الثلاثاء، 19 أبريل 2011

سلامات يا حوار



بعد فاصل موسيقى من الحان الف ليله و ليله ...كان يا مكان فى سالف العصر و الاوان و ما يحلى الكلام الا بذكر النبى عليه الصلاه و السلام , يحكى ان فى مصر ام العجايب و ذات المعجزات كان فى حاجه كده اسمها ( الحوار الوطنى) كان وليد يتهدهد فى مهده ....و قعدوا يشتغلونا - كالعاده- الحوار راح , الحوار جه , الحوار دح, الحوار كخ ....و فجأه ان ان ان ااااا اختفى كأن شئ لم يكن و براءه الاطفال فى عينيه....


فاكر لما التليفزيون المصرى و خاصه قناه الاخبار ذاعت الحلقه الاولى - و تقريبا الاخيره- من الحوار على الهوا بحضور شخصيات عامه و حزبيه لو مش فاكره هو كان اقرب لقعده المصطبه قدام البيت فى ليله صيفيه ....اتفقنا و اختلافنا على جوده و تنسيق الحوار و شعورنا بنقص بعض العناصر بل و قله اهميه ما يقال اصلا و لكن لم اتخيل للحظه فكره ان ما شاهدته من حوار و شوق للحوار و خطط بعيده المدى على الحوار سيكون الحوار الاول و الاخير  و خاصه مع وجود شخصيات عامه مرموقه بشرتنى بالخير....هل كل شخصيات او علنى اقول معظمها او حتى بعضها من الشرفاء و الكبار ذوى العقول ممن تمنينا ان يشاركوا فى عالمنا بعد سنوات و سنوات من التهميش و تفضيل اهل الثقه على اهل الكفاءه لا يستطيعوا افاده مصر حتى بفكره واحده؟؟




و بما ان الرب واحد و العمر واحد و انى تعبت من انى امشى جنب الحيط خاصه انى ايام امن الدوله مكنتش بخاف و دلوقتى بقيت بحسس عالكلام قبل ما بقوله  و هو ما يسبب نيران فى حلقى اكثر من تنين الصين العظيم , قررت انى اقول رأيى و خلاص...
انا شايفه ان الحوار ده اتلغى بسبب رأى و ضغط شباب التحرير على عصام شرف !!...بل ان رأيى ان عصام شرف عزل الذى احترمه يحيى الجمل من اداره الحوار الوطنى ليس لكونه نائبه كما حاول ان يقعننى بل لان شباب التحرير معترض على شخصه !! بل و ارى ان مجاهره الجمل برفضه لاى طرف من اطراف الحوار فرض شروط مسبقه او الضغط بان فلان يجى و فلان ما يجيش..فمثلا رفض شباب الائتلاف حضور حسام بدراوى و بغض النظر على موافقتك او معترضك للشخص فمبدا فرض الرأى قبل الحوار اثار الجمل ...دعونى اعترف بانى لست من محبى شرف - الله فى الله- لاحساسى دوما بقابليته للضغط و الاذعان للشباب التحرير و الضغط الجماهرى عامه  بل و تغيير اراءه بعد اعلانها و هذا ما اعتبره ضعفا ليس اكثر...


هل لمجرد عدم رضا و مباركه شباب الاتئلافات يلغى الحدث من اساسه او يؤجل لاجل غير مسمى؟؟   هل رجعنا لايام تفضيل من فى صفنا على من يملك عقل؟؟


بل و دعونى اخبط عالاخر و رزقى على الله و اطرح سؤال على طريقه الحكمه  القائله (ان سؤال واحد يستطيع ان يفتح كل ابواب الحجيم) : ما هى حدود و قدرات ائتلافات الشباب للضغط و التأثير ؟؟ و الى متى؟؟ و هل بوجوده رئيس و مجلس سينتفى هذا الدور ام سيصبح لوبى ضاغط فعال لما يريد ؟؟؟بل سؤال اقوى:  من يحكم مصر اصلا؟؟؟....تذكروا كلاماتى ان السلطه المطلقه مفسده مطلقه الى الجميع و يا فرعون اش فرعنك قال ....و لا على ايه!!!!

د/دودى
مدونه رفايع...مجرد رفايع 

12 التعليقات:

faroukfahmy يقول...

د-دودى
مصر قد غدت فى حال ان ذكرت ، جادت همومها فى الكلام والحِوَرِ
ما اعظم الحوارات التى لاتجدى ولا تشفع ، شبعت آذاننا منها فلم تشبع ولم تشفع ن وفقت يادكتوره فى السعى واين ومتى الجدوى

الاحلام يقول...

كلام غايه فى الاهميه تمنياتى لكى دكتوره بالتوفيق والتالق دائما فانتى حقا تختارى مواضيعك باهميه
دمتى دائما متالقه سعيد بوجودى هنا تقبلى دائما تحياتى الاحــــــــــــــلام

د/دودى يقول...

استاذ فاروق : زمان كان الحوار فاشل عشان كان كلام مش حوار ...كلام قيم بترمى فى الهوا و ياما اتمنينا انه يتنفذ و الان ها نحن نطبق نفس المنهج من ليس معنا فهو علينا و من ليس معنا لا يستحق ان يتحدث و ان كان كلام مفيد ...و السعى لا يأتى الا من حسن التخطيط و كل البلاوى اللى احنا فيها دى من اننا كنا بنعمل الحوار و نرميه و ننفذ كلام البهوات....نفسى منكررش نفس الخطأ

د/دودى يقول...

الاحلام : كلماتك رقيقه مميزه ...ميرسى

Carmen يقول...

بصراحة انا حاجات كتير قلقاني قالو هتحصل وماحصلتش
ربنا يستر

د/دودى يقول...

كارمن : على طريقه قلت النهار هيبان مبنش , قلت العذاب هيهون مهنش , و لامتى هبقى مصدقه....نفسى شباب الائتلافات يبطلوا تقوقع فى ذاتهم و ينفتحوا عالناس

وردة الجنة يقول...

موضوع حلو جدا يا دودى

بس بصراحة انا عن نفسى بقيت حاسة بتوهان فظيع ما بين الجيش ورئيس الوزراء والمحاكمات اللى بتحصل

مبقتش عارفة فين الغلط وفين الصح ويا ترى ليهم وجهة نظر فى كل اللى بيحصل ولا الحقيقة مبقتش فاهمة اى حاجة

غير معرف يقول...

السلام عليكم و رحمة الله و بركاته كيف حال الاخوة المدونيين لي الشرف أن أدعوى سيادتكم الموقرة لزيارة مدونتي و التفاعل فيها و اعطائي رأيكم في مدونتي

تقبلو سلامي و تحياتي

د/دودى يقول...

ورده الجنه : هو طبعا المرحله مليانه تشوش بس انا نفسى محدش يخاف يقول اللى عايزه ....

د/دودى يقول...

مدونه الامل : على الرغم من تكرار الاعلان الا انى مصره لاتحاه الفرصه ....

Casper يقول...

عندك حق يا دينا في كل اللى قلتيه وذكرتيه
واضم صوتي لصوتك واقول مع كل الاحترام والتقدير والاعزاز - خلوا بالكوا من التلت كلمات اللى فاتوا -
لشباب التحرير بس انا كشاب مش عاوزهم الامر الناهي في البلد ده يقعد لا ده يمشي لا اعمل كذا لا متعملش كذا

في النهاية دي وجهة نظري
قد أصيب وقد أخطئ

د/دودى يقول...

كاسبر : هو احنا ليه بقينا بنخاف و نحسس على كلامنا ؟؟؟ انا ملاحظه انى انا و انت و غيرنا بنتكلم بتحسس و خوف من سوء الفهم ..

إرسال تعليق

حلو؟؟ وحش؟؟ طب ساكت ليه ما تقول....