الاثنين، 4 أبريل، 2011

30 يوم فى الشرف











هابى بارز داى تو يو ...شهر حلو يا شرف!!


النهارده 4 ابريل يمر شهر على توليه عصام شرف الوزراه اللى مسك يوم 3 مارس 2011 و بما ان كل مده التولى هتبقى 6 شهور اذا الحساب مش هيبقى بطريقه اول 100 يوم على الطريقه الامريكيه حيث الحساب فى اليوم المئه على ما حققه المسئول و كفايه قوى شهر لاننا نحقق و ندقق و نركز...دعنا الاول نتفق ان الشرف ده كان طبيعى و مطلوب فى اى مسئول و بالتالى فشرف الاستاذ شرف ليس محل اعجاب اكتر منه المفروض انه الطبيعى -بس احنا اللى كنا نسينا- و بالتالى نحن نقيم الاداء و الاداره و ليس الشرف و الامانه:


أ- سلبيات :










 1/ اداره مصر كمحل البقاله...حيث التعامل يوم بيوم على طريقه افتح الدكان و يا فتاح يا عليم يا رزاق يا كريم عندنا ايه النهارده؟؟ من غير لا رؤيه مستقبليه و لا خطه عمل...


2/ حكومه تلهث...حكومه شرف هى حكومه رد فعل لا افعال حيث انها فضلت تجرى ورا الاحداث بعد حدوثها , المسيحين زعلانين راضوا المسحيين , الدكاتره متضايقين ادوهم فلوس, وزراه الاثار زعلانين من الاندماج افصلوهم , و بالتالى يحصل على حقه فقط من يعلو صوته و من يصمت يداس بالاقدام فلا تتعجب عندما يعلو صوت الاخريين..


3/ انا لا انا عباس فيها مسئوليه...على طريقه مسرحيه فايز حلاوه لما كان فى شخصيه عباس اللى مابيخدش اى قرار لانه فى مسئوليه و مع المسئوليه تأتى العقاب و الخوف و بنفس المنوال لا وزير يستطيع اتخاذ اى قرار جاد لا تخصيص ارض ولا بيعها لخوفهم من المحاسبه و من الناس وان كان ظلما و بهتانا..


4/ كجزء من نتيجه النقطه ال3 مفيش حركه فى البلد لا بناء ولا انشاء مصانع ولا نيله فالخوف من المسئولين يرعب المستثمر اللى يشبه بالطير على رأس الواقف يطير مع اى حركه مهما صغرت..


5/ تكنوقراط...انا كنت و مازالت من اعداء فكره التكنوقراط نظرا لانهم مجموعه من الموظفين عديمى الابتكار و الروتين هو دستورهم فلا ابداع ولا خطوات واثبه و بالتالى فهى حكومه شربه الخضار التى بلا طعم ولا يعبر اكثر من ذلك من وزير الثقافه اللى بيحسسنى دايما انه موظف فاين هذا من احلامى مع تولى ابن الصاوى للوزره حين يكون كل قصر ثقافه ساقيه صاوى..


ب- ايجابيات:













1/ الغاء امن الدوله (و ربنا يستر من موضوع الامن الوطنى)


2/رجوع الامن للشارع (و ان كان جزئيا و على خجل و موضوع ماتش الزمالك هبب الدنيا)


3/ عوده المصريين من ليبيا باعدادهم الضخمه و ما يكلف ذلك من عناء.


4/ استطاعه تنظيم الاستفتاء بجداره.


ج- سلبيات؟؟ ولا اجابيات؟؟ ولا ما اعرف













 1/ قانون تجريم الاعتصام؟؟
* مع : كفايه بقى اللى البلد فيه ده هو احنا هنفضل فى الشارع كده؟؟ وقف الحال ده فى مصلحه مين؟؟ يعنى يرضيك وقف المرور و حرق المنشأت و القرف ده؟؟

* ضد : انتقد الفنان خالد الصاوي سياسة الدكتور عصام شرف رئيس الوزراء الحالي واصفاً إياها باﻻنتحار السياسي وذلك علي خلفية القرار الذي اصدرة مجلس الوزراء أمس اﻻربعاء 23 مارس 2011 بتجريم الاعتصام والتجمهر والتحريض, وحق التظاهر السلمي حيث كتب خالد الصاوي علي صفحته علي موقع الفيس بوك "حق الانسان المعاصر في الاحتجاج السلمي بكل طرقه مش حيسقط بقانون متفصل ولا باعلام خبيث ولا حتى بغطرسة السلاح.. اللي حيسقط لو فكر يمس الحق ده هو عصام شرف اللي كان محتج معانا ولما مسك الوزارة راح حلف قدام الجماهير وبعدها على طول اتفضت الاحتجاجات بالعنف والتعذيب، وحراسه اعتدوا على الناس يوم الاستفتاء عشان يوسعوله، ودلوقتي بيهندس في تجريم الاحتجاجات أصلا.. انتحار سياسي ده يا دكتور" .

وابدي الصاوي انزعاجه الشديد من إنتهاك الجيش للحرم الجامعي وتدخله لفض اﻻعتصام السلمي للطلبة بالعنف الشديد حيث قال "من غير تزويق ولا مراوغة: انتهاك الجيش للحرم الجامعي لفض احتجاج سلمي للطلاب بالعنف هو جريمة جديدة ضد حريات وكرامة الإنسان المصري اللي بيحلم يرفع راسه بعد طول ذل، ده اللي حيقوله التاريخ بوضوح مهما اتقال من تبريرات، ومهما أبدينا من تواطؤ بالصمت" .
وأضاف الصاوي "الثورة مستمرة لحد ما تحقق أهدافها.. بأي ثمن.. ومهما طال الوقت.. وفوق كل المعوقات"



2/ تحقيق كل المطالب على طريقه now means now :
مع : لازم نهدى الناس , هو احنا هنفضل لاغيين الشعب , الثوره ملك الشعب و محدش بياخد حاجه اكتر من حقه , صبروا كتير و ده من حقهم.

ضد: ما هو كل ما بيحقق حاجه يطلع غيرهم امال فين هيبه الدوله ؟ , ده وقته؟ , فين الحزم و السيطره؟...

3/ الحوار الوطنى؟؟

مع : يااااه احنا كنا محتاجينه من زمان

ضد: نعم؟؟ امال فين التحرير؟؟


س و ج :

س: هل تعتقدى ان الفريق احمد شفيق كان الامور ستكون افضل؟
ج: اجاوب رغم اعجابى بشفيق الا ان كان هيضاف فوق البلاوى دى كلها اختلافنا على شخصه و بالتالى مكنتش هتفرق كتير....




كم من عشره تحب تديها؟؟؟




8 التعليقات:

عليم يقول...

مازلت بحب شرف رغم كل السلبيات لان الفترة دي حساسة جدا والمشكلة مش في شرف ولا شفيق ولا حتي مدحت المشكلة فينا احنا اللي عاوزين فارس احلام يحقق كل حاجة فوقت قصير والمهم انه ميدوش دماغنا باي حاجة

الذي يعجبني في د شرف انه بيتجه دايما لاصل المشكلة وانه بيفكر في اللي جاي مش في اللي راح وان كان اللي راح صعب يتنسي بس لو فضلنا نفكر في اللي راح ( دللوقتي في الفترة الانتقالية ) هنبقي في الاخر زي لبنان وهنقعد لنا 10 12 سنة نقول من قتل الحريري

انا من رأئي ان الموضوع يتلم وبسرعة والشعب يحاول يتفائل وميعتمدش علي غيرة ويفكر في اللي عليه مش اللي ليه لمدة سنة واحدة بس وشوفي هنبقي ايه

مه اصلي كل واحد دلوقتي عايز حقوقة والبلد واقفة ومفيش فلوس وابنك بيطبع من غير غطاء ولو الحال استمر شوية كمان يبقي فاكس بلد

اتمني ان نظرتنا لرئيس الوزراء بعد الفترة الانتقالية تكون نظرة الي سياسة لا الي شخص والي نقاط محددة علشان نقدر نحاسبه بعدين

اما دللوقتي فمقدرش اقول لدكتور شرف غير ربنا وحدة اللي يقدر يساعدك وشكرا

عماد هلال يقول...

د. شرف راجل نبيل وبيحب الناس وكمان خلينا نتفق أن الحكومة الانتقالية أو تسيير الأعمال عقب الثورات ربنا معاها ، حيث كل الناس بتقطع فيها وبتحسبها حساب الملكيين ، المهم مايكنش حسابنا كام من عشرة ..لا .. الحساب يصبح تحقيق الأمانى الملقاه على عاتق الوزارة مستمر ولا توقف .. أنا شايف فيه حركة قويه بلا منازع وسوق قابل للتطوير وبورصة بتحقق مكاسب وعلاقات دولية متزنه.. يعنى الدنيا ماشيه للأفضل..
شكرا لموضوعك الجميل

ابراهيم رزق يقول...

اولا رجل شريف و ده جديد علينا ازاى يبقى فى مسئول شريف ده كان لازم يمشى و لو تتذكرى احمد رشدى مرورا بحسب الله و الجنزورى و الجويلى و الليثى و هو نفسه الشريف لازم يمشى و ده طبعا غير صفوت الشريف ده الشريف الوحيد اللى كبس على نفسنا
عارفه انا باعذر عصام شرف تخيلى واحد طول النهار الناس بصى ليه و هو بياكل و هو بيشتغل حتى و هو فى الحمام الناس بصى ليه لازم بعض التوتر و التوتر ده بعض هفواته اللى احنا هانستحملها
خالص تحياتى

Carmen يقول...

بيتهيألي الايجابيات ماشية بخطي بطييييئة جدا
ربنا يستر ع اللي جاي

د/دودى يقول...

عليم : حلوه قوى حكايه مدحت دى ....كله الا الطبع من غير غطاء انا عن نفسى كنت افضل انه يصدر قرار حاسم حتى لو زعل بعض الناس بانه لا نظر فى الشكاوى دى الا بعد شهرين مثلا بدل جز الابتزاز ده...

د/دودى يقول...

استاذى عماد : بيعجبنى فيك دائما تفاؤلك و نظرك لنصف الممتلئ و حته الاستمرار دى برضه ملفته للانتباه ...

د/دودى يقول...

ابراهيم: معاك ان حكايه الشريف لازم يمشى الا صاحبنا طبعا و اى نظيف لازم يرحل الا صاحبنا برضه ..بس زى ما قلت انا شايفه ان موضوع الشرف ده مش ميزه اكتر منه المفروض بس احنا اللى كنا نسينا..

د/دودى يقول...

كارمن : هى بطيئه بس زى ما استاذ عماد قال مستمره اظن ده كويس و اللى جاى بقى ربنا يستر

إرسال تعليق

حلو؟؟ وحش؟؟ طب ساكت ليه ما تقول....