الخميس، 5 مايو 2011

اه يا ليبرالى يا ابن ال....

الاول خلونى اعبر عن سعادتى بتواصلكم من التدوينه الاخيره "ماذا لو لو خربوها؟" ده ادنى احساس اننا اكثر ذكاءاا بكثير عما ينظنونا و  بالتالى ده شجعنى على كتابه تدوينه النهارده...

الملحوظه التانيه: احب اقولكم انى حاولت اتجنب الكلام عن السلفيين خالص لكن مش بقدر , كل ما اقول هاتجاهل افعالهم و ارائهم الغريبه يطلعوا لى بحاجه تتستفزنى اكتر لانى افتح الاب توب و اكتب كالعاده....


و انا خارجه من محطه مترو كليه الزراعه فى طريقى من الكليه الى منزلنا الحبيب اللى بعرف قيمته اكتر فى الحر بتاع اليومين دول ...و ها هو المشهد كتالى : ها انا اتهادى ببلوزتى الورديه و شنطه اشبه بمخله الجيش حامله فيها الفيل ان احببت فلاقيت واحد بذقن طويله "الحته دى بتفكرنى بفيلم الارهاب و الكباب لما قال للعيل ثكلتك امك" المهم الراجل ده لاقيته بيوزع ورق و كنوع من الغتاته كعادتى اخدت منه الورقه عشان اشوف اخر ابداعات حبيابنا الحلوين و نالتنى نظره من النوع الذى اكره من الراجل ده و كالعاده بلعتها و كانت تلك الورقه  :


طبعا بعتذر عن الجوده المترديه اصلى معنديش سكانر فالتصوير موبيلات بقى ...عموما انا هافصصه و اجيب جزء جزء و نتاقش فيه سوى و انا هحاول امسك اعصابى على قد ما اقدر ....و بجد انا عمرى ما شفت هذا الكم من الاغلاط و الترهات فى ورقه واحده كما رايت فى تلك الورقه...


الجزء الاول :


لغايه كده هاقول اوكى و انا مالى ...كل واحد حر فى تعريف نفسه و المبدأ اللى بيفضله فى حياته و ما اظنش ان عندى اعتراض على الجزء ده و لو انى ليا اعتراضات على فكره انهم بتبعوا السلف الصالح و احنا اللى ماشيين على خطا الشيطان لكن خلى حسن النوايا متوافر ....


الجزء التانى :


يعنى كل وسائل الاعلام دى كدابه؟؟ امال مين اللى حرق و هدم الاضرحه و هدد الصوفيين بالقتل؟؟ برضه رجعنا تانى لنظريه المؤامره و الفلول و الكائنات الفضائيه اللى بتجى تعمل المصايب و تاخد السفينه الام الى المريخ دون ترك اى اثر ...و بعدين سب حد بانه بيشوه صوره الاسلام اتهام اوفر قوى خاصه ان كلنا مسلمين فى بعض و مفيش جو التربص ده...و بعدين يعنى هما بيحاربكوا ليه ما هو ما اللى بتعملوه....


الجزء الثالث:
تشويه صوره الدين ؟!!!!!!!!!!!!!!!!!!!.......ايه العبط ده ؟ و بعدين مين دول اللى لا يريدون مصلحه البلاد و العباد دول ان شاء الله كده ؟؟...انا مثلا بهاجم السلفيين لما بيعملوا حاجه هتخرب البلد او تضر بالناس يبقى انا بشوه صوره الدين و المسلمين؟ ثم ان انا مسلمه فعلا فايه الفكره انى اشوه دينى و هل لمجرد اننا مختلفين فى الرأى يبقى انا مستفيده من الفساد ؟؟....و بعدين انتوا حاطين الليبرالين و العلمانين و النظام السابق فى كفه واحده ازاى يعنى....
يعنى مثلا واحد ليبرالى زى عمرو حمزاوى اللى بحترمه جدا يتساوى بفساد النظام السابق لمجرد انه مش عاجبكوا....


الجزء الرابع:
على فكره فى خلط بشع فى الجمله اللى فاتت دى بين العلمانيه و الالحاد..الالحاد هو عدم الايمان باى اله و ده مبدأ شخصى و كل واحد حر اما العلمانيه فهى فصل الدين عن السياسه بمعنى انى مسلمه و موحده بالله لكن مش بدخل ده فى السياسه و ادراه الدوله و ان اتفقت او اختلفت معاهم يجب الاول ان تعرف ايه فكرهم و هو مش وحش للدرجه اللى مصورناها كده...فرويد و سارتر مش شويه برضه دول اساتذتنا فى الفلسفه و اللى يقول غير كده يبقى بيهزر طبعا ...


الجزء الخامس :
و هنا لا يساعنى سوى كلمتى الشهيره : يالهوووووووووووووووووووووووووووووووووى....لقد وقعنا فى الفخ
طبعا مش هادخل فى محاورات اكاديميه فى معنى تعريف الليبراليه لانكم ادرى منى ..بس هاقول انا ليبراليه من 5 سنين بعد قراءات طويله و معمقه فى الموضوع و شفتها النظام الاميل الى قلبى و روحى فالانسان حر فى كل شئ و حريتك تنهى عند حريه الاخريين باختصار كده مينفعش نجبر حد على الايمان و التقوى و الا صنعت منه منافق و السعوديه اكبر مثال على الظاهر و الباطن و ذلك المواطن المعقد الذى خلقوه يراعى الله فقط امام الناس و يعيصيه بمجرد ان يتوارى بسبب الضغط المجتمعى الهائل ....بقى لانى مش عايزه افرق مسلم عن مسيحى او راجل عن ست او ابيض على اسمر او اى نوع من التفضيل يبقى انا ضد الاسلام؟!!!! ايه علاقه الاباحيه باللبيراليه سوى فى عقل و قلب مريض و فكره مشوه يقصد تسمم عقول الناس...بقى الشيخ محمد عبده احد اقطاب الليبراليه الاسلاميه بقى ضد الدين ؟؟؟؟؟ يعنى انتوا بس اللى اهل الدين و كلنا ليبرالين ولاد ال.......


الجزء السادس:
هههههههههههههههههههه.......بص كده على رقم 5 بقى السلفيين وسطين ههههههههههههههههههههههههههههه


هاقول حاجه واحده : حسبى الله و نعم الوكيل...

46 التعليقات:

سواح في ملك اللــــــــــــــــــه- يقول...

مش عارف يادكتورة ايه اي بيحصل ده
كان في عصر الرايس المخلوع
لما تيجي تنتقدي تصرفاته يطلع عليكي جهابيذ الاعلام السابق ويقولولك ان نقد الرايس اساءة الي سمعة مصر
وكانه مصر واسامة سرايا يقوللك ولدت مصر يوم مولدك
ودلوقتي لو انتقدتي مدعي للسلفية يقوللك
اساءة للاسلام حاااجة تنقط
بس والحق يقال ان حرق الاضرحة كنت قريت فعلا
ان السلفيين ملهومش دعوة بيه نقول برضه اي لينا
والي علينا
تحيتي

د/دودى يقول...

سواح فى ملك الله : انت هتقولى ده يا اما اسامه سرايا ده قال ابداعات نفسى اقرا له دلوقتى و اعرف رأيه و كعاده هيطلع الدنيا وردى و جبنه فى السندوتشات...

يعنى كل ما تجى تنتقد حد تلاقى نفسك خبطت فى حاجه تانيه نفسى يطلعو من ورا الدين و يكلمونا راجل لراجل و نتكلم من غير تخوين ولا تكفير...

كالعاده موضوع الاضرحه اتقفل عليه و محدش عرف الحقيقه و لا مين السبب و ان كنت ما استبعدش ان يكون ليهم يد فى الموضوع برضه...ثوره الشك بقى و الكل تحت الميكروسكوب

ENG./ELSAYED,PMP يقول...

شوفى يا دكتورة ... مبدئياً الفكر السلفى كفكر هو من أنقى ما تتخيلى ... وهو كما معرف من اسمه ... اتباع كتاب الله وسنة رسوله ... وهدى السلف الصالح نظراً لأنهم كانوا الاقرب لعهد الرسالة والاكثر فهماً للدين عن من يلونهم ... بمعنى بسيط جداً - ولله المثل الأعلى ولرسوله - لو فرضنا ان بابا بيحكيلك حكاية او قصة وغالباً اثناء الدردشة بيكون هناك حركة للجسم Body language ، بتؤكد وتعزز من كلمات الحوار ... هب انك بعد ان سمعتى الرواية من والدك ... قررتى ان تحكيها لأختك ... ثقى تماماً ان المعنى لن يصل الى اختك كما وصلك لانك استمعتى ورأيتى ... لذا فأنتى أكثر فهماً لرواية والدك ... ومن هنا كان هناك حديث يسمى بالتشبيك ... لان راوى الحديث يقول فيه وشبك يديه هكذا ( أى الرسول عليه الصلاة والسلام ) ... اى ان سلفنا الصالح حرص على ان ان ينقل لنا البودى لانجوتش للرسول عليه الصلاة والسلام حتى يكتمل ايصال الامانة جيلاً بعد جيل .

أقول وهذا المهم ... أن جميع المسلمين سلفيين ولله الحمد بشكلٍ أو بأخر ... لماذا ؟ لأننا نتبع كتاب الله وسنة رسوله ... وما نقل إلينا من هدى السلف الصالح كذلك ، ولكن بدرجات ... اتباعنا هذا بدرجات ... لاحظى ان الجنة درجات ... والنار دركات ايضاً ... ما أعدل الله ... سبحانه .

انتى تقولى انكِ ليبرالية - فلنتحفظ قليلاً ثم نعود - لما لا تقبلين حرية السلف فى التعبير عن ارائهم ووجهة نظرهم تجاه قضايا مجتمع يعيشون فيه ويبغون له كل ما هو طيب وصالح وخير ... و أؤكد لكِ ان السلفيين فعلاً طيبون وغير مغالون فى دينهم ... ولم يحرقوا اضرحة ... واثبتت النيابة برائتهم ولكن الاعلام ... لم ينشر ذلك بنفس الدرجة التى نشر بها الخبر الكاذب .

اضيف هنا نقطة هامة ... وهى ان السلفيين غير محترفى سياسة ... واعتقد وبنسبة كبيرة انهم جارى استغلالهم - مستغلون - وبشكل سياسى كفزاعة جديدة ... وستؤكد لك الايام ذلك .

نأتى هنا لليبرالية والعلمانية ... تعريف الليبرالية فى المطلق ( أنت حر ما لم تضر ) ... و أؤكد لك لا انتى ولا انا ولا اى انسان حر حرية بدون ضوابط شرعية ... أقولك على حاجة ولا حتى رسول الله صلى الله عليه واله وصحبه وسلم " ولو تقول علينا بعض الأقاويل لأخذنا منه باليمين ثم لقطعنا منه الوتين " أى " إن كل من السموات والأرض إلا آتى الرحمن عبداً ، لقد أحصاهم وعدهم عداً وكل آتيه يوم القيامة فرداً " ... هنا بيت القصيد أن تعريف الليبرالية فى حد ذاته ( حرام ) لا انا ولا انتى ولا اى احد حر ... اقول ... ماذا لو اننى اشتريت خمر ومخدرات ثم تعاطيتها مغلقاً على نفسى الابواب ... انا لم اضر احد ... ولكنى لست حر فى ذلك ... هناك ضوابط شرعية للحرية ... فى الملبس والمأكل ... أقولك ... حتى فى المشية ... وطريقة الكلام ..." وأقصد فى مشيك وأغضض من صوتك " ... " ولا تمشى فى الأرض مرحا انك لن تخرق الارض ولن تبلغ الجبال طولاً "

أقول من فرويد ومن سارتر ... كلاً يؤخذ منه ويرد عليه إلا أبا الزهراء محمد بن عبد الله صلى الله عليه وآله وصحبه وسلم ... بلغ الرسالة وأدى الأمانة ونصح ( للأمة ) وكشف الله به الغمة ... وجاهد فى الله حق جهاده حتى آتاه اليقين ... كلاً يؤخذ منه ويرد عليه حتى السلفيين حتى الاخوان حتى ...اى حد ... ولكن يرد على الفكر بفكر ... وبمرجعية صحيحة ..نحتج اليها ... ومرجعيتنا كمسلمين الكتاب والسنة ... لا يصح ان نقول إمانويل كنت قال ... أو سارتر قال ... أو فرويد اللى فسر الدنيا كلها تفسير جنسى عليل قال ...!

نأتى هنا للعلمانية ...وجذر الكلمة من العلم بفتح العين وتسكين اللام ... والعَلم عكس الغيب ... وهى تنادى بالكفران بكل ما هو غيب ... أى أن العلمانية إلحاد ... وفعلاً لم يخطأ السلفيون هنا كذلك ... لأن الدين فى مجمله غيب ... " الم(1)ذَلِكَ الْكِتَابُ لا رَيْبَ فِيهِ هُدًى لِلْمُتَّقِينَ(2)الَّذِينَ يُؤْمِنُونَ بِالْغَيْبِ وَيُقِيمُونَ الصَّلاةَ وَمِمَّا رَزَقْنَاهُمْ يُنفِقُونَ(3)
أى ان فى اول صفحة ف كتاب الله يعرف الله كتابه ويعرف من يؤمنون به بأنهم أبتداءً يؤمنون بالغيب

لذا ف العلمانية إلحاد ... ستقولين ... لا نقصد الالحاد ولكن فصل الدين عن الدولة ... لا يصح ايضاً " أفحكم الجاهلية يبغون " ..." إن الحكم إلا لله

اسف جداً ... جداً ... جداً ع الاطالة

faroukfahmy يقول...

د- دودى
مقال مثير ومنير ومقيد
فاننا لكتاباتك مشتاقين وبما تسطرينه منتظرين
كل ليل يعقيه نهار دواليك وعسى ان يكون نهارنا افضل من ليلنا
كثرت التعريفات ،وقل الافهام امام الاقلام فتشويه ديننا ابعد ماكان من امر السلف الذى يتتسب السلفيين اليه اليوم.. حسبى الله ونعم الوكيل

غير معرف يقول...

صباح الورد د/دودي

خلينا في البداية نتفق بأن الإختلاف لا يفسد للود قضية وكوني أختلف معك لا ينبغي أبداً أن يخرج عن نطاق الحرف فكلنا أخوة يجمعنا أكثر مما يفرقنا ..

في البداية لم أعلرف سبب حشرك للسعودية في هذا الموضوع الخاص بمصر فقط وهل السعودية بالفعل تعيش تحت ضغط فيضهر أفرادها الدين والتدين في حين عندما يختلون بأنفسهم يقوموا بما لا يرضي الله ؟
لسنا تحت وطأة العصا يا سيدتي وهذا فعل المنافقين الذين حذر منهم رسول الله صلى الله عليه وسلم ولم أجبر لا أنا ولا غيري على التمسك بتعاليم ديني لأننا مسلمين نذهب للمساجد فقط لأننا مسلمين ونتبع تعاليم ديننا الحنيف ونبتعد عن كل الموبقات لأنها تغضب الله ونلتزم بالأخلاق لأنها ترفع درجتنا في الجنة لأن خلقه كان عظيم في التعامل مع الناس والتعامل مع ربه عليه الصلاة والسلام ولا دليل على ذلك أكثر من الحرم المكي فصدقيني لم يقم أحد بأجبار مالا يقل عن نصف مليون مصلي يحضرون في كل الصلوات خاشعين لله تاعالى تسبقهم دموعهم وأملهم بما وعدنا الله به من نعيم مقيم نسأل الله أن نصل له جميعاً يوم لا ينفع فيه إلا عملنا .. لذلك أرجوك لك مطلق الحرية في الكتابة ولكن لا تصفي شعب كامل بالنفاق لتعززي موقفك وهو خطأ لن أبسط مبادىء النقاش العلمي تفرض عليك الحيادية والتعميم هو أكبر خطأ يقع فيه من يحاول أن يصل لوصف معين وأن يتعمق في حديثه عن فئة ما ...

غير معرف يقول...

نعود لمحور حديثك وهم السلفيين في مصر ...
ما معنى السلفيين ؟
أعتقد بأنهم لم يتأخروا أو يتوانوا عن وصف أنفسهم مع تحفظي الشديد على أن يبقى هذا الوصف حكر عليهم فقط فجميع من أتبع سنة محمد عليه الصلاةوالسلام هو سلفي سني من أهل السنة والجماعة الذين لم يدخلوا تحريف على مذهب السلف الصالح الذين أستقوا هذه المبادىء الدينية من الرسول الكريم مباشرة لذلك لن نلتفت لأي مسميات غبية تصف فئة معينة ما بين سلفي وسني ووهابي وغيرها من تصنيفات جاهزة ندخل من نشاء إليها ونخرج من نشاء حسب أهوائنا ونظرتنا القاصرة للامور وعدم تقبلنا للآخر مهما كان وللاسف نكيل التهم فقط لأنه على خلاف معنا .. لذلك فالنتفق أنه لا يحق لي تسميت ليبرالية وأنني سلفي أو وهابي فجميعنا نتبع دين واحد هو دين محمد عليه الصلاة والسلام ولا يحق لأحدنا أن يصف الآخر وكأنه يتهمه بشكل مبطن فالسلفيين مثلما يسمون أنفسهم عندما يواجهون من يناقشهم ويحاججهم أتهموه بالعلمانية والعكس أيضاً صحيح مع العلمانيين أو اليبراليين بأنزال التهم ...

غير معرف يقول...

نقطة مهمة جداً ياسيدتي فعند تعريفنا للعلمانية جميعنا سنقول هو مبدأ فصل الدين عن الدولة بمعنى السياسة سياسة والدين دين فلا يجب خلطها مع بعضها ولكن هل هذا مبدأ يتفق مع الإسلام ؟؟
لا أظن ذلك بدليل أن نبينا ومرشدنا الديني كان هو حاكمنا السياسي الذي لم يفرق بين سياسة ودين فنحن كمسلمين نستقي كل مبادئ حياتنا من القرآن والسنة النبوية أو عن طريق الصحابة الذين شربوا الدين فكان القرآن هو دستورنا الأول بعيداً عن الدساتير الموضوعة من البشرية والتي تخالف في كثير منها دستور الدولة الحق في عهد رسول الله صلى الله عليه وسلم لذلك فالعلمانية تخالف مبدأ الدولة في الاسلام وجميعنا يعرف بأن الغسلام جمع ما بين الدين والحياة العامة ليكون الدين السماوي الأشمل من بين كل الديانات الأخرى فلا معنى لفصله عن السياسة في أي دولة مسلمة ولو أننا أتبعنا الأسلام الحق المتسامح في دستورنا صدقيني سنخلق دولة عظمى تهز أركان أعدائنا كما حدث في السابق ...
لذلك أرى أن العلمانية هي بعيدة عن سمو الدولة الإسلامية والتي هدفها الأول هو زرع القوة والامان في اي مكان يطبق هذا الدستور ...

نعود لمعنى الليبرالية والتي أنحرف مسماها عندنا لتصبح مرادف للإلحاد والعلمانية والتفصخ والعري وكل ما هو سيء يوصف به هذا المذهب السياسي فكما هي عادتنا الذميمة بتحريف المفاهيم لتصبح أما أروع وهذا نادر الحدوث أو اسوء وهو الغالب عندنا لذلك أصبح مفهوم ليبرالي هو نداء الرعب لدى الملتزمين وغيرهم من البسطاء الذين رأوا فيه شر حقيقي ولكن لوعدنا لمفهوم ليبرالي هو في الحقيقة مفهوم يطالب بالتغيير للأحسن دون المساس بالقيم ومن قال غير ذلك فهو مسوف وينطق بما لا يفهم عن هذا المبدأ والذي مثلما قلت لك حرفناه حتى أصبح ذاك المارد المتوحش الذي يحاول القضاء على القيم والمبادئ التي توارثناها ....

أما حرق الأضرحة فهذا ينافي الشرع من ناحية واحدة فقط وهو المساس بحرمة الميت وهذا منهي عنه حتى لو كان الميت لا يؤمن بالله أو كافر فما بالك وأنه يحرق بالنار الذي نهي عن إقرابها من ميت لأنها تأذيه لذلك هذا الفعل مرفوض تماماً حتى لو كان الضريح منافي للدين وهو ما نرى أنه بالفعل منافي للدين بإتفاق أئمة المذاهب الأربعة والتي تتبع مصر أحدها لذلك نقول الضريح محرم بدليل جميع الأحاديث المنسوبة للنبي صلى الله عليه وسلم ولكن لا تزال أو تحرق بهذه الطريقة حرمة للميت ...

وفي النهاية لو أجتمع ليبرالي مع سلفي وألغوا المسميات المشوهة للوجه الغسلامي العربي وجلسوا تحت مظلة النقاش المحترم يلفهم حب ودين يغاروا عليه عندها صدقيني سنخلق كيان رائع قوامه نحن فقط ....

موضوع جميل وأعذريني على الإطالة وأتمنى أن يسع صدرك لكلامي فمثلما قلت لك الذي يجمعنا كثير جداً ولا أجد شيء يفترض به أن يفرقنا ...

تحياتي

MTMA89 يقول...

د/دودي..

لابد لي في البداية.. أن أحيكي على هذه المدونة الرائعة.. فاختلاف أفكارها و مواضيعها.. يدل على ثقافة صاحبتها و تمكنها من تداول الأفكار المتعددة بفكر ممتاز..

أنا قريت مع البوست ده.. بوست "ماذا لو لو خربوها؟".. و "عيد تحرير مسجد النور !!"..
و بالتالي أنا -للأسف- هيكون كلامي طويل شوية..

أولاً.. أشكرك انك فصلتي تيار السلفية عن باقي التيارات الإسلامية.. مع إني ضد ده في الواقع.. لكن لابد منه في المرحلة دي.. لانهم فعلا أساؤوا للإسلام.. حتى لو كان قصدهم كويس من الأول..
ثانياً.. السلفية دول موجودين من زمان.. و عايشين وسطنا.. و أكيد عالأقل كل واحد فينا يعرف حد بيحب أو يفضل المنهج ده..
أمال فين المشكلة؟؟ المشكلة تبدأ من إنهم قرروا الخوض في السياسة من مبدأ ان المسلمين أغلبية.. و بالتالي احنا اللي نتحكم في البلد.. و ظهر ده بوضوح في الاستفتاء.. لما حد فهمهم غلط ان "نعم" هتلغي المادة2.. و زاد الطين بلة إن الكنيسة حشدت رأيها على "لا".. و بقى الاستفتاء حرب بين الاسلام و المسيحية.. و الجيش تصرف بذكاء.. و خلى نعم زي لا..

ثالثًا.. تعاقب الأحداث بعد كده.. يدل على ان السلفيين.. عاوزين يوصلوا لقوة في المجتمع.. و للأسف.. و ده اللي أنا شايفه عندي في أسيوط أكتر.. انهم اعتمدوا على الجهل و حب الدين في البسطاء.. بعكس تيارات أخرى -دينية أو سياسية- اعتمدت على الدعوة و المناقشات.. الخلاصة اللي ممكن تنتج من ده.. أنه ممكن يكون عندنا قطبية في المجتمع.. و ده شيء موجود في كل المجتمعات.. لكن الحكم هو الشعب.. و للأسف معظمنا -و أنا منهم بصراحة- جاهل سياسيًا.. فبقت القوة هنا للعاطفة مش للعقل و المنطق..

رابعاً.. أنا اللي مطمني من ناحية السلفيين حتى الآن.. أنهم لم يلجأوا للقوة.. و إن كانت المظاهرات و الاعتصامات تعتبر نوع من القوة.. لكن ممكن يكون في أسوأ من كده..

خامسًا.. أنا اعتقد ان السلفيين.. بدأوا يدركوا أنهم عايشيين نشوة المنتصر.. و انها مش هتدوم.. لانهم حسوا ان نسبة الرفض كبيرة.. و هيحاولوا يتعقلوا و لو شوية..

سادسًا.. السلفيين و الإعلام.. للأسف في بداية الموضوع تعامل جزء كبير من الإعلام مع السلفيين.. على انهم الخطر القادم.. و منقدرش ننكر أنه كان هجوم متعمد في بعض الحالات.. يمكن ده سببه الخوف.. أو ليه أسباب أخرى.. أنا رأيي أنه يتم تجاهلهم إعلاميًا..

سابعًا.. التوعية السياسية.. ده الي محتجاه مصر حاليًا.. التخويف و الترهيب من تيارات بعينها.. مش هو ده المطلوب..

أخيرًا.. رغم كل القلق منهم.. لكن أنا متفاءل.. لأنه كل ما زاد النقاش و تداول الأفكار.. ده هيوصل بينا لفكر أكثر نضوجًا..

آسف للإطالة.. و أكيد هتكون ليا أكتر من زيارة للمدونة خارج "بلوتيكا انتيكا" :)

بالنسبة للفكر الليبرالي.. يا ريت لو تقولي ايه كتب ممكن أقراها أو مواقع عن الموضوع ده.. و ياريت لو تشمل آراء سياسية أخرى.. لأنه بصراحة أنا مش لاقي حاجة خالص هنا في أسيوط.. و عالنت في آراءء كتير متناقضة..


تحياتي..

محمد
:)

كريمة سندي يقول...

الخلط بين المصطلحات وبين المصالح مازال قائم طالما الجهل هو المسيطر

Kem يقول...

اللى استفزنى اوى بس هو من يريد تشويه صورة الاسلام
هما السلفيين هما الاسلام ؟؟؟؟؟
يعنى شيخ الجامع هو الاسلام كله الاسلام عامة ؟؟؟؟؟؟؟
احنا مسلمين لكن احنا بعض من كل هو ايه الكلام العجيب ده
عاااااااااااااااااااااااااا بلد عجيبة كانوا فين ايام ما كنا بنضرب لالقنابل و هما بيقولولنا من اهان كبيره فهو فى النار ؟؟؟؟

IMSA يقول...

د / دودي :
مبدئيا ، تحية لكِ على هذا البوست الرائع - كالعادة - ، دعيني اتحدث كما يقولون تعليقا على الورقة التي قمتِ بنشرها - شكرا - ، السلفية يقولون انهم ينتمون إلى السلف الصالح ، كلام جميل جدا ، دعيني اخبرك امرا تاريخيا ، السلف الصالح وصحابة رسول الله صلى الله عليه وسلم ، لا غبار ولا كلام عليهم ولكن اقول ان المبدأ في الكلام أو الكلام الظاهر عكس الكلام الباطن ، دعيني اخوض قليلا في الحديث ، قديما ابان الدولة الاسلامية في المغرب والاندلس كان هناك دولة بعد انهيار دولة بني امية ودولة ملوك الطوائف تعرف بدولة المرابطين ليوسف بن تاشفين ، وابن تاشفين هذا دعا في منهجه كما دعى محمد بن عبد الوهاب للوهابية - والسلفية هنا في مصر - واستطاعوا انهم يعلوا شأن الدولة الاسلامية في المغرب والاندلس واستطاعوا انهم يصونوا الاسلام هناك ولكن كالعادة البشر وجدوا على مفهوم خاطئ ان الدين تشدد للنهاية فما كان بهم إلا ان انهارت دولتهم على يد الموحدين ، هذا هو المفهوم العام للأمر رغم اختلاف اسم الجماعة او الفرقة يعني يوسف بن تاشفين انهارت دولته على يد الموحدين ، محمد بن عبد الوهاب انهارت دولته على يد جيش محمد علي .
//
نأتي بعد ذلك لتعريفهم للليبرالية على ما اعتقد ان الدين الاسلامي نفسه يكفل الليبرالية ان لم يصدقوا دعوني اوضح ، الدين الاسلامي يكفل الحرية - والليبرالية تدعو للحرية ، الدين الاسلامي يقول لا فرق بين عربي او اعجمي الا بالتقوي - والليبرالية تقول ان الفروق تكون حسب العمل والكفاءة ، الدين الاسلامي يقول ان لا عنصرية في الاجناس واللون والدين وكذلك الليبرالية ، الدين الاسلامي كفل حرية العبادة والليبرالية كفلت حرية العبادة ..
انا لا اقارن او اوضح ولكن اقول ان هذا وذاك يدعوان لنفس الامر ، القول بأن الانسان غير حر يقودنا لنفس القضية الجدلية العقيمة الانسان مخير ام مسير ، ان كان مسير وليس حرا فلا يحاسب وان كان حرا يحاسب - فاهمة قصدي - الليبرالية تقول ان الانسان مخير مسير ، فهو مخير في حريته وافعاله ومسير في مستقبله لا يعلمه كما يقول الدين .
الدين يضع الخط الاحمر وهو الاخلاق والضمير ليكون الرادع للفرد اما الحكم فلله ، والقوانين الدنيوية هي من تحكم الفرد - عجيبة نفس ما تقوله الليبرالية بأن الانسان حر ويردعه ضميره واخلاقه ، والقوانين الدنيوية ، اما حساب العبد على مفهومه الديني يرجع الى الله كما يقول الدين الاسلامي بنفس الحذافير ؟؟
اذن لماذا تم ضرب الليبرالية كمفهوم ، انا لا اقول ان الليبرالية دين ولكن كفكر هو مقارب للدين الاسلامي ولكنه غير قاصر على الدين الاسلامي بل هو فكر للعالم اجمع لان العالم يعيش فيه كافة البشر والاديان !!!
//
العلمانية وهو فصل الدين عن الدولة او السياسة ، سأكمل من اجل المشاركة ..

IMSA يقول...

كما قلت العلمانية هو فصل الدين عن الدولة ، يأخذها البعض في فكرة ان الدين يقعد في المسجد بينما يتم تصريف امور الدولة من غير دين - طب دا كلام -
تعالوا نحسبها ليس كل ما يحدث في الغرب او بلد يتطابق ليحدث في بلد اخرى ، يعني عوامل التأثير كبيرة جدا جدا ، عشان تحدث علمانية بنفس الطريقة اللي بيروجوا لها عن الغرب والانحلال وووو يبقى لازم يكون عندنا نفس مكونات الغرب ، يعني لما افصل الدين عن الدولة هل هذا معناه اني اقتصر دور الدين على المساجد والكنائس وخلافه ولا اني اجنب الدين في الدخول في كافة تفاصيل الامور الكبيرة والعلمية منها والدنيوية منها ، حتى ان الدين لدينا مقسوم لامرين عبادات - علاقة العبد بربه ولا شأن لعبد بعبد فيها - ومعاملات وهي الامور الدنيوية ، لو قلنا مثلا عملية زرع الكلى ، الكبد ، القلب ، لو قلنا اننا هنخلي حد ديتنازل عن قلبه او كبده بعد وفاته وعرضنا هذا على رجال الدين ، حرااااااااااااام ، على الرغم من انه سيفيد البشرية ويكون نقلا طبيا في شفاء مليون حالة طبية تعاني من الفشل الكلوي او تهتك الكبد وخلافه ، هنا تتدخل العلمانية لكي تحل المشكلة ، وتجدي الحل معروف وهم يغيبوه بسبب الدين ..
عن نفسي ضد العلمانية ولكني لا اعاديها ان كانت فيها نفعا للبشرية ، وان حققت النجاح في بعض الحالات فأخذ تلك الحالات واترك الباقي وليس تكفيرهم ..
//
ردا على احد المعلقين على البوست ، سيدي الفاضل سيدنا محمد كما قلت انت هو الوحيد الذي لا ينطق عن الهوى ان هو إلا وحي يوحى ، وكل البشر له وعليه ، هل لك ان ترد على علماء السلفية في اخطائهم ؟
وتقول لهم تلك العبارة انكم تخطئون في الدين ، وتسيئون له ببعض التصريحات التي تطلقونها ولا تمس الدين بصلة - هو ليس تحدي ولا نحن اندادا - ولكنه مجرد سؤال
//
دودي تحياتي لكِ على جديدك دائما وعذرا كل العذر على الاطالة تقبلي ردي ومروري

ENG./ELSAYED,PMP يقول...

د/ دودى
تعليق بسيط ... نعم تستطيع ان تنتقد السلفيين ... ده اساسا محدش متهاجم غيرهم حالياً ... ولكن انتقدهم ايضاً حجة بحجة ...تحياتى

Tears يقول...
أزال المؤلف هذا التعليق.
Tears يقول...

بصى انا مش ح اذوق كلامى و مابعرفش اجامل

السلفيين و التيارات دى عموما هم من يشوهون الاسلام و بيفزعوا الناس من المسلمين قبل المسيحيين او الغرب و العجيب ان لما واحد فيهم بيكلم بيطلع عليكى كم جهل فظيع يكفى لتخلف البشرية كلها و يزيد

احساسى انهم اداه لجهة ما بتحول تشوه الاسلام و تظهره بشكل متخلف...و ارجعى لفيديو نوارة نجم من قدام الكتدرائية عندما اعلنت انها جاءت لتساند البابا و شوفى هى قالت عنهم ايه و اى دولة اللى بتمولهم و ليه تحديدا

ظهورهم فجاه عامل زى ما تكون بلاعه و ضربت فى وشنا و صراحة انا لا املك سعه صدرك فى انك خدتى الورقة و كمان ماسكة اعصابك و ح تناقشيهم...كلام ايه ما كفاية قوائم امن الدولة اللى مليانه اسماء سلفيين بيتعاونوا معاهم و بيعملوا فتن بالامر و ايام الثورة كانوا بيحرموا التظاهر و الخروج على الحاكم

احسن شىء ليهم التجاهل التام من قبل الاعلام و اى فرد

خلط الدين بالسياسة كما وضح جليا فى فترة الاستفتاء اساء للدين و افسد السياسة

همه خالطين بين معنى الحرية و معنى التسلط على الخلق و مدعى علم و محتاجين الامن القومى يتعامل معاهم بحزم

عماد هلال يقول...

يالهووووووى ..ايه التدوينة الجميلة دى
ورد فعل مافيش ه
وموضعية أخر تمام
الله ينور عليك
ولازم استعير هذه التدوينة عشان تنور مدونتى البسيطة

Tamer Nabil Moussa يقول...

من حق كل تيار التعبير عن نفسة

المشكلة ان السلفين وغيرهم من التيارات الموجودة تستهدف اولا الفئة الجاهلة الفقيرة البسطاء

الذى سهل الوصول لهم


غير كدة اللى يقول يقول

التجاهل للحاجات دى شىء مهم لان الكلام عنها كتير يعطيها اهمية اكثر من اللزم

والبسطاء يحتاجون من يرشدهم ويوجهم الى الطريق الصحيح حتى لايقعون تحت سيطرة بعض التيارات التى تستغل الدين لااهداف اخرى

معروفة للجميع

احيك على الموضوع

مع خالص تحياتى

أم يقول...

بجد حسبى الله و نعم الوكيل

د/دودى يقول...

احم احم...بسم الله الرحمن الرحيم الاجابه تونس

انا متوقعتش ان ردود الافعال تكون بالفصاحه و القوه دى!! ...هاخد نفس اصفى افكارى ولنا بعد الفاصل الردود

ابراهيم رزق يقول...

اولا انا مش عايز اعلق عشان مغلطش
انا من انصار كل واحد يقول اللى هو عايزه
الجزء الاول كانهم هم المفوضون فقط بالتعريف بالاسلام
لم نسمع يوما ان الامام الشافعى حكم ولاية او ان الامام مالك امسك بزمام دولة
حتى التاريخ الاسلامى الذى يذكر اهم رجل دين اثر فى التاريخ الشيخ الفاضل العز بن عبد السلام كان دوره ينحصر فقط فى تحفيز المسلمين على الجهاد لم يتدخل فى السياسة
و عندما تدخل رجال الدين فى السياسة ضعفت الدولة الاسلامية فى الاندلس و سقطت
اكثر ما يضايقنى هو استغلالهم للتعبيرات السياسية و وضعها فى قلب اقرب الى الكفر و هو تفكير برجماتى يصب فى كفتهم و لقد تذكرت احمد رجب فى قصته فوزية البرجوازية عندما ارادوا تقليب الحى عليه قالوا عليه ديمقراطى و كأن الديمقراطية سبة
اما ملامحمهم فهى تتعارض مع صحيح الدين الذى افهمه ان الدين المعاملة

هم متجهمون و تبسمك فى وجه اخيك صدقة
هم ضد الجمال بملابس الرجال القصيرة و تشويه الارجل بالحناء و ملابس النساء القاتمة
هم ضد النظافة لاحظى ملابس النساء الطويلة التى تصل الى الارض و تجمع كل مخلفات الارض
اغلبهم يفتقد الى العلم و المتعلمون منهم اصحاب فكر متحجر لا يقبل الاخر
هذا ينطبق على السلفيين المسحيين و تلك قصة اخرى و لكن بمفهوم اخر
التجاهل الاعلامى حلهم و التصدى لهم على ارض الواقع لانهم يتوغلون بين البسطاء
مع اعترافى يجب ان نستوعبهم و هم احرار و لكن دون ان يتعرضوا لفكر الاخر
تحياتى و احتراماتى و تقديراتى ودى غير تقديراتك فى الامتحان

د/دودى يقول...

حاجه حاجه كده ...يا مسهل

ENG./ELSAYED,PMP : بما انى ليبراليه فقررت ان فعلا كل واحد من حقه يتكلم بل و انه يحاول يوصل صوته للناس و الا ابقى مش مؤمنه بالحريه و التالى فهما احرار فى انهم يعرفوا بنفسهم زى ما هما عايزين و بالتالى انا معلقتش على الشق الاول ...

اللى اعترض عليه بقوه هو توزيع ورق فى الشارع بين جمهور شبه مغيب يادوب بيقرا و يكتب يوص فيها المصطلحات السياسيه على مزاجهم و بالتالى تبقى المناقشه من جانب واحد لا مناظره يسمع فيها المتلقى من كلا الطرفين ...

اما رأى حضرتك فى العلمانيه و الليبراليه - اللى لازم احترمه- فللاسف مش موافقه على حاجه منه خالص ...لان ببساطه اجبار الناس على الايمان و التقوى اكيد مش هو الحل فزى المثال اللى حضرتك ضربته بانى مثلا لو اخدت مخدرات لوحدى مش هاذى حد فهل اجبار هذا الشخص على الطاعه خارج الابواب بالتاكيد لن يجدى بل ستضيف الى كونه عاصى الى كونه منافق ...

الايمان و التقوى حريه شخصيه جداا و كل واحد متعلق من عرقوبه و محدش بيتحاسب مكان حد :" فمن شاء فليؤمن و من شاء فليكفر إنا أعتدنا للظالمين نارا أحاط بهم سرادقها " كل واحد حسابه عند ربنا ...

احنا كده بنخوف الناس من الدين

د/دودى يقول...

faroukfahmy58 : يا سلاااام على طريقه التعليق الشاعرى الفنان ...

و زى ما قال سيد حجاب : لا الناس ولا النظره الباهته على الامل صاحيه و نايمه مهما الليالى تكون فايته و بكره جاى قوموا قبلوه ..

احنا اللى يوم الفدا روحنا , نفديكى ونضصحى بروحنا و ضحكنا حتى على جروحنا ضحكتنا هونت الشيله ...ولا ابو لهب هيخوفنا محاش ضعاف قلات حيله اه يا جميله

د/دودى يقول...

ريبال بيهس : حوار ممتع و الله و الاختلاف فى الرأى لا يفسد للود قضيه مع اننا مش مختلفين كتير...

الجزء الاول : فاما وصف شعب السعوديه بالكامل بالنفاق فهو - بالطبع- تعميم فيه ظلم بين و مش معقول اللى فى حضن الحرم يبقوا كلهم منافقين تقدر تقول انى بنيت فكرتى على ما سمعته فقط لانى ما زرتش السعوديه من قبل ..لكن قريت كتير لكتاب من السعوديه و يجمعهم جميعا احساسك بكونهم مضغوطين من ضغط مجتمعى ما و ان كان هذا فى الادب فهو بالتاكيد يمثل شريحه موجوده فعلا فى المجتمع ده ...
ده رابط ريفيو روايه يوسف المحيميد القاروه و هى مثال لما قرأت

http://suchasmallaffairs.blogspot.com/2010/12/blog-post_20.html

د/دودى يقول...

ريبال بيهس :
الجزء الثانى : هنا اتفق معاك على ضروره عدم احتكار احد لفكره اتباعهم للسلف الصالح فمن منا ليس كذلك ؟؟ كلنا نتبع السنه و الصحابه و بالتالى فحكر التمسك بالسلف بهم فقط فعلا يغيظ و ان كان ممكن يبرر بانهم ملتزمين بيه اكثر من غيرهم و ده ممكن...

لكن اختلف معاك فى فكره عدم تقسيم المسلمين ارها فكره غير عمليه فاحنا مش بس مسلمين و بغض النظر عن افكار التخوين و التكفير عادى اننا نكون مختلفين فى الاراء و الافكار و كونا ننتمى لنفس الدين يعنى اننا توائم متماثله فانا مثلا كتنصيف : فتاه مسلمه مصريه ليببراليه اهلاويه شبراويه صميمه ...

د/دودى يقول...

ريبال :
الجزء الثالث : فاما العلمانيه فعلى الرغم من انى مش بحتقرها زى رأيكوا فيها لكنى اراها عموما غير قابله للتطبيق فى مصر ...

فاما اليبراليه فدعنى اجتزء من كلامك :
"نعود لمعنى الليبرالية والتي أنحرف مسماها عندنا لتصبح مرادف للإلحاد والعلمانية والتفصخ والعري وكل ما هو سيء يوصف به هذا المذهب السياسي فكما هي عادتنا الذميمة بتحريف المفاهيم لتصبح أما أروع وهذا نادر الحدوث أو اسوء وهو الغالب عندنا لذلك أصبح مفهوم ليبرالي هو نداء الرعب لدى الملتزمين وغيرهم من البسطاء الذين رأوا فيه شر حقيقي ولكن لوعدنا لمفهوم ليبرالي هو في الحقيقة مفهوم يطالب بالتغيير للأحسن دون المساس بالقيم ومن قال غير ذلك فهو مسوف وينطق بما لا يفهم عن هذا المبدأ والذي مثلما قلت لك حرفناه حتى أصبح ذاك المارد المتوحش الذي يحاول القضاء على القيم والمبادئ التي توارثناها .."

براااافو اتفق معاك فى كل كلمه فيهم فانا معك قلبا و قالبا...

اما عن الاضرحه فدى غير انها حرام طبعا فهى استفزاز للناس الطيبين اللى بتجمعهم صله محبه بال البيت و يكره الناس فى التدين و هى اصلا مش ناقصه...

استمتعت بالكلام معاك

د/دودى يقول...

MTMA89 : انت من اسيوط ؟ غريبه كثيرين مما احترمهم من اسيوط او من الصعيد عموما انا برضه فيا فرع صعيدى من سوهاج....

انا قلت وقت الاستفتاء فى تدوينه لماذا خسرت الثوره الشارع
http://suchasmallaffairs.blogspot.com/2011/03/blog-post_20.html
ان انضمام الكنيسه لاتجاه لا اضر بالكنيسه و شرائط "قولوا لا من اجل يسوع" و قولوا "نعم لله و رسوله" اضر بالعمليه كامله و بوظ متعه الديموقراطيه ..

و ان كانوا لم يلجأوا للعنف فهذا يشفع لهم عندى و ان كنت خايفه من ان ذلك على وشك الحدوث ...

اللى كلنا نتفقين عليه ان فكره التخوين و التكفير مش هى الديمقراطيه و جذب مشاعر الناس و استجلاب احساسهم مش سياسه ...

انا كنت عارفه بوجودهم اصل كليه الطب عندنا مليانه منهم و ان كان محدش منهم صحابى لان البنات عندهم عوره و محدش منهم بيرضى يتكلم معانا ...

اما عن الليبراليه فممكن ابعت لحضرتك فى مدونتك مصادر للموضوع ده بعد ما اجمعهم و بعد ما تقرا تحكم رأيك و تحدد موقفك منها و احترم فيك بقوه حبك للتطلع للاكثر بغض النظر عن كلام النت المتناقض...

د/دودى يقول...

كريمة سندي : موقفنا احنا كمثقفين اننا نحارب الخلط ده و نوعى الناس من غسيل المخ ...

د/دودى يقول...

اغانى الشتاء : اتفق معاك ومع سواح فى ملك الله انهم كل ما نجى نكلمهم نلاقى نفسنا بناقش الدين ...اطلعوا من ورا الكلام ده و كلمونى....

د/دودى يقول...

IMSA : انا فعلا مستمتعه بالبوست دى بالتعليقات اكتر من كلامى اللى ابتدى يبان انه تافه بعد الجمال اللى بسمعه...

فاما ضربك بالامثله التاريخيه و الاندلس فاتفق معاه الف فى الميه و عندى مثل مشابهه بس على الديانه المسيحيه -طبعا الوضع كان مختلف لكن العقول واحده- فى انجلترا لما اتحولت جمهوريه و من ثم مملكه بسبب ما فعلهخ فيهم شبيهين الاخوان و السلفيين هناك و التفاصيل هتكون فى بوست منفصله ان شاء الله -انت اللى اوحيت ليا بالبوست دى-...

فاما الليبراليه فاتفق معاك تماما فالاسلام غير متناقض مع الليبراليه ابدا فالانسان فى الدين حر و لا اكراه فى الدين و شرحك مفيش اجمل منه...

فاما العلمانيه فزى ما قلت على الرغم من عدم كرهى التام بها لكنى اراها دائما غير مناسبه فى مصر على الرغم من بعض محاسنها لكن اذا كانت سمعه الليبراليه باظت هينفع نتكلم فى العلمانيه ازاى بين الناس ده انا ارجم فيها ده انا قلت ليبراليه بقيت عدوه الدين اكتر من كده هيقوموا عليا الحد...

د/دودى يقول...

IMSA/ENG.ELSAYED من غير خناق ..الاختلاف فى الرأى لا يفسد للود قضيه ....كل يؤخد ويرد عليه الا صاحب هذا القبر قالها انسابن مالك مشيرا لقبر الرسول صلى الله عليه وسلم و بالتالى فقلا احد فوق النقد فى عصرنا

سارتر و فرويد و السليفيين كلهم تتفق او تختلف معاه دون ان تسمح ان يسبك احد بانك جاهل او كافر...

و احنا فعلا بنتكلم حجه بحجه مش شتيمه مطلقه ..

د/دودى يقول...

Tears: امسكى اعصابك هنعمل ايه يعنى اهى وقعه و جت و امرنا لله....اعترف ان فعلا مشاعرى ملتهبه و حاسه بخنقه من جراء ظهورهم ليا فى كل شق من الارض و كفايه نظرات الراجل و انا باخد الورقه منه و لسان حاله بيقول انتوا الحريم ايه اللى مطلعكم من البيت ؟؟

على الرغم من مشاعرى بحاول -على قدر قدراتى- انى اكون محاديه و اقابل الحجه بالحجه لان الثوره كده طيبه حنونه قانونيه فلا قرارات ثوريه و كل حاجه بالمنهده و الحوار و امرنا لله ...

موضوعهم مع امن الدوله سمعته بس مش متاكده منه لكم موضوع عدم ذهابهم للمظاهرات بل و تحريمهم ليها ده انا متاكده منه فعلا ...احنا مش بنحاول نخونهم بس ياريت هما ميكفروناش...

تحياتى لبنات المدونات ذوات العقول الواسعه...بحترم عقلك يا تيرز قوى

د/دودى يقول...

استاذى و ملاذى عماد هلال : انا سعيده ان التدوينه عجبتك و حضرتك عارف المدونه كلها تحت امرك...اتمنى اكون موضوعيه بحاول و الله...

د/دودى يقول...

تامر نبيل موسى: اتفق معاك بقوه ان استهدفهم للبسطاء بيغظينى فتوزيع ورق لمصطلحات سياسيه فى الشارع مش شغل سياسه ...و خاصه انك مش معقول هتلم واحد واحد من اللى خد الورق و تكلمه او توعيه ...اللى عايز يتكلم فى مناظره يتفضل و يكون فى حد بيرد عليه لكن كده فى الشارع طب نعمل ايه؟؟....

د/دودى يقول...

أم : حسبى الله و نعم الوكيل دى شككتنى فى حاجه ...حسبى الله دى تعود عليا انا ولا عليهم؟؟ فقط للتوضيح لو سمحتى..و الله مش هازعل

د/دودى يقول...

صديقى ابراهيم رزق : عندى نفس احساسك بس بحاول ابقى موضوعيه معاهم و امرى لله ...هو بس اللى بيغظنى فعلا اهتمامهم الضخم بالمظاهر عموما و ده اللى بينرفزنى بصراحه ده بالاضافه لاحساسى باحتقارهم للستات و احساسهم على طريقه صعايده زمان بان البنات عار و يجب اخفائهم او على طريقه الكفار يجب وئدهم فى المهد...

هما حرين يقولوا اللى عاويزنه بس بلاش تكفير او تخوين او تسميم لعقول العامه...

Tears يقول...

لا انا مش بخونهم بالباطل انما وثائق امن الدولة اللى نشرتها الدستور قبل الثورة بايام قليلة فيها اسماء الاعضاء فى الجماعه السلفية اللى كانوا بيشتغلوا معاها و هى اعداد كبيرة اوى

لا تنسى ان بعد مقتل سيد بلال ما رضيوش يطلعوا معانا مظاهرات عشانه..مع ان كل اللى طلعوا عشان خالد سعيد طلعوا عشان سيد بلال بعدها بس همه رفضوا المشاركة...يعنى اختى كامليا اهم من اللى اتقتل...ده ما يخليكيش تفكرى شوية فى الهدف و فى التوقيت ده بالذات؟

د/دودى يقول...

تيرز : انا بحاول على طريقه احبوا اعدائكم عشان مبقاش متحيزه ضدهم...بس معروف ان السلفيين كان بيتقبض عليهم عادى زى الاخوان يعنى ...

اللى غيظنى جدا رفضهم للمظاهرات بقوه فى الاول و حبهم للمظاهرات دلوقتى..

Tears يقول...

ما البلطجية اللى كانوا فى الانتخابات بيشتغلوا مع الامن كان بيتقبض عليهم عادى و لو مش مصدقة اتفرجى على اعادة برنامج فى الميدان (ابراهيم عيسى) على قناة التحرير بكرة الساعه اتنين..استضاف البلطجية اللى كانوا مع الامن و بيقبض عليهم برضة

د/دودى يقول...

هههههههههه.....و الله فكره تمويه كويس برضه اول مره اسمع عن حاجه زى كده ...

احنا هنلاقيها من الفلول ولا من الاخوان ولا من السلفيين ولا من الهم اللى ورانا ....لكى الله يا مصر

IMSA يقول...

ENG.ELSAYED :
عزيزي انها ليست مشادة ، وما قلته ليس موجها لك بل لأغلبية جمهور السلفية والوهابية ..
هل يمكن ان تعلن رأيك ان مثلا ابن باز اخطأ في تلك ، او ان ابن عثيميين لم يشرح تلك بالمعنى الصحيح ؟؟
أو ان محمد حسان ليس موفقا في كلامه ، ومحمد حسين يعقوب يقول كلاما لا علاقة له بالدين ، او ان ابو اسحاق الحويني يعيش عصرا ليس بعصره ؟
معك أن السلفين هم اكثر المهاجمين لكن ليس لأنهم على صواب بل لأنهم يصدرون امورا غريبة تماما ..
هذا ما اقصده ..
//
د/ دودي :
لا مشادات نحن هنا لكي نتقاسم المعرفة ..
تحياتي لكِ وللمهندس السيد ..

د/دودى يقول...

IMSA/ENG.ELSAYED :

مفيش خناق ولا حاجه انا بهزر ده المناقشه نفسها بقت امتع بمراحل من البوست نفسها و الله ....

انا مصره فى الحفاظ على رأيى فى النقد لاى تيار دون الخوف من التخوين او التكفير او السب و الفضيحه , مناقشه مناظره راقيه حجه بحجه و الناس تحكم ...هو المشكله ان مش عارف هو انت بتناقش السلفيين ولا الاسلام و ها انا اعلنها - واجرى على الله- السلفيين مش الاسلام فهم ببساطه بشر صح او خطأ....

IMSA يقول...

د/ دودي :
انا اناقش فكر والسلفيين فكر - رغم اني اعلم جيدا انهم لا يحوون فكرا بل تطبيقا اعمى - انا لا اناقش دينا ، فانا مسلم ، اعلم جيدا مدى قوة ديني وانه برئ مما يرتبط به من افكار متشددة ..
اناقش فكرة سلفية يقولون انهم الدين الصحيح وان من دونه هو الخطأ البيّن رغم انهم ليسوا الدين كما قلتي .
هم لا يريدون أن ينتقدهم احدا ، وهذا ما يقودنا الى فكرة واحدة الايديولوجية الموحدة ونظرة الاله الذي لا يخطئ ..
تحياتي لكِ

r يقول...

شوفى انا عندى امل كبير ان هيظهر علاج يشفى المرض المزمن دا مش السلفى طبعا لانى اعرف ناس منه غايه الاحترام والفهم ولكن اقصد الغباء والتخلف العقلى اللى عند الباقيين واللى للاسف منسوبين للاسلام
يا خساره القراءه والتعليم

Unknown يقول...

من الفقرة الرابعة: " للدرجه اللى مصورناها كده...فرويد و سارتر مش شويه برضه دول اساتذتنا فى الفلسفه و اللى يقول غير "
فرويد مش استاذنا في الفلسفة يا دودو. انتي حرة في جان بول سارتر لكن فرويد ده بتاعنا احنا. تحياتي وتقديري. د. محمد زكريا الأسود

د/دودى يقول...

هاقول لك فى اى مناسبه ذكرت تلك العباره اصل انا عندى قناعه ان فرويد فى كتير من كتبه كان بيتجاوز علم النفس و يروح لاطراف الفلسفه...طبعا ده مش رأى علمى و لا حاجه بس اصلى من كتر ما حبيت فرويد و قريت من كتبه كتير جالى الاحساس ده (:

Unknown يقول...

طبعاً أنا مصدقك وده ببساطة لأن كل هؤلاء العباقرة كان عندهم ثقافة وإلمام بنواحي كثيرة من المعارف والثقافات، يعني تجدي فرويد متأثراً بالفلاسفة الإغريق وليس ذلك بغريب حيث أنهم من الأوائل الذين اهتموا بدراسة النفس والطبائع البشرية وتقسيم الناس حسب مزاجهم إلي أنماط ثابتة كانت إحدي إسهامات أبوقراط ( Hippocrates ). المهم أن هناك رأي لمنصور الرحباني أن " الفن لا يتجزء" أيضاً الثقافة لا تتجزء, فتجدين فرويد كان مثقفاً شديد الاهتمام بالفلسفة الإغريقية والحضارة المصرية الفرعونية والموسيقي وكثير من نواحي الثقافة والمعرفة. , وعموماً ياسيدتي فرويد مش ح يزعل لو قلتي عليه أستاذك في الفلسفة، وهو يطول؟ مع تحياتي وتقديري. د. محمد زكريا الأسود

إرسال تعليق

حلو؟؟ وحش؟؟ طب ساكت ليه ما تقول....