الأربعاء، 27 أبريل 2011

ف ج ر ؟؟؟؟

واضح ان النهارده اليوم العالمى لثلاثى الحروف ف ج ر !!!! 

فَجـــــَر : بفتح الفاء بمعنى الوقت اللى الشمس بتطلع فيه ده
 

فجّـــــر : بتشديد الجيم بمعنى فخخ بالمتفجرات فهو مفجر

فُجــــــر : بضم الفاء بمعنى القوه و القدره بالظلم فهو قادر و فاجر 




اليوم فجرا فجر عدد من الملثمين محطه للغاز فى سيناء و ده طبعا من فجرهم .....انتهى الخبر


وأسفر التفجير عن هروب أهالي حي المساعيد القاطنين بالقرب من موقع الانفجار، واعتقد الأهالي أن الانفجار عبارة عن زلزال، وشاهد الأهالي ألسنة النيران تتصاعد حتى السماء، ما دفع السلطات الأمنية بالتنسيق مع محطة الغاز الرئيسية ببورسعيد لغلق المحابس حتى يتوقف ضخ الغاز للسيطرة على الحريق. " يا اختى اسم الله"


وبحسب العاملين في المحطة: "تقدر الخسائر الأولية لتفجير المحطة بعشرات الملايين من الدولارات.. ولم يتم حصر الخسائر حتى الآن وهى غالبا في الأنبوب والمحطة وكميات من الغاز". ...."يا فلووووووووسى"

وأدى تفجير محطة الغاز الرئيسية في غرب مدينة العريش إلى توقف ضخ الغاز إلى المنازل ومستودعات الغاز في العريش وكذلك الغاز الذي يمد مصانع الأسمنت في وسط سيناء بالإضافة إلى توقف العمل في محطة الكهرباء البخارية والتي تعمل بالغاز والتي تقع 15 كم غرب مدينة العريش ....."يعنى احنا مموتين نفسنا شغل ...مش فارقه" 

لعلك مخدش بالك من الخبر اصلا او سمعته و ما اهتمتش و ده بسبب بسيط هو ان دى مش اول مره لانها حصلت فى مكان مشابه الشهر اللى فات و دخل شويه ملثمين كمموا الحارس او هددوه و وصلوا المتفجرات و منفجرتش ....و على طريقه فيلم اللى بالى بالك لما كان مامور السجن بيلغهم بان اللمبى هرب "اقول لهم ايه؟؟ اقولهم فى سجين حاول يهرب الصبح فربنا كرمه و هرب بالليل؟؟" ..المره الاولانيه حصل غلط فى المتفجرات فببساطه رجعوا كمان شهر و فجروها تانى بس الحمد لله انفجرت المره دى ...


من الغباء تكرار نفس الفعل و توقع نتائج مختلفه , بمعنى هو احنا عملنا ايه اصلا عشان الناس اللى مااشتغلتش معاها القنبله اول مره مايرجعوش ؟؟ :

1 / نفس الاداء الامنى الــــــفــــاشــــل ..

2/ عدم التامين الجيد - او التامين السئ حتى- لمحطه غاز بملايين هتصلحها الدوله على حسابها من اموال دافعى الضرائب ..هو ده مش يعتبر تبديد للمال العام برضه؟؟

3/ عدم القبض على الجناه فى المره الاولى او حتى تحديد هوايتهم او اتجاهم  على الاقل يقولوا لنا دول تبع مين...مفيش مصارحه اعلاميه يعنى امال فين التليفزيون المصرى ابو من غير وزاره اعلام و لا فالحين بس بتتبع مين جاله مغص فى طره و مين بيلعب ونج شمال فى ماتش الكوره اللى بيلعبوه فى استراحه السجن  و ضغط حسنى بقى كام و نبضه كام و اتغدى ايه!! 
 

4/ نفس الوعود الجوفاء التى اما لا يمكن تنفيذها او كونها مهدئات كالعاده او فلنقل مخدرات ..خاصه ان الكلام ده بعض زياره شرف الاستاذ شرف لسيناء ب 3 ايام !! و نفس القعده بتاعه كل مره اللى مرضتش اكتب عنها يومها و قلت يا دينا بطلى تنتقديه ما كل الناس بتمدحه طب اديله فرصه يمكن ....بس ديل المسئولين لا ينعدل لو ركبوا فيه قالب فالحين بس "  لا التهميش‏..‏ لا الاضطهاد‏..‏ لا التفرقة في المعاملة " و الاهرام يكتب و التليفزيون المصرى يمدح و الناس تصفق كالعاده ....

5/ نفس نظريه حبيبك يبلع لك الزلط و عدوك يتمنى لك الغلط ...اين الاعلام الحر المستقل ابو صوت عالى فى ملثمين فشلوا فى تفجير القنبله فهربوا و رجعوا فجروا بعد شهر ؟؟!! هى الحريه و الديمقراطيه انك تستطيع انتقاد من فارق السلطه بالفعل ام من بيده القرار ؟؟


6/ اقرا الخبر ده و  لاحظ تاريخه "كلاكيت تانى مره"
http://www.masress.com/baladnews/11589
 

ملحوظه هاااامه : عشان خاطرى , و النبى , بالله عليك , لاجل عيون مصر , لخاطر مصر اما يا بهيه يا ام طرحه و جلابيه ,......محدش يقولى انها ثوره مضاده و فلول !!!!!

د/دودى
مدونه رفايع ...مجرد رفايع




29 التعليقات:

غير معرف يقول...

لا مش ثورة مضادة ولا حاجه
في القصص زمان كان فيه دايما ابطال بيسرقوا من الاغنية علشان يساعدوا الفقراء
ايه علاقة ده بده؟
العلاقة ان الناس دي قررت تنفذ اللي هي شيفاه صح
بغض النظر عن قررات الحكومة او مصلحة الدولة
خط الانابيب بيوصل لاسرائيل
يبقي يتفجر دي وجهة نظرهم
وانا اتوقع والله اعلم
حتي بعد اصلاح خط الانابيب هيرجعوا يفجروه من جديد
وهيساعد في كده طول خط الانابيب اللي بيمتد لآلاف الكيلومترات

وربنا يستر

د/دودى يقول...

هما مش اعلنوا ان ضخ الغاز لاسرائيل وقف فى فبراير بعد التنحى باسبوع كده ....اللى اتفجر ده اللى رايح الاردن

يا اما الناس دى بتضحك علينا و غاز اسرائيل شغال!!

يا اما الناس اللى بتفجر دى ساكنين فى بلد تانيه او مش مصدقين !!

و احنا هنفضل نقول ربنا يستر بس ولا هنعمل حاجه؟

Unknown يقول...

دينا أنا سعيده جداً باكتشاف مدونتك و بحب طريقتك اللي من القلب و النقد الساخر لوضع غلط تحليلك كان رائع و للأسف الاعلام سئ جداً و محتاج ينضف هو كمان زي ما كل حاجه عايزه تنضف, احنا محتاجين بس الصبر و العمل.
شرف أنا بصراحه مشفقه عليه لأنها مسؤليه كبير في وقت كل الناس حاسه بانفلات و ان مالهاش كبير, الملثمين مفتكرش ثورة مضاده يمكن ناس فاهمه (أو متأكده) ان ده غاز بيروح لاسرائيل, و ده مش مبرر لتقاعص الأمن.
تحياتي ليكي و سعدت بزيارتك

Casper يقول...

هههههههههه مش هقول ثورة مضادة طبعا
لكن هرجع السبب زي ما قلتي للتواجد الامني الفاشل
واللى مش عارف ايه سببه حتى الان

اتمنى ان الاعلام يحاول يقوم بدوره بدل الهبل اللى هما شغالين فيه ليل ونهار

__________

خالص تحياتي

د/دودى يقول...

شيرين : و الله انا اسعد بكتير بصراحه مدونتك كانت اكتشاف و شدتنى من اول مقاله ...هو رابسو جاى امتى اللى هينضف البلد كلها؟؟...

هو صحيح شرف عليه ضغط بس ده برضه وقت الشغل و الانجاز ...

نفسى بس يشد حيله شويه

د/دودى يقول...

كاسبر : بصراحه بقيت بخاف من مراجيح مولد النبى و جو الانقلاب و المضادات دى اصله بقى شماعه....

انا بقى هاموت ايه موضوع الامن ده...هو يعنى تامين محطه غاز ثمنها ملايين هيكلف الدوله كام يعنى؟..

ابراهيم رزق يقول...

طبعا انشاء الله لما تتخرجى و تبقى مسئولة عن مستشفى و فجاة و انتى لسه قاعدة على مكتبك يقوللك الممرضات بيتخانقوا مع الدكاترة عشان كل واحد بيقول انه اهم فى المستشفى و فجاة تلاقى بتوع قسم النساء عاملين اعتصام و مش مخلين حد يعدى يولد ليه اشمعنى احنا اللى لتانى مرة تعينوا واحدة ست رئيسة لقسم النسا و بعدين تلاقى العمال زعلانين زعلانين ليه يا عمال احنا مظلمومون و حقنا منهوب و فجاة تلاقى المستشفى بتتسرق امسكوهم يا بتوع الامن لا عشان احنا خايفين و ممكن يحاسبونا و بعدين و بعدين و بعدين كل الناس متابعكى حتى فى الحمام سبوت 24 ساعة هو ده جو شغل و لا جو حد يعمل شغل ربنا معاك يا دكتور عصام

faroukfahmy يقول...

د- دودى
تحليل رائع ولكن مين يشوف ومين يسمع ، تخلخلت الموازين ، وانتهى العمر الافتراضى للمكاييل حتى ابصارنا لم تعد تميزالوان الابيض من الاسود ... لك الله يامصر!!!!!!!!!!!

سكندري يقول...

أحييك علي تحليليك و اختلف معاكي في نقطة ان الدكتور شرف بقي فوق النقد عند بعض الناس
بصراحة دي اكبر مسؤولية ممكن يشيلها بني ادم ، بلد زي مصر فيها متباينات كتير جدا ، و كل واحد مفكر انه الانسان الوحيد اللي مظلوم و الثورة جت تغيرللاحسن بالنسبة له ، و اصبح ديدن الناس دلوقتي
"الكلام ده كان قبل 25 يناير انما احنا خلاص بعد الثورة ... ضحكات متقطعة "

صدقيني الواحد ممكن تلاقية مش عارف يشيل مسوؤلية نفسه و زي ما أ.إبراهيم بيقولك ، جو الشغل بيخنق لوحده ، فما بالك بواحد ماسك البلد و هي بتقع اقتصاديا في كل المجالات و كل وزير تحت ايديه بتترعش الف مرة قبل ما يمضي علي اي قرار
وما بالك بالمستثمرين اللي بيهربوا من مصر و محاولات الدكتور شرف المستميتة في الخليج و السعودية علشان بس نقدر نسوي امورنا الاقتصادية ،
و ما بالك بالاعتصامات و الاضطرابات و ... و... و ...
طبعا انا مش بينكر انه خطأ كبير اللي حصل من الغياب الامني ده ، لنا الله (:

اما بخصوص الفعل "فجر" فزي ما بيقولك أ.محمود ، دول اكيد ناس مقتنعين ان الغاز مش مفروض يتصدر لاسرائيل ، ده طبعا حلم كل مصري ،لكن كثير ما يكون وراء الجرائم الكبري نوايا حسنة

ربنا يعينك يا د؟.شرف و كل شريف في البلد دي

سلام

سكندري يقول...

أقرأي المقال ده للأستاذ\ فهمي هويدي
http://fahmyhoweidy.blogspot.com/2011/04/blog-post_26.html

د/دودى يقول...

صديقى ابراهيم رزق : رجعنا تانى لنفس النقطه الخلافيه الابديه بينى و بينك ...الفرق ان لو نفس الوضع حصل مع شفيق كانت الصحافه و التحرير راحوا ولعوا فيه مع المحطه المحروقه انما دلوعه الدوله الذى لا يخطأ و كفايه مباركات الناس و صكوك الغفران و الشحاته علينا فى بلاد الدنيا فلنكتفى بقول ربنا معاه ....

انا معرفش هو المفروض يعمل ايه و الله ما اعرف...بس اللى اعرفه ان فى حاجه غلط ....

د/دودى يقول...

faroukfahmy58 : عجبنى قوى ان العمر الافتراضى للمكاييل انتهى ...تعبير جديد

د/دودى يقول...

سكندرى : هو من امتى و الشعب المصرى بيدور لمبررات لمسئول بعد خطأ؟؟؟....مش شايف انها لوحدها حاجه غريبه ؟؟؟

انا زهقت من حكايه الاعباء و الاثقال و ربنا يعينه و كلنا وراك مهما حصل ...بقولك المفجرين فشلوا فى تفجيرها اول مره رجعوا تانى بعد شهر فجروها؟؟ عايز ايه اكتر من كده مش عارفه ...

قريت المقاله : قويه جدا مع انى عموما بختلف مع فهمى هويدى بس المقاله دى تقريبا بتفق معاه فيها

د/دودى يقول...

سكندرى : "الكلام ده كان قبل 25 يناير انما احنا خلاص بعد الثورة ... ضحكات متقطعة "

الجمله دى لوحدها محتاجه تدوينه لوحدها ....

ابراهيم رزق يقول...

انا مش برر حاجة لكن الواحد عشان يشتغل لازم يركز والحساب يوم بيوم عملية صعبة هضربلك مثال انا مش عارف ليع عمال اضرب امثلة
هو المريض بيخف اول ما بياخد الدوا و لا الشفاء على خطوات قد يقابلها فى الوسط بعض الانتكاسات
اما شفيق فاهم شىء عنده مفقود ما انا مش هاروح لدكتور لا اثق فيه مهما تحدثوا عن امكانيته
الجو الصحى للعمل مطلوب
تحياتى

سكندري يقول...

د.دينا

علي فكرة انا مش بقول ان صح ان الناس ما عرفوش يفجرها ففكروا كويس و شافوا اخطائهم فين و هربوا في عربية الخضار بالليل و فجروا الخط

أكيد في خطأ و خطأ كبير في حاجة معروف ان الخلاف عليها كبير جدا زي موضوع خط الغاز الطبيعي لاسرائيل ده

و ما بنكرش برضه ان الاعلام بتاعنا بيتبع سياسة "ريح الزبون" و شغال يلعن سلسفيل اركان النظام السابق و ينشر في فضايحهم

بس صدقيني المسوؤلية كبيرة اكبر مما تتصوري و إذا كان الواحد بيتعب لما يقرأ تغم كل شوية فما بالك بواحد حياته كلها بيسمع الاخبار دي و هو المسوؤل قدام الله سبحانه و تعالي و قدام المجلس العسكري و قدام الشعب المصري ان "يسير" الامور علشان العجلة تدور شوية

زي ما قالك أ.إبراهيم ... المريض مش بيخف لما يأخد أول حباية دواء، أنما بيخف بعد ثقته في أن ربنا سيكتب له الشفاء و راح لدكتور "يثق" فيه و "استمر" في أخذ الدواء لمدة طويلة و بعدين يشوف النتيجة.
سلام

ENG./ELSAYED,PMP يقول...

عارفة يا دكتورة مشكلة ثورة 25 يناير ايه ... انها ثورة تتحرى الدقة ... تتحرى عدم الظلم حتى مع الظلمه ... بمعنى انه لا يوجد قرارات ثورية غاشمة - على فكره انا مع غاشمة دى قلباً وقالباً - عارفه فيه ناس كبيرة سنناً من عهد عبد الناصر - انا ليه تحفظات كتير على الرجل - تشتمى ابوه ولا تشتمى عبد الناصر ... عارفه ليه ... لأنه كان له قرارات ثورية غاشمة ... التأميم على سبيل المثال لا الحصر .

تحياتى

والى ان يثبت ( وبالقانون ) ان شوية الفاسدة اللى كانوا حاكمين مصر دوول مظلومين ... وقالولوا ... وانا مش انا يا دكتور ... وتحب تسمع ايه ( يا ستى انا عايز ابنى ) من مسرحية العيال كبرت رمضان السكرى ... وانا نفسى اروح عند قبر حفيدى ... من شرم الشيخ ... تتوالى الاحداث

د/دودى يقول...

صديقى المشاكس دائما ابراهيم رزق : ايه حكايتك مع التشبيهات الطبيه بس هههه ...هاعبر لك عن رأيى بتشبيه طبى برضه افرض ان المريض بيموت او بيصرخ من الالم ساعتها لو اديت له دواء اقراص يبقى غلط لانه تاثيره هيبقى بطئ ده لو المريض هدى اصلا عشان ياخده , الحل هنا الحقن اللى بتمشى فى الدم علطول من غير ما نستنى هدوء المريض او نسمعه بيدعى علينا من الالم ....

بس هى دى الفكره ببساطه انه يعمل حاجه حاسمه سريعه فى الدم على طول

د/دودى يقول...

سكندرى : عندى احساس ان المريض مش عايز يخف اصلا هو مستريح كده اهو واخد اجازه من الشغل و الكل بيروح له بكيس برتقال ....هو احنا يعنى فى الطبيعى هنموت نفسنا شغل لكن العمليه زادت قوى ....

و بعدين هو يقعد قد ايه اصلا عشان يلحق الدواء يشتغل هما كلهم 6 شهور فات منهم 2 و لسه مفيش حاجه ؟؟...

يا خوفى من انفجار رابع ساعتها هتبقى نكته و الله

د/دودى يقول...

عزيزى المهندس : الاول بقولك انى بثق فى راى المهندسين قوى لان بابا مهندس ...هى فعلا محتاجه شويه حزم -مش لازم ظلم يعنى - لكن اللبان و البسكويت و الصلصال لا يصلحوا لبناء مبنى لازم يبقوا انشف شويه....

د/دودى يقول...

رد عام للكل : ثانكس يو من كل قلبى ان محدش قال انها مؤامره و فلول ....كم انا سعيده بذلك بيدل اننا مشينا خطوه لقدام

Tamer Nabil Moussa يقول...

عندنا حاجة غلط فى الناحية الامنية وعايزة حل عشان البلاوى اللى بتحصل دى

من راى سرعة محاكمة العادلى واخواتة الاشرار من الظباط هيريح كتير من الناس ومنهم الضباط الشرفاء

اللى هتقدر ترجع تمارس مهام عملها بكل ثقة دون خوف من نظرة كدة ولاكدة

مع خالص تحياتى

الجوكر يقول...

السبب ياسيدتى

أن حكومتنا مازالت ضعيفة

وليس لها هيبة

ولم تستطيع حتى الآن بسط سيطرتها على الأوضاع

وكل واحد عاوز يعمل حاجه بيعملها

فلابد أن تتعامل الحكومة مع هذه الأفعال بقبضه من حديد

حتى يعود الأمن والإستقرار الى بلدنا الحبيب


د / دودى

مودتى

الجوكر يقول...

على فكره أين وعدك

مدونتى تفتقدك

وتشتاق اليكِ

Elsayed Azab يقول...

للأسف فعلا الوضع الأمنى هو التحدى الأكبر أمام حكومة عصام شرف .. رب اجعل هذا البلد أمنا يارب العالميين واحفظه لنا برحمتك يا أرحم الراحميين ..

دمتى بكل ود وعز وسعادة دائما ان شاء الله ..

تحياتى

د/دودى يقول...

عزيزى تامر : اظن ان المشكله الامنيه المفروض انها تكون على قمه الملفات عشان البلاوى دى تخف بدل الفلوس اللى عامله تطير اونطه دى...

د/دودى يقول...

الجوكر : عندك حق فى حكايه الهيبه دى مش القوه اللى بشتغل احيانا الهيبه بتشتغل .....

و الله ما نسيت الوعد لكن فى زيارتى هاوضح لك السبب

د/دودى يقول...

elsayed azab : يارب دعاءك يستجاب

faroukfahmy يقول...

د-دودى عذرا دكتورة دودىاذا كان قصدى لم يكن صائبافأنت لست مقصودة بالرأى والمقصود الذين يندسوا الصفوف يبغون اشعال نار الفتنه وينفخون لهيبها
وعموما رأيك كان مرشدا وهاديا ومعينا

إرسال تعليق

حلو؟؟ وحش؟؟ طب ساكت ليه ما تقول....