الجمعة، 29 أبريل 2011

ماذا لو لو خربوها ؟؟



 ماذا لو لو وانت ماشى طلع لك عو , ماذا لو لو لاقيت تاكسى طاير فى الجو؟؟ ايه اللى انا بقوله دى؟؟ انا بتكلم فى موضوع تانى بس على نفس المنوال تخيل معايا الموقف التالى : 

ماذا لو تجمهر الالف المسيحين امام الازهر ؟؟ جاؤوا بشكوى معينه او لطلب ما و انت عارف كم الطلبات و الشكوى اللى ممكن يملكوها و تستحق الاعتصام ...ماذا لو جاءوا بصلبانهم و دى جى التراتيل الكنائسيه و اقاموا قداس الاحد امام الازهر الشريف ؟؟ ماذا لو اغلقوا المرور و شلوا المنطقه المحيطه و ليحترق البشر فى نار الجحيم ؟؟ و مررت انت بالمنطقه و لو صدفه و انت مسلم فوجدت الازهر و المنطقه المحيطه  تم حصاره بالصليب و صور يسوع  و اجراس الاحد ......هنا و قبل ان تفقد اعصابك لمجرد القراءه قل لى فى 10 كلمات احساسك وقتها ؟؟؟ بل و ازيد هل يمكن هنا ان يمتد ان تغير المكروه بيدك ؟؟


و الان بعد ان استمتعتوا ببرنامج "ماذا لو لو؟" ننقل اليكم فى قناتنا الحبيبه برنامج "احداث 24 ساعه" ....باختصار اللى فات ده كان التشبيه , الخيال , الممكن اما اللى جى فده اللى حصل النهارده و  المصدر جريده  اليوم السابع و المحيط:


فرضت القوات المسلحة حصارًا أمنيًا مكثفا على الكاتدرائية المرقسية بالعباسية، وذلك تحسبا لوقوع أى اشتباكات بين المسيرة التى تضم الاف السلفيين المتجهين من مسجد الفتح إلى مسجد النور بالعباسية مرورا بالكاتدرائية، حيث قام الجيش بتكثيف تواجد الشرطة العسكرية، بالإضافة إلى عدد كبير من عساكر الأمن المركزى لتأمين الكاتدرائية التى يحتشد عشرات الآلاف من السلفيين الآن للتظاهر أمامها والمطالبة بالإفراج عن المسلمات المحتجزات بالأديرة، وعلى رأسهم كاميليا شحاتة، مرددين "الله أكبر..الله أكبر"، "مصر إسلامية".


 في سياق متصل، نظم المئات من السلفيين وقفة حاشدة أمام مجلس الدولة بتنظيم المركز الثقافي للحوار، حملوا فيها لأول مرة لافتة كبيرة تدعوا لمحاكمة  مظاهرات تطالب بالتدخل فى اختطاف كامليا شحاتة وعزل شنودة .
الذي أصبح رئيساً لما اسموه بـ "جمهورية النصارى " على حد تعبيرهم. وتم توزيع منشورات تشرح قضية كاميليا شحاتة من بداية إسلامها حتى هذه اللحظة وسط حضور إعلامي مكثف


هذا كان الخبر اما التعليق فمش هيكون كتير المره دى لانى باختصار قلته فى المره اللى فاتت بس هتكفى بكلمتى الشهيره : يالهوووووووى... انا بس كتبت مقدمه الخيال العلمى ده عشان تقدر مشاعر غيرك لما يشوف الموقف ده ...

ملحوظه: فى مقاله عيد تحرير مسجد النور اللى هو ورا الكاتدرائيه بشارع كان نفس الناس دى معتصمه من 6 ايام و رجعوا تانى بس المره دى قدام الكنيسه مش الجامع , بتفكرنى بحكايه المفجرين اللى فشلوا فى تفجير القنبله فى سيناء فرجعوا بعدها باسبوع بس الحمد لله انفجرت المره دى ...اهو ربنا كرمه و هرب فى عربيه الخضار بالليل 

اقرأ ايضا :
عيد تحرير مسجد النور !! 

42 التعليقات:

سواح في ملك اللــــــــــــــــــه- يقول...

بصي يادكتورة
انا زيك باستغرب علي الاوضاع الغريبة دي
واوقات كتير باسال
عمن ناخذ ديننا
وبعدين عايز اعرف انا
هو مش فيه اختراع اسمه دولة
والا هو لسة ماوصللناش
طيب ليه بنزعل لما بيحصل للمسلمين اضطهاد في الدول الغربية
لما احنا هنا بنضطهد بعضنا
كنت سالت سؤالا علي مدونة الاخت الحرة
مامعني كلمة سلفي
فاجابت يعني اناس يتبعون السلف الصالح
فاعدت عليها سؤالي بطريقة اخري
اليسوا من قالوا لسيدنا ابراهيم
وجدنا ابائنا لها عابدين
ايضا سلفيين
ارجع واقوللك
ضعف مؤسسة الازهر
ساعد هذه التيارات في الظهور علي السطح

د/دودى يقول...

يا سلاااااام عالكلام الموزون بميزان الدهب ...صحيح هو مش فى اختراع اسمه الدوله؟؟......نفسى و منى عينيا الازهر يرجع من الغيبوبه...

ENG./ELSAYED,PMP يقول...

شوفى يا دكتورة
غالباً ما يكون تقيمى لإستحقاق حدوث أمر أو واقعة ما - أتحدث عن نفسى - نابع من مرجعيتين :
- فقه الأولويات .
- وقاعدة درء الخطر مقدم على جلب المنفعه .

ونظراً لأن هناك ما هو أولى من هذه القضية المطروحة - أولى فى مجمل الشأن الإسلامى وشأن المسلمين ف المجمل - فلا يستقيم وزناً ولا عقلاً أن يكون عموم مسلمى هذا العصر فى هذه البلد ما بين جائع أو جاهل أو مريض أو فاسق ... ثم أطرح هذه القضية ، لإهدار الكثير من الطاقات وتشتيتها بدلاً من تجميعها و تقويتها لمواجهة ما سلف ، لقد خطرت فى ذهنى الآن فتنة عظيمة تعرض لها المسلمون وفقدت فيها الامة الاسلامية من اعاظم علمائها الكثيرين - فتنة خلق القرآن - ولكى لا اطيل عليكى او على من يقرأ هذه الكلمات ، كانت فتنة خلق القرآن عبارة عن فتنة ( جدلية ) :
وكان مدار المحنة حول قضية خلق القرآن فانقسم الناس في هذه المحنة إلى قسمين:

قسم ضال: وهم أصحاب البدع كالمعتزلة وغيرهم قالوا أن القرآن مخلوق .

قسم مصيب ومحق:وهم أهل السنة: قالوا أن القرآن كلام الله الأزلي غير مخلوق.

وقد أضلّت الكثير ورفعت الكثير ووضعت الكثير .

المهم ، أقول أليس حرياً بمن انتفخت اوادجهم لهذه القضية ، أن يغيثوا من يموت جوعاً او مرضاً او جهلاً ، أو من يصطفون يومياً فى طوابير العنوسة، كم واحداً منهم يعلم عن جاره شيئاً ، كم واحداً منهم أعطى ميراث اخواته الاناث طبقاً لشريعة الله ، كم منهم أطعم فى يوم ذى مصغبة يتيما ذا مقربة او مسكينا ذا متربة ، والله الذى لا اله غيره ان سنة الله لا تحابى احداً ، وللنصر إستحقاقات وموعد وقدر " ثم جئت على قدرٍ يا موسى " الآية ، أقول لو أن سنة الله تحابى احدا لحابت المصطفى صلى الله عليه وآله وصحبه وسلم ، شجت رأسه وكسرت سنيته وهو يدعو اهل الطائف ، جاءه ملك الجبال طارحا عليه ان يطبق عليهم الاخشبين - جبلين - فآبى نبى الرحمة ، أكررها وأكرر قسمى السابق ان للنصر استحقاقات ، وليس مظاهرات " أنه لقول فصل وما هو بالهزل ، فمهل الكافرين أمهلهم رويداً " الآية

أسف للأطالة

تحياتى

ENG./ELSAYED,PMP يقول...

اسف على اعادة التعليق

" أنه لقول فصل وما هو بالهزل ، إنهم يكيدون كيدا ، وأكيد كيدا ، فمهل الكافرين أمهلهم رويداً " الطارق

د/دودى يقول...

انا اول مره اشوف الردود احلى من المقاله نفسها ...مش هقدر ارد على الكلام الحلو اللى انا مش قده ....

ابراهيم رزق يقول...

انتى عارفة لو فى مريض عندك بقالوا سنين منعاه من الاكل و منعاه من الحركة و فجاة قلتى له كل كل اللى فى نفسك و اتحرك زى ما انت عايز تفتكرى هيعمل ايه هيعرف ازاى ياكل او يتحرك و لا هياذى نفسه و اللى حواليه
دول ناس كانوا محرومين من الحرية من التنفس زى العصفور اول ما يخرج من القفص بيتخبط لحد ما يعرف الطيران
لم نعلمهم ان الحرية يجب ان تكون مسئولة سواء بالردع او بالتوعية
نفتقد قليلا للشفافية مع اعترافى بعدم اهمية كامليا و وفاء لكن اين الحقيقة لماذا لا تظهر فى برنامج من برامج التوك توك و لو لعشر دقائق على الهواء طبعا لا الكنيسة دولة داخل الدولة و لا الازهر دولة داخل الدولة المطلوب سيادة القانون
لا مظاهرة الا بتصريح مسبق معروف اجراءته و عدد المتظاهرين مثل الخارج
لا اعتصام الا باخطار مسبق قبلها بفترة محددة
لا اجراءت تحد من الحرية و لكن الحرية المسئولة
خالص تحياتى

faroukfahmy يقول...

د- دودى
انا مع رأى اخىاراهيم
فى مسألة سيادة القانون
مسألة كاميلياو كرملّه دى حجة وذريعة لاشعال الفتنه بين عنصرى الامة وبدل مايعقعدوا على باب الست كاميليايسرعوا الى كامل وكميل وتكامل امتهم التى تاهت من احضان فكرهم وستموت فى صدر فتنتهم وتهانينا لكاميليا التى اشتهرت بشهر اسلامها لك الله يامصر!!! لك الله ياحبيبة !!!

Elsayed Azab يقول...

أغرب حاجة ان سبب كل ده واللى هما مشايخ السلفيين نفسهم نفسهم محدش كان بيسمعلهم حس ولما طالبنا بالديموقراطية قالك ده مصطلح دخيل على الاسلام ولما حققنا مطالبنا ونجحت الثورة هما أول وأكتر ناس بيلعبوا بالحرية ..

وجهة نظرى ان لما الشرطة ترجعتانى ويبقى فى سلطة تنفيذية قوية مسيطرة على البلد وترجع معاها هيبة الدولة فى نفوس الناس مش هتلاقى المشهد ده تانى ..

تسلمى بجد على الطرح المميز ده ..

تحياتى

الاحلام يقول...

ممكن افهم اين كانوا السلفيين من او ما ظهرت على قيد الحياه لم اسمع عنهم الكثير الا هذه الايام هل هذه هى الحريه التى ينادون بها ام هى انطلاقه العصفور الحبيس عندما يفتح له الباب ويعرف انه يمكن ان ينطله دون ان يعترضه احد اتمنى ان تنتهى هذه الفتره الخطيره على خير حتى لا تكون هناك فعلا فتنه فى مصر ستكون عواقبها وخيمه جدا وخطيره جدا
دمتى دكتوره دائما متالقه ودام قلمك قوى
تقبلى تحياتى الاحــلام

غير معرف يقول...

عندما تضعف سلطة الدولة
يكثر الهرج..!!
لكن يادكتورة السلفيون ليسوا جماعة سياسية كالإخوان
فالسلفي هو من يتخذ من الصحابة والتابعين قدوة يقتدي بها
وجميع المسلمون كذلك
وليس من حق أحد ان يصدر فتوي باسم جماعة المسلمين الا اذا اجتمع عليه جماعة المسلمين.

د/دودى يقول...

صديقى ابراهيم رزق : عجبتنى جمله اننا ينقصنا الشفافيه مع عدم اهميه الاتنين ...على رايك فى حل نخلص بيه الليله قبل القنبله ما تنفجر يبقى احسن ..

Kem يقول...

لا استغرب ولا اتعجب خصوصا بعد الخطبة اللى سمعتها امبارح من شيخ الجامع بتاعنا و هو بيقول بلااااااوى من اللى بتقوم الناس ع بعض من هذا القبيل و كمان قال ان اللى صوت ب نعم صوت لحفظ الدين طب ما الموضع هدى عايزين تغيظنى تانى ليه معرفش !!!!!
ضيعلى نص الفرح فى كلام فارغ ,, شعب عجيب
الشعوب بتتلكك عشان تتبسط و احنا لازم نضايق نفسنا و نعمل حروب من ولا حاجة اوفففففففففففففف

د/دودى يقول...

faroukfahmy58 : مع انى مش من انصار مبدأ الزريعه و المؤامرات لكن مع انصار استغلال الفرصه و الضغط على الجميع بموضوع صغير لاكتساب المشاعر و المكانه ....

د/دودى يقول...

elsayed azab : طريقه مشايخهم انهم يرموا الكلام اللى زى الطوب و الحجاره و برجعوا اما ينفوه او لو مسجل يقولوا انه اتفهم غلط و يصدروا شبابهم فى وش المدفع ....عندى احساس ان مدام مفيش جهاز امنى قمعى لازم نتعود على الحريه حتى لو اوفر ...انا بس كل خوفى لسيناريو الخيال العلمى اللى كتبته يتنفذ

د/دودى يقول...

الاحلام : هما السلفيين طول عمرهم موجودين لكن امن الدوله كان مغطى عليهم خااالص و كان مفهومهم متداخل مع مفهوم الاخوان...اتمنى ان يكون ذلك فعلا كمرحله انتقاليه بمعنى انا ايش ضمنى ان الريس الجديد مش هيخاف منهم برضه؟؟

د/دودى يقول...

ماشي بنور الله : اظن ان السلفيين فى طريقهم للسياسه هما كمان على شاكله الاخوان و اننا خرجنا من المعنى الدينى الى المعنى السياسى بدليل ان انهم بقوا شبه قوه سياسيه

د/دودى يقول...

اغانى الشتاء : اهو موضوع خطبه الجمعه ده مواااال لوحده و العك اللى بتقال فيها بقى عبره لمن يعتبر ....متافافش خير ان شاء الله

الجوكر يقول...

دكتوره دودى

لأن هيبة الدوله مازالت فى غرفة الإنعاش

فيحق لأى أحد أن يفعل مايشاء

حتى يمن الله عليها بالشفاء العاجل

...

وعاوز اقولك على موضوع ظريف حصل

فى إحدى القرى التى اعرفها

قام سكانها بقطع الطريق العام

وقامو بمنع أى سيارة تعبر من أى إتجاه

ليه .. ( لاتستغربى )

لأن لهم مطالب

هى ايه .. ؟

الافراج عن جميع المساجين التابعين للإخوان المسلمين

مهما كانت الجريمة التى سجنوا من أجلها

وإستمرت هذه الحالة ثلاثة أيام كاملة

حتى تكرموا بفتح الطريق بعد تدخل اهل الخير

فأنا لم أعد أستغرب أى شىء

فى ظل الفوضى التى تعم مصر من ادناها الى اقصاها

نسأل الله الأمن والأمان




تحياتى وكل الود

د/دودى يقول...

الجوكر : هو المضحك فى قصتك فكره مهما كانت الجريمه !!...يعنى لو اخوانى قتل قتيل يطلع برضه؟؟ انا بقى على كده عايزه الكارنيه بتاع الاخوان فورا دى حصانه

Tamer Nabil Moussa يقول...

بقيت هيصة وفوضى

بس مش عارف تصدقى رغم كل دة

عندى امل ان الحال هيكون عسل وسكر

وكل اللى بيحصل دة مجرد زوبعة فى فنجان


مع خالص تحياتى

د/دودى يقول...

تامر نبيل موسى : هيصه حلو اللفظ ده والله ..

معنديش نفس املك

Unknown يقول...

المقال رائع و التعليقات بديعه لكن أنا عموماً ضد نبرة التشاؤم لأن القادم مهما كان سيكون أفضل من السابق ليس بزر سحري انما بالعمل و زيادة الوعي لنمحوا جهل و فقر و كبت 30 سنه.
تحياتي لكي

كريمة سندي يقول...

في اعتقادي أن الدين الإسلامي يحتاج لتفهم الآخر وليس للتجني عليه والاختلاف معه ومحاربته تقبلي مروري

غير معرف يقول...

طب بس اقرأى الاول سورة الممتحنه وانتى تعرفى يعنى ايه الدفاع عن اخت مسلمه
وبعدين انصحك انك تقراى هن السلفيين لتعرفى وسطيتهم
ولكن لكثرة المتساهلون ظهر الملتزمون بمظهر المتشددون المتطرفون ولا حول ولا قوة الا بالله

عماد هلال يقول...

يا دكتورة ..هناك دائما انتهازيين يريدون خطف الثورة الطاهرة ويوجهوها الى حضنهم، بس تدوينات أمثالك وفضحهم هى احدى الضمانات..اكتبى وافضحى ..من غير يالهوى .. الخفافيش لاتعيش فى النور

د/دودى يقول...

شيرين: ههههههه شوفتى فعلا التعليقات اكثر لباقه و جوده من الموضوع...

د/دودى يقول...

كريمه : اهلا و سهلا بيكى فى رفايع للمره الاولى و يا رب ما تكون الاخيره ....نفسى نتفهم الاخر فعلا و كفاينا خناق بقى

د/دودى يقول...

غير معرف : اظن من غير ما اقرا حاجه انا فاهمه يعنى ايه دفاع عن المسلمين و لو لاحظت انا برضه مسلمه بس بصراحه ما اظنش ان السلفيين وسطيين !! انا مش عايشه فى المريخ لانهم حواليا طول الوقت و العمليه ما اظنهاش محتاجه قراءه برضه...

د/دودى يقول...

استاذى عماد هلال : الخفافيش لا تعيش فى النور ...بس فين النور ؟؟ ما خطفوا مسجد النور شخصيا ...و لان لا احد يتحرك تظل يا لهوى على السطح...و بعدين هو ايه يعنى بجيب حاجه جديده ما الكلام كله عالجرايد ادينا بنتكتب و بنتمنى الافضل...

Tears يقول...

المفروض فيه حاجة اسمها مؤسسات دولة و قانون و دستور بينص على حرية العقيدة

لو تم خرق القانون فتلك مسئولية النائب العام خاصة اذا تقدمت احد الجهات او المنظمات الحقوقية ببلاغ...لكن المشكلة ان لسه ماعندناش سيادة قانون و الناس بتحاول تاخد ما تعتقده حقها بالدراع

لا اعتقد ان اثارة موضوع كاميليا الان بعيد عن ايادى فلول امن الدولة خاصة ان السلفيين بيحرموا المظاهرات و فضلوا همه و شيخهم يوسف البدرى يهاجموا الثورة و يساندوا مبارك لاخر لحظة ثم فوجئنا بجريدة الدستور تنشر وثائق لامن الدولة و بها قوائم باسماء السلفيين المتعاونيين معهم

اى انسان حر فى عقيدته او حتى عدم اعتقاده و لا يحق لاى جهة احتجازة او ايذاوه باى شكل من الاشكال و على مؤسسات الدولة الحفاظ على هذا لكى نسد الثغرات التى قد ينفذ منها مثيرى الفتن

د/دودى يقول...

تيرز : و الله انا سعيده جدااا بزيارتك دى...برضه انا مش من المقتنعين بفكره المؤامرات و الفلول دول سلفيين و معروف بالواحد يعنى مش هنروح بعيد و بعدين هو فى حد فاضل بره اصلا ما كلهم فى طره....انا معاكى ان موقف السلفيين كان سلبى من الاول لكنهم عرفوا من اين يؤكل الكتف و استغلوا الفراغ صح ....بس انا معاكى برضه ان الدوله لو اتدخلت و فكت الحجه دى يمكن نخلص منهم و يشوفى حاجه تانيه يتلككوا بيها غير القصه دى

محظوظة يقول...

هو فى اية الايام دى

مشاكل فى مشاكل

مش عارفة اقول اية

بس بدعى ربنا الوضع يكون بخير فى بلدى

سلاموززززززززززز

رحاب صالح يقول...

صباحك ورد دودي
عارفة اني مقصرة معاك
ومع الجميع الصراحة يعني
بس غصب عني فعلا
انا مع اخي سواح ف ملك الله
بعرف احساس غيري اووي لاني دايما بتخيل نفسي مكانه
الازهر لأسف مغيب من زمااااااااااان جدا
يا ريت بجد ينتبه ويقوم بقي م الغيبوبة
يا ربت تكون في حرية عقيدة زي ما بيفضلوا يقولوا دايما ولوانها كلمة وخلاص بيقولوها
ربنا يستر

Unknown يقول...

يمكن اختلاف المواقع والخبرات الحياتية , بل والمعلومات الدينية والواقعية بيخليني اتخيل ان حضرتك دلوقتي في سجن الكنيسة منذ عدة سنوات مثل وفاء التي اشهرت اسلامها فعليا ثم اضطرت لتغيير ديانتها مرة اخرى , مثل كريستينا وماريان طبيبتا الفيوم ( دفعة 2004 ) يمكنك سؤال اي طالب في هذه الدفعة من التخرج من كلية الطب .

لن اتحدث كثيرا فقط اتخيل ان حضرتك مكانهم , وانا اخوك او شفت حد وهوه بيخطفك ورحت بلغت الشرطة ورفعت قضية ومحدش عبرني والكنيسة رفضت استلام الاعلان , رحت لرئيس الوزراء قالي طيب ومعملش حاجة من اكتر من شهر ونصف , رحت للمجلس العسكري معملش حاجة , علما ان حل المشكلة مش محتاج اكتر من انها تظهر وتقول انا مسيحية والناس دي كدابة وخلاص المشكلة تخلص ,.صعبة على صاحب القداسة ؟

اه صعبة على كل اللي بيتاجر بدم الغلابة والمساكين والمغيبيين في سبيل معارك يراها هو مقدسة , صعبة على اللي معندوش مشكلة مصر تغرق في بحر دم علشان خاطر مش عايز صورته تتهز
ربنا يحفظنا بحفظه ويجعل وفاتنا على الاسلام غير مفتونيين ولا يوقعنا في ايد حد يجبرنا نغيير ايماننا

SaRa يقول...

الحكومة عندما تكون صادقة

فى ما تقول للمواطنين

لن يكون هناك مثل ما ارى واسمع الان فى مصر

ميرسى ليكى

على زيارتك الجميلة

تحياتى

IMSA يقول...

دودي :
كيف الحال ؟
مبدئيا عجبني البوست جدا ، فهو يعطيك الشعور لكي تشعر بغيرك تماما ، وتقيس الامر على نفسك قبل ان تحاسب غيرك عليه !! تحياتي لفكرتك ..
//
ثانيا الوهابيون او السلفيون - اسمهم في مصر - وضعوا لنفسهم تلك الدائرة المغلقة والتي اختاروا لها اسم السلفية نسبة الى السلف الصالح وهم بعاد تماما عن صحابة الرسول بل والاسلام نفسه ..
من قال ان الاسلام يدعو الى التجمهر امام المعابد والكنائس ودور العبادة ايا كانت الديانة التي يتبعها الناس ، الفكرة العامة والسائدة لدى السلفية هي عدم تقبل الديانة الاخرى او حتى الاعتراف بوجودها !!
وهذا يقودنا الى فكرة الدين الواحد الذي لا يقبل غيره على الرغم من وجود ميثاق اهل الذمة حتى ان عمر بن الخطاب رضي الله عنه قد اضاف المجوس الى معاملة اهل الذمة ، المجوس عباد الناس تم الاعتراف بهم كأهل ذمة في عهده !! ، وهم اتباع السلف كما يقولوا لا يعترفون بالمسيحية ؟؟
//
القول والتشدد والتناحر هذا نتيجة لنظام بائد عن حق اراد ان يقمع دور الشيوعين فشجع الاخوان ثم اراد ضمع الاخوان فشجع السلفية ، وبعد ان كنا لا نسمع لهم صوتا سوى كيف تدخل الحمام بقدمك اليسرى وتأكل بيدك اليمنى اصبح الامر محوري تماما وكأنهم كما يقولوا كانوا في جرة وخرجوا لبرة ..- عذرا ع التعبير -
في الحقيقة هذه هي السلفية قوم ضعاف العقلية تم السيطرة عليهم ومسح امخاخهم - كما يقولوا عن كاميليا بمسخ المخ هم ايضا مغيبون باسم الدين -
المسئولية ترجع على الازهر في كونه اراد العزلة وعدم الاختلاط وعلى علمائه المعتدلين في عدم مجابهة هذا الفكر التشددي ..
//
تحياتي لكِ وتقبلي ردي ومروري

د/دودى يقول...

واحد من الناس : مش عارفه ليه مش مصدقه الادعاءات دى خالص ..حاجه جوايا بتكدبها ...و بعدين ما احنا بنثق فى المدعى العام و الحكومه فى كل حاجه اظن ان ملف زى ده فى ايدهم امن من اننا نولع فى بعض او فى البلد...

د/دودى يقول...

رحاب : الازهر شكله انتقل من مرحله النوم الى الغيبوبه و يا خوفى من الموت الدائم..

د/دودى يقول...

ساره : توقعت بعد كل ما حدث ان الصراحه تكون قارب النجاه و لكن فى مصر ام العجايب اصبحت لا اتوقع شئ

د/دودى يقول...

IMSA : عجبت لتلك التدوينه الردود فيها احلى من البوست نفسها و الله كلامك متعه لا تعليق على تعليقك

Tears يقول...

انا اللى مبسوطة اوى ان فيه عقليتك المستنيرة دى و قادرة تناهدى مع العالم العجيبه اللى ح يجيبونا ورا دول

مش معاكى خالص فى فكرة ان كل الفلول فى طرة...دى فكرة بيحاول يروجها الفلول نفسهم و للاسف الناس صدقت

اللى فى طرة هم الصف الاول لكن الصف التانى و التالت اخطر كتير و منتشرين فى المجالس المحلية و المحافظات و النوداى و النقابات و مؤسسات حكومية عديدة و هم اعضاء مجلس الشعب اللى كانوا فى الدورة البرلمانية السابقة...هم عبد الرحيم الغول سبب الفتن فى نجع حمادى....هم رجب حميدة اللى بيدفع لبتوع اسف ياريس و بيجيب كومبارس يشتموا البرادعى و نور و يأيدوا مبارك

اللى فى طرة واحد على مليون من اللى بره...امن الدولة مجرمية لسه بره...السعوديةالوهابية (الحجاز سابقا قبل الخطف) ح تموت عشان ح يبقى فيه ديمقراطية عندنا و دفعت مليارات من اجل نشر الفوضى..و ارجعى لمقالات عبدالحليم قنديل و عبد البارى عطوان و تصريحات جورج اسحاق فى هذا الشأن

شوفى الفيديو ده
http://www.youtube.com/watch?v=8hFyxObvQic

د/دودى يقول...

تيرز : و الله بدايه انا سعيده ببنات مصر فمن خلال خبرتى القصيره فى عالم المدونات , بنات المدونات مخ و ذكاء و متعه للفاهمين والله مش عارفه ليه عايزنا نقعد فى البيت و يخسروا مخنا ....عموما
مش معقول اننا نلم الصف التانى والثالث و الخامس فى السجن و الا هنحبس نص البلد ...لكن نقدر نقاومهم بطريقه التصدى ...اظن انهم من مصلحتهم انهم يحاولوا يرجعوا قوتهم مش يضعفوا البلد نفسها ...

برضه انا مش شايفه مصلحه مباشره للسعوديه فى الموضوع ...

إرسال تعليق

حلو؟؟ وحش؟؟ طب ساكت ليه ما تقول....