى اى حاجه ....فلول , كائنات فضائيه , يهود , حزب وطنى , ماسونيه , امريكا لو عايز المهم ان مايكونش احنا و خلاص ...

لما حذرت من السلفيين و اللى  بيعملوه فدام الكنائس لاقين نفسى دخلت فى مناقشات و مداولات عن الايدلوجيات , حذرت من وقوفهم الغريب و صرخت خوفا من الكارثه لاقيت نفسى عديمه الدين و ليبراليه كمان شويه شويه كانوا هيقولوا عليا ديمقوقراطيه!. قلت فى تقصير امنى و حكومه شرف مش ناشفه كفايه قالولى خلى عندك امل و ربنا يكون فى عونه ....خلاص  انا قررت انى ما ازعلش حد تانى فى اى حاجه: 

* مش المسيحين اللى كانوا معاهم السلاح, ولا المسلمين اللى كان معاهم السلاح : دول الفضائيين
* مش المسيحين اللى كانوا بيرموا مولوتوف , ولا المسلمين اللى لى كانوا بيرموا مولوتوف : الفضائيين
* مش المسلمين اللى خلعوا عين الطفل , ولا المسحيين اللى خلعوها : دول الفضائيين
* مش مسئوليه شرف ولا وزير الداخليه اللى سايب السلاح فى السوق زى البونبونى : دول الفضائيين 
* الفضائين اللى ذنب اللى اقتلوا دول فى رقبتهم و ربنا هيحاسبهم ....المهم ان محدش يكون غلطان


أنا عم غني المذهب, لما بغني ردوا عليه,وبعده نفسه المذهب, ولولا قدرتوا زيدوا عليه, وعودوا تبقوا عيدوا الكوبليه... سلملي عليه سلم

30 التعليقات:

MTMA89 يقول...

أول كومنت
:)

سواح في ملك الله- يقول...

برضه هتطلعي متحيزة عنصرية ضد المريخ
لابقي مش من المريخ من عطارد
شر البلية مايضحك

MTMA89 يقول...

د/دودي..

الواحد مبقاش عارف يقول ايه..
دي أخطر نقطة.. مادام الطرفين حملوا سلاح.. يبقى ربنا يستر على البلد..
و كله غلطان.. السلفيين و المسيحيين و الشرطة.. و مش هتفرق مين عمل ايه.. و زودوا عليهم الاشباكات اللي حصلت النهارده في التحرير..
و في الآخر الكنيسة تستنكر و السلف بيستكنر هو الاخر..
أنا رأيي أنه كفاية تهاون.. لازم يكون في أحكام بالاعدام المرة دي و تتنفذ فورا.. و مش نقضيها بيانات عالفيس بوك..

مدد مد مدد مدد شدى حيلك يابلد مد مد

ان كان فى ارضك مات شهيد فى الف غيرة بيتولد

:(


محمد

د/دودى يقول...

MTMA89 : ههههههههه و انا برضه اول واحده ترد على ردك....

مدام الاتنين شالوا السلاح يبقوا يتحرقوا و يتقبض اللى ماسك سلاح عادى جدا..المشكله ان الايد بتترعش و خايفين بدليل ان مفيش حد عمل حاجه لما وقفوا قدام الكاتدرائيه و ساعتها صوتت ان حد يعبرنى...

مصر تحكم عبر الفيس . طب و اتباع تويتر يعملوا ايه ؟؟..بكره تلاقى بتوع تويتر عاملين مظاهرات يقولوا اشمعنى ...

شيدى حيلك يا بلد قبل ضهرك ما يتقطم..

د/دودى يقول...

سواح في ملك الله: انا عندى مصادر مطلعه تؤكد انهم من المريخ لان بتوع عطارد بيلبسوا ازرق ...

بجد انا قررت ان كل حاجه اوكى و مش هنزعل حد

حمدى جعوان يقول...

انا متفق معاكى مليون فى المية .. بلاش نزعل اى حد بعد كده

لما الحكومة قالت نجرم الوقفات ولاضرابات اللى بتعطل العمل وتعمل بلبله الدنيا قامت ومقعدتش .. وازاى ؟ احنا كدا هنرجع لورا دى حق اصيل من حقوق الانسان
ولما الحكومة سمحت بالمظاهرات والاحتجاجات ... قالوا حكومة رخوة ومش هتقدر تعمل حاجه ولازم نطبق القانون


انهارده وللاسف وبعد مقاومة فظييييعه لرغبتى فى انى اتابع الاخبار (ولانى خارج مصر ) فتحت التليفزيون لقيت شيوخ الازهر هما كمان عاملين مظاهره والاقباط عاملين مظاهره وفى مظاهره تانيه للوحده الوطنيه وفى مظاهره فى جنوب سينا وقاطعين طريق وبتوع الامن فى قناة السويس معتصمين وبتوع بور سعيد بيتذامنوا معاهم

اتوقع ان البلطجية فى الايام الجايه هيعملوا اعتصام وهيطالبوا ب ( البلطجه حق اصيييل من حقوق الانسان )
اقولك معتش متابع اخبار تانى

حمدى جعوان يقول...

ايه رايك نكون حزب ونسمية ( اللى مالهومش دعوه )

faroukfahmy58 يقول...

د- دودى
ماههذا الشئ القاتم فى نفوسنا
ما هذا الشئ الثقيل الذى يجثم فوق قلوبنا
ماهذا الشئ الذى يخنق الحلم قبل ان يتحقق
لم نهنأ بثورة الا وتقوم فى طريقها ثورةتذهب باليانع واليابس
مرة نتستر وراء اعمالنا الهادمة بان الفضاء هو الجانى ومرةمن يكرهنا فى الارض فعل وما فعل ، وما سوى غيرنا الا الذى فعل

ريبال بيهس يقول...

مساء الورد د/ دودي

مش حناقشك يا دودي بخاف أكون من أياهم اللي بيناقشوا عمال على بطال بس بجد أنا ما بدافعش عن حد لا سلفيين ولا ليبراليين ولا علمانيين وهقول حاجة واحدة بس كنت برددها في كل مدونة مصرية بتتكلم عن أوضاع مصر بس في البداية بقدم التعازي لكل مصري شريف في الأحداث الأخيرة واللي للاسف مش هتعرفي مين المتسبب فيها ...
مصر بتمر بفترة حرجة جداً ولو قلتي وشمعنى مصر هحقول دا مش سؤال لأن مصر دولة ليها ثقلها السياسي والعسكري والإقتصادي ووووو طيب أزاي نخلي الدولة دي ضعيفة ؟؟
هجاوبك بأقدم طريقة معروفة عند البشر أضرب الناس ببعضيها طي أيه أجمل من أنا نظرب مسيحي بمسلم ؟؟
دلوقتي هتكلم فصحى إذا سمحتي ......
ياسيدتي هذه طريقة من اقذر واقدم الطرق في التاريخ ولكنها ناجحة في كل عصر ومع كل دولة لا تقولي سلفي ولا تقولي مسلم ولا مسيحي ولا حتى يهودي أو علماني هناك أفراد مدسوسين بينكم من هم وماهو إنتمائهم لن نعرف أبداً ولكنهم مدسوسون لتدمير مصر بنشر الطائفية الكريهه بين المسلمين والمسيحيين وسأسألك سؤال محدد لماذا لم نرى إشتباكات أحد طرفيها يهودي ؟؟
سأجاوبك لأن اليهود أقلية صغيرة في البلد وعملية أحمائهم لن تأتي بنتائج واضحة ومدمرةكطائفة المسيحيين والذين هم بالملايين في مصر فقولي لي كيف ستتمكنين من تهدأت الثائرين عندما يصاب طفل أو شخص من طائفة بسبب الطائفة الأخرى ؟؟
للأسف سيكون الضحايا بالعشرات ولن يتوقفوا إلا بالقوة وعندها سنقول نجح الفضائيون والذين ينتمون للأرض بأكثر من المريخ ولكن كيف يعقل البشر ....
سيدتي مازلت أردد مصر في مرحلة حرجة وإذا لم يتنبه المصريون لذلك فستتكرر الأحداث من جديد بسبب عدم تفطن الناس لها والسبب من ورائها ...

كلمة أخيرة سيدتي صدقيني ليس بضرورة أن يكون السلفييون من هم وراء هذه الأحداث فقط ثقي أن هناك جماعات ترسم لمخطط مخيف لمصر حتى لا تنهض من جديد .

تحياتي وعذراً على الإطالة

اغانى الشتاء يقول...

اقولك ع حاجة؟؟؟؟؟؟؟؟؟؟؟؟؟ انا مش متفائل

ENG./ELSAYED,PMP يقول...

كان فيه مشهد ظريف جداً فى فيلم الارهاب والكباب ... التدوينة دى فكرتنى بيه ... المشهد ده لو تفتكرى لما دخل وزير الداخلية - كمال الشناوى - ومساعديه ومعاونيه للصلاة فى المسجد وبعد الصلاة أخذ الأمام فى الدعاء فقال :

الأمام : اللهم لا تؤخذنا بما فعل السفهاء منا ( وهو ينظر من تحت لتحت لوزير الداخلية وكأنه هو والحكومة هم السفهاء )

وزير الداخلية لأحد مساعديه : الراجل ده يقصد مين بالسفهاء .

مساعد وزير الداخلية : الإرهابيين يا باشا .

وزير الداخلية : تمشى ... تمشى .

تحياتى لكى ولكل الفضائيين .

اللهم لا تؤخذنا بما فعل الفضائيين منا

شيرين سامي يقول...

ههههههه هم يضحك و هم يبكي يومها كنت بتخانق على النت مع واحد بينكر ان السلفيين غلطانين
بس موضوع الفضائيين ده فكره هايله و التعليق اللي قبلي على طول تُحفه ههههههه
تحياتي ليكي

حآفية القدمين يقول...

كنت هنا ...
(=

ابراهيم رزق يقول...

هاقولك حاجة بس خديها جد
السلفين فيهم عيوب كتير لكن ميعملوش كده
المسيحين اللى جوة الكنيسة اللى جوة الكنيسة بيقولوا مضربوش نار و انا مصدقهم
فاكرة يا دودى افلام زمان لما محمود المليجى او زكى رستم او توفيق الدقن يسخن مجموعة على مجموعة و لما يقابلوا بعض يقوم يقتل واحد من هنا و واحد من هنا فيتشاجروا مع بعض
هو ده اللى حصل
واحد دارس نفسية السلفين و عارف ان لهم قوة فى سرعة الحشد و الغضب عندهم فرمى لهم طعم اختنا عبير اللى متجوزا اثنين
و رمى للمسحين ان السلفين هيجموا على الكنيسة
و فى اللحظة اللى اتقابلوا مع بعض طلع محمود المليجى او ذكى رستم او توفيق الدقن فوق عمارة و ضرب نار على الطرفين فاشتبكوا مع بعض
يبقى تحليلك غلط مش كائنات فضائية
ده محمود المليجى يا ذكى رستم يا توفيق الدقن و فى ناس بتقول عادل ادهم
تحياتى

Tears يقول...

فكرة رائعه موضوع الكائنات دى ...الحقيهم بيها

ربنا يستر

د/دودى يقول...

حمدى جعوان : على طريقه قصه جحا و الحمار و ابنه , يركب حجا يقولوا حرام عليك الولد . يركب الولد يقولوا قليل الادب, يمشوا هما الاتنين يقولوا هبل , يركبوا هما الاتنين يقولوا الحمار هيفطس , فى الاخر كلنا شيلنا الحمار عشان نريح دماغنا..

د/دودى يقول...

faroukfahmy58 : البلد معمول لها عمل اكيد مش بنلحق يا عينى . او كسرنا مرايه فقدامنا 7 سنين نحس , او شعب مصر وقف طابور واحد واحد من تحت سلم...

نفسى نلحق نفرح بقى

د/دودى يقول...

ريبال بيهس : انا مش هاقول السلفيين المره دى ...انا هاقول التخاذل الحكومى و الضعف المريب اللى خلى البلد زى مصاب السرطان اى بكتريا تافهه تموته زى مريض الايدز اى عطسه تذهب بروحه ...

البلد بتمر بمرحله حساتسه طبعا اتفق معاك ..ممكن تكون مرتع لمخابرات اجنببه طبعا ممكن جدا لان البلد عامله زى اللى طالع من اوضه العمليات و مفتح من كل ناحيه ...لكن ...ماذا فعلنا لنوقف ذلك ؟؟

د/دودى يقول...

اغانى الشتاء:: اقولك على حاجه...ولا انا

د/دودى يقول...

ENG./ELSAYED,PMP : متشتمش الفضائيين لاحسن اتباعههم يظهروا بقى ..و تلاقى صفحات عالفيس احنا اسفين يا فضائيين , الشعب يريد اسقاط الفضائيين , الشعب و الفضائيين ايد واحده و كل الحاجات اللطيفه دى...

د/دودى يقول...

شيرين سامي : انا قلت الفضائين و نبطل خناق و نريح دماغنا بقى ...

ملحوظه : الفضائيين يكونون حزب سياسى جديد

د/دودى يقول...

حآفية القدمين : نورتى يا قمر

د/دودى يقول...

ابراهيم رزق : اممممممم تصدق ممكن.... انا اميل لانه يكون عادل ادهم فعلا ....و ولع لنا فى الفستان يا قطه ههههههههههه هههههههه ههههههههه"ضحكات متقطعه شريره"

د/دودى يقول...

Tears : وراهم يعنى هنروح فين ...يا انا يا الفضائيين فى البلد دى

حميد يقول...

السلام عليكم دودى
بصراحة هو انا عاوز أضحك وأعيط فى نفس الوقت أضحك على كلماتك اللطيفة وعلى الكائنات الفضائية وأعيط على اللى بيحصل فى بلدنا ده
أنا أعتقد أن هذا الأمر تتلاعب به يد يهودية صهيونية تنفذ بسواعد أناس مصريين سواء مسلمين أو مسيحين المهم ناس مش فاهمة إن ده تخطيط يهودى

شكرا جزيلا أختى
أتمنى أن تزورينا فى مدونتنا واللى إحنا اللى هنزور بس والا إيه النظام ؟؟

Tamer Nabil Moussa يقول...

مش اقول اية بس يادكتورة

ربنا يصلح الحال

والبلد تكون افضل واحسن حالا

وتنتهى حالة التوابع الساخنة دى للثورة


مع خالص تحياتى

الاحلام يقول...

طيب هنفضل فى الى احنا فيه ده لغاية امتى طيب وبعدين يعنى هنعيش مهديين طول عمرنا ممكن الانسان يموت فى اى لحظه وهو ماشى وهو راكب حتى وهو فى البيت ولامتى هنفضل نخاف على اولادنا فى الشارع وفى المدارس
ليس لدى الا الدعاء لله سبحانه وتعالى ان ربنا يسترها علينا جميعا دمتى بخير الاحـــــــــلام

Dr Ibrahim يقول...

على الرغم ان كل الجهات برأت السلفيين من أحداث إمبابة!فالفزاعة من السلفيين خاصة والاسلاميين عامة مازالت مستمرة!..

إلا أن ما يحدث من قبل الكنيسة بحجز الأشخاص ليس من سلطتها وهى بذلك تتعدى على سلطة الدولة وبتخزينها أسلحة ليس من سلطتها أيضاً وهذا تعدى على القانون..

إذا ما يطلبه السلفيون وباقى قوى المجتمع ببساطة ألا يكون هناك احد فوق القانون وأن يكون هناك مساواة أمام القانون..
وشكرا

Beautiful girl يقول...

والله الوحدة بقت عارفة

الضربة بتيجى لمين ولصالح مين

ربنا يهدى

تحياتى ليكى

أم يقول...

نرجوا المشاركة في الحملة الرمزية - حملة الجسد الواحد - ليتوحد صف أمة محمد التفاصيل في جانب المدونة وشكرا

إرسال تعليق

حلو؟؟ وحش؟؟ طب ساكت ليه ما تقول....