الجمعة، 1 أبريل، 2011

Amelie 2001



Amélie (2001)



"تحتاج احيانا لمن يعبث بحياتك ليغيرها للابد" هى دى الحكمه المستنتجه من الفيلم الممتع الفرنسى ايميلى او بالاسم الكامل Le Fabuleux Destin d'Amélie Poulain و معناه بالانجليزى The Fabulous Destiny of Amélie Poulain".  ...طبعا انا عارفه ان فيلم ايميلى انتاج 2001 يعنى من 10 سنين كامله و مش جديد ( ياااه هو سنه 2001 بقالها 10 سنين بحالها هى الايام بتجرى كده ليه) لكنى شفته امبارح و بالتالى اقدر اقول انه جديد بالنسبه ليا على الاقل...هتقولى طب ما انتى بتتفرجى على افلام كتير مش معنى يعنى الفيلم القديم ده اللى استفزك انك تكتبى عنه؟؟ هتعرف الاجابه لما تكتشف مدى اعجابى بالفيلم ده...

ايميلى بنوته صغيره لام و اب تقليدين يمكن زياده عن اللزوم , بنوته وحيده لمرض مزمع (حلوه مزمع دى عموما لما تتفرج هتفهم الموقف) , ايميلى بتتعلم فى البيت من غير صحاب من غير لعب حقيقى , لعبه ايميلى حياه الناس بتعدلها اما بالعقاب و اما بتصليح الاتجاه و اما بالمكافأه و كتير من الحيل و الخدع , كل اللى قلته دى اتقدم فى اول 4 دقائق فى الفيلم بطريقه ممتعه جميله خفيفه مميزه عن اى حاجه يمكن شفتها...

تخيل لو كل انسان ليه ملف بحيث يعرف من خلال سطور من خلال ما يحب و مايكره (تخيل شكل ملفك يبقى ايه؟؟) اهو الفيلم بيقدم كل شخصيه تظهر من لاول مره بالطريقه دى بنظام كاركتيرى ممتع للمشاهد , حاجات صغيره بتكون شخصيتك يمكن تحسها حتى تافهه لكنها فى الاول و الاخر اجزاء البزل اللى بتكونك اهى هى دى الرفايع فعلا...بالمناسبه كده فاكر كان فى فيلم مصرى اسمه (حد سامع حاجه؟) بتاع رامز جلال هو طبعا فكرته العامه already مسروقه من احد الافلام الامريكيه Stranger than Fiction 2006 لكن لو تفتكر كان المؤلف بيجيب فى اول ظهور كل شخصيه تقديمه قصيره عنه دى بقى مسروقه من اميلى 2001 , حاجه تغيظ سرقه كده عالمكشوف..

الفيلم ده فى راوى يتميز بصوته المريح و حضوره القوى يصل لمرحله تشوقك لسماع صوته , فاكر فيلم (مواطن و مخبر و حرامى) ؟؟ بس على احسن شويتين و مش طول الوقت كده...بيظهر فى الاول بكثافه شويه و بيقل فى المنتصف و يزيد فى الاخر...

جو الفيلم العام طفولى ممتع و كأنك فى قصه خرافيه , على الرغم من انتاج الفيلم 2001 و ان احداثه بتدور 1995 لكن جو الفيلم يحسسك بجو الستينات و يمكن خمسينات حيث الفستاين الانيقه و الالوان المبهجه...لوحظ على هذا الفيلم ان من كتر رغبه المخرج فى تكوين جو لفرنسا المثاليه شال من محيط الكاميرا اى سود او عرب صحيح الموضوع ده تم اخذه بشكل سلبى لكن بصراحه ده خلى الفيلم منسجم اكتر و سلس جدا...

معجبه بالفيلم؟؟ قطعا , من الاخر مينفعش تكون متفرجتش عليه....معظم الروابط اللى عالنت بايظه بس اللينكات دى متجربه

او

ملحوظه : بعض مشاهد الفيلم بتكون خارجه احيانا صحيح هى متناسقه دراميا و مش مقحمه بس لو معاك اطفال او انت محافظ ابقى قدمها...


Audrey Tautou بطله ايميلى ذات الابتسامه الساحره هى هى بطله "شفره دفينشى" ....

د/دودى
مدونه رفايع..مجرد رفايع

13 التعليقات:

آخر أيام الخريف يقول...

بحب اودرى توتو بالذات انها شبه اختى :)

Casper يقول...

واضح انه فيلم جميل
جاري تحميله باذن الله

________

خالص تحياتي

re7ab.sale7 يقول...

وحشااااااااااااني يا دودي كتيييير
اوووي اوووووي اووووي
معلش مقصرة معاك ومع الجميع
ظروف بجد قهرية جدا
حلوة قصة الفيلم هحاول مع الينكات لانمي مشفتوش اكيد...
"تحتاج احيانا لمن يعبث بحياتك ليغيرها للابد "بس عجبتني اجملة الاولي اووي ..."

حصلت معايا قبل كدة...وبعدها حبيت حياتي اكتر واكتر
تحياتي لك عزيزتي ووحشاني اووي اووي اووي

د/دودى يقول...

آخر أيام الخريف : اكيد اختك عسوله قوى..

قهوة بالفانيليا - شيماء علي يقول...

فيلم ايميلي جميل يا دينا جدا ..
الفيلم نفسه صورته المبهجة بتخليكي حابة تتفرجي عليه .. لأن الوانه جميلة و جذابة جدا .
و اودري فيه كانت جيدة للغاية :)
و كمان صوت الراوي عجبني .. برضه :)

د/دودى يقول...

كاسبر : سعيده جدا بانى حمستك انك تشوفه

د/دودى يقول...

رحاب : والله العظيم انتى كمان وحشانى جدا و قلت برضه انتى مختفيه فين؟ ...ايميلى دى مثال للناس اللى بتعلب فى حياه البنى ادمين و احيانا كتير تصلحها... متغبيش تانى عننا بقى

د/دودى يقول...

شيماء : رأيى فى "ايميلى " مماثل لرأيك , كفايه انه مبهج فى ايام مفهاش بهجه

Carmen يقول...

اممم تقريبا شفته قبل كده , تسلم ايدك حبي

د/دودى يقول...

كارمن : شكله عجبك بما انك افتكرتيه...تسلمى

Ahmed يقول...

الله ، انا بحب الفيلم دة اووووووي

الوانــه مبهجـة وحبكته جميلة اوي

اميلي احلي حاجة فيها ابتسامتها الشعنونة ، ومقالبها اللي تموت م الضحك .. وبثتبت في الفيلم

إن فيه تفاصيل صغيرة كـدا ، جايز تكون عبيطة

بس مبهجة و مريحة .. :)

دة أول تعليق ليا في المدونة ، مدونتك جميلة وفيها افكار كتير و متجددة .. تحياتي :)

د/دودى يقول...

احمد : الاول كده يا مرحاب بيك لاول زياره نورتنى...

اجمل حاجه فى ايميلى و يمكن هو ده اللى دفعنى انى اكتب عنه اصلا هو اهتمامه بالتفاصيل فعلا مش جو سلق البيض بتاع الافلام العربى...

نورتنى تانى

Mahmoud Mostafa يقول...

ههههههه في الجون دي ...حد يقولي ليه ؟

اقوله لانه واخد المركز ال 6 كافضل فيلم كوميدي فالعالم

إرسال تعليق

حلو؟؟ وحش؟؟ طب ساكت ليه ما تقول....