السبت، 14 مايو 2011

الفصل بين طلبه الجامعه ...ماذا بعد؟

أثار قرار عميد كلية الحقوق جامعة بنى سويف، حظر الاختلاط فى المدرجات، حفيظة عدد من طلبة وطالبات الكلية، واستهجن البعض من الطلاب بالكلية القرار، رافضين رضوخ المسئولين لآراء السلفيين أو تبنيها، وموضحين أن ثورة يناير ثورة أخلاقية تنويرية وليست ثورة لتبنى الجمود والآراء الفقهية المتشددة وهو ما يستغله البعض من السلفيين مما يؤدى إلى تشويه صورة ثورة الشباب.....







لا استطيع التعبير عن نفسى بوضوح فى تلك اللحظه , و لذلك ساجعل مشاعرى بالترتيب بحسب حدتها : ألم , ارتباك , خيانه , ازعاج , كدر , تعاسه , صعوبه و ثقل فى التنفس هذه الاخيره ليست حقا من المشاعر لكننى اعتقدت انه يجب ان تعلم بامرها على اى حال ....


خلونى اخرج من صدرى تلك الكلمه التى اصبحت ترافقنى تلك الايام : يا لهووووووى ........


بعد صدور قرار منع القبلات من الافلام فى التليفزيون المصرى كنت متشوقه جدااا للكتابه فى الموضوع ده بكل غضب من التخلف و العبط اللى بقينا فيه , كنت عايزه اكتب عن ازاى مسئولى التليفزيون بيستغلوا طيبه و خشى الشعب المصرى , كنت عايزه اصرخ و اقول مش من حق حد ان يربى الناس بالعافيه او يحدد لهم يشوفوا ايه , كنت عايزه اقول ان الاراده الحره و حريه الاختيار هو اللى بيحدد الانسان و شخصيته و بيحدد حنى اخرته بمعنى ان الانسان يختار ان يشوف المشاهد دى او لا هو الفضيله بينما تريح الدماغ و منعها عنه مش هو الحل خاصه ان التليفزيون فقد " ريادته" من زمان و الدش بقى فى كل حته مش من انحلال الناس لكن من سوء ادراته و استخفافه بعقل مشاهديه .......طب هتسألنى : امال ما كتبتيش ده وقتها ليه؟؟؟ اجاوبت بكل اسف انى احرجت و اتكسفت انى اكتب كده خاصه انى فى الاول و فى الاخر بنت و مش محبب انى اتكلم فى الحاجات دى , ده بالاضافه انى already  قريت مقاله مشابه جدا لما اردت ان اكتبه فى مدونه الاغلبيه الصامته فى تدوينه رائعه اسمها : حنفيه المنع 
http://theegyptiansilentmajority.blogspot.com/2011/05/blog-post.html

اهو السؤال بيطنطط فى عينيك ايه اللى جاب سيره الموضوع فى البلوه اللى احنا فيها دى ؟.. ببساطه لاننا على طريقه يا فرعون ايش فرعنك قال مقلتقش حد يلمنى ....عشان سكتنا و اتكسفنا نتكلم فى الحاله الاولى جت المصيبه  و الهم اللى احنا فيه ده , القرار ده يدل على ان مصر مبقاش فيها حاكم ولا ولى امر يعنى ايه عميد كليه يجرؤ ان ياخد قرار زى كده ؟؟... فين رئيس الجامعه ؟؟ فين وزير التعليم العالى ؟؟ فين رئيس الوزراء ؟؟ .....و خلونى ابرئ السلفيين و اعارض طريقه كتابه الخبر هما السلفيين مالهم بحاجه زى دى هما عن نفسهم طول عمرهم بيتكلموا العيب عالبيه عميد الكليه اللى عايز يعمل بطل ...

اوعى تقولى انتى متعصبه ليه ؟؟ او مكبره الموضوع قوى ...او ان الجامعه مش مكان للاختلاط و ان ده اجتناب للشبوهات ....دعنى اعلنها صريحه - و انا اسفه على عصبيتى الزياده - القرار ده فضيحه او مقدمه لشئ أسوء بمراااااااحل .....

النهارده فصل بين طالب و طالبه , بكره فرض الحجاب , بعده فرض النقاب , بعده نقعد البنات فى البيت , لكن لاااااااا قسما برب موسى و عيسى و محمد لن نسمح بان يقودنا كالغنم .... 

نداء لطلبه و طالبات حقوق جامعه بنى سويف : اوعوا تسيبوا حقكم , اوعوا تخافوا او تكسفوا ....اوعوا حد يخوفكوا .... 

س/ انا عايزه افهم بقى .....هى الثوره دى دينيه ؟؟؟؟؟  انا مش ضدها انا بس بسأل 

53 التعليقات:

صفا حرك يقول...

أولاً :
"بعد صدور قرار منع القبلات من الافلام فى التليفزيون المصرى ..."
تم نفي الخبر من مسئولي التلفزيون ، يعني كانت إشاعة

ثانياً :
هاهاهاهاهاها .... و لسه ، داحنا هنشوف أيام
=D

د/دودى يقول...

صفا : انا برضه سمعت بخبر النفى ده بس جالى احساس عميق انه كان نوع من جس النبض و بلونه الاختبار ....

ثانيا : يا خوفى من دى ايام...

Kem يقول...

يعنى يرضيكى ان البنت تقعد جنب الولد فى المدرج ؟؟؟؟؟؟
تكلمه و يكلمها و تنظر اليه و ينظر اليها ؟؟
و قد قالوا قديما نظرة فابتسامة فموعد فلقاء ؟؟؟؟؟

بكرة الاقي قرار بمنعى من التحدث مع زميلاتى فى المدرسة , و مسح ارقام الاناث من هاتفى حتى لو كانت امى , و منعى من محادثة ابنه عمى
عشان حرام ... حرام .... حراااااااااااااااااااااااااااام

د/دودى يقول...

اغانى الشتا : يعنى يرضيك ان اقعد جنب ولد ؟؟ نعمل بحث سوا ؟؟ و الناس بتقول نظره فبحث فماجستير فدكتوراه ؟؟....و لسه المدررس و الشوارع انا بقول نبنى سور عازل بين الستات و الرجاله زى بنات اسرائيل و نريح دماغنا....

Kem يقول...

طب ما نموت حد فيهم و نخلص , اللى تخلف ولد ندبحه و اللى تجيب بنت نعلقهم الجوز و نخلص !!

سواح في ملك اللــــــــــــــــــه- يقول...

دكتورة
اسمحيلي اختلف معاكي
انا شايفه قرار صائب
وهو ايه المشكلة ان ابنت تقعد مع البنت
والولد مع الولد
انا مش شايفة حاجة تستاهل النقاش
ثانيا بمناسبة القبلات
فيه حاجة في الدين
اسمها اشاعة الفاحشة
والقبلات مقدمات للفاحشة
علي فكرة اللي بيكلمك ده مش سلفي
بس لما بكون قاعد في بيتي في وسط اسرتي
لما بشوف مشهد في فيلم عربي فيه قبلة ساخنة
اة منظر مخل باضطر اغير القناة
عشان لازم اغير علي اهل بيتي
واوعي تقوي نحي الدين جانبا لان الدين
لايمكن الاستغناء عنه

د/دودى يقول...

اغانى الشتا : و الله فكره و اهو نريح دماغنا و خلاص بلا هم

د/دودى يقول...

سواح فى ملك الله : ازاى نسمح لحد ان يكون واصى علينا بالطريقه الفجه دى ؟؟....الناس حره فى اللى بتعلمه و كونى دخلت الجامعه يعنى هنزل للحياه يعنى هاشتغل , طب ده فى الجامعه و فى الشغل هنعمل ايه؟؟ طب و فى الشارع هنعمل ايه؟؟ ....الحريه هى الحل اللى عايز يختلط يتفضل و اللى مش حابب هو حر انما فرض العفه عالناس ضرب من النوع و العته ...

اما بمناسبه التليفزيون فالفكره برضه فى فرض الوصايه بل و النفاق الحكومى لاتجاه اصبح سائد فى المجتمع مش اكتر من كده...

سواح في ملك اللــــــــــــــــــه- يقول...

ده رايك وله احترامه
اما هو ليس رايي
علي فكرة يادكتورة
كوني اختلف معكي
اكيد طبعا حاجة لاتزعلك ولاتزعلني
تحيتي

كريمة سندي يقول...

أنا معاك في اللي قولتي بس التوسط في الأمور مطلب لا ضرار ولا ضرار هكذا نربي أجيالنا

حمدى جعوان يقول...

من نص ساعه تقريبا فى برنامج فى الميدان مع محمود سعد كان فى اتصال هاتفى من الدكتور حسن ربيع ونفى الواقعه كلها من الاساس

sharifaarts يقول...

بين ضد و مع واحتار الفكر وقررت الا ازعجه لاني اصلا جالسه بالبيت ;)

من متابعيك د/دودي

Unknown يقول...

بصي يا دودي
كل الأمور دي هتتحل و هتتظبط .. مفيش قانون مصدق عليه في مصر بمنع الاختلاط .. و هو مايقدرش يفرض قوانينه الخاصة .
هو القرار فعلا غريب اوي .. و بمناسبة منع القبلات ..
هو احنا اللي عندنا دي سينما اصلاً !!
يعني منعها او خلاها هو دة اللي هيخلي سينما مصر زي بوليوود مثلا !!
لازم العقول تتغير .

ابراهيم رزق يقول...

بصى يا دعاء انا عندى اكتئاب ما بعد التحرير كل ما اذهب للتحرير بيجيلى اكتئاب لكن الموضوع ده استفزنى يعنى ايه يعتى بعد شوية قيو قيود انتى عارفة التصنيف ده بيرجعنا لعصر الحرملك دى الافلام اللى فى الخمسينات و الستينات كانت بتتريق على الفكر الجامد الاستاذة فاطمة و الافكاتو مديحة نيجى احنا دلوقتى و نحط قيود مش بيعيد نوصل احزام العفة
يجب الا نكتفى بالغاء القرار لكن يجب ان يترك مكانه بقى كلية الحقوق بتلغى الحقوق اما نسيب ايه بتوع كلية الطب هههههههه
هو سؤال على جنب فى سرك ينفع اصرخ و اقول يا لهووووى
و لا حد هيقول ده حرام الراجل يصرخ و يا لهوووى دى بدعة و كل بدعة ضلالة و كل ضلالة فى النار و الاقى نفسى دخلت النار فى يا لهووى
تحياتى تحياتى

Rain يقول...

كنت عايزه اصرخ و اقول مش من حق حد ان يربى الناس بالعافيه

EXACTLY!

عماد هلال يقول...

وأنا كمان.. عايز أصرخ وأقول مش من حق حد يربى الناس بالعافيه.
خليه شعار المرحلة

د/دودى يقول...

سواح في ملك الله : لا طبعا مش زعلانه ...الاختلاف فى الراى لا يفسد للود قضيه يا صديقى...

د/دودى يقول...

كريمة سندي : انا رايى ان التربيه تبدأ من طرح الحريه و تشجيع اختيار الاخيار الصحيح و ليس حذف اجابه من الاتنين و فرض ما نراه صحيحا...

AHMED SAMIR يقول...

انا حاسس ان الثورة بتتسرق مننا لصالح اطراف عديدة اهمها طبعا التيار الديني
حقيقي انا مش عارف مصر رايحة على فين...؟

Unknown يقول...

السلام عليكم ورحمة الله وبركاته
صحيح لاأحد يربى الناس بالعافية
لكن عندى سؤال ...
إذا كنت تشاهدين فيلماً فى التليفزيون ووجدت ممثل يقبل ممثلة هل ستنظرين إليهما ؟ أم تغليقين التليفزيون ؟
فى انتظار إجابتك

Tears يقول...

المهم ان الميد فى مداخلة تليفونية نفى كل ده

الشعب مشكلته ان حظة ان حكامة خونه..مبارك ماكانش خاين لوحدة و احنا لم نتخلص من باقى فريقة و بالتالى الخيانة مستمرة و ان كان تم تحجيم الفساد نسبيا

ولان الشعب ضحية اساسا فتعليمه و الاهم وعيه بما يدور محدود فبياخد وقت طويل ومجهود جامد مننا على ما يفهم ان فيه خونه لازم نتخلص منهم

الخونة الحاليين زملاء الخاين الاول اللى كان فى الواجهه بيشيعوا الفوضى و بيمنعوا تدخل الامن بالساعات لاحداث فتنه طائفية و ربما حرب اهلية و بيتحالفوا مع قوى الظلام لتثبيت اقدامهم و امتصاص ثورة لو اتت ثمارها لشرفوا طره جنب زملائهم

لا اعتقد ان ح يكون فيه ديمقراطية و لا انتخابات نزيهه لان الاستفتاء لو فرضنا ان الفرز نزيهه فلم يكن طرحه او دعايته نزيهه

فى ظل التواطىء الحالى نحن مقبلون اما على مصير الثورة الايرانية التى بدات ليبرالية ثم انقض عليها التيار الظلامى فخربت ايران او مصير ثورة الجزائر الذى حدث لها نفس ماحدش فى ايران من انقضاض لكن قادة الجيش انقلبوا لياخدوا الحكم و عاد للديكتاتورية

Dr Ibrahim يقول...

هو ايه المانع ان نمشى على شرع ربنا؟!!!
دا يبقى تخلف وجهل؟!!
الصراحة لاتعليق
كيف اصدق ان يصدر هذا الكلام من متعلمة ويفترض انها طبيبة فى المستقبل!!

هو لما الاختلاط اخرته مصايب بنشوفها كل يوم يبقى منعه جهل.هو اه حرية..ولكن الحرية فى الدين تعنى انت حر مالم تصطدم بشرع الله.

وكثير من الناس بيشوفوا ويلات من الاختلاط
هو فيه غير عفة المرآة وحيائها..
وهو حضرتك مفكرة ان لما واحد يمشى مع واحدة او يكلمها الناس هتعبرها بعد كده..؟!!

ولا هو هيعبرها بعد كده..ونادر لما بيحصل حالات زواج وان حصلت بتفشل بعد مده..

ثانيا التربية يا سيدتى الفاضلة يشارك فيها التلفاز والميديا وانتى تذكريننى بمذيعة الاون تى فى التى طالعتنا وفاجأتنا اننا تربينا على هذه المشاهد!!

ورئيس التلفزيون المحترم طلع وكذب خبر منع القبلات وكان الخبر كان جريمة..

حضرتك لاتعلمين خطورة هذه المشاهد على الاطفال ولا على الكبار..

اعتقد انكى لم تدرسى طب شرعى بتعمق لتعرفى انواع الشذوذ الجنسى وخطورته ولاتعلمى كيف يتدرج الاطفال والكبار من مجرد لقطات على التلفاز بها قبلات الى ادمان افلام اباحية ثم تحول حياتهم وحياة من يحيطون بهم ومجتمعهم الى حجيم..

وشكرا

ابراهيم رزق يقول...

دعاء اسمحى لى لاول مرة ان ارد على تعليق د ابراهيم
ما هو الخروج عن شرع ربنا اذا تكلم فتى مع فتاة داخل اسوار الجامعة لماذا نذهب الى التفكير المريض
ما هو شرع الله الذى لم اعرفه فى تحريم ان يتكلم ذكر مع انثى داخل مدرجات الجامعة هل ستشيع الفاحشة الذى يريد ان يخطىء لن يمنعه منع الاختلاط داخل الجامعة
عجبت من التعامل مع الطلاب كانهم قطيع بلا ضمير بدلا من التحريم يجب التعليم تعليم القيم و المبادىء و اعلاء الضمير
اما الطب الشرعى و علاقة المشاهد يالشذوذ لا اجد علاقة بين هذا و هذا الشذوذ موجود من ايام قوم لوط قبل ان يوجد تلفزيون
كما ان نسبة الشذوذ عالية اعلى من مصر فى مجتمعات مغلقة طبعا لن اذكر اسم الدول و لكن يمكن لسيادتك متابعة الدراسات و ربطها
اسف على الرد و لكنى استفزيت

Carmen يقول...

شرعا طالما توفر معلمين ومعلمات يبقي نفصل بين الجنسين
واللي بيحصل في ايامنا دي يبقي يجب الفصل

د/دودى يقول...

خلونى اكمل ردودى :

حمدى جعوان : مش ملاحظ ان الاخبار الصادمه اللى بتفرقع و بعدين بعد ما تحدث ردود فعل مجتمعيه ثم تنفى ...كثرت بشكل مريب ؟؟

د/دودى يقول...

حآفية القدمين : انا بقى من المتابعين للموضوع و ساظل احمل تلك القضيه على كتفى لاننى ببساطه مش هاقعد فى البيت...

د/دودى يقول...

شيماء : طبعا مفيش قانون و مهما حصل لا يمكن نرجع ورا تانى و ان طال الامر ثوره تانيه ...و عن موضوع السينما بتوع السينما النظيفه حتى من الافكار قاموا بالواجب من زمان ...

د/دودى يقول...

ابراهيم رزق : اظن حزام العفه فى السكه قريب بدليل مشروع بنطلون الولاده و ده بقى موضوع وحده ليه حكايه منفرده ...حرملك ليه بس انا بقول اقتلوا كل الستات و ريحوا دماغكوا من الفتنه احسن بلا هم

د/دودى يقول...

Rain : ربنا يكتر من امثالك ...نفسى صوتنا فى الحق يعلى و منخافش ولا نتحرج زى ما بقيت بعمل للاسف...

د/دودى يقول...

استاذى عماد هلال : و الشعار ده يفضل شعار المرحله قد ايه ؟؟ انا خايفه يبقى على طووووول بس لا انا بقى حطيت الموضوع ده فى دماغى و قررت اجيب اخره يا يجيب اخرى..

د/دودى يقول...

AHMED SAMIR : عندى احساس اننا اتسرق خلاص و اللى كان كان و بيستغلوا فينا ادبنا ...استرها يا رب

د/دودى يقول...

محمد الجرايحى : ايوه مش هنربى الناس بالعافيه , فاما عن سؤالك فببساطه ده سؤال شخصى لكن الاكيد انى مش هقفل التليفزيون بمكن اغير القناه لو العمليه اوفر لكن الحاجات العاديه عادى يعنى و فى اختراع اسمه غض الصر لو عايز و ده ابسط ...لكن بالتاكيد كونى بعمل كده لا يعنى انى اجبر الاخريين على فعل المثل لاننا ببساطه مش هنربى الناس بالعافيه ...و العقاب و الثواب على حريتك فى اختيار قرارك و لا ثواب فى الاجبار

د/دودى يقول...

تيرز : فى ظل التواطىء الحالى نحن مقبلون اما على مصير الثورة الايرانية التى بدات ليبرالية ثم انقض عليها التيار الظلامى فخربت ايران او مصير ثورة الجزائر الذى حدث لها نفس ماحدش فى ايران من انقضاض لكن قادة الجيش انقلبوا لياخدوا الحكم و عاد للديكتاتوري

السيناريو الايرانى هو كابوسى الاكبر فى مصر بمنتهى الصراحه خاصه وان السيناريو ماشى مشهد مشهد بدون تعديل ولا تغيير جمله فى الحوار حتى ....

د/دودى يقول...

Dr Ibrahim : الاول ميرسى جدا على هجومك عليا فى مدونتى و عموما المناقشه ما تضرش حد ...

كيف اصدق ان يصدر هذا الكلام من متعلمة ويفترض انها طبيبة فى المستقبل!!

عشان انا متعلمه و المفروض انى مثقفه بدافع عن حقوق من خافوا من ان يتهموا مثلى , عشان انا متعلمه و المفروض انى مصريه بدافع عن مكتسبات حربنا عشانها كتييير و ياما شفنا بلاوى قهر و ظلم وكبت و حبس فى بيوتنا و حبس فى افكارنا , عشان انا متعلمه برد على حضرتك بالمناقشه على الرغم من هجومك غير المبرر على شخصى على الرغم من اننا بنتكلم عن قضيه عامه ..

عشان انا -ان شاء الله- هاكون دكتوره فى المستقبل مش هارضى انى اتحبس بره بيتى , انى اقبل انى اكتم او يحد من اختلاطى بالبشر زى البنى ادمين ما بيعملوا ..عشان انا هابقى دكتوره عايزه اتعلم مااخفش من الدكتور المدرس ولا من المريض الراجل ولا من زميلى الطالب اللى هو كمان هيبقى دكتور و هيجى يوم احول له مرضى او نشتغل سوا فى عمليه , عشان انا هاكون دكتوره مش هاقبل انى اتفصل عن زميلى الطالب عشان فى المستقبل لا تعلو الاصوات تقول الدكاتره الستات يعالجوا ستات بس والاقى نفسى اتحرمت من كل التخصصات او انى الاقى الدكاتره الستات اللى برضه قضوا 7 سنين هم قلب بيتحرموا من الجراحه عشان هتبقى خلوه غير شرعيه مع الجراح او دكتور التخدير ....

حضرتك انا مش بطالب بوجود مكتب محامى عشان يكتب ورق العرفى فى الجامعه انا بطالب بالمنطق الطبيعى فى بشر بيتعملوا مع بعض مش مجرد ثور و بقره شافوا بعض ...بطالب بانى امشى فى الشارع و الجامعه من غير ما اكون جوه مصباح علاء الدين و اطمن هاكون برضه محجبه عادى عشان انا عارفه المظاهر بتفرق معاكوا قوى..

ثانيا / التربيه يا دكتور بانى ادى حق الاختيار للانسان و احاسبه بعد كده و كونى احجب عنه كل الخيارات و كونه بيمشى صح فده ببساطه لا يثبت اى شئ فاين الحسنات و السيئات فى انسان يعيش بلا مؤاثرات طبيعيه , كيف تحكم على مناعه انسان و هو من يوم ما اتولد عايش فى غرفه معقمه ؟؟؟

اما بالنسبه للشرعى فعلى فكره انا درسته , و انا متاكده ان الشذوذ ده بيزيد اكتر لما الرجاله ميشفوش غير رجاله و الست متشفش غير ست بدليل انتشارها البشع فى بلاد الخليج ( اللى ابراهيم احرج انه يكتبها) و يزيد من انتشاره الكذب على الذات و العيش تحت ضغط مجتمعى للمشى عدل امام الناس مما يثبت ما نراه حين يختلوا بانفسهم فى بيوتهم او فى بلد اخرى ..

و اخيرا عموما اختلاف الرأى لا يفسد للو د قضيه

د/دودى يقول...

ابراهيم : ميرسى على مساعدتك ليا و انا بقى كتبت اسم البلاد عادى هو احنا بنفترى ...و ما اظنش ان التليفزيون المصرى بيعرض شذوذ اصلا ده بوسه رشدى اباظه لناديه لطفى عندهم مصيبه ...

د/دودى يقول...

Carmen : للاسف لا اتفق معاكى قطعيا ...فكيف يتخرج طالب من الجامعه دون ان يتعامل مع بشر!! كيف يصبح موظف فى بنك و هو مش عارف يتعامل مع العميله غير بنظرته الحيوانيه ؟؟ ازاى اخرج طالبه من حقوق و هى بتخاف من الرجاله و دى تتعامل مع القاضى و المحاممين و المتهمين ازاى؟؟ ولا ساعتها هنقول نخصصها للمرافعه عن الستات بس ؟؟...

انا بقول نبنى حائط عازل زى بتاع اسرائيل كده يفصل بين الستات و الرجاله و نريح دماغنا..

Unknown يقول...

فاما عن سؤالك فببساطه ده سؤال شخصى لكن الاكيد انى مش هقفل التليفزيون بمكن اغير القناه لو العمليه اوفر لكن الحاجات العاديه عادى يعنى و فى اختراع اسمه غض الصر لو عايز و ده ابسط ...لكن بالتاكيد كونى بعمل كده لا يعنى انى اجبر الاخريين على فعل المثل لاننا ببساطه مش هنربى الناس بالعافيه ...و العقاب و الثواب على حريتك فى اختيار قرارك و لا ثواب فى الاجبار
ـــــــــــــــــــــــــ
شكراً لك على الإجابة والتى تكفينى للتعرف على مستوى تفكيرك ومدى تواجد الوازع الدينى عندك وثقافتكالدينية....
واعلمى أن كل كلمة سطرتها أناملك هنا ستكون شاهدة عليك والله هو الحكم العدل......

رحاب صالح يقول...

صباح الثورة علي الجهل والتخلف
ازيك يا دودي ...يا بنتي انا زهقت الصراحة كل ما اعلق ف المدونات تعليقات تظهر وتعليقات لاء
المهم
انا معاك اكيد
مفيش فرض تربية او اخلاق بالعافية ..واذا مكانش الانسان رقيب علي نفسه محدش هيفرض عليه الرقابة دي
ثم ان اصلا ده هيزيد البلاوي المستخبية ....
بالعكس انا شايفة الاختلاط ده مفيد ف حاجات كتيرة
علي الاقل هيخلق بين الولد والبنت نوع من التفاهم والنظام ...
بالنسبة للقبلات ف الافلام هما منعوها بس للأسف مشاهد الجنس سابوها ....يبقوا عملو اية بقي...؟ زادوا الطين بله وغرق...والا الملابس العريانة والرقص الخليع
شوفي ده جهل وعبط والله
طب ما انا في كلية وانت ف كلية ولينا زملاء اولاد يعني بنغلط معاهم مثلا ...ما هو اختلاط بقي ....؟
تخلف يا بنتي
الاخلاق والتدين مش بالغصب ...اختي ف مرة كانت بتشتكيلي ان البنات المنتقبات اغلبهم بيلبس ملابس ضيقة جدا و ميك اب العينين يودي ف داهية يبقوا لابسين النقاب ده لية...؟ قالت لي يارب نبقي زي ايران والسعودية والدين يتفرض علينا بالعافية واللبس كمان....قلت لها كل واحد رقيب علي نفسه ومش انت اللي هتحاسبيهم ...انت انسانه ولست الها
الله هو فقط من سيحاسبنا وليس انت
ثم ما كان ف اختلاط علي ايام الرسول......
كل شخص يا ريت يكون رقيب علي نفسه وبلاش يراقب غيره
تحياتي يا دودي

د/دودى يقول...

محمد الجرايحى : انا مش فاهمه هو الموضوع تحول ليه من مناقشه فى قضيه عامه بتأثر فى ملايين المصريات اللى طلعت عينهم فى الحريه الى تقييم ليا انا شخصيا ؟؟!!! ....

د/دودى يقول...

re7ab.sale7 : كلماتك تؤكد ان مصر لسه فيها بنات عاقلات ممكن للبلد انها تسفيد منهم , مش فاهمه لمجرد اننا بنات مطلوب ممنا نستخبى فى قمقم ليه ؟؟ هو احنا يا ما نقعد فى البيت يا اما نشتغل فى كباريهات ؟؟...ما احنا فى جامعات اهو هل احنا خاظئيين ؟؟...عجبت لابى جهل حين يتحدث فى القرن ال 21 و العشرين و يتلف حوله الناس مصفقين له

Dr Ibrahim يقول...

بداية انا لم اهاجم أى شخص بل أنتقد ما رأيته وقد كتبتى فوق التعليقات "حلو؟؟ وحش؟؟ طب ساكت ليه ما تقول...."
والنقد البناء هو أن تقول للخاطىء انه أخطأ وليس لنجامل احدا...

وقد وجدت فى معظم التعليقات السابقة لى نقد لكى ولكن بصنعة لطافة حتى لا يضر ذلك الود بينك وبينهم...

وبالنسبة لكلام الاستاذ ابراهيم رزق انا لم استفز احدابل من الواضح ان ما يستفز هو المقال الذى نرد عليه وردك وسيكون جوابى متضمنا فى ردى التالى..

لقد هاجمتى رفض الاختلاط على رغم من كونك لاتعلمين حكم الاختلاط او ضوابطه..

وفى ردك ذكرتى بعض ضوابط الاختلاط..
فمن ضوابط الاختلاط:-
1ـ الالتزام بغض البصر من الفريقين.
2ـ الالتزام من جانب المرأة باللباس الشرعي المحتشم.
3ـ الالتزام بأدب المسلمة في كل شيء، وخصوصًا في التعامل مع الرجال.
في الكـلام، في المشي،في الحـركة.
4 ـ أن تتجنب كل ما شأنه أن يثير ويغري من الروائح العطرية، وألوان الزينة التي ينبغي أن تكون للبيت لا للطريق ولا للقاء مع الرجال.
5 ـ الحذر من أن يختلي الرجل بامرأة وليس معهما محرم، فقد نهت الأحاديث الصحيحة عن ذلك، وقالت :" إن ثالثهما الشيطان " إذ لا يجوز أن يُخَلَّي بين النار والحطب.
6 ـ أن يكون اللقاء في حدود ما تفرضه الحاجة، وما يوجبه العمل المشترك دون إسراف أو توسع يخرج المرأة عن فطرتها الأنثوية، أو يعرضها للقيل والقال، أو يعطلها عن واجبها المقدس في رعاية البيت وتربية الأجيال.

اذا ما الضرورة من اختلاط الشباب بالبنات فى الجامعة فى غير الضرورة؟!!
انمنع الاختلاط بحجة الحرية؟
ام نمنع انتشار الفاحشة والزنا؟

"تفرق معاكو" ؟!! من تقصدين بنحن لكى تفرق المظاهر معنا؟!!

درستى الطب الشرعى؟! ولكنك والاستاذ ابراهيم ذكرتوا نوع من الشذوذ الجنسى الاوهو اللواط

ولم تعلموا ان هناك الكثير من انواع الشذوذ والتى ذكرت النوع الذى اقصده بالنسبة لمشاهدة الاباحيات فى مقال لى من هنا
وبالنسبة للواط تتدخل فيه عوامل كثيرة ولم احدد اللواط.

والرجال لاترى الا الرجال والنساء لاترى الا النساء..اؤكد لكى ان الفاحشة او الشذوذ سيأتى لعدم تطبيقهم لشرع الله كاملا الذى ينهى عن الانواع المحرمة من العلاقات الجنسية وليس كما تعقدين لانه تم منع الاختلاط..

كيف هذا وان فى بلاد الغرب نسبة الشذوذ مرتفعة وهناك اختلاط فى كل مكان..
ليس هناك علاقة! بل ذلك يؤيد وجهة نظرى من حيث مشاهدة الاباحيات وراتفاع نسبتها وشركات صنع الافلام الاباحية فى الغرب وارتفاع نسبة الشذوذ هناك..

المسائل التى ترتبط بتعاليم الدين لا يوجد فيها رأييى ورأيك واختلاف رأى..
لان الله خلق الانسان ووضع له المنهج(او الكتالوج ولله المثل الاعلى) الذى يمشى عليه من قرآن وسنة نبوية مكملة للقرآن ان تمسكنا بهما لن نضل بعدهما أبدا وكما قال رسول الله صلى الله عليه وسلم"إني قد خلفت فيكم شيئين لن تضلوا بعدهما أبدا ما أخذتم بهما أو عملتم بهما : كتاب الله وسنتي ولم يتفرقا حتى يردا علي الحوض" رواه ابو هريره

د/دودى يقول...

دكتور ابراهيم : الانتقاد ؟؟ امممم اظن لما توجه حد خطاب بان "كيف اصدق ان يصدر هذا الكلام من متعلمة ويفترض انها طبيبة فى المستقبل!!" يبقى اسمها اهانه مش انتقاد يا دكتور يا اللى مقتلتش ابدا و انا بكلمك -و على الرغم من اختلافى معاك - ازاى يطلع الكلام ده من واحد المفروض انه متعلم و دكتور ..ليه ما اقدرش اسمح لنفسى اقول كده لانى مش معقول لمجرد اننا مختلفين اجرحك بكلامى ...word can hurt

ببساطه كل الضوابط التى تكرمت حضرتك بكتابتها لا تسترعى مناقشتنا اليوم ببساطه لانها ضوابط شرعيه لكن ما يتطلب مناقشتنا هو مدى استطاعتنا فرضها على الناس و هنا اعبر عن المسلمين و الاقباط فاما الاقباط فببساطه مش من حقك انك تجبرهم على تطبيق الشريعه الاسلاميه خاصه فى الامور الشخصيه اللى مالهاش دعوه بنظام الدوله , و اما المسلمين فحتى دول -فى رأيى- لا يمكن ان نجبرهم على الالتزام بالشريعه دى ..ايوه منقدرش نجبرهم على تطبيقها القواعد معروفه للكل و اللى عايز يطبقها و ياخد ثوابها يتفضل و اللى عايز مايطبقاش و يتركب المعاصى بدرجتها فهو حر برضه و حسابه عند ربه و منقدرش نربى الناس بالعافيه او نجعل من الشريعه فى حد ذاته قانون مجتمعى ملزم لاحظ اننا بنتكلم عن جامعه يعنى مؤسسه اجتماعيه مش دينيه ...

الشذوذ بكل انواعه موجود فى امريكا و مصر و افريقيا -اللى مفهاش اعلام خالص- و موجود من ايام لوط و بالتالى لا اظن ان المجتمع يفرق قوى ...لان ببساطه الشذوذ بكل انواعه موجود فى الحريه الاعلاميه الكامله امريكا مثلا , فى الحريه النسبيه زى مصر , فى انعدام الحريه زى الخليج , فى غياب كل المؤاثرت زى افريقيا و العصور السحيقه فالانسان هو الانسان من صنع القيود لكسرها و لا دين او تقييد قانونى استطاع تقويمه فى كل الاحوال ....

اتفق معاك ان المسائل الدينيه مفهاش اراء و انا مش بقول ده حلال او حرام -و خاصه انها منطقه جدليه - ولا اظننى لا انا و لاانت مؤهلين للتحدث فيها اصلا ...احنا بنتكلم ببساطه هل نستطيع اجبار الناس على اتباعها ام لا ؟؟ ببساطه رأيي لا...

و برضه الاختلاف فى الرأى لا يفسد للود قضيه

Unknown يقول...

اللهم إنى بلغت اللهم فاشهد

IMSA يقول...

د/ دودي :
مبدئيا كيف الحال ؟ والصحة والطب والاعتصامات ؟
ثانيا مشاركة في ذلك المقال ...
عجبني جدا ولكني استئت منكِ لسبب بسيط عبارتك التي تقولين فيها انكِ كنتِ ستتحدثين ولكن ما اوقفك إنكِ أنثى ؟!!
عايز اقولك على كلمتي الشهيرة يا راااااااااجل ، نسبة لكلمتك الشهيرة : يالهوي .
الموضوع لا يمنعك من الكلام لكونك بنت أو انثى يكون من الاولى ان تغلقي المدونة إن كان هناك مواضيع تتحدثين فيها ومواضيع لا لكونك انثى - انتِ تكتبين ما تشعرين به وليس ما يريده الاخرين - . " كان امر اريد ان انوه به فقط فتقبلي ملاحظتي ولا تتضايقي " .
//
نرجع للبوست ..
نوعية الفرض التي سنلقاها عديدة ، فمن القبل داخل التليفزيون إلى الفصل بين الطلاب والطالبات والفصل بين الطبيب والطبيبة في غرفة الجراحة - لازم محرم - هيكون المصير في المستقبل للعودة لامرين لا ثالث لهما الاول هو عصور ما قبل الجاهلية الاولى - المرأة في البيت ولو خرجت هتكون سبب دمار بني البشر - .
الثاني هو ضياع أجيال بأكملها ولسبب بسيط فأم جاهلة تعني بناء جيل كامل جاهل قد يكون متعلما ولكنه غير مثقف وغير واعٍ لأن الأم غير واعية ويبقى على الام السلااااااااام - وممكن سبيكو او الموقف الجديد - .
الحقيقة التي لا فكاك منها أن يتم الوقوف أمام أي فكر تخلفي يقضي على الوعي والإنارة التي تفتح الأفاق للتسقبل والرقي والتفوق ..
//
تحياتي لكِ واتمنى الا توقفك أي مواضيع عن الكتابة فيها لكونك انثى .

ابراهيم رزق يقول...

معلش يا دعاء اسمحى لى ارد للمرة الثانية
لم يذكر د ابراهيم حكم الاختلاط او ضوابطه فاولى ان يعلمها لا ان يمنع
اعتقد ان وقوف فتى مع فتاة فى الجامعة يوجد عشرة الاف محرم
فى عصر السموات المفتوحة و الانترنت لا يمكن المنع و لا يمكن اعلاء الضمير حتى يتحكم الفرد فى نفسه وازعه ضميره
اما موضوع الطب الشرعى فمعلوماتى المتواضعة جدا جدا جدا ان علاقة الطب الشرعى بالشذوذ هم حالاتان اللواط و السحاق
تحياتى

د/دودى يقول...

محمد الجرايحى : انا بقى مش هرد المره دى ...بس انا كمان هاقول انى عملت اللى عليا و حاولت تفتيح عيون الناس و اللهم ما بلغت اللهم فاشهد ...اتجهوا بالبلد فى الاتجاه اللى انتوا عاوزينه بقى

د/دودى يقول...

IMSA : اديك انت شايف التهزيء اللى انا فيه لمجرد انى جرأت انى افتح بقى ...بصراحه انا قربت ازهق

د/دودى يقول...

ابراهيم رزق : انا فاهمه قصده فى الشذوذ هو يقصد مثلا ممارسه الجنس فى الاطفال , الجوع و زياده الرغبه المبالغ فيها عند الكبار حاجات من النوع ده مثلا ...

حسام بدوي يقول...
أزال المؤلف هذا التعليق.
حسام بدوي يقول...

نتناقش بهدوء ؟؟؟
انا بس عاوز أسأل ايه اللي يزعل في منع الإختلاط ؟؟؟
بتقولي هو احنا هنربي الناس بالعافية ... طيب هو احنا منعنا عنهم حاجة كويسة أو مفيدة ده الإختلاط ( المحرم ) في حد ذاته مصيبة وخطر كبير جدا على المجتمع ... مثلا لما القانون والشريعة بيمنع القتل هل انا ممكن أسأل هو احنا هنربي الناس بالعافية .. طيب ما نعطي لهم حق الحرية في الاختيار وهما حريين يقتلوا او لأ . لو عندك بنت يا دكتورة دودي صغيرة ورايحة تحط اديها على النار ومنعتيها تبقي منعتي عنها حريتها ولا بتحميها ؟؟؟؟ في دراسة حديثة امكن حصرها بين الطلاب والطالبات في مختلف الجامعات المصرية، بلغت حالات الزواج العرفي نحو 130 الف حالة. واحصائية وزارة التضامن الإجتماعي 255 الف طالب وطالبة في مصر متزوجون عرفيا يعني 17% من نسبة الطلاب . المهم بقى أن النسبة دي مش موجودة إطلاقا في جامعات الأزهر . لييييه ؟ الإختلاط طبعا ده سبب مباشر . طيب ردا على ليه الجامعات مش أي مكان تاني ؟؟ أقول لأن الجامعات تعتبر أكتر مكان فيه اختلاط على الإطلاق وحضرتك طبعا فب الجامعة وشايفة الصور في الحرم الجامعي التي لا يقبلها مجتمعنا فضلا عن ديننا . سؤال تاني هل كان فيه اختلاط عام أيام النبي ؟؟؟ لأ لأن ديننا الحنيف وشريعتنا الغراء دين ينظم الكون بالبعد عن الخبائث وعيش حياة نظيفة لذلك نجح المصطفى صلى الله عليه وسلم في انشاء مجتمع فاضل يستقيم فيه الفرد والمجتمع من قلوب متحجرة وصحراء معبأة بالكفر والشرك والرذائل والخبائث . والظاهر ان إحنا مش عاجبنا حياة الإسلام وعاوزيين حياة الجاهلية . مش هطول في الناحية الشرعية لأن واضح أن الدين بالنسبة لنا شيئ مهمش والتمسك بيه جهل وظلام ورجعية وتخلف مش كده ؟؟؟؟؟؟

Sara يقول...

ههههههه
عادي بقه ما كل واحد بقه بيعمل اللي هو عايزه دلوقتي
:D :D

لكن أنا دخلت الجامعة كذا مرة عندنا في المنصورة و كان البنات بيفصلوا تلقائي عن الرجال
يعني ماجبوش حاجة من عندهم !

بصراحة

هبل XD

و الثورة كانت ثورة شعبية بس نط عليها شوية من بتوع الدينية :)

د/دودى يقول...

حسام بدوي : للاسف و بجد للاسف انى اول مره اخد بالى من التعليق ده ...كنت اود انى اعلق عليه ساعتها ....

بص انا لا هتعصب و لا هاتنرفز انا بس هاقولك انا شخصيا فى كليه الطب تقدر تقولى هاتعلم ازاى من غير دكتور يدينى من علمه و خبرته ؟...هاعالج مرضى -رجاله- ازاى و انا بستخبى منهم ؟..هاتعامل مع اهل المرضى ازاى؟...هاتعاون مع زملاتى ازاى؟...هاتعلم جراحه ازاى؟؟...و بعيد عن ده كله و بعيد عن الشغل خالص ...انا هاعمل زيك و اقتبس جزء من كلامك :

". لو عندك بنت يا دكتورة دودي صغيرة ورايحة تحط اديها على النار ومنعتيها تبقي منعتي عنها حريتها ولا بتحميها ؟؟؟؟"

الفرق يا استاذ حسام بين البنت الصغيره و الشعب المصرى كتير و كتير قوى ...الشعب المصرى عنده عقل يحكم بيه و اراده يفعلها و مش هيسمح لحد يضربنا على ايدينا...

و لو سمحت بلاش اتهام اهمال الدين و اللعب على العنصر العاطفى ...بدليل ان الخليج اللى مانع كل حاجه عندهم بلاويهم برضه....

و برضه الخلاف فى الرأى لا يفسد للود قضيه

د/دودى يقول...

Sara : بصى الفصل التلقائى بفعل الصحوبيه و الشلل موجوده عندنا احنا كمان و بذات عشان كده انا برفض فرد العضلات و كتم الانفاس بالغافيه باسم الدين...

إرسال تعليق

حلو؟؟ وحش؟؟ طب ساكت ليه ما تقول....